1-2. Ia ty afaky manampy mpianatsy Baiboly handroso ho amy batisa?

“TENA teako ty raha nianarako tamy Baiboly ao”, hoasani-Amy, mipetraky a Fiji any. “Haiko”, hoasany, “fa io ro marina. Fe lafa niaraky matetiky tamy ranadahy noho rahavavy rey aho vo tena niova noho nandroso ho amy batisa.” Hitantsika amy tantarani-Amy io hoe tena marina raha raiky toy: Ho mora amy mpianatsy Baiboly raiky ty handroso ho amy batisa lafa manampy azy ty olo amy fiangona eo.

² Samby afaky mandramby anjara amy fitomboani-fiangona ty mpitory iaby amy fiangona eo. (Efes. 4:16) Nivola ho zao Melanie *, ranabavy mpisava lala mipetraky a Vanuatu any: “Misy fomba fivolana zay manao ho zao hoe olo tanà raiky vo mahabe ajà raiky. Hitako hoe manao ho zay koa ty fanaova mpianatsy. Fiangona raiky vo mahavita manampy olo raiky hilitsy amy fahamarina.” Tsy ho be avao ty ajà raiky laha tsy eo ty longony, ty namany, noho ty mpampianatsy an-dakilasy any. Mampianatsy azy raha bevata rozy sady manampy azy koa. Ho zay koa ty ataoni-mpitory amy fiangona eo. Manome torohevitsy rozy, mampahery, sady miezaky ho modely ho ani-mpianatsy Baiboly rey mba hanampea an-drozy handroso ho amy batisa.​—Ohab. 15:22.

3. Ino ty ianaranao baka amy raha nivolanini-Ana, Daniel, noho Melanie?

³ Manino ty mpitory ro tokony ho falifaly lafa ampeani-mpitory hafa ty olo ampianariny Baiboly? Henteo moa raha nivolanini-Ana, mpisava lala manoka a Moldovỳ any toy: “Tena mila fanampea maro ty mpianatsy raiky lafa manomboky mandroso.  Tsy ho vitan’olo raiky raha zay.” Zao koa ty nivolanini-Daniel, mpisava lala manoka a Moldovỳ any avao koa: “Matetiky mpitory rey ro mivola raha midosiky ty foni-mpianatsy iny, amin’io raha tsy nieritseretiko mihintsy.” Niresaky antony hafa tokony hahafalifaly antsika koa Melanie. Hoy ty asany: “Lafa hitani-mpianatsy iny hoe tea noho midary azy ty mpiara-manompo, le hieky ie hoe vahoakini-Jehovah vatany tsika.”​—Jaona 13:35.

4. Ino ty hodinihintsika amy lahatsoratsy toy ato?

⁴ Fe mety hieritseritsy iha hoe: ‘Ka manao akory moa ty ahafahako manampy azy handroso laha tsy zaho ro mampianatsy azy?’ Ndao hodinihintsika ty valini-fanontanea retoa: Ino ty azontsika atao lafa misy olo mitao antsika hiaraky aminy hampianatsy Baiboly? Ino ty azontsika atao laha manomboky mamonjy fivoria mpianatsy iny? Le ino ty azoni-anti-panahy atao mba hanampea ani-mpianatsy Baiboly rey handroso ho amy batisa?

5. Ino ty tokony hataonao lafa misy mpitory mitao anao hampianatsy miaraky aminy?

⁵ Azy tomponi-fampianara iny ro tompon’andraikitsy voalohany manampy ani-mpianatsy iny hahazo soa ty raha volanini-Safà-Ndranahary. Fe lafa misy mpitory mitao anao hampianatsy miaraky aminy, le tokony hiaraky miasa aminy iha zany hoe hanampy azy. (Mpito. 4:9, 10) Ka ino zany ty azonao atao mba hahafahanao manampy amy fampianara iny?

6. Akory ty hanorihanao ty torolala amy Ohabolana 20:18 ao lafa misy mpitory mitao anao hiaraky mampianatsy aminy?

⁶ Omano fampianara iny. Anontaneo ani-namanao iny tse ty mikasikasiky ani-mpianatsiny iny. (Vakio Ohabolana 20:18.) Afaky manontany iha hoe: “Olo manao akory mpianatsy zao? Mikasiky ino zay ty fianaranareo? Ino ty raha tena teanao ho hainy amy fianara raiky toy? Misy raha tokony hataoko na tsy tokony hataoko va lafa any, sa misy raha tokony hovolaniko na tsy tokony hovolaniko? Ino ty azoko atao mba handrisiky azy handroso?” Mazava ho azy aloha fa tsy hiresaky ty sekireni-mpianatsiny iny mpitory iny, fe hovolaniny aminao ze raha mety hanampy anao. Zay ty nataoni-Joy ranabavy misionera zay. Iresahany ani-raha reo sandrany ze mpitory hiaraky mampianatsy aminy. Nieky ie hoe: “Nanjary ta hanampy ani-mpianatsy iny namako iny sady hainy hoe ino ty tokony hovolaniny lafa mampianatsy zahay.”

