1. Ino ty raha mety ho nahatseriky anao tamy iha vo nizara ty hafatsy amy Baiboly ao voalohany?

MBO tiaronao va tamy iha vo nahay fahamarina voalohany? Tena nazava soa aminao ty raha nianaranao baka amy Baiboly ao! Nieritseritsy amy zay iha hoe mety mba hijanjy soa ty olo lafa iresahanao ani-raha inoanao iny. Natoky koa iha hoe hanampy an-drozy ho falifaly noho hanan-draha tamany hafatsy amy Baiboly ao rey. (Sal. 119:105) Le ingo iha nizara ani-fahamarina nianaranao rey tamy ty namanao noho ty longonao. Fe nitseriky iha lafa niresaky tamin-drozy. Fa nanino? Tsy nekenin-drozy raha niresahinao rey!

2-3. Nanao akory ty ankamaroan’olo tamy androni-Jesosy lafa nahita azy noho naharè ty hafatsy niresahiny?

² Tsy tokony ho tseriky tsika laha tsy maneky ty hafatsy torintsika ty olo. Fa ho zay ty nataon’olo tamy androni-Jesosy. Nanao fahagagà maro Jesosy sady natorony hoe manoha azy Ndranahary, fe nandà azy ty ankamaroan-drozy. Ohatsy avao tamy Jesosy namelo ani-Lazarozy nimaty iny. Nihitani-mpanohitsy azy rey soa fahagagà io, fe tsy nino mihintsy rozy hoe Jesosy ro Mesia. Vomaiky aza mpitariky fivavaha jiosy rey nila fomba hamonoa ani-Jesosy noho Lazarosy!​—Jaona 11:47, 48, 53; 12:9-11.

³ Fa nihaini-Jesosy fa tsy hino ty ankamaroan’olo hoe ie ro Mesia. (Jaona 5:39-44) Farany nivolaniny mpianatsini-Jaona mpanao batisa rezay hoe: “Sambatsy ze tsy mahita raha mahamarikariky amiko.” (Mat. 11:2, 3, 6) Fa manino ro maro ty olo tsy naneky ani-Jesosy?

4. Ino ty hodinihintsika amy lahatsoratsy toy ato?

 ⁴ Hodinihintsika amy lahatsoratsy toy noho amy lahatsoratsy manaraky ao hoe manino ty olo tamy androni-Jesosy ro tsy nino azy. Hohenteantsika koa hoe manino ro maro ty olo tsy maneky ty hafatsy torintsika. Fa toy ty tena vatan-draha amy raha hianarantsika reo, manino ro tena mila mino ani-Jesosy tsika laha ta hanori-dia azy avao.

5. Mety ho ino ty antony nahavy olo sisany nieritseritsy hoe tsy Jesosy Mesia nampitamany iny?

⁵ Nifantoky tamy ty tanà nahabe ani-Jesosy avao ty ankamaroan’olo, farany tsy naneky azy. Le nieky rozy hoe tena nahay nampianatsy vatany Jesosy sady nahavita fahagagà maro. Fe anakin’olo mpandrafitsy mahantra avao ie amin-drozy. Tsy zay avao fa mbo baka a Nazareta any koa Jesosy, kanefa tanà io atao raha tsy de ahoan’olo loatsy. Nisy lahilahy mana anara Natanaela zay aza nivola ho zao tamy ie mbo tsy nanori-dia ani-Jesosy: “Mba misy raha soa avao va baka a Nazareta ao?” (Jaona 1:46) Mety tsy de niteani-Natanaela loatsy tanà nahabe ani-Jesosy io. Na vasa ie nieritseritsy ani-faminania amy Mika 5:2 ao iny. Resahiny ao hoe hateraky a Betlehema any ty Mesia, fa tsy hoe a Nazareta any.

