1. Manino Jesosy ro nangataky amy Jehovah mba hiaro ty mpianatsiny?

NIERITSERITSY ty raha sarotsy hahazo ani-mpianatsiny reo Jesosy tamy haly farany niainany tan-tany etoy. Teany mpianatsiny reo ka nangataky amy Babany ie mba ‘hiaro an-drozy’ tsy ho azoni-azy raty iny. (Jaona 17:14, 15) Nihaini-Jesosy fa lafa mimpoly an-danitsy any ie, le tsy hienieny Satana Devoly fa hialy amy ze olo maniry hanompo ani-Jehovah avao. Mila fiarova vatany zany ty vahoakini-Jehovah.

2. Manino tsika ro afaky matoky fa hamaly ty vavaky ataontsika Jehovah?

² Namaly ani-vavakini-Jesosy iny Jehovah satria teany Anakilahiny io. Ho teani-Jehovah koa tsika laha miezaky mampifalifaly azy. Hamaly ty vavaky ataontsika ie amy zay ka hanampy noho hiaro antsika. Baba be fitiava Jehovah ka tsy maintsy hikarakara ty anany avao ie. Ho afa-baraka ie laha tsy manao ani-zay sady ho raty laza!

3. Manino tsika ro tena mila ty fiarovani-Jehovah?

³ Henanizao mihintsy tsika ro mila ty fiarovani-Jehovah. Ino ty antony? “Meloky marè” Satana satria nivoaroaky baka an-danitsy any. (Apok. 12:12) Ataony amy zay ze hahavy ty olo sisany hieritseritsy hoe “manao fanompoa masy ho a Ndranahary” rozy lafa manenjiky antsika. (Jaona 16:2) Manenjiky antsika koa ty olo sisany tsy mino a Ndranahary satria tsy manahaky ty olo amy tontolo toy tsika. Ndre ino ino ty antony anenjehan’olo antsika, le tsy matahotsy tsika satria manome toky antsika ty Baiboly hoe: “Tsy mivaliky amy ty safàny Tompo, ka hampahery noho hiaro anareo tsy ho azoni-azy raty iny.” (2 Tes. 3:3) Ino ty ataoni-Jehovah mba hiarova antsika?  Misy raha roe nameany antsika, le handiniky ani-zay tsika henanizao.

4. Laha hentea ty Efesianina 6:13-17, ino ty nameani-Jehovah mba hiarova antsika?

⁴ Ameani-Jehovah fialia fiarova tsika mba hiarova antsika amy fanafihani-Satana. (Vakio Efesianina 6:13-17.) Tena matanjaky fialia fiarova baka amy Ndranahary io sady maharo antsika soa! Fe tsy hiaro antsika raha io laha tsy ampiasantsika iaby na apotapotakintsika. Mampiseho ino iaby fitaova reo? Ndao tsika handiniky an-drozy kiraidraiky.

5. Ino sentirani-fahamarina zao, le manino tsika ro tokony hisiky azy?

⁵ Sentira. Mampiseho ty fahamarina amy Safà-Ndranahary ao ty sentirani-fahamarina. Manino tsika ro tokony hisiky ani-sentira io? Satria “babani-vandy” Satana. (Jaona 8:44) Fa an’arivony tao ty navandesany noho namitahany “ty tany iaby misy olo.” (Apok. 12:9) Fe miaro antsika tsy ho voafitaky ty fahamarina amy Baiboly ao. Ka manao akory ty hisikinantsika ani-sentirani-fahamarina io? Misiky azy tsika lafa mianatsy ty marina mikasiky ani-Jehovah, mivavaky aminy “araky ty fanahy noho ty fahamarina”, noho manao ty marina amy kila raha iaby.​—Jaona 4:24; Efes. 4:25; Heb. 13:18.

