1. Miresaha antony raiky mahavy ty fianakaviani-Jehovah hiharo raiky.

FALIFALY tsika satria anatini-fianakaviani-Jehovah. Manino moa tsika ro milamy noho miharo raiky? Satria samby manao ze azontsika atao tsika mba hanajà ani-ze olo nameani-Jehovah fahefà. Anisani-antony zay. Vomaiky hiharo raiky tsika laha azontsika soa fandahara nalamini-Jehovah io.

2. Ino iaby ty fanontanea hovaleantsika amy lahatsoratsy toy ato?

² Hodinihintsika amy lahatsoratsy toy ato hoe ia ro mana fahefà amy fiangona eo. Hamaly ani-fanontanea retoa koa tsika: Ino ty andraikitsini-ranabavy? Marina va hoe lohani-ranabavy iaby lafa kila rahalahy? Fa haintsika hoe mana fahefà amy valy amin’anany ty loham-pianakavia, fe mitovy amy zay koa va ty fahefàni-anti-panahy amy rahalahy noho anabavy reo? Ndao tse hodinihintsika hoe akory ty tokony ho fahitantsika ty ranabavy.

3. Ino ty hanampy antsika hankasitraky marè ty asa ataoni-anabavintsika reo?

³ Tena ankasitrahantsika anabavintsika reo satria miasa mafy rozy mikarakara ty fianakavian-drozy, mitory ty vaovao soa, noho manoha ty fiangona. Vomaiky hankasitraky an-drozy tsika lafa mahay hoe akory ty fahitani-Jehovah noho Jesosy an-drozy. Handramby soa koa tsika lafa mandiniky ty fomba nandaisani-apostoly Paoly ty ampela.

4. Akory ty ampisehoani-Baiboly hoe samby lafovily amy Jehovah ndre ty ampela ndre ty lahilahy?

 ⁴ Hita amy Baiboly ao hoe samby lafovily amy Jehovah ndre ty ampela ndre ty lahilahy. Mampiseho ani-zay, ohatsy, ty raha niseho tamy taonjato voalohany. Samby nameani-Jehovah fanahy masy rozy ka samby nahavita raha miavaky, anatini-zay ty fahaiza mivola amy safà samby hafa. (Asa. 2:1-4, 15-18) Samby nihosora fanahy masy rozy ka hiaraky manday amy Kristy. (Gal. 3:26-29) Samby hahazo fiaina zisiky farany an-tany etoy ndre ampela ndre lahilahy. (Apok. 7:9, 10, 13-15) Samby nirahy hitory ty vaovao soa noho hanao mpianatsy koa rozy. (Mat. 28:19, 20) Miresaky mikasiky ani-ranabavy Prisila, ohatsy, ty bokini-Asani-Apostoly. Niaraky niasa rozy morovaly, ka nanazava soa ty fahamarina tamy Apolosy, azy lahilahy nahita fianara iny.​—Asa. 18:24-26.

5. Manao akory ty fahitani-Jesosy ty ampela laha hentea ty Lioka 10:38, 39, 42?

⁵ Nanaja noho nanome voninahitsy ty ampela Jesosy. Tsy nanahaky ani-Fariseo rey ie. Nanambany ampela ty Fariseo, tsy niresaky tamin’ampela amason’olo, sady tsy niresaky mikasiky ty Soratsy Masy tamin-drozy mihintsy. Tsy ho zay Jesosy. Samby niresahany fahamarina bevata iaby ndre ampela ndre lahilahy. * (Vakio Lioka 10:38, 39, 42.) Nengany hiaraky mitory amin-drozy koa ty ampela. (Lioka 8:1-3) Mbo ampela avao ro nameany tombontsoa hanambara amy apostoly rey hoe nivelomy tamy maty ie.​—Jaona 20:16-18.

6. Akory ty nampisehoani-apostoly Paoly hoe nanaja ampela ie?

⁶ Nampitiarovini-apostoly Paoly Timoty hoe tokony hanaja ampela ie. Nivola tamy Timoty ie hoe tokony hataony ‘sahala amy reniny io ty ampela be tao’, le ‘ty tanora sahala amy anabaviny.’ (1 Tim. 5:1, 2) Nanao raha maro Paoly mba hanampea ani-Timoty ho lasa Kristiana matotsy, fe nieky ie hoe renini-Timoty noho bebeny ro tena nampianatsy azy “ty Soratsy Masy.” (2 Tim. 1:5; 3:14, 15) Nahatiaro anabavy maromaro koa Paoly amy taratasiny ho ani-Romanina reo, le nanono ty anaran-drozy mihintsy. Niambiny ty asa nataoni-ranabavy reo ka nankasitraky an-drozy ie.​—Rom. 16:1-4, 6, 12; Fil. 4:3.