6. Manino ty olo tamy androni-Jesosy ro tokony ho nahay hoe ie ro Mesia?

⁶ Ino ty raha volanini-Soratsy Masy? Fa nivola Isaia mpaminany hoe tsy hodareani-fahavaloni-Jesosy ‘ty tsipiriany mikasiky ty razambeni-Mesia.’ (Isaia 53:8) Fa nambarani-faminania taloha tany ty ankamaroani-raha reo. Laha nidinihin-drozy soa ty raha tena nisy, le ho nihain-drozy fa nateraky ta Betlehema tany Jesosy sady taranakini-Davida Mpanjaka. (Lioka 2:4-7) Nateraky tamy tanà volanini-faminania amy Mika 5:2 ao iny zany Jesosy. Ka ino avao zany? Nalisalisa nitsara ty olo sady tsy nandiniky ty raha tena nisy iaby, farany rozy tsy nino ani-Jesosy.

7. Manino ro maro ty olo malay mpanomponi-Jehovah?

⁷ Manahaky ani-zay koa va henanizao? Eka. Tsy manan-draha ty ankamaroani-mpanomponi-Jehovah sady tsy malaza. Olo ‘tsy nandia lakilasy noho olo tsotsotra’ ty fahitan’olo an-drozy. (Asa. 4:13) Misy olo mieritseritsy hoe tsy tokony hampianatsy Baiboly ty mpanomponi-Jehovah satria tsy nianatsy tamy lakilasy fianara Baiboly malaza rey tany. Ty sisany koa manao ho zao hoe “Fivavaha Amerikein” ty Vavolombeloni-Jehovah, kanefa tsy mipetraky a Etazinỳ any ty ankamaroani-Vavolombeloni-Jehovah. Resahin’olo sisany hoe tsy mino ani-Jesosy ty Vavolombeloni-Jehovah. Tanatini-tao maro koa, nikaihy hoe “Mpampisaraky mpilongo” na “Mpamono olo” ty vahoakini-Jehovah. Tsy ta ho lasa Vavolombeloni-Jehovah amy zay ty olo sisany satria manday resakin’olo avao fa tsy mahay ty tena marina mikasiky ty vahoakini-Jehovah.

8. Laha hentea ty Asan’ny Apostoly 17:11, ino ty tokony hataon’olo raiky laha teany ho hay hoe ia marina ty tena mpanompo-Ndranahary henanizao?

⁸ Ino ty hanampy olo raiky hahay ty marina mikasiky ty mpanomponi-Jehovah? Mila ataon’olo iny hay soa ty tena marina. Ho zay mihintsy ty nataoni-Lioka, azy mpanoratsy Filazantsara iny. Nifotopotorany soa baka am-boalohany any ty raha iaby sady ‘nihamarininy.’ Teany laha ‘mahazo antoky’ ani-ze raha iaby nianaran-drozy mikasiky ani-Jesosy ze mamaky ani-Filazantsara io. (Lioka 1:1-4) Nanahaky ani-Lioka koa ty Jiosy ta Beria any. Laha vo naharè ty vaovao soa mikasiky ani-Jesosy rozy, le avy le nandiniky ty Soratsy Hebreo, amy zay ho azon-drozy antoky hoe marina ty raha niresahy tamin-drozy.  (Vakio Asan’ny Apostoly 17:11.) Mila mandiniky soa ho zay koa ty olo ta hahay ty marina mikasiky ty mpanomponi-Jehovah henanizao. Tokony hohenteany soa hoe mitovy amy ty raha volanini-Soratsy Masy va ty raha ampianarini-vahoaki-Ndranahary. Mila dinihiny koa ty raha fa vitani-vahoakini-Jehovah henanizao. Laha mandiniky soa ho zay ie, le tsy hitsaratsara na handay resakin’olo avao.

9. Nanao akory ty olo lafa tsy naneky hanao famantara baka an-danitsy any Jesosy?

⁹ Lafa nampianatsy Jesosy le tsy niafa-po ty olo sisany fa mbo nila raha hafa koa. Nao zao tean-drozy Jesosy hanao “famantara baka an-danitsy” any mba hanaporofoa hoe ie vatany ro Mesia. (Mat. 16:1) Mety Daniela 7:13, 14 iny nahavy an-drozy nangataky ani-zay io. Tsy niazon-drozy soa andinin-teny io. Mbo tsy tamy fotoa zay moa ty tokony hahatanterahani-faminania io. Fa porofo ampy soa ho an-drozy fampianarani-Jesosy rey. Tokony fa nino rozy hoe Jesosy ro Mesia, kanefa lafa tsy naneky nanao famantara nilan-drozy iny ie le niala rozy.​—Mat. 16:4.