6. Ino fiarovan-tratrani-fahitia zao, le manino tsika ro tokony hisiky azy?

⁶ Fiarovan-tratra. Mampiseho ty fitsipiky marina napetrakini-Jehovah ty fiarovan-tratrani-fahitia. Manino tsika ro tokony hisiky fiarovan-tratra? Miaro ty foni-maramila amy raha mety hitsiboky azy ty fiarovan-tratra. Ho zay koa fa miaro ty fontsika an’ohatsy ty fiarovan-tratrani-fahitia le tsy ho voafitakini-tontolo toy tsika. (Ohab. 4:23) Teani-Jehovah hanompo azy amy ty fontsika iaby tsika. (Mat. 22:36, 37) Miezaky amy zay Satana mba hampizarazara ty fontsika, ka ataony ze hahavy antsika ho tea ty raha amy tontolo toy eto na ty raha halani-Jehovah. (Jak. 4:4; 1 Jaona 2:15, 16) Laha mbo tsy azony amy rey tsika le horohoroeny soa hanao raha halani-Jehovah.

7. Akory ty hisikinantsika ty fiarovan-tratrani-fahitia?

⁷ Manisy ty fiarovan-tratrani-fahitia tsika laha maneky ty fitsipikini-Jehovah mikasiky ty soa noho ty raty sady miay mifanaraky amy fitsipiky reo. (Sal. 97:10) Mety misy mieritseritsy hoe maneritery ty fitsipikini-Jehovah. Mba eritsereto moa toy: Mety hanao akory laha misy maramila raiky an’aly any fe apotany fiarovan-tratra iny fa nao hoasany mavesatsy. Zay tsy hadalà! Manao ho zay koa tsika laha tsy manoriky ty fitsipikini-Jehovah sasy. Fe laha tea ani-Jehovah tsika, le “tsy mavesatsy” mihintsy ty fahitantsika ty didini-Jehovah fa miaro.​—1 Jaona 5:3.

8. Ino ty dikani-hoe ataontsika kiraro an-tombontsika eny ty fanaova parè hitory ty vaovao soa?

⁸ Mampirisiky antsika koa Paoly hoe anovo kiraro an-tombonareo eny ty fanaova parè hitory ty vaovao soani-filongoa. Midika zay hoe tokony ho parè hitory ty vaovao soani-Fanjakà iny avao tsika. Mihamatanjaky koa ty finoantsika lafa resahintsika amin’olo ty raha resahini-Baiboly. Tena mampahery ty mahita hoe miezaky mila fomba sankarazany ty vahoakini-Jehovah amy tany toy iaby mba hanambarà ty vaovao soa. Mitory am-piasà any, ohatsy, rozy, an-dakilasy any, amy pilasy maro birò, santrano, am-bazary eny, amy longo tsy Vavolombelo, na amin’olo hain-drozy. Mbo manao ani-zay avao koa rozy ndre tsy afaky miboaky baka an-trano ao. Laha matahotsy tsika ka tsy mitory sasy, le hitovy amy maramila mamotaky kiraro an’aly eny. Azo antoky fa ho mora maratsy ty tombony.  Ino amy zay ty ho vokany? Tsy afaky hiaro ty vatany ie sady tsy hahavita hanaraky ty komandini-sefony.

9. Manino tsika ro mila manday ani-ampinga bevata io?

⁹ Ampinga bevata. Mampiseho ty finoantsika ani-Jehovah ty ampinga bevata. Matoky tsika hoe hanatanteraky ty raha iaby ampitamaniny Jehovah. Finoa zay ro hanampy antsika “hamono ty balakititsy mirehitsy iaby baka amy azy raty iny.” Manino tsika ro mila manday ani-ampinga bevata io? Satria miaro antsika tsy ho voafitakini-fampianarani-mpivadi-pinoa raha io sady manampy antsika tsy ho kivy lafa misy olo mikinokino ty raha inoantsika. Laha tsy manam-pinoa tsika, le tsy hahavita hanohitsy lafa misy olo miforosè antsika handika ty fitsipikini-Jehovah. Fe saky mandà tsy hanao ze raha halani-Jehovah tsika am-piasà na an-dakilasy any, le manday ani-ampinga io tsika zay. (1 Pet. 3:15) Saky tsika koa tsy maneky lafa atoro asa hanelingely ty fanompoantsika ani-Jehovah, ndre asa be karama aza, le manday ani-ampinga io tsika zay. (Heb. 13:5, 6) Le saky tsika manompo ani-Jehovah ndre misy manohitsy antsika, le miaro antsika ampinga be io.​—1 Tes. 2:2.

