1. Ino ty raha nivolanini-Jesosy mikasiky ty hanana an-danitsy any?

METY tsy ho hitantsika maso ty raha lafovily sisany. Azy tena lafovily marè rey mihintsy aza ro tsy hitantsika. Tamy Toriteny Tam-bohitsy teo iny, le niresaky hanana an-danitsy any Jesosy. Lafovily mandilatsy ty drala noho hanana an-tany etoy raha rey. Nivola koa ie hoe: “Amy ze misy ty hanananao, le ho any koa ty fonao.” (Mat. 6:19-21) Lafa eritseretintsika ho lafovily ty raha raiky, le hataontsika ze hahazoa azy. Mamory “hanana an-danitsy any” tsika lafa miezaky hana laza soa anatreha-Ndranahary eo. Nihazavanini-Jesosy fa tsy misy afaky manimba na mangalatsy ani-hanana reo mihintsy.

2. a) Laha hentea ty 2 Korintianina 4:17, 18, nampirisiky antsika hifantoky amin’ino Paoly? b) Ino ty hodinihintsika amy lahatsoratsy toy?

² Nampirisiky antsika ty apostoly Paoly mba ‘hampifantoky ty masontsika ... amy raha tsy hita.’ (Vakio 2 Korintianina 4:17, 18) Anatini-raha lafovily tsy hita maso reo ty fitahia ho azontsika amy tontolo vaovao nampitamani-Ndranahary ao. Handiniky raha lafovily tsy hita maso efatsy tsika amy lahatsoratsy toy ato. Tsy ino zay fa ty fifandrambesa amy Ndranahary, ty fahafaha mivavaky, ty fanampeani-fanahy masy, le ty fanohanani-Jehovah noho Jesosy voho ty anjely lafa manompo. Fa afaky mahazo ani-raha reo tsika henanizao. Hodinihintsika koa hoe akory ty ampisehoantsika fa mankasitraky ani-raha lafovily tsy hita maso reo tsika.

3. Ino ty fanomeza farani-ze lafovily fe tsy hita maso, le amy fomba akory ty mampety ani-zay?

³ Ty fifandrambesa amy Jehovah Ndranahary ro fanomeza farani-ze lafovily fe tsy hita maso. (Sal. 25:14) Akory ty hahavy ani-Ndranahary masy iny hinama amin’olombelo tsy lavorary? Afaky manao ani-zay ie, satria “manafaky ty fahotàni-zao tontolo zao” ty sorom-panavota nataoni-Jesosy. (Jaona 1:29) Nampitamà Jehovah fa hanome Mpanavotsy ho ahi-ty olombelo. Natoky ie hoe tsy maintsy ho tanteraky raha zay. Ka ndre mbo tsy nimaty aza Kristy, le fa afaky ninama tamin’olo sisany taloha tany ie.—Rom. 3:25.

4. Mivolana olo ninama-Ndranahary talohani-niaviani-Jesosy tan-tany etoy.

⁴ Eritsereto, ohatsy, lahilahy ninama-Ndranahary niay talohani-Jesosy retoa. Nana finoa matanjaky Abrahama. Arivo tao mahery tafarani-nahafaty ani-Abrahama, le nikaihini-Jehovah hoe “namako” ie. (Isa. 41:8) Midika raha zay fa mbo namani-Jehovah avao ty olo raiky ndre maty aza. Mbo velo anatini-fahatiarova-Ndranahary ao Abrahama. (Lioka 20:37, 38) Ohatsy hafa koa Joba. Lafa nivory raiky ty anjely iaby tan-danitsy any, le nihita tamy raha nivolanini-Jehovah tanatrehan-drozy teo hoe natoky ani-Joba ie. Nivola Jehovah hoe “lahilahy tsy misy tsiny ie, sady marina noho matahotsy Ndranahary voho mifaly ty raty.” (Joba 1:6-8) Ka manao akory ty fahitani-Jehovah ani-Daniela? Tamy tanini-mpanompo sampy tany ie, fe tsy nivaliky avao tanatini-80 tao teo ho eo. Intelo soa ty anjely ro nanome toky ani-lahilahy fa antitsy io hoe “tena lafovily” amy Ndranahary ie. (Dan. 9:23; 10:11, 19) Afaky matoky tsika fa fa tsy linini-Jehovah ty andro hameloma ndraiky ani-namany tena teany rey.—Joba 14:15.

