1. Ino ty azo volany mikasiky ty rahalahy tanora?

MARO biby ty raha ilà anareo rahalahy tanora amy fiangona eo, satria matanjaky ty ankamaroanareo sady mbo vory hozatsy. (Ohab. 20:29) Maro ty raha fa ataonareo amy fiangona misy anareo eo. Mety fa ta ho mpanampy amy fanompoa ty sisany aminareo, fe mety hieritseritsy hoe mbo mpamaraky marè ty fahitan’olo azy na mbo tsy hay ametraha andraikitsy bevata. Kanefa ndre mbo tanora iha, le misy raha azonao atao mba hahavy anao ho azo atokisa noho hohajàn’olo amy fiangona eo.

2. Ino ty hodinihintsika amy lahatsoratsy toy ato?

² Amy lahatsoratsy toy ato tsika handiniky ty raha niainani-Davida Mpanjaka. Hodinihintsika kelikely koa ty raha niseho tamy Asa noho Josafata. Samby mpanjakani-Joda rozy roe. Hohenteantsika hoe ino ty raha natrehini-lahilahy telo reo, akory ty niatrehan-drozy azy, le ino ty azoni-rahalahy tanora ianara baka amin-drozy.

3. Mivolana raha raiky azoni-tanora anampea ty olo be tao amy fiangona eo.

³ Tena nanan-talenta Davida sady nifandramby soa tamy Jehovah ndre tamin’ie mbo nitanora. Nahay moziky ie ka nampiasany fahaizany zay mba hanampea ani-Saoly, mpanjaka voatendrini-Jehovah. (1 Sam. 16:16, 23) Rahalahy tanora koa  va iha le misy raha hainao azonao anampea olo amy fiangona eo? Maro aminareo ro afaky manao ani-zay. Mety ho hitanao, ohatsy, hoe falifaly ty olo be tao lafa hainy ty mampiasa tablety na fitaova elektroniky hafa amy fianara am-bata noho fivoria. Laha ampiasanao mba hanampea an-drozy zany raha hainao rey le tena hahasoa an-drozy.

4. Ino iaby ty toetsy tokony hananani-ralahahy tanora laha teany ty hanahaky ani-Davida? (Henteo sary amy fononi-gazety toy.)

⁴ Natoroni-Davida tamy ty raha nataony sanandro hoe nahay nandramby andraikitsy noho azo atokisa ie. Nikarakara soa ty aondrini-babany, ohatsy, ie tamin’ie mbo nimpamaraky. Tena tsy mora raha nampanaovy azy io. Nivola tamy Saoly Davida tafara atoy hoe: “Lasa mpiaraky ty aondry noho aosini-babany mpanomponao toy. Niavy ty liona, le nisy orsa koa, samby nangalaky aondry tamy biby maro rey teo. Nihianiko ie le nivangoako ka navotako azy tambavany eny iny.” (1 Sam. 17:34, 35) Nihaini-Davida hoe tsy maintsy mikarakara ani-aondry rey ie ka nisiky herim-po mba hiarova an-drozy. Manahaky ani-Davida ty rahalahy tanora laha manao soa ani-ze andraikitsy amea an-drozy.

5. Laha hentea ty Salamo 25:14, ino ty raha farani-ze bevata azoni-rahalahy tanora atao?

⁵ Niezaky nifandramby marìny tamy Jehovah Davida. Zay ro vatan-draha marè taminy mandilatsy ty herim-pony na ty fahaizany moziky. Tsy Ndranahariny avao ty fandrambesani-Davida ani-Jehovah fa Namany mihintsy. Le tsy hoe namany avao koa aza fa tena Namany biby. (Vakio Salamo 25:14.) Ino ty raha farani-ze bevata azonareo rahalahy tanora atao? Miezaha hifandramby soa amy Jehovah, azy Babanao an-danitsy any iny. Hahazo tombontsoa fanampiny iha laha manao ani-zay.

6. Nanao akory ty fahitan’olo sisany ani-Davida?

⁶ Nieritseritsy ty olo sisany hoe mbo kelikely marè Davida ka mbo tsy hay ametraha andraikitsy. Lafa nanao volontera hialy amy Goliata, ohatsy, ie le nisakanani-Saoly Mpanjaka. “Mbo ajà iha”, hoasany. (1 Sam. 17:31-33) Nivolambola ani-Davida mihintsy aza ty rahalahiny troky raiky aminy fa nao tsy hay anankina andraikitsy ie. (1 Sam. 17:26-30) Fe tsy ho zay ty fahitani-Jehovah azy. Hainy soa Davida. Nivitani-Davida aza ty namono ani-Goliata satria niantehitsy tamy Jehovah, azy Namany iny ie.​—1 Sam. 17:45, 48-51.