7. Manino iha ro mila manoma koa lafa misy mpitory mitao anao hiaraky aminy hampianatsy?

⁷ Laha misy mpitory mitao anao hampianatsy, le soa koa iha laha manoma ani-raha hianaran-drozy iny. (Ezra 7:10) Hoy Daniel, azy rahalahy niresahintsika taloha eroy iny:  “Falifaly aho lafa manoma ani-fianara iny koa ty namako, satria mba misy ventiny ty raha volaniny lafa mandramby anjara ie.” Ho hitani-mpianatsy iny koa amy zay hoe samby nanoma soa nareo, le modely soa ho azy zay. Ndre tsy tena afaky manoma soa ani-fianara iny iaby aza iha, le mba henteo ty hevitsy bevata anatiny ao.

8. Ino ty azonao atao laha teanao hisy heviny ty vavaky ataonao amy fampianara Baiboly rey?

⁸ Tampany bevata amy fampianara rey ty vavaky, ka soa laha eritseretinao sandrany hoe ino ty raha hovolaninao laha iha ro hampanaovy vavaky. Hidosiky ty foni-mpianatsy iny ty raha volaninao amy zay. (Sal. 141:2) Tsy halinoni-Hanae, ranabavy a Japon any zay mihintsy ty vavaky nataoni-ranabavy niaraky tamy mpampianatsy azy iny. Hoy ty asany: “Nihitako tamy vavaky nataony iny hoe nifandramby marìny tamy Jehovah ie, le mba nita hanahaky azy koa aho. Lafa nitononiny tamy vavaky iny tao koa ty anarako le nitsapako hoe mba misy mpitea aho.”

9. Laha hentea ty Jakoba 1:19, ino ty tokony hataonao laha ta hanampy iha lafa miaraky mampianatsy Baiboly amy mpitory hafa?

⁹ Ampeo namanao iny lafa mampianatsy. “Manaraky soa ani-fianara iny ty naman-tena laha ta hanampy”, hoasani-Omamuyovbi, ranabavy mpisava lala manoka a Nigeria any. “Miresaky raha misy ventiny ie fe tsy be resaky satria hainy fa azy tomponi-fampianara iny ro mitariky ani-fianara iny.” Ka ombia zany iha ro tokony hivola, le ino ty tokony hovolany? (Ohab. 25:11) Mijanjina soa lafa miresaky namanao iny noho mpianatsy iny. (Vakio Jakoba 1:19.) Ho parè iha amy zay ka ho afaky hanampy. Mazava ho azy fa mila mandiniky soa tse iha vo mivola. Tsy ho be resaky, ohatsy, iha amy zay, tsy hanampaky ty fanazavani-namanao iny, sady tsy hiresaky raha hafa mihintsy. Tena manampy iha laha miresaky raha boribory, na manao fanohara, na mametraky fanontanea, mba hampazava ani-hevitsy resahy iny. Mety hisy fotoa koa atao raha fa tsy misy azonao volany sasy. Fe laha midera ani-mpianatsy iny noho midary azy iha le hanampy azy handroso.

10. Manino ro mety hanampy ani-mpianatsy Baiboly rey ty raha niainanao?

¹⁰ Tantarao ty raha niainanao. Laha mety hanampy ani-mpianatsy iny, le afaky tantaraninao tsielatsiela aminy hoe akory ty nahitanao fahamarina, ino ty nataonao mba handresea raha sarotsy, na akory ty nanampeani-Jehovah anao. (Sal. 78:4, 7) Mety rey avao le fa hanampy azy. Mety hampatanjaky ty finoany zay na handrisiky azy handroso avao. Vasa mety ho zay koa ro hahitany hoe ino ty hanampy azy amy raha sarotsy iainany. (1 Pet. 5:9) Misy rahalahy mpisava lala mana anara Gabriel zay a Brezily any. Tiarony avao ty raha  nanampy azy tamy ie mbo nianatsy Baiboly. Zao ty nivolaniny: “Lafa zaho naharè tantarani-rahalahy rey le nihaiko hoe hitani-Jehovah ty raha mahazo antsika. Ka laha rozy nahavita niatriky ani-zay, le ho vitako koa toy.”

11-12. Manino mpianatsy Baiboly rey ro tokony horambesintsika soa lafa mamonjy fivoria?

¹¹ Tsy maintsy mamonjy fivoria tsy tampaky ty olo raiky vo ho afaky handroso ho amy batisa. Tena hanampy azy raha io. (Heb. 10:24, 25) Mety mpampianatsy azy iny tse ro nanasa azy voalohany. Lafa avy amy zay ie le afaky mampirisiky azy koa tsika mba hivory avao amy manaraky. Fe akory ty hanaovantsika ani-zay?