5. Ino ty tokony hataontsika mba ho afaky mifandramby marìny amy Jehovah?

⁵ Fa an-tapitrisany henanizao ty olombelo tsy lavorary falifaly satria afaky mifandramby marìny amy Jehovah. Olo maro amy tany toy iaby, tsy ho lahilahy, tsy ho ampela, tsy ho ajà, ro mampiseho amy ty raha ataon-drozy hoe ta ho nama-Ndranahary rozy. “Mana fifandrambesa marìny” amy Jehovah vatany “ty olo mahity.” (Ohab. 3:32) Nino ty sorom-panavota nataoni-Jesosy rozy ka afaky mifandramby aminy. Nameani-Jehovah antsika raha io, mba hahafahantsika manokam-bata ho azy noho atao batisa. Lafa mandramby ani-fanapahan-kevitsy bevata reo tsika, le ho tafaraky amy Kristiana an-tapitrisany vita fanokanam-bata noho batisa. Ho falifaly tsika satria hana “fifandrambesa marìny” amy Azy farani-anabo amy kila raha iaby zao iny!

6. Ino iaby ty ataontsika mba hampisehoa hoe mankasitraky ty finamantsika amy Ndranahary tsika?

⁶ Ino iaby ty ataontsika mba hampisehoa hoe lafovily amintsika ty finamà amy Ndranahary? Tsy nivaliky tamy Ndranahary tanatini-zato tao mahery Abrahama noho Joba. Tokony tsy hivaliky koa tsika, ndre fa ela aza ty nanompoantsika ani-Jehovah amy tontolo raty toy eto. Manahaky ani-Daniela, le tokony ho lafovily amintsika mandilatsy ty aintsika ty fifandrambesantsika amy Ndranahary. (Dan. 6:7, 10, 16, 22) Hanampy antsika Jehovah ka ho vitantsika ty hiaritsy fitsapà noho hifandramby marìny aminy avao.—Fil. 4:13.

7. a) Laha hentea ty Ohabolana 15:8, manao akory ty fahitani-Jehovah ty vavaky ataontsika? b) Akory ty amaleani-Jehovah ty vavakintsika?

⁷ Raha lafovily tsy hita maso koa ty vavaky. Tea mifampiresaky mikasiky ty raha eritseretin-drozy noho ty fihetseham-pon-drozy  ty mpinama. Manahaky ani-zay koa va ty finamantsika amy Jehovah? Eka! Miresaky amintsika amy alalani-Safàny Jehovah, le ambarany antsika ao ty hevitsiny noho ty fihetseham-pony. Miresaky aminy amy vavaky koa tsika, sady ambarantsika azy ty raha an-tsaintsika noho am-pontsika laliky any. Teani-Jehovah ty mijanjy ty vavaky ataontsika. (Vakio Ohabolana 15:8.) Nama be fitiava Jehovah ka mijanjy ty vavaky ataontsika ie sady mamaly ani-raha rey koa. Mety halaky mivaly ty vavaky sisany. Fa misy fotoa, mety mila mivavaky matetiky mikasiky raha raiky tsika. Fe afaky matoky tsika fa ho voavaly amy fotoa noho amy fomba mety soa raha zay. Mety tsy hitovy amy ty nieritseretantsika azy aloha ty amalea-Ndranahary azy. Mety tsy hangalaky ty fitsapà mahazo antsika, ohatsy, ie fa ameany fahendrea noho hery tsika mba ‘hahazakantsika’ azy.—1 Kor. 10:13.