7. Ino ty ianaranao baka amy tantarani-Davida?

 ⁷ Ino ty azonao ianara baka amy Davida? Ilà ty mahaliny raha. Laha nisy olo nahita ty nahakelikely anao, le mety ho elaela vo hiova ty fahitany anao. Ataony mbo ho kelikely manahaky nahitany anao taloha iny avao iha. Fe matokisa fa tsy manao ho zay Jehovah. Hainy soa iha le hainy koa hoe ino ty raha ho vitanao. (1 Sam. 16:7) Miezaha hifandramby soa amy Ndranahary. Zay ty nataoni-Davida. Nandiniky ty raha namboarini-Jehovah ie le nieritseretiny soa hoe mampiseho ino mikasiky ani-Mpamoro iny raha rey. (Sal. 8:3, 4; 139:14; Rom. 1:20) Misy raha hafa azonao atao koa. Mangataha amy Jehovah mba hanome hery anao. Laha mikizakizaky anao, ohatsy, ty mpiaraky mianatsy aminao satria Vavolombeloni-Jehovah iha, le mivavaha amy Jehovah soa hampeany hiatriky ani-zay. Oriho ty torohevitsy ameany amy Safàny ao, amy boky noho gazetintsika rey, noho amy video rey. Vomaiky hatòky ani-Jehovah iha saky hitanao hoe manampy anao hiatriky raha sarotsy ie. Lasa hatòky anao koa ty olo lafa mahita anao miantehitsy amy Jehovah.

8-9. Ino ty nanampy ani-Davida nahaliny zisiky niaviani-fotoa haha mpanjaka azy, le ino ty azoni-rahalahy tanora ianara baka amy ty raha nataony?

⁸ Nisy raha sarotsy hafa koa nahazo ani-Davida. Lafa baka nihosora ho mpanjaka ie, le mbo tsy maintsy nandiny an-taony maro zay vo tena lasa mpanjakani-Joda. (1 Sam. 16:13; 2 Sam. 2:3, 4) Ino ty nanampy azy hahaliny tanatini-fotoa zay? Tsy nikivy Davida fa naleony nifantoky amy ze raha azony natao. Lafa nivonivony tamy tanini-Filistina reo tany, ohatsy, ie le nanararaotsy nialy tamy fahavaloni-Israely rey. Niaro ty sisin-tanini-Joda ie lafa nanao ani-zay.​—1 Sam. 27:1-12.

⁹ Ino ty azoni-rahalahy tanora ianara baka amy ty raha nataoni-Davida? Anovo ze azonao atao mba hanompoa ani-rahalahy noho anabavinao reo. Eritsereto ty tantarani-rahalahy Ricardo. * Mbo nifolo tao eo ho eo ie le fa naniry ho mpisava lala maharitsy. Fe nivola taminy ty anti-panahy hoe mbo tsy ho vitany zay. Nikivy va Ricardo na niankenjy? Tsy zay. Vomaiky aza ie nazoto nanompo. Hoy ty asany: “Lafa mieritseritsy ani-raha rey aho, le hitako hoe nahasoa ahy ty nandiny satria mbo nisy raha nila niezahako. Avy le nitsidihiko, ohatsy, ze olo kinto sady nanoma soa koa aho. Nanjary nana mpianatsy Baiboly mihintsy aza aho. Arakaraky ty nanompoako le vomaiky aho nihanahasaky.” Mpisava lala maharitsy mahita vokatsy Ricardo henanizao sady mpanampy amy fanompoa.

10. Ino tse ty nataoni-Davida talohani-handrambesany fanapahan-kevitsy bevata?

¹⁰ Eritsereto koa raha nahazo ani-Davida toy. Nivony ani-Saoly tamy tanini-Filistina rey any ie miaraky amy maramilany rey. Fe nisy fotoa rozy nandeha nialy le tsy maintsy nengan-drozy tan-tanà ao ty valy amin’anan-drozy. Lafa tsy tao amy zay rozy, le nitafihini-fahavalo tanà iny, bakeo nandesini-mpanafiky rey any fianakavian-drozy rey. Lahilahy fa zatsy aly Davida ka tsy sarotsy aminy ty hahita fomba hanavota ani-fianakavian-drozy rey. Fe nila ty fitarihani-Jehovah Davida. Nikaihiny Abiatara mpisoro, bakeo nanontany ani-Jehovah ie hoe: “Hania ani-mpandrava reo va aho?” Namaly Jehovah hoe tokony handeha ie sady ho tratsiny fahavalo rey. (1 Sam. 30:7-10) Ino ty azonao ianara baka amy tantara io?

11. Ino ty azonao atao alohani-hanapa-kevitsy?

¹¹ Mangataha torohevitsy alohani-hanapa-kevitsy. Miresaha amy babanao noho neninao. Hahazo torohevitsy soa koa iha laha  miresaky amy anti-panahy mahay rey. Matoky ani-lahilahy voatendry reo Jehovah le afaky matoky an-drozy koa iha. “Fanomeza” nameany ho ani-fiangona rozy. (Efes. 4:8) Hahay hanapa-kevitsy iha laha manahaky ty finoan-drozy noho mijanjy ty torohevitsy amean-drozy. Ndao amy zay tsika handiniky ty tantarani-Asa Mpanjaka. Ino ty azontsika ianara baka aminy?

12. Nanao akory ty toetsini-Asa Mpanjaka laha vo nanomboky nanjaka ie?

¹² Niambany noho nana herim-po Asa Mpanjaka tamin’ie mbo nimpamaraky. Lafa nimaty, ohatsy, Abia babany le ie ro lasa mpanjaka nandimby azy. Avy le niravany iaby ze sampy tamy tanà iny. “Nandidy ani-Joda koa ie mba hila ani-Jehovah Ndranaharini-razan-drozy, sady hanoriky ty lalàna noho ty didy.” (2 Tan. 14:1-7) Lafa nanafiky an-drozy Zera Etiopianina niaraky amy maramila 1 000 000, le nila fanampea tamy Jehovah Asa. Hoy ty asany: “Nao lahy Jehovah, tsy sarotsy aminao ty manampy olo ndre maro rozy ndre tsy mana hery. Mba ampeo lahy zahay Jehovah Ndranaharinay, fa iha ro ianteheranay.” Hita baka amy safà soasoa reo fa tena natoky Asa hoe ho vitani-Jehovah ty hanavotsy azy miaraky amy vahoakiny rey. Natoky ani-Babany an-danitsy any iny Asa, ka ‘nataoni-Jehovah resy Etiopianina rey.’​—2 Tan. 14:8-12.

13. Ino ty raha nahazo ani-Asa, le ino ty antony?

¹³ Tena mampatahotsy hiatriky maramila 1 000 000 zao. Fe niantehitsy tamy Jehovah Asa ka nandresy. Mampalahelo fa tsy nanao ho zay sasy Asa lafa nisy raha azo volany hoe tsy tena mampatahotsy nahazo azy. Tsy niantehitsy tamy Jehovah, ohatsy, ie lafa nanafiky azy Basa Mpanjaka raty fanahy tamy Israely teo. Syria ro nilàny fanampea. Loza ty vokatsini-fanapahan-kevitsiny zay! Naniraky ani-Hanany mpaminany Jehovah mba hivola tamy Asa hoe: “Satria iha niantehitsy tamy mpanjakani-Syria fa tsy tamy Jehovah Ndranaharinao, le ho bototsy an-tananao ty maramilani-mpanjakani-Syria.” Nanomboky teo le nisy firenena nialy tamy Asa avao. (2 Tan. 16:7, 9; 1 Mpanj. 15:32) Ino ty fianara ho antsika?

14. Akory ty ampisehoanao fa miantehitsy amy Jehovah iha, le ino ty ho vokany laha hentea ty 1 Timoty 4:12?

¹⁴ Miezaha hiambany noho hiantehitsy amy Jehovah avao. Lafa natao batisa iha,  le natoronao hoe tena mino noho matoky ani-Jehovah iha. Falifaly biby Jehovah nandramby anao ho anatini-fianakaviany. Ino ty tokony hataonao? Miantehera aminy avao. Mety ho mora ty manao ani-zay lafa misy fanapahan-kevitsy bevata ataonao. Fe manao akory amy raha hafa? Tena vatan-draha ty matoky ani-Jehovah amy fanapahan-kevitsy iaby ataonao, ndre amy resaky fialam-boly zay na asa na amy raha hafa teanao hatao amy fiaina! Ka miantehitsy amy fahaizanao avao. Aleo mila torolala amy Baiboly ao mifandramby amy raha mahazo anao iny, bakeo oriho raha zay. (Ohab. 3:5, 6) Hanao raha mampifalifaly ani-Jehovah iha laha manao ani-zay sady hohajàn’olo amy fiangona eo.​—Vakio 1 Timoty 4:12.

15. Laha hentea ty 2 Tantara 18:1-3; 19:2, ino ty hadisoa nataoni-Josafata Mpanjaka?

¹⁵ Tsy lavorary manahaky ty olo iaby avao iha, ka mety hanao hadisoa kindraiky. Fe tsy midika zay hoe tsy afaky manao ze azonao atao iha mba hanompoa ani-Jehovah. Diniho ty ohatsini-Josafata Mpanjaka. Nana toetsy soa maro ie. Laha vo nanomboky nanjaka ie, le “nila ty Ndranaharini-babany bakeo nanaraky ty didiny.” Tsy zay avao fa naniraky manamboninahitsy koa ie hitety ty faritsini-Joda mba hampianatsy ty vahoaky mikasiky ani-Jehovah. (2 Tan. 17:4, 7) Fe nisy fotoa ie tsy nahay nanapa-kevitsy. Ino ty vokany? Nisy solontenani-Jehovah nananatsy azy. (Vakio 2 Tantara 18:1-3; 19:2.) Ino ty azonao ianara baka amy tantara io?

16. Ino ty azonao ianara baka amy tantarani-Rajeev?

¹⁶ Rambeso ty torohevitsy amea anao, le bakeo oriho. Mety sarotsy aminao vasa ty manao voaloha lista ty fanompoa ani-Jehovah, manahaky ty tanora iaby avao. Fe ka kivy. Diniho moa ty tantarani-rahalahy Rajeev. Zao ty niresahiny mikasiky ty fotoa nahatanora azy: “Tsy haiko kindraiky hoe ino ty raha hataoko amy fiainako. Tena lahy tanora ka! Sporo noho fialam-boly ro nahatandrena an-tena. Fivoria noho fanompoa zao, tsy raha niazon-tena tavy iaby.” Fe ino ty nanampy ani-Rajeev? Nisy anti-panahy soa fanahy nanoro hevitsy azy. Nivola Rajeev hoe: “Nampeany aho handiniky ani-torolala amy 1 Timoty 4:8 ao iny.” Niambany Rajeev ka norihiny  torohevitsy iny, bakeo ie nieritseritsy hoe ino ty tena vatan-draha aminy. Hoy ty asany: “Nanapa-kevitsy aho hoe hanompo ani-Jehovah amy fomba maro sankarazany, sady zay ro hataoko amy pilasy voalohany amy fiainako.” Ino ty vokany? “Tao vitsivitsy tafarani-nahazoako torohevitsy iny”, hoasani-Rajeev, “le nivoatendry mpanampy amy fanompoa aho.”

17. Manao akory ty fahitani-fiangona ty rahalahy tanora manompo ani-Jehovah?

¹⁷ Tena tsy foini-rahalahy noho anabavy amy fiangona eo nareo rahalahy tanora satria manompo ani-Jehovah miaraky amin-drozy. (Zef. 3:9) Tean-drozy nareo satria mazoto manao ze raha ampanaovy anareo. Tena lafovily amin-drozy nareo.​—1 Jaona 2:14.

18. Laha hentea ty Ohabolana 27:11, manao akory Jehovah lafa mahita rahalahy tanora manompo azy?

¹⁸ Ka halinonareo rahalahy tanora mihintsy fa tea anareo Jehovah sady matoky anareo. Fa nivola ie hoe amy andro farany zao le hisy tanora maro hanao volontera hanompo azy. (Sal. 110:1-3) Hainy fa tea azy nareo sady ta hanao ze fara herinareo amy fanompoa azy. Ka miezaha zany hahaliny raha. Ekeo ze torohevitsy noho fananara amea anao laha nanao hadisoa iha, sady rambeso sahala baka amy Jehovah raha zay. (Heb. 12:6) Imaneo soa ze andraikitsy ankiny aminao. Fa toy ty vatan-draha marè, anovo mahafalifaly ani-Babanao an-danitsy any iny ze raha iaby ataonao.​—Vakio Ohabolana 27:11.