1. Ino iaby ty raha sarotsy mety hatrehini-mpanomponi-Jehovah?

MISY raha sarotsy atrehinao va? Vasa nisy mpiara-manompo nanao raha nampalahelo anao. (Jak. 3:2) Na misy mpiaraky miasa na mpiaraky mianatsy aminao mikizaky anao satria manompo ani-Jehovah iha. (1 Pet. 4:3, 4) Na koa misy olo trano raiky aminao misaka anao tsy hivory na tsy hiresaky ty raha inoanao. (Mat. 10:35, 36) Lafa tena sarotsy ty raha atrehinao le mety hieritseritsy iha hoe aleo tsy manompo ani-Jehovah sasy. Fe afaky matoky iha fa ndre ino ino raha mahazo anao, le hanome fahendrea noho hery anao Jehovah mba hahavy anao hahay hanapa-kevitsy noho hahavita hiaritsy.

2. Laha hentea ty Romanina 15:4, hanao akory tsika lafa mamaky Baiboly?

² Maro ty olo tsy lavorary nahavita niaritsy raha sarotsy taloha tany. Nampanoratini-Jehovah amy Safàny ao hoe akory ty nahavitan-drozy ani-zay. Ino ty antony? Mba handrambesantsika fianara. Zay mihintsy ty nampanoratini-Jehovah ani-Paoly. (Vakio Romanina 15:4.) Hihamatanjaky noho hanan-draha tamany avao tsika lafa mamaky ani-tantara rey. Fe tsy ampy ty hoe mamaky avao laha teantsika hahasoa antsika raha rey. Tokony hengantsika hanova ty saintsika noho ty fontsika ty Soratsy Masy. Ka ino ty azontsika atao laha mila torohevitsy mikasiky ty raha mahazo antsika tsika? Afaky manao ani-raha efatsy retoa tsika: 1) Mivavaky, 2) Mangalaky sary an’eritseritsy, 3) Mametsivetsy, le 4) Manoriky ze raha ianarantsika. Ndao hohenteantsika hoe ino iaby ty tafilitsy amy raha reo kiraidraiky. *  Bakeo handiniky ty raha niainani-Davida Mpanjaka noho apostoly Paoly tsika, le hampiasantsika raha reo.

3. Ino tse ty tokony hataonao alohani-hamakia Baiboly, le ino ty antony?

³ 1) Mivavaky. Mivavaha tse alohani-hamakianao Baiboly, le angataho Jehovah hanampy anao hahita hevitsy hahasoa anao amy raha hovakinao iny. Laha misy problemo mahazo anao, ohatsy, le angataho Jehovah mba hanampy anao hahita torolala mifandramby amy raha mahazo anao iny.​—Fil. 4:6, 7; Jak. 1:5.

4. Ino ty azonao atao mba ho velombelo ty tantara vakinao amy Baiboly ao?

⁴ 2) Mangalaky sary an’eritseritsy. Nataoni-Jehovah miavaky ty saintsika ka afaky mangalaky sary an’eritseritsy. Ho velombelo ty tantara vakinao laha eritseretinao hoe ino ty raha miseho ao. Anovo sahala iha mihintsy olo voaresaky ao iny. Anovo sahala hitanao maso ty raha hitany, le tsapanao ze raha mety ho tsapany.

5. Manao akory mametsivetsy zao, le akory ty hanaova azy?

⁵ 3) Mametsivetsy. Ty hoe mametsivetsy le midika hoe mandiniky soa ze raha vakinao noho ze fomba hanorihanao ani-raha iny. Ho azonao soa raha vakinao iny amy zay satria ho hainao ty hampifandramby azy amy ze raha fa hainao. Laha mamaky Baiboly iha kanefa tsy mametsivetsy, le sahala mihina laoky tsy misy sira. Tsy ho renao tavy laoky iny. Tsy ho renao tavy koa zany ty famakia Baiboly laha tsy mametsivetsy iha. Fa mametsivetsy iha laha mieritseritsy fanontanea mitovy amy retoa: ‘Akory ty namahany ani-problemo iny? Akory ty nanampeani-Jehovah azy? Ino koa ty hataoko mba hanampy ahy hiaritsy laha dinihy raha toy?’