8. Akory ty ampisehoantsika hoe fanomeza lafovily amintsika ty vavaky?

⁸ Akory ty azontsika ampisehoa hoe tena ankasitrahantsika fanomeza farani-ze lafovily io? Fomba raiky azontsika anaova ani-zay ty fanoriha ty torolalani-Jehovah hoe “ka mieny mivavaky.” (1 Tes. 5:17) Tsy manery antsika hivavaky Jehovah. Mifanohitsy amy zay, fa manaja ty safidintsika ie sady mampirisiky antsika mba ‘haharitsy amy vavaky.’ (Rom. 12:12) Asehontsika hoe mankasitraky ani-fanomeza lafovily io tsika lafa mivavaky tsy tampaky sanandro. Tsy tokony ho halinontsika ty misaotsy ani-Jehovah noho midera azy lafa mivavaky tsika.—Sal. 145:2, 3.

9. Ino ty raha tsapani-rahalahy raiky lafa mivavaky, le ino koa ty raha tsapanao mikasiky ani-raha io?

⁹ Laha fa ela tsika ro nanompo ani-Jehovah sady nahita ty fomba namaleany ty vavaky nataontsika, le vomaiky tsika hankasitraky marè ani-fanomeza lafovily io. Zay ty raha tsapani-Chris, rahalahy nanompo tamy fotoa iaby tanatini-47 tao. Hoy ie: “Falifaly biby aho laha vo mifoha maraindray rey satria afaky mivavaky. Teateako ty miresaky amy Jehovah amy andro mbo mangoantinana iny. Mbo soasoa iaby amin’iny ty raha hitanao. Le vomaiky aho ta hisaotsy azy amy ty raha iaby ameany,  anatini-zay ty tombontsoa mivavaky. Azon-droro soa tena lafa mivavaky amy hariva alohani-hatory sady milamy soa ty eritseritsy.”

10. Manino ro tokony ho lafovily amintsika ty fanahy masi-Ndranahary?

¹⁰ Fanomeza lafovily tsy hita maso ty herini-fanahy masi-Ndranahary. Nampirisihini-Jesosy tsika mba tsy hieny hangataky fanahy masy. (Lioka 11:9, 13) Mampiasa ty fanahiny masy Jehovah mba hanomeza “hery fanampiny” antsika. (2 Kor. 4:7; Asa. 1:8) Afaky miaritsy ani-ze fitsapà mahazo antsika tsika satria manampy ty fanahi-Ndranahary.

11. Manao akory ty anampeani-fanahy masy antsika?

¹¹ Afaky manampy antsika hahavita ty andraikitsy amy fanompoa a Ndranahary ty fanahy masy. Afaky manasoa ty talentantsika noho ty fahaiza fa ananantsika ty fanahi-Ndranahary. Afaky mahita vokatsy soa amy fanompoa tsika, fe tsy ty ezaky manoka nataontsika ro nahavy ani-zay fa ty fanampeani-fanahi-Ndranahary.

12. Laha hentea ty Salamo 139:23, 24, ino ty raha ilàntsika ty fanampeani-fanahy masy?

¹² Asehontsika koa hoe lafovily amintsika ty fanahy masi-Ndranahary lafa mangataky ty fanampeany tsika mba hahaizantsika ani-ze eritseritsy raty na fanirian-draty am-pontsika ao. (Vakio Salamo 139:23, 24.) Laha mivavaky tsika, le hampiasa ty fanahiny Jehovah ka ho haintsika ze eritseritsy raty na fanirian-draty ananantsika. Lafa haintsika amy zay raha zay, le tokony hangataky fanahy masy ndraiky tsika mba hanome hery antsika hanohera ani-eritseritsy na fanirian-draty io. Laha manao ani-zay tsika, le mampiseho hoe tapa-kevitsy hanalavitsy ani-ze raha mety hahavy antsika tsy hampeani-fanahy masini-Jehovah.—Efes. 4:30.

