Mampiasa fitaova elektroniky ty Kristiana sisany mba hifandrambesa amy fianakavia noho amy mpiara-manompo. Fe ty Kristiana matotsy mitiaro ani-torohevitsy toy avao: “Mahajilo loza ty mahihitsy ka mivony, fa ty tanora fanahy mbo manaloha avao ka voa.”​—Ohab. 27:12.

Haintsika hoe ta hiaro antsika Jehovah. Farany tsika tsy mifandramby amin’olo mahavy fisaratsaraha, olo voaroaky, na olo mampianatsy raha diso. (Rom. 16:17; 1 Kor. 5:11; 2 Jaona 10, 11) Mety tsy manoriky ty lalàna amy Baiboly ao koa ty olo sisany amy fiangona eo. (2 Tim. 2:20, 21) Soa ty mitiaro ani-zay lafa mifily nama tsika. Fe mety ho sarotsy ty hifily nama soa laha amy programy fandefasa mesazy rey ro ifampiresahantsika amin-drozy.

Misy programy fandefasa mesazy sisany afaky ifampiresahan’olo maromaro miaraky na gropy. Vomaiky tena ilà ty miamby soa lafa mampiasa ani-raha rey. Nisy Kristiana sisany nilitsy amy gropy rey le niazon-draha. Akory vatany moa ty hahafahani-rahalahy na anabavy raiky mitandrina laha olo an-jatony na an’arivony ro anatini-gropy rey ao? Sarotsy ty hahaiza hoe ia marina olo reo, le manao akory ty ara-panahin-drozy. Mivola ty Salamo 26:4 hoe: “Tsy miaraky mipetraky amin’olo tsy marina aho, sady tsy mifandramby amy ze mamonivony ty maha ie azy.” Hitantsika baka amin’io hoe soa laha olo haintsika avao ro ifandefasantsika mesazy.

Mbo mila mitandrina avao ty Kristiana ndre olo vitsivitsy avao aza ro anatini-gropy iny ao. Tokony hohenteany hoe firy lera ty laniny amy raha iny, le ino ty raha resahin’olo rey ao. Tsy voatery hoe tsy maintsy mamaly ze mesazy ao tsika, ndre ino ino raha iny ndre manao akory ty halavany. Nifeperani-Paoly Timoty amin’olo “mpitsikotsiko noho mpilikilitsy amy fiainan’olo” rey. (1 Tim. 5:13) Mety hampiasan’olo hanaova raha manahaky ani-reo koa ty fitaova elektroniky henanizao.

Tsy mikinokino mpiara-manompo ty Kristiana matotsy ndre ao sady tsy mivola ty sekiren-drozy. Tsy mijanjy raha ho reo koa ie laha misy olo manao ani-zay ty ao. (Sal. 15:3; Ohab. 20:19) Tsy miresaky na mijanjy tantara tsy marina na nitary koa ie. (Efes. 4:25) Mahazo vaovao marina noho fanazavà soa baka amy Baiboly ao tsika amy jw.org noho amy Tele JW sambola rey.

Misy mpiara-manompo sisany koa mampiasa programy fandefasa mesazy rey mba hamarota noho hiviliana raha, na hanaova piblisitè enta na asa. Filan-drala ty raha ho reo fa tsy misy ifandrambesany amy fanompoa ani-Jehovah. Laha “tsy misy fitiavan-drala” ty Kristiana raiky le tsy hataony filan-drala ty mpiara-manompo aminy.​—Heb. 13:5.

Ka manao akory laha ohatsy ampiasà programy fandefasa mesazy rey mba hangataha drala hanampea ani-rahalahy noho anabavintsika mila fanampea na tra-boina rey? Teantsika aloha rahalahy noho anabavintsika rey ka ta hanampy noho hampahery an-drozy tsika. (Jak. 2:15, 16) Fe mety hanasarotsy ty fandahara fa ataoni-sampana na fiangona tsika laha manao ani-zay amy programy fandefasa mesazy rey. (1 Tim. 5:3, 4, 9, 10, 16) Azo antoky koa fa tsy teantsika hieritseritsy ty olo hoe nivoatendry hanao asa manoka ho ahi-ty aondri-Ndranahary tsika.

Ta hanao raha manome voninahitsy a Ndranahary tsika. (1 Kor. 10:31) Ka laha manapa-kevitsy hampiasa programy fandefasa mesazy zany iha, ndre ino zay ndre ino, le diniho sandrany ty ho voka-dratiny bakeo miambena soa.