6. Manino tsika ro tokony hanoriky ze raha ianarantsika?

⁶ 4) Manoriky ze raha ianaranao. Nivola Jesosy hoe laha tsika tsy manoriky ze raha ianarantsika, le sahala amy lahilahy raiky mamboatsy ty tranony anabo fasy. Miasa mafy ie fe misera avao ezaky ataony zay. Fa manino? Satria ho rava trano iny laha misy ora na ranobe. (Mat. 7:24-27) Mitovy amy zay koa fa ndre mivavaky tsika, mangalaky sary an’eritseritsy, noho mametsivetsy, fe tsy manoriky ani-raha ianarantsika iny le tsy hisy dikany ezaky nataontsika zay. Lafa miatriky raha sarotsy amy zay tsika le resy satria tsy mana finoa matanjaky. Fa laha mianatsy tsika bakeo manoriky ani-raha iny, le hahay hanapa-kevitsy, hilamin-tsay, noho hana finoa matanjaky. (Isaia 48:17, 18) Ndao amy zay tsika handiniky ty raha niainani-Davida Mpanjaka, le hampiasantsika raha efatsy nidinihintsika teo rey.

7. Ino ty tantara hodinihintsika henanizao?

⁷ Nisy namanao na olo trano raiky aminao va nanao raha nampalahelo anao? Laha zay ty mahazo anao, le hahasoa anao ty mandiniky ty tantarani-Absaloma anakilahini-Davida Mpanjaka. Namadiky ani-babany ie sady nangalatsy ty fahefàny.​—2 Sam. 15:5-14, 31; 18:6-14.

8. Ino ty azonao atao laha teanao ty hampeani-Jehovah?

⁸ 1) Mivavaky. Eritsereto tantara iny le volano amy Jehovah hoe ino ty tsapanao amy raha raty nataon’olo taminao iny. (Sal. 6:6-9) Ka misy avonivony fa resaho aminy iaby. Bakeo angataho Jehovah mba hanampy anao hahita torolala, amy zay ho vitanao ty hiatriky ani-raha mahazo anao iny.

9. Ino ty raha niseho tamy Davida noho Absaloma?

 ⁹ 2) Mangalaky sary an’eritseritsy. Eritsereto ty raha niseho amy tantara io, le alao sary an’eritseritsy ty vokatsini-raha zay tamy Davida Mpanjaka. Nataoni-Absaloma ze hahavy ty olo ho tea azy le tanatini-tao maro ie ro nanao ani-zay. (2 Sam. 15:7) Lafa hitany amy zay fa fotoa tokony hanaovany raha tamy zay, le naniraky mpitsikilo ie hitety an’Israely iabiaby, mba hampiomana ty olo haneky azy ho mpanjaka. Nireseny lahatsy mihintsy aza Ahitofela namani-Davida noho mpanoro hevitsy azy, mba hiaraky aminy hanohitsy ani-Davida. Nivola Absaloma hoe lasa mpanjaka ie, le bakeo niezaky nanambotsy noho namono ani-Davida. Atao raha narary mafy Davida tamy fotoa io. (Sal. 41:1-9) Haini-Davida tetikini-Absaloma iny ka nilay niala ani-Jerosalema ie. Tafara atoy nialy tamy maramilani-Davida maramilani-Absaloma rey. Fe niresy mpanohitsy reo le nimaty koa Absaloma.

10. Ino ty raha tsy nataoni-Davida?

¹⁰ Mba eritsereto amy zay ty raha tsapani-Davida lafa nahazo azy raha iaby rezay. Teany Absaloma le Ahitofela olo natokisany. Fe samby namadiky azy olo reo. Tsy vitani-hoe nanao raha nampalahelo azy rozy fa ta hamono azy mihintsy. Tsy nanao ho zao Davida hoe tsy no fa miaraky amy Absaloma koa namako sisany retia. Azony natao ty tsy nieritseritsy olo hafa le nilay lavitsy ani-tanà iny ie raiky avao. Tokony ho nahakivy tanteraky azy koa raha iny. Fe tsy nanao ani-raha iaby reo Davida. Naleony niatriky ani-raha nahazo azy iny. Manino ie ro nahavita ani-zay?

11. Ino ty nataoni-Davida lafa niatriky raha sarotsy?

¹¹ 3) Mametsivetsy. Ino ty torolala hitanao baka amy tantara io? Mba valeo moa fanontanea toy: “Ino ty nataoni-Davida ka nanampy azy?” Tsy niasa loha marè Davida sady tsy nalisalisa hanapa-kevitsy. Tsy navaka marè koa ie ka hoe tsy hitany mihintsy ty hataony. Vomaiky aza ie nivavaky soa hampeani-Jehovah. Nila fanampea tamy namany rey koa ie. Avy le nitanterahiny koa ze fanapahan-kevitsy nataony. Marina fa nalahelo biby Davida, fe tsy hoe lasa tsy natoky olo ie na nalay olo. Natoky ani-Jehovah avao ie sady natoky ty namany.