13. Akory ty ahafahantsika mampitombo ty fankasitrahantsika ty fanahy masy?

¹³ Vomaiky hankasitraky ty fanahy masy tsika lafa mandiniky ty raha nivitany amy androntsika zao. Talohani-niakarani-Jesosy an-danitsy any, le nivola tamy mpianatsiny rey ie hoe: “Hahazo hery nareo lafa avy aminareo ty  fanahy masy, ka ho vavolombeloko ... amy faritsy farani-lavitsy amy tany toy any nareo.” (Asa. 1:8) Tanteraky amy fomba miavaky safà reo henanizao. Manampy ty fanahy masy, ka fa mandilatsini-valo tapitrisa noho tampany ty olo manompo ani-Jehovah amy tany toy iaby. Miay amy paradisa ara-panahy koa tsika, satria manampy antsika hana ani-toetsy soa retoa ty fanahi-Ndranahary: Fitiava, hafalea, fiadana, fahari-po, hasoa fanahy, hasoa toetsy, finoa, fahalemeam-panahy, noho fifehezam-bata. “Vokatsini-fanahy” ro ikaiha ani-toetsy reo. (Gal. 5:22, 23) Fanomeza lafovily vatany ty fanahy masy!

14. Ino ty fanohana tsy hita maso azontsika lafa tsika manompo?

¹⁴ Fanomeza lafovily ty hoe “miaraky miasa” amy Jehovah, Jesosy noho ty anjely. (2 Kor. 6:1) Miaraky miasa amin-drozy tsika lafa mandramby anjara amy asa fitoria noho fampianara. Ho zao ty nivolanini-Paoly mikasiky ty vatany noho ze olo manao ani-asa io: “Mpiaraky miasa amy Ndranahary zahay.” (1 Kor. 3:9) Mpiaraky miasa amy Jesosy koa tsika lafa manao fanompoa kristiana. Tiarovo ty raha nivolanini-Jesosy tafarani-nanomezany didy ty mpanori-dia azy mba ‘hanao mpianatsy ty olo amy firenena iaby.’ Hoy ty asany: “Hiaraky aminareo aho.” (Mat. 28:19, 20) Ka manao akory koa ty anjely? Mitariky antsika rozy lafa tsika manambara “vaovao soa zisiky farany ... amy ze mipetraky an-tany etoa.” (Apok. 14:6) Tena fitahia bevata zay!

15. Mivolana ohatsy amy Baiboly ao mampiseho hoe mana anjara asa bevata Jehovah amy fanompoa ataontsika.

¹⁵ Ino amy zay ty raha vitantsika lafa mahazo fanampea baka an-danitsy any tsika? Lafa mamafy ty hafatsy mikasiky Fanjakà iny tsika, le misy voa sasany latsaky am-pon’olo ao ka mamoa. (Mat. 13:18, 23) Ia ty mahavy ani-voani-fahamarina rey hitombo noho hamoa? Nanazava Jesosy fa tsy misy olo afaky hanori-dia azy laha tsy “taomini-Baba.” (Jaona 6:44) Manome ohatsy mazava soa mikasiky ani-zay ty Baiboly. Tiarovo ty raha niseho lafa nitory tamin’ampela maromaro tambalikini-tanàni-Filipy tao Paoly. Henteo moa ty raha volanini-Baiboly mikasiky ani-Lydia, raiky amy ampela reo: “Nisokafini-Jehovah soa ty fony mba handrambesany ty safà nambarani-Paoly.” (Asa. 16:13-15) Manahaky ani-Lydia, le nitao olo an-tapitrisany koa Jehovah.