10. Ino fiarovan-dohani-fanavota zao, le manino tsika ro tokony hisiky azy?

 ¹⁰ Fiarovan-doha. Tsy ino fiarovan-dohani-fanavota io fa ty raha nampitamanini-Jehovah antsika. Fa nampitamà antsika moa ie hoe hameany kadò ze olo manao ty sitrapony, ka ndre maty aza tsika le hovelominy ndraiky. (1 Tes. 5:8; 1 Tim. 4:10; Tit. 1:1, 2) Miaro ty lohani-maramila ty fiarovan-doha. Manahaky ani-zay koa fa miaro ty fahaizantsika mandiniky ty fitamana fanavota. Amy fomba akory? Manampy antsika hifantoky amy fampitamana-Ndranahary rey avao raha io sady manampy antsika tsy ho kivy lafa misy raha manahira. Akory ty hisikinantsika ani-fiarovan-doha io? Misiky azy tsika laha ataontsika azo antoky hoe mitovy amy hevitsi-Ndranahary ty hevitsintsika. Miantehitsy amy Ndranahary, ohatsy, tsika fa tsy amy hanana, satria tsy azo antoky raha rey.​—Sal. 26:2; 104:34; 1 Tim. 6:17.

11. Ino sabatsini-fanahy zao, le manino tsika ro mila manday azy?

¹¹ Sabatsy. Tsy ino sabatsini-fanahy io fa ty Safà-Ndranahary, zany hoe ty Baiboly. Mahavita mandrava ty karaza vandy iaby sabatsy io sady mahavita manafaky olo amy fampianara diso noho fahazara raty. (2 Kor. 10:4, 5; 2 Tim. 3:16, 17; Heb. 4:12) Mianatsy mampiasa soa ani-sabatsy io tsika lafa manao fianara am-bata noho mandramby ty fampiofana baka amy fandamina-Ndranahary. (2 Tim. 2:15) Tena miaro antsika ty fialia fiarova baka amy Ndranahary, fe mbo misy raha hafa koa ameany mba hiarova antsika. Ino zay?

12. Ino koa ty raha hafa ilàntsika, le ino ty antony?

¹² Haini-maramila fa zatsy aly hoe tsy afaky handresy maramila maro biby laha ie raiky avao. Mila nama hanampy azy ie. Mialy amy Satana noho ty namany koa tsika, fe tsy haharesy mihintsy tsika laha tsika raiky avao. Mila ani-rahalahy noho anabavintsika reo tsika. Nameani-Jehovah antsika ty “rahalahy” amy tany toy iaby mba hanampy antsika.​—1 Pet. 2:17.

13. Laha hentea ty Hebreo 10:24, 25, ino iaby ty raha soa azontsika lafa mivory?

¹³ Tena manampy antsika ty fanatreha fivoria. (Vakio Hebreo 10:24, 25.) Misy fotoa, ohatsy, tsika kivy fe afaky mampahery antsika ty fivoria. Manome hery antsika ty valin-teny baka amy fo ameani-rahalahy noho anabavintsika reo. Ho zay koa ty lahateny noho fampisehoa ataon-drozy. Mahavy antsika ho tapa-kevitsy hanompo ani-Jehovah raha rey. Mahazo fampahereza koa tsika lafa mifampiresaky aloha noho afarani-fivoria rey. (1 Tes. 5:14) Tsy zay avao, fa lafa tsika mivory le falifaly satria afaky manampy olo. (Asa. 20:35; Rom. 1:11, 12) Misy raha soa hafa koa azontsika baka amy fivoria. Manampy antsika hihamahay mitory noho mampianatsy raha rey. Ianarantsika any, ohatsy, ty fomba fampiasà ani-raha amy Fitaova Fampianara ao rey. Ka le manomàna soa zany lafa hivory. Mijanjina soa koa lafa any. Bakeo oriho ze fampiofana niazonao tany. Laha manao ani-reo iha, le hanjary “maramila soani-Kristy Jesosy.”​—2 Tim. 2:3.

