Mampieritseritsy vatany tantara io laha tsy dinihy soa. Fe soa ho hay fa miresaky lahilahy roe samby mana anara hoe Mefiboseta andininy reo. Ndao moa hodinihintsika soa tantara io.

Nanan’anakilahy fito noho anakampela roe Saoly Mpanjakan’Israely. Jonatana ty talanolony. Tafarani-zay Saoly niteraky ani-Mefiboseta tamy valy masainy mana anara Rizpa zay. Soa ho hay fa nana anakilahy mana anara Mefiboseta koa Jonatana. Samby Mefiboseta zany ty anarani-anakilahini-Saoly Mpanjaka io noho ty anarani-zafiny io.

Niaraky nipetraky tamy Israelita ty Gibeonita, fe nihalani-Saoly Mpanjaka rozy ka teany ho naripaky. Atao raha maro mihintsy ty Gibeonita nivonoany. Tena tsy nety raha nataony zay. Fa manino? Satria tamy androni-Josoa, le nifanaraky tamy Gibeonita rey ty Israelita hoe tsy hialy amin-drozy mihintsy.​—Jos. 9:3-27.

Mbo nanan-kery avao fifanaraha io tamy androni-Saoly Mpanjaka. Fe tsy nahoani-mpanjaka io zay fa teany haripaky avao Gibeonita rey. Ino ty vokany? Neloky tamy raha nataoni-Saoly noho fianakaviany reo Jehovah. (2 Sam. 21:1) Tafara atoy, lafa nilasa mpanjaka Davida, le niresaky taminy ze Gibeonita tsy nimatini-Saoly. Nitantaranin-drozy taminy raha raty natao tamin-drozy rey. Ta hilongo amy Gibeonita retoa Davida mba hahazoani-tanin-drozy io fitahia baka amy Jehovah, farany ie nanontany hoe: “Ino ty hataoko ho anareo? Akory ty handimbofa ani-fahotà zay?” Tsy drala ro nangatahini-Gibeonita rey fa ty fito lahy tamy anakini-Saoly. “Ta handripaky anay” hoasan-drozy lahilahy iny ka ‘ameo anay anany reo hovonoanay.’ Nekeni-Davida fangatahan-drozy iny.​—Nom. 35:30, 31; 2 Sam. 21:2-6.

Fa nimaty tan’aly any Saoly noho Jonatana tamy zay, fe Mefiboseta anakilahini-Jonatana tsy nimaty. Nisy raha nahazo azy tamin’ie mbo nikely ka nalemy ty tombony. Tsy niaraky tamy dadabeny nandripaky ani-Gibeonita rey zany ie. Davida koa fa nifanta tamy Jonatana hoe hinama aminy avao. Mahasoa ty taranakini-Jonatana afara atoy raha zay, le anatini-zay Mefiboseta. (1 Sam. 18:1; 20:42) Hoy ty Baiboly: “Niferinesani-[Davida] mpanjaka Mefiboseta anakini-Jonatana anakini-Saoly, satria fa nifanta talohani-Jehovah eo Davida noho Jonatana anakini-Saoly.”​—2 Sam. 21:7.

Ka ino ty nataoni-Davida mba hanatanterahany ani-fangatahani-Gibeonita reo iny? Nameany an-drozy ty roe amy anakilahini-Saoly rey, le anatini-zay azy mana anara Mefiboseta iny. Nameany an-drozy koa ty limy amy zafini-Saoly rey. (2 Sam. 21:8, 9) Ino ty vokatsini-raha nataoni-Davida zay? Tsy nisy vokany tamy tanin-drozy iny sasy fandatsaha lio nataoni-Saoly iny.

Ino ty azontsika ianara baka amy tantara io? Fa nivola mazava soa ty lalàna-Ndranahary hoe: “Tsy tokony hovonoa ty anaky laha misy fahotà ataoni-babany.” (Deot. 24:16) Tsy ho nankasitrahani-Jehovah ty raha natao tamy anakilahini-Saoly roe rey noho tamy zafiny limy rey laha tsy nanan-tsiny rozy. Hoy ty tohini-lalàna io: “Ze fahotà vitany avao ro hamonoa ty olo kiraidraiky.” Mety nanao raha nisy ifandrambesany tamy fandripahani-Saoly ani-Gibeonita rey vasa anakilahiny fito nivonoa reo. Nibaby ty vokatsini-raha nataon-drozy avao rozy.

Hita baka amy tantara io fa tsy maintsy voasazy avao ty olo raiky lafa manao raha raty. Tsy hanao ho zao ie hoe zaho ane olo nanaraky baiko avao satria tsy hahafaky azy amy fahotà nataony iny zay. Hoy ohabola raiky zay: “Diniho soa ze andehanani-tombokinao, le ho azo antoky soa ty lalanao iaby.”​—Ohab. 4:24-27; Efes. 5:15.