16. Ia ty tokony hamea voninahitsy lafa mahita vokatsy soa amy fanompoa tsika?

¹⁶ Ia vatany moa ty mahavy antsika hahita vokatsy soa amy fanompoa? Namaly ani-fanontanea zay Paoly lafa nanoratsy ani-safà mikasiky ty fiangona korintianina retoa: “Zaho namboly, Apolosy nanondraky, fa Ndranahary tsy nieny nampitombo. Ka tsy ze namboly na ze nanondraky ro ino, fa azy Ndranahary mampitombo iny.” (1 Kor. 3:6, 7) Manahaky ani-Paoly, le tokony hanome voninahitsy ani-Jehovah avao tsika lafa mahita vokatsy soa amy fanompoa.

17. Akory ty ampisehoantsika hoe ankasitrahantsika ty “miaraky miasa” amy Ndranahary, Kristy noho ty anjely?

¹⁷ Akory ty ampisehoantsika hoe ankasitrahantsika ty tombontsoa “miaraky miasa” amy Ndranahary, Kristy noho ty anjely? Afaky manao ani-zay tsika laha manao ze azontsika atao mba hizarà ty vaovao soa amin’olo hafa. Maro ty fomba azontsika anaova ani-zay, anatini-zay ty fitoria “ankavoria noho santrano.” (Asa. 20:20) Maro koa ty mitory tsy ara-potoa. Lafa mifankahita amin’olo tsy hain-drozy rozy, le miezaky ho soa fanahy, miarahaba bakeo manomboky resadresaky. Laha mijanjy  olo iny, le miezaky rozy mba hiresaky ty vaovao soa mikasiky ani-Fanjakà iny.

18-19. a) Akory ty ahafahantsika manondraky ty voani-fahamarina? b) Mivolana fitantarà mampiseho ty fomba nanampeani-Jehovah ty mpianatsy Baiboly raiky.

¹⁸ “Mpiaraky miasa amy Ndranahary” tsika, ka tsy tokony hamboly voani-fahamarina avao fa hanondraky ani-raha rey koa. Manao ze azontsika atao tsika mba himpolia amy ze olo kinto, na handefa olo hafa ho aminy any, mba hahafahany hanomboky hianatsy Baiboly. Lafa mandeha ty fianaran’olo iny, le mahafalifaly antsika ty mahita hoe manampy azy hanova ty fony noho ty sainy Jehovah.

¹⁹ Diniho ty tantarani-Raphalalani, ambiasa raiky tan’Afriky Antimo any. Teany ty raha nianarany tamy fianarany Baiboly. Fe tena nisarotsy taminy ty naneky ty raha volanini-Safà-Ndranahary mikasiky ty firesaha amy maty. (Deot. 18:10-12) Nengany hanova ty sainy tsikelikely Ndranahary. Tsy nanao ambiasa sasy ie lafa nandeha ty fotoa, ndre zay avao aza ty asa nivelomany. Fa 60 tao henanizao Raphalalani. Hoy ty asany: “Manao mahavelo bevata ani-Vavolombeloni-Jehovah reo aho, satria nanampy ahy tamy raha maro rozy, anatini-zay ty filà asa. Fe Jehovah ro tena isaorako, satria nanampy ahy hanova ty fiainako ie, ka afaky mitory aho henanizao sady Vavolombelony vita batisa.”

20. Tapa-kevitsy hanao ino iha?

²⁰ Nandiniky raha lafovily tsy hita maso efatsy tsika tamy lahatsoratsy toy ato. Ty farani-bevata amy reo, le ty tombontsoa hinama marìny amy Jehovah. Io ro hahafahantsika mahazo ani-fanomeza lafovily tsy hita maso hafa rey, zany hoe ho afaky hamonjy ani-Jehovah amy alalani-vavaky, hahita ty fanampeani-fanahiny masy, sady hahazo fanampea baka an-danitsy any lafa manompo. Loniky lahy tsika ho tapa-kevitsy hampitombo ty fankasitrahantsika ani-raha lafovily tsy hita maso reo, sady tsy hieny hisaotsy ani-Jehovah avao, satria Nama tena soa ho antsika ie.