14. Ino koa ty fanampea hafa azontsika?

¹⁴ Manoha antsika koa ty anjely mahery an-tapitrisany. Mba eritsereto avao moa ty raha vitani-anjely raiky! (Isaia 37:36) Mba eritsereto amy zay koa hoe manao akory ty raha ho vitani-anjely maro biby reo. Tsy misy olombelo na demonia hahavita handresy ani-maramilani-Jehovah matanjaky reo. Jehovah ro tena farani-ze mahery. Ndre tsika raiky avao aza, lafa miaraky amy Jehovah, le tsy misy  maharesy antsika ndre firifiry ty mpanohitsy antsika. (Mpits. 6:16) Tsy misy afaky mandietsy ani-zay! Tiarovo avao zay lafa mivola na manao raha mahakivy anao ty mpiaraky miasa aminao, ty mpiaraky mianatsy, na ty longonao tsy Vavolombelo. Tiarovo hoe tsy mialy raiky iha. Manoha anao Jehovah satria manaraky ty tari-dalany iha.

15. Laha hentea ty Isaia 54:15, 17, manino ty vahoaki-Ndranahary ro tsy mieny mitory?

¹⁵ Maro ty antony mahavy ani-tontolo ambany fahefàni-Satana toy halay antsika. Tsy militsy amy resaky politiky tsika sady tsy mandeha mialy. Manoriky ty fitsipiki-Ndranahary koa tsika, manambara ty anarany, sady mitory hoe ty Fanjakàny raiky avao ro handay fiadana. Atorontsika fa mpavandy noho mpamono olo azy mpanday ani-tontolo toy iny. (Jaona 8:44) Ambarantsika koa fa kely sisa le horavà tontoloni-Satana toy. Tsy ho vitani-Satana noho ty olo manoha azy mihintsy ty hampijano ty asa fitoria ataontsika. Vomaiky aza tsika midera ani-Jehovah ka manao ze fara herintsika amy asa io! Marina fa mahery Satana sady tsy teany hiparitaky ty hafatsy mikasiky Fanjakà iny. Fe maharè ani-hafatsy io ty olo amy tany toy iaby. Tsy ho nisy raha zay laha tsy niaro antsika Jehovah.​—Vakio Isaia 54:15, 17.

16. Akory ty hanavotani-Jehovah ty mpanompony lafa amy fijalea bevata?

¹⁶ Ino ty raha hiseho tsy ho ela? Hanavotsy antsika Jehovah amy fijalea bevata. Misy raha roe bevata hataony amy zay. Voalohany, lafa Jehovah hampirisiky ty mpanjakani-tany handrava ani-Babylona Bevata, zany hoe ty fivavahan-diso iaby, le harovany ty mpanompony tsy mivaliky. (Apok. 17:16-18; 18:2, 4) Afarani-zay, lafa handrava ty sisa tavela amy tontoloni-Satana ie amy Hara-magedona, le havotany ty mpanompony.​—Apok. 7:9, 10; 16:14, 16.

17. Manino ro mahasoa antsika ty mifandramby soa amy Jehovah?

¹⁷ Lafa tsika mifandramby soa amy Jehovah le tsy haharitsy ty fampijaleani-Satana antsika. Ie koa aza ro haripakini-Jehovah, le tsy hisy sasy. (Rom. 16:20) Isikino iaby zany fialia fiarova rey, le ka apotapotaky mihintsy! Ka mialy raiky. Ampeo rahalahy noho anabavinao reo. Le ka miala amy tari-dalani-Jehovah. Laha manao ani-zay iha, le afaky matoky hoe hampahery noho hiaro anao Babanao be fitiava an-danitsy any iny.​—Isaia 41:10.