12. Ino ty nataoni-Jehovah mba hanampea ani-Davida?

¹² Akory ty nanampeani-Jehovah ani-Davida? Laha manao fikaroha kelikely iha le ho hitanao fa nameani-Jehovah hery ie ka nahavita niaritsy. (Sal. 3:1-8; noho ty safà fampilira azy) Nitahini-Jehovah ty fanapahan-kevitsy nataoni-Davida. Nampeany koa namani-Davida rey lafa nialy mba hiarova ani-mpanjakan-drozy io.

13. Akory ty hanahafanao ani-Davida laha misy olo manao raha tena mampalahelo anao? (Matio 18:15-17)

¹³ 4) Manoriky ze raha ianaranao. Eritsereto toy: ‘Akory ty hanahafako ani-Davida?’ Avy le manaova raha mba hamahà ani-problemo iny. Azonao orihy, ohatsy, raha nivolanini-Jesosy amy Matio toko 18 ao rey, le ampifanaraho amy ze raha misy. (Vakio Matio 18:15-17.) Fe ka malaky manapa-kevitsy laha mbo meloky iha. Tokony hivavaky amy Jehovah iha soa hampeany ho kalma noho hahay ty tokony hatao. Miezaha hatòky ani-rahalahinao reo avao le ekeo ty fanampea amean-drozy. (Ohab. 17:17) Fa toy ty tena vatan-draha, oriho ze torohevitsy ameani-Jehovah amy Safàny ao.​—Ohab. 3:5, 6.

14. Lafa amy raha manao akory ro mety hampahery anao ty 2 Timoty 1:12-16; 4:6-11, 17-22?

¹⁴ Manohitsy anao va ty fianakavianao satria iha manompo ani-Jehovah? Sa iha mipetraky amy tany anakasakana na andrarà ty asa  ataoni-mpanomponi-Jehovah? Laha zay ie, le mety hampahery anao ty mamaky ty 2 Timoty 1:12-16 noho 4:6-11, 17-22. * Tan-gadra tany Paoly ro nanoratsy ani-andininy reo.

15. Ino ty raha azonao angatahy amy Jehovah?

¹⁵ 1) Mivavaky. Alohani-hamakianao ani-tantara reo, le mivavaha amy Jehovah tse. Resaho aminy ty raha mahazo anao noho ty vokatsini-raha iny aminao. Avantano mihintsy fa ka misy avonivony. Mangataha amy Jehovah soa hampeany iha hahita hoe ino ty torolala anatini-tantarani-Paoly io ka hanampy anao hahay ty tokony hataonao.

16. Fintino kelikely ty raha nahazo ani-Paoly.

¹⁶ 2) Mangalaky sary an’eritseritsy. Eritsereto hoe iha mihintsy ro Paoly. Gadra a Roma any iha, le mirohy seny. Fa nigadrà iha talohani-zay, fe amy raiky toy iha tena hovonoa mihintsy. Niala anao ty namanao sisany, sady fa reraky koa amin’io ty vatanao.​—2 Tim. 1:15.

17. Ino ty raha tsy nataoni-Paoly?

¹⁷ Ara-dalàna laha nahatiarotiaro ty fiainany taloha Paoly na nieritseritsy hoe tsy ho nigadra ie laha nanao raha hafa. Azony natao koa ty neloky ani-lahilahy nanenga azy tamy faritsini-Azỳ any rey, le bakeo tsy natoky sasy ty namany sisany. Fe tsy nanao ho zay mihintsy Paoly. Nanino ie ro mbo natoky ani-namany rey avao sady natoky hoe hamaly soa azy Jehovah?

18. Ino ty nataoni-Paoly lafa niatriky raha sarotsy?

¹⁸ 3) Mametsivetsy. Eritsereto zao: “Ino ty nataoni-Paoly ka nanampy azy?” Tsy nihalinoni-Paoly mihintsy hoe tena vatan-draha ty manome voninahitsy ani-Jehovah ndre fa hainy aza fa hovonoa ie. Nifantoky tamy ze raha azony ampahereza olo avao ie. Niantehitsy tamy Jehovah tamy alalani-vavaky koa ie. (2 Tim. 1:3) Tsy tamy rahalahy nanenga azy rey tany sasy ty sainy. Tena nifalifaly ie satria tsy vitani-hoe nitea azy ty namany fa nanampy noho nanoha azy koa. Tsy zay avao, nianatsy ty Safà-Ndranahary avao koa Paoly. (2 Tim. 3:16, 17; 4:13) Fa ty tena vatan-draha, tena natoky ie hoe tea azy Jehovah noho Jesosy. Natoky ie hoe tsy nanenga azy rozy sady hamaly soa azy satria tsy nivaliky ie.

19. Ino ty nataoni-Jehovah mba hanampea ani-Paoly?

¹⁹ Fa nivola tamy Paoly Jehovah fa hiatriky fanenjeha ie satria Kristiana. (Asa. 21:11-13) Ino ty nataoni-Jehovah mba hanampea ani-Paoly? Namaly ty vavaky nataony Jehovah, le nanome hery azy koa. (2 Tim. 4:17) Nameani-Jehovah toky Paoly hoe hameany raha soa satria niasa mafy. Nampiasa ani-namany tsy nivaliky rey koa Jehovah mba hanome azy ze fanampea nilàny.

20. Lafa mandiniky ty Romanina 8:38, 39 iha, akory ty hanahafanao ani-Paoly?

²⁰ 4) Manoriky ze raha ianaranao. Eritsereto zao: ‘Akory ty hanahafako ani-Paoly?’ Tokony fa hampoizintsika hoe henjehy manahaky ani-Paoly tsika satria manompo ani-Jehovah. (Mar. 10:29, 30) Mila miantehitsy amy Jehovah amy vavaky noho mianatsy tsy tampaky ty Safàny tsika, amy zay tsy hivaliky mihintsy lafa miatriky raha sarotsy. Tokony ho tiarovintsika avao koa fa ndre ino ino raha ataontsika le ty manome voninahitsy ani-Jehovah ro tena vatan-draha. Afaky matoky tsika fa tsy hanenga antsika mihintsy Jehovah sady tsy misy afaky hisaka azy tsy ho tea antsika.​—Vakio Romanina 8:38, 39; Heb. 13:5, 6.

21. Ino ty nanampy ani-Aya noho Hector handresy raha sarotsy?

²¹ Ndre ino ino ty raha mahazo antsika le afaky manampy antsika hiaritsy ty tantara  amy Baiboly ao. Eritsereto, ohatsy, Aya ranabavy mpisava lala a Japon any. Nivola ie fa nanampy azy hahasaky hitory amy pilasy maro olo ty tantarani-Jona. Tsy manompo ani-Jehovah koa ty baba noho renini-Hector, tanora mipetraky an’Indonezỳ any. Fe nandrisiky azy hianatsy mikasiky ani-Jehovah noho hanompo azy ty tantarani-Rota.

22. Ino ty azonao atao mba tena hahasoa anao filma noho tantara baka amy Baiboly rey na ty lahatsoratsy amy hoe “Tahafo ty Finoan-drozy”?

²² Tantara aia amy Baiboly ao ty mety hampahery anao? Afaky manampy anao video noho tantara janjiny rey satria atao raha hitanao intia mihintsy olo rey. Afaky manampy anao koa ty lahatsoratsy mifampitohy hoe “Tahafo ty Finoan-drozy.” * Nanaova fikaroha laliky tantara reo. Ka alohani-hanenty, na hijanjy, na hamaky azy le mangataha amy Jehovah soa hanampy anao hahita fianara mifanaraky amy raha mahazo anao. Anovo sahala iha mihintsy olo voaresaky ao iny. Eritsereto hoe ino ty raha nataoni-mpanomponi-Jehovah tsy nivaliky reo le akory ty nataoni-Jehovah mba hanampea an-drozy hahavita hiatriky raha sarotsy. Bakeo ampifanaraho amy ty raha iainanao raha iny. Isaoro Jehovah amy ze raha fa nataony mba hanampea anao. Atoronao koa hoe mankasitraky ani-fanampea rey iha laha mila fomba hampahereza noho hanampea olo.

23. Laha hentea ty Isaia 41:10, 13, ino ty raha ampitamanini-Jehovah antsika?

²³ Sarotsy ty miay amy tontolo fehezini-Satana toy le kindraiky aza tsy hitantsika ty hatao. (2 Tim. 3:1) Fe tsy tokony hiasa loha na hatahotsy tsika. Haini-Jehovah ty raha mahazo antsika. Mampitamà ie fa hitanjaky antsika ty tanany ankavana lafa mila fanampea tsika. (Vakio Isaia 41:10, 13.) Matoky zany tsika fa tena hanampy antsika Jehovah, le ty Baiboly koa manome hery antsika mba hahavitantsika miaritsy raha sarotsy.