10. Ino ty raha nataoni-Jesosy ka nanatanteraky ani-raha nisoratini-Isaia mikasiky Mesia iny?

¹⁰ Ino ty raha volanini-Soratsy Masy? Zao ty raha nisoratini-Isaia mpaminany mikasiky ty Mesia: “Tsy hikaikaiky ie na hampiakatsy ty feony, sady tsy hataony re an-dala eny ty feony.” (Isaia 42:1, 2) Tsy nanao raha hahavy olo hifantoky aminy Jesosy lafa nanompo. Tsy nanamboatsy tempoly ie sady tsy nanao siky manoka mampiavaky ty mpitariky fivavaha. Tsy nikaihy tamy anaram-boninahitsy fikaiha mpitariky fivavaha rey koa ie. Ndre tamin’ie nitsarà aza, tsy naneky nanao fahagagà ho ani-Heroda Mpanjaka ndre hahavoan-draha azy raha zay. (Lioka 23:8-11) Marina fa nisy fotoa avao Jesosy nanao fahagagà, fe ty fitoria ty vaovao soa ro tena nifantohany. “Zay ty antony niaviako” tetoy, hoasany tamy mpianatsiny rey.​—Mar. 1:38.

11. Ino ty hevitsy diso ananan’olo henanizao?

¹¹ Manahaky ani-zay koa va henanizao? Eka. Lagilizy be feno sarisary lafovily ro manahira  olo henanizao. Tean-drozy koa anaram-boninahitsy fikaiha mpitariky fivavaha rey, handraky moa fetifety mifandramby amy fivavaha rey. Ataon-drozy kisary tsy hay hoe baka amy fanompoa sampy raha rey. Tsy raha mianatsy mikasiky a Ndranahary noho ty raha teany hatao rozy amy lagilizy rey ao. Tsy manahaky ani-zay tsika lafa mivory fa ianarantsika ze raha teani-Jehovah hataontsika. Malio soa Efitrano Fanjakà ampiasantsika rey, fe tsotsotra noho tsy feno pozipoziny nandania drala be. Tsy manao siky manoka ty mpitariky sady tsy mana anaram-boninahitsy be. Baka amy Baiboly ao iaby ty raha ampianarintsika noho inoantsika. Fe ndre zay, mbo maro avao ty olo tsy maneky ty hafatsy andesintsika satria tsy manao fombafomba noho fety sisany tsika. Tsotra marè hoasan-drozy ty fomba fivavahantsika sady tsy ty raha tean-drozy ho re avao koa ro ampianarintsika.

12. Laha hentea ty Hebreo 11:1, 6, tokony hiory amin’ino ty finoantsika?

¹² Ino ty hanampy antsika tsy hiala ani-Jesosy? Zao ty nivolanini-apostoly Paoly ho ani-Kristiana nipetraky ta Roma tany: “Ty finoa le baka amy ze re, le ze raha re amy zay, baka amy safà mikasiky ani-Kristy.” (Rom. 10:17) Ty fianara Safà-Ndranahary zany ro mampatanjaky ty finoantsika fa tsy resaky fetifety tsy mifanaraky amy Soratsy Masy, ndre atao raha soasoa manao akory ty fahità ani-fety rey. Tokony hiory amy fahaiza marina soa ty finoantsika sady tokony hatanjaky satria “laha tsy amy finoa, le tsy misy raha azo atao mba hampifalifalea a Ndranahary.” (Vakio Hebreo 11:1, 6.) Tsy voatery hahita famantara miavaky baka an-danitsy any zany tsika vo hatòky hoe tena nahita ty marina. Mila dinihintsika soa avao ty fampianarani-Baiboly satria mampatanjaky finoa. Ho resy lahatsy tsika amy zay hoe nahita ty marina ka tsy hisalasala sasy.

13. Manino ro maro ty olo tsy naneky ani-Jesosy?

¹³ Nitseriky ty mpianatsini-Jaona Mpanao Batisa hoe tsy nifaly hany mpianatsini-Jesosy  rey. Fe nihazavanini-Jesosy tamin-drozy fa tsy misy antony tokony hifalian-drozy hany laha mbo velo ie. (Mat. 9:14-17) Fe ndre zay le mbo nanome tsiny ani-Jesosy avao Fariseo noho mpanohitsy azy rey satria ie tsy nanoriky ty fomban-drazan-drozy. Neloky rozy lafa nitaha olo tamy andro Sabata Jesosy. (Mar. 3:1-6; Jaona 9:16) Le mizesta rozy mivola hoe manaja ty Lalànani-Mosesy mikasiky Sabata, kanefa ataon-drozy filan-drala ty amy tempoly ao. Vomaiky nisosotsy rozy lafa nanarini-Jesosy. (Mat. 21:12, 13, 15) Nisy fotoa koa Jesosy nitory tamy synagoga ta Nazareta tany le niresaky tantarani-Israelita taloha tany mba hampisehoa hoe tea tena noho tsy manam-pinoa olo nijanjy azy rey. Niromotsy rozy lafa naharè ani-raha iny. (Lioka 4:16, 25-30) Maro ty olo tsy naneky ani-Jesosy satria ie tsy nanao raha araky ty nieritseretin-drozy.​—Mat. 11:16-19.

14. Manino Jesosy ro nalay ty fomban-draza tsy mifanaraky amy Soratsy Masy?

¹⁴ Ino ty raha volanini-Soratsy Masy? Nivola tamy alalani-Isaia mpaminany Jehovah hoe: “Mamonjy ahy am-bava avao vahoaky toy, sady manome voninahitsy ahy an-tsoniny eny avao, fe ty fony lavitsy ahy, sady mianatsy didin’olombelo ie, ka zay ro ataony ho fatahora ahy.” (Isaia 29:13) Marina ty ahini-Jesosy laha nalay fomban-draza tsy mifanaraky amy Soratsy Masy rey. Mandà ani-Jehovah noho azy Mesia nirahiny iny ze olo mieritseritsy hoe mbo anabo mandilatsy Baiboly ty lalàna ataon’olombelo noho ty fomban-draza.

15. Manino ro maro ty olo tsy tea Vavolombeloni-Jehovah henanizao?

¹⁵ Manahaky ani-zay koa va henanizao? Eka. Maro ty olo tseriky lafa tsy maneky hanao raha sisany miaraky amin-drozy ty Vavolombeloni-Jehovah. Tsy mankalaza aniversera noho Krismasy, ohatsy, ty Vavolombeloni-Jehovah sady tsy manao fetim-pirenena na fombafomba sisany amy fandevena satria tsy mifanaraky amy Soratsy Masy raha reo. Meloky mihintsy aza ty olo sisany lafa maharè ani-zay. Mety mieritseritsy olo rey hoe tena manompo a Ndranahary rozy. Kanefa tsy hahafalifaly azy mihintsy rozy laha ty fombafomba amy tontolo toy eto ro tean-drozy mandilatsy ty raha ampianarini-Baiboly.​—Mar. 7:7-9.

16. Laha hentea ty Salamo 119:97, 113, 163-165, ino ty tokony hataontsika, le ino ty tokony hohalavirintsika?

¹⁶ Ino ty hanampy antsika tsy hiala ani-Jesosy? Mila ampitomboantsika ty fitiavantsika ty lalànani-Jehovah noho ty torolalany. (Vakio Salamo 119:97, 113, 163-165.) Laha tsika tea ani-Jehovah, le tsy hataontsika ze kila fomban-draza tsy teany. Tsy hisy raha hataontsika anabo mandilatsy ty fitiavantsika ani-Jehovah mihintsy.

17. Ino ty raha nieritseretin’olo tamy androni-Jesosy hoe hataoni-Mesia?

¹⁷ Nieritseritsy ty olo sisany tamy androni-Jesosy hoe hanova raha Jesosy. Nitamà rozy hoe hanafaky an-drozy tsy ho ambany fahefàni-Romanina reo ty Mesia satria voaserisery marè rozy. Fe tsy naneky Jesosy lafa nataon-drozy mpanjaka. (Jaona 6:14, 15) Fa natahotsy ty mpisoro noho ty olo sisany tamy zay hoe horavