TAMY Lalànani-Mosesy, le samby niazo natao fanatitsy ho ani-Jehovah ndre dehoky ndre pizon. Miaraky tonòny avao voro roe reo amy lalàna mikasiky soro rey sady azo afatakalo na afamadiky. (Lev. 1:14; 12:8; 14:30) Manino raha zay ro nahasoa ani-Israelita reo? Toy misy antony raiky: Tsy hoe misy mandavantao ty dehoky. Ino ty antony?

Voro mpifindrafindra tanà ty dehoky, le misy azy iaby ty tanini-Israelita reo lafa mafana ty andro. Fe saky avy ty Oktobra, le mifindra manantimo voro reo satria any mba mafanafana. Lafa andro asara koa rozy vo mimpoly an’Israely any ndraiky. (Tonon. 2:11, 12; Jer. 8:7) Tamy androni-Baiboly zany, tsy nimora ty hoe hanao fanatitsy dehoky lafa asotry ty andro.

Fe tsy ho zay ty pizon. Tsy mandehandeha loatsy ty pizon ka nisy pizon avao tan’Israely tany mandavantao. Ankoatsini-zay, fiharen’olo koa ty pizon. (Ampitovizo amy Jaona 2:14, 16.) Mivola ty boky Raha Mitiry Noho Biby Resahy amy Baiboly Ao fa “nihary pizon iaby ze tanà ambanivohitsy ta Palestiny any, ndre kelikely ndre bevata. Ze olo nana trano le samby nana tranom-pizon iaby, na nasiany loadoaky rindrin-tranony iny mba hipetrahani-voro rey.”​—Ampitovizo amy Isaia 60:8.

Natoroni-Jehovah zany hoe be fitiava noho hendry ie lafa nekeny hataoni-Israelita reo fanatitsy koa voro io satria misy avao mandavantao.