¹² Rambeso soa mpianatsy iny. (Rom. 15:7) Laha rambesintsika soa mpianatsy iny lafa avy am-pivoria any, le mety ho teateany ty amy Efitrano Fanjakà any ka mbo ta himpoly hivory ndraiky ie. Tsy hanao raha tafahoatsy tsika lafa miarahaba azy noho midary azy. Arahabantsika soa ie, le ampifankahaizintsika amin’olo iaby ao. Ka mieritseritsy hoe tsy tokony hanao raha iha satria fa misy manampy ie. Miresaha aminy satria mety mbo tsy avy mpampianatsy azy iny, na mety mbo rekitsy amy andraikitsiny amy fiangona ao. Janjino soa ie lafa miresaky le miezaha ho soa fanahy. Ino ty mety ho vokatsini-fandrambesanao azy soa iny? Henteo moa tantarani-Dmitrii toy. Vo tao vitsivitsy zay ty nahavita batisa azy, le mpanampy amy fanompoa ie henanizao. Zao ty nivolaniny lafa nieritseritsy ty fivoria voalohany natrehiny ie: “Nitsanga tamonto ao aho fa tsy nahasaky nilitsy tamy Efitrano Fanjakà ao. Lafa nahita ahy rahalahy raiky zay le nandesiny nilitsy aho. Namonjy ahy iaby ty olo sady niarahaba ahy. Nitseriky biby aho. Tena niteako raha iny ka nainako ho nisy fivoria avao sanandro. Mbo tsy nahita raha ho zay mihintsy aho.”

13. Mety hanao akory ty mpianatsy Baiboly raiky lafa mahita ty fihetsikinao?

¹³ Miezaha ho modely. Ndre ty fihetsikinao avao le fa mety hahavy ani-mpianatsy Baiboly iny hatòky hoe toy ty fivavaha marina. (Mat. 5:16) Zao ty nivolanini-Vitalii, rahalahy mpisava lala a Moldovỳ any: “Nihenteako soa ty olo amy fiangona ao lafa niresaky, nihenteako ty raha ataon-drozy noho ty fihetsikin-drozy. Tena resy lahatsy aho hoe miaraky mandeha amy Ndranahary ty Vavolombeloni-Jehovah.”

14. Manino ty modely ameanao ro mety hanampy olo handroso?

¹⁴ Mila manoriky ty raha ianarany tse ty mpianatsy raiky vo azo atao batisa. Tsy mora raha zay. Fe lafa hitany hoe mahasoa anao ty manoriky ty torolalani-Baiboly, le mety haniry hanahaky anao koa ie. (1 Kor. 11:1) Diniho moa ty tantarani-Hanae, azy niresahintsika  taloha teroy iny. Zao ty nivolaniny: “Hitako maso amy fiainani-ranadahy noho rahavavy rey ty fomba fanoriha ani-raha nianarako rey. Nihitako hoe manao akory mampahery zao, manenga hadisoa zao, noho mampiseho fitiava zao. Miresaky raha soa mikasiky ty olo hafa avao rozy. Tena ta hanahaky an-drozy aho.”

15. Laha hentea ty Ohabolana 27:17, manino tsika ro tokony hinama amy mpianatsy Baiboly rey avao laha mbo mivory rozy?

¹⁵ Minamà amy mpianatsy iny. Laha mbo mivory avao mpianatsy iny, le atorò hoe midary azy iha. (Fil. 2:4) Manino laha mba miresadresaky aminy? Azonao atao, ohatsy, ty miresaky ty hafaleanao mahita ty ezaky ataony. Anontaneo azy ty mikasikasiky ty fianarany Baiboly, ty fianakaviany noho ty asany. Fe ka milimilitsy marè amy ty fiainany sady manaova soa tsy no hametraky fanontanea mety hahamenatsy azy. Vomaiky nareo ho mpinama laha mifampiresaky manahaky ani-zay. Hanampy azy handroso ho amy batisa iha laha minama aminy. (Vakio Ohabolana 27:17.) Mpisava lala maharitsy Hanae henanizao. Zao ty nivolaniny mikasiky ty fotoa nanatrehany fivoria voalohany: “Lafa zaho nahazo nama tamy fiangona eo, le nanjary tsy liniko ty fotoa hivoria. Nivory avao aho ndre nivozaky aza. Niteako ty niaraky amy namako vaovao rey, farany aho tsy ninama amin’olo tsy manompo ani-Jehovah rey sasy. Ta hifandramby marìny amy Jehovah noho amy mpiara-manompo rey aho, ka nanapa-kevitsy hatao batisa.”