7. Ino iaby ty fanontanea hodinihintsika henanizao?

⁷ Nihitantsika tamy fehintsoratsy taloha teo rey fa tsy mivola mihintsy ty Baiboly hoe ambany ty ranabavy. Be fitiava noho matariky anabavintsika reo ka tena manampy ty fiangona. Mila ty fanampean-drozy koa ty anti-panahy mba hahavy ty fiangona hilongo soa noho hiharo raiky avao. Fe retoa misy fanontanea: Manino ty anabavy ro ampanaovini-Jehovah saron-doha amy raha sisany? Rahalahy avao ro tendrè ho anti-panahy noho mpanampy amy fanompoa. Midika va zay hoe lohani-ranabavy iaby amy fiangona eo lafa kila rahalahy?

8. Laha hentea ty Efesianina 5:23, lohani-ranabavy iaby va lafa kila rahalahy? Hazavao.

⁸ Kristy ro lohani-fiangona. (Vakio Efesianina 5:23.) Ie zany ro lohani-ranabavy iaby amy fiangona eo fa tsy ty rahalahy. Amy fianakavia eo le mana fahefà amy valiny ty lahilahy. Tsy ho lohani-reniny mihintsy ty mpamaraky raiky ndre vita batisa aza. (Efes. 6:1, 2) Amy fiangona eo, le voafetra avao koa ty fahefàni-anti-panahy amy ty rahalahy noho anabavy. (1 Tes. 5:12; Heb. 13:17) Manao akory laha misy ranabavy tsy manambaly fe fa tsy  miaraky mipetraky amy babany noho reniny? Fa tsy ambany fahefàni-babany ie fe mbo manaja an-drozy avao. Manaja ty anti-panahy koa ie. Fe manahaky ty rahalahy iaby amy fiangona eo, le mbo misy mana fahefà aminy. Tsy ia zay fa Jesosy.

9. Manino ty ranabavy ro mila manao saron-doha kindraiky?

⁹ Fe ndre zay, tsy nameani-Jehovah fahefà hitariky amy fiangona eo ty ampela, fa ty lahilahy ro nitendreny hanao ani-raha zay. (1 Tim. 2:12) Ino ty antony? Mbo manahaky ty nataony tamy Jesosy avao. Nanendry azy ho lohani-lahilahy Jehovah amy zay milamy soa ty fianakaviany. Marina fa ty lahilahy ro lohani-ampela, fe amy raha sisany, le tsy maintsy manao ty andraikitsy tokony hataoni-rahalahy ty ranabavy. Tsy maintsy manao saron-doha * hoasani-Jehovah ie amy zay. (1 Kor. 11:4-7) Tsy hoe manambany an-drozy Jehovah laha mampanao ani-zay. Teany hatoron-drozy hoe manaja ty fitsipiky napetrakiny mikasiky fanajà fahefà rozy. Fe ndao amy zay tsika hamaly ani-fanontanea toy: Manao akory ty fahefàni-loham-pianakavia noho ty ahini-anti-panahy?

10. Ino ty antony mety hahavy ty anti-panahy ta hametraky fitsipiky ho ani-fiangona?

¹⁰ Tea ani-Kristy ty anti-panahy. Tean-drozy koa ty “aondry” nampikarakarani-Jehovah noho Jesosy an-drozy. (Jaona 21:15-17) Mety hieritseritsy mihintsy aza ty anti-panahy sisany hoe sahala baban’olo amy fiangona eo satria mazoto mikarakara noho tea an-drozy. Mety hanao ho zao koa ie hoe satria mana zo hametraky fitsipiky hiarova ty fianakaviany  ty loham-pianakavia, le azoni-anti-panahy atao koa zany ty mametraky fitsipiky laha hitany hoe hahasoa ty aondri-Ndranahary. Vomaiky mampirisiky azy hanao ani-zay koa ty rahalahy noho anabavy sisany satria mangataky azy mba hanapa-kevitsy ho an-drozy. Fe mitovy vatany va ty fahefà ananani-anti-panahy amy fiangona eo noho ty ani-loham-pianakavia?

11. Ino ty mampitovy ty andraikitsini-loham-pianakavia noho ty ahini-anti-panahy?

¹¹ Nivola Paoly hoe misy itovizany ty andraikitsini-loham-pianakavia noho ty ahini-anti-panahy. (1 Tim. 3:4, 5) Teani-Jehovah hanaja ty loham-pianakavia, ohatsy, ty olo iaby an-trano ao. (Kol. 3:20) Teany koa laha manaja ty anti-panahy ty olo iaby amy fiangona eo. Mitamà Jehovah hoe samby hikarakara soa ani-ze ambany fahefàn-drozy ndre ty loham-pianakavia ndre ty anti-panahy. Samby ampianarin-drozy ho tea ani-Jehovah zany olo reo. Samby ataon-drozy ze hahavy azy hahatsapa hoe misy mpidary ie sady mahazo ze fanampea ilàny lafa misy problemo. (Jak. 2:15-17) Ankoatsini-zay, mitamà Jehovah hoe samby hanampy olo hafa hanoriky ty lalànany ty anti-panahy noho ty loham-pianakavia. Fe tsy tokony “hihoatsy ani-ze  voasoratsy” amy Baiboly ao rozy lafa manao ani-zay.​—1 Kor. 4:6.

12-13. Laha hentea ty Romanina 7:2, ino ty tsy mampitovy ty andraikitsini-loham-pianakavia noho ty ahini-anti-panahy?

¹² Fe misy raha tena tsy mampitovy ty andraikitsini-anti-panahy noho ty ani-loham-pianakavia. Ty anti-panahy, ohatsy, nitendreni-Jehovah hitsara noho handroaky ani-ze mpanota tsy mibebaky amy fiangona eo.​—1 Kor. 5:11-13.

¹³ Fe misy fahefà sisany nameani-Jehovah ty loham-pianakavia tsy ananani-anti-panahy. Ty loham-pianakavia, ohatsy, nameani-Jehovah fahefà hametraky fitsipiky ho ahi-ty fianakaviany. (Vakio Romanina 7:2.) Azony atao zao, ohatsy, ty mamaritsy hoe amy firy ty anany ro tokony hilitsy an-trano lafa hariva, le azony sazỳ rozy laha tsy manoriky ani-fitsipiky zay. (Efes. 6:1) Fe laha be fitiava ty loham-pianakavia raiky le mifampiresaky amy valiny tse ie alohani-hametrahany fitsipiky an-trano ao, satria “nofotsy raiky” rozy. *—Mat. 19:6.

14. a) Laha hentea ty raha volanini-Marka 10:45, manino ro mety soa laha Jesosy ro nitendreni-Jehovah ho lohani-fiangona? b) Ino ty andraikitsini-Filan-kevi-pitantana? (Henteo ty efajoro hoe “ Ty Andraikitsini-Filan-kevi-pitantana.”)

¹⁴ Nivilini-Jehovah tamy soro nataoni-Jesosy iny iaby lafa atao olo amy fiangona eo, le ho zay koa ze olo hafa mino ani-soro io. (Vakio Marka 10:45; Asa. 20:28; 1 Kor. 15:21, 22) Mety soa zany laha Jesosy ro nitendreni-Jehovah ho lohani-fiangona,  satria nanome ty ainy ho vilim-panavota ie. Mana fahefà hametraky fitsipiky mikasiky ze raha tokony hataon’olo kiraidraiky, ty fianakavia, noho ty fiangona zany ie. Azony atao koa ty mivola hoe tsy maintsy manoriky ty fitsipiky ameany tsika. (Gal. 6:2) Fe tsy hoe mametraky fitsipiky avao Jesosy fa tea noho mikarakara antsika kiraidraiky koa.​—Efes. 5:29.

15-16. Ino ty nianaranao baka amy ty raha nivolanini-ranabavy Marley noho rahalahy Benjamin?

¹⁵ Atoroni-ranabavy reo hoe manaja ani-Kristy rozy laha manoriky ty tari-dala ameani-lahilahy nitendreny reo. Natao hikarakara an-drozy olo reo. Amy resaky fanajà io, maro amy anabavintsika reo ro mitovy hevitsy amy Marley, ranabavy mipetraky a Etazinỳ any. Ho zao ty nivolaniny: “Tena teako ty andraikitsy nameani-Jehovah ahy ndre an-trano ao zay ndre amy fiangona eo. Tsy maintsy miezaky aho mba hanaja ty fahefà nameani-Jehovah ani-valiko noho nameany ty anti-panahy. Fe tsy de sarotsy amiko ty manao ani-zay satria manaja ahy rozy sady mankasitraky ty raha ataoko.”

¹⁶ Atoroni-rahalahy hoe azon-drozy soa ty fandahara nataoni-Jehovah mikasiky fahefà, laha manaja noho manome voninahitsy ty ranabavy rozy. Ho zao ty nivolanini-rahalahy Benjamin, mipetraky an’Angletera any: “Maro ty raha nianarako baka amy valin-teny ameani-ranabavy reo am-pivoria any noho ty soso-kevitsy mikasiky fomba fianara noho fomba ahità vokatsy amy fanompoa. Tena ilà vatany ty asa ataoni-ranabavy reo.”

17. Manino tsika ro tokony hanaja ty fitsipiky napetrakini-Jehovah mikasiky fanajà fahefà?

¹⁷ Hilamy soa ty fiangona laha haintsika iaby sady hajàntsika ty karazam-pahefà napetrakini-Jehovah, ndre lahilahy tsika ndre ampela, ndre loham-pianakavia ndre anti-panahy. Fa ty vatan-draha marè, hahazo voninahitsy Jehovah, azy Babantsika be fitiava an-danitsy any iny.​—Sal. 150:6.