TAMY androni-Baiboly, le nanome vodiondry ho ani-fianakaviani-ampela iny ty lahilahy raiky lafa hampaka-baly. Nanome ani-raha io ie lafa nifaneky ty fianakavian-drozy roe. Mety ho biby raha nameany io, na drala, na raha lafovily hafa. Nisy fotoa koa raha io nasolo asa. Manahaky ani-zay zao ty ahini-Jakoba. Naneky hiasa fito tao tamy babani-Rahely ao ie mba hahazoany ani-Rahely. (Gen. 29:17, 18, 20) Ino marina moa ty antony nanomeza vodiondry?

Misy manam-pahaiza mikasiky Baiboly mana anara Carol Meyers zay nivola hoe: “Mety hanonera ty asa tokony hataoni-anakampelan-drozy iny vodiondry io. Tena nilà zay satria tokony mbo hikarakara ty fiharea noho ty famboleani-fianakavian-drozy ie.” Mety nanamafy ty filongoani-fianakavia roe naharoni-fanambalea reo koa vodiondry iny. Lasa afaky nifanampy rozy lafa nisy raha sarotsy. Ankoatsini-zay, vodiondry iny koa ro porofo hoe fa manan-tompo ampela iny, le fa tsy babany sasy ro hiaro noho hikarakara azy fa lahilahy ho valiny iny.

Tsy midika zay hoe raha azo avily na vilỳ ty valy. Hoy ty boky Israely Taloha Tany​—Ty fiainan-drozy Noho ty Fomban-drozy: “Tsy maintsy nanome drala na raha mitovitovy amy drala ho ani-fianakavian’ampela iny ty Israelita. Laha hentea zay, le atao raha hoe resaky varotsy ty fanambaleani-Israelita reo. Fe atao raha tsy de vilin’ampela iny loatsy [vodiondry] io fa onitsy namea ho ahi-ty fianakaviany.”

Mbo manaraky ani-fomba io koa ty olo amy firenena sisany henanizao. Laha misy Kristiana mitaky vodiondry le atorony hoe “mahay mandanjalanja” ie ka tsy ataony lafo marè ty vodiondry angatahiny. (Fil. 4:5; 1 Kor. 10:32, 33) Atorony amy zay hoe tsy olo “tea drala” na tsy mety afa-po ie. (2 Tim. 3:2) Ankoatsini-zay, laha tsy mitaky vodiondry lafo marè ty Kristiana raiky, le tsy hahemotsini-lahilahy ta ho vinanto iny mariazy iny satria tsy hoe mbo hamorivory drala fanampiny handoava ani-vodiondry iny ie. Laha mpisava lala koa ie le tsy hahatsapa hoe tokony hiala tsy ho mpisava lala satria hoe mila miasa tontolonandro mba hahazoa drala handoava ani-vodiondry lafo marè iny.

Fa anaty lalànani-fanjakà mihintsy resaky vodiondry io amy tany sisany any. Manaraky ani-lalàna reo ty ray aman-dreny kristiana mipetraky amy tany reo any. Fa manino? Satria mivola ty Safà-Ndranahary fa tokony “haneky ty manam-pahefà” ty Kristiana, le tokony hanaraky lalàna laha tsy mifanohitsy amy lalàna-Ndranahary lalàna rey.​—Rom. 13:1; Asa. 5:29.