16. Ino koa ty raha hafa azonao atao mba hahavy ty mpianatsy Baiboly ho tamà amy fiangona ao?

¹⁶ Laha miova noho mandroso avao mpianatsy iny le ampeo ie hahatsapa hoe tsy olo hafa ie amy fiangona eo. Manao ani-zay iha laha mahay mandramby vahiny. (Heb. 13:2) Nahatsapa ani-zay Denis, mpisava lala a Moldovỳ any, tamy ie mbo nianatsy Baiboly. Hoy ty asany: “Matetiky zahay morovaly nasani-rahalahy reo niaraky amin-drozy. Nitantaranin-drozy taminay ty nanampeani-Jehovah an-drozy. Nampahery anay raha rey, ka vomaiky naniry hanompo ani-Jehovah zahay sady natoky hoe hotahiny laha manao ani-zay.” Lafa lasa mpitory mpianatsy iny le afaky taominao hiaraky hanompo aminao koa. Zao ty nivolanini-Diego, rahalahy a Brezily any: “Maro ty rahalahy nitao ahy hiaraky hanompo amin-drozy. Lasa nifankahay soa zahay. Nahaizako raha maro ty niarahako tamin-drozy sady nanampy ahy hihariniky ani-Jehovah noho Jesosy.”

17. Ino ty azoni-anti-panahy atao mba hanampea ani-mpianatsy Baiboly rey?

¹⁷ Manokana fotoa ho ani-mpianatsy Baiboly rey. Manampy ani-mpianatsy reo handroso ho amy batisa nareo anti-panahy lafa atoronareo hoe teanareo rozy sady dareanareo. Afaky miresaky  amy mpianatsy Baiboly rey matetiky va iha lafa am-pivoria any? Ho hitan-drozy hoe midary an-drozy iha lafa tiaronao ty anaran-drozy, sirtò lafa rozy mamaly teny iny. Afaky manao fandahara matetitetiky miaraky amy mpitory mampianatsy an-drozy rey koa va iha? Mety tsy ho ambinao fa tena hisy vokany bevata amin-drozy raha zay. Zao ty nivolanini-Jackie, ranabavy mpisava lala mipetraky a Nigeria any: “Nitseriky mpianatsiko rey lafa nihain-drozy hoe anti-panahy ranadahy niaraky nampianatsy amiko iny. Nivola aza mpianatsy raiky zay hoe: ‘Tsy hanao ho zao mihintsy pasiteranay. Olo mpanarivo rey avao ro vangìny sady tsy mbeo ie laha tsy amea drala!’ ” Fa mivory mpianatsy io henanizao.

18. Akory ty hanatanterahani-anti-panahy ty andraikitsin-drozy voaresaky amy Asan’ny Apostoly 20:28 ao?

¹⁸ Ampiofano noho ampaherezo mpianatsy Baiboly rey. Mana andraikitsy bevata nareo anti-panahy satria manampy ty mpitory mba hahay hitory noho hampianatsy. (Vakio Asan’ny Apostoly 20:28.) Laha menatsy hitariky fampianara mpitory iny lafa miaraky aminao, le volano ie hoe afaky mitariky iha. Nitantara ho zao Jackie, ranabavy nivolanintsika taloha teroy iny: “Manontany mikasiky mpianatsiko reo matetiky ty anti-panahy. Manome torohevitsy soa rozy lafa sahira aho mitariky fampianara sisany.” Maro ty raha azoni-anti-panahy atao mba hanampea ani-mpitory mampianatsy Baiboly rey. (1 Tes. 5:11) Mbo nivola avao Jackie hoe: “Falifaly aho lafa mampahery ahy anti-panahy reo sady mivola amiko hoe tena tean-drozy ty asa mafy ataoko. Velombelo manahaky olo mino rano manintsy amy andro mafana rey aho lafa mahazo ani-safà reo. Vomaiky aho matoky hoe asa fanaova mpianatsy toy ro asa farany soa ka tena falifaly aho.”​—Ohab. 25:25.

19. Manino tsika ro afaky ho tena falifaly iaby?

¹⁹ Ndre tsy mana mpianatsy aza tsika henanizao le mbo afaky manampy olo handroso ho amy batisa avao. Afaky manao ani-zay tsika laha manoma soa lafa hampianatsy miaraky amy mpitory hafa, le tsy be resaky fa manoha ani-mpitory iny. Lafa avy am-pivoria any mpianatsy iny, le afaky minama aminy tsika sady miezaky ho modely soa ho azy. Ho zay koa ty anti-panahy. Mampahery ani-mpianatsy rey rozy laha manoka fotoa ho an-drozy. Mampahery ani-mpitory rey koa rozy lafa mampiofana noho midera an-drozy. Tena falifaly biby tsika satria afaky manao raha, ndre kelikely aza, mba hanampea olo ho tea ani-Jehovah noho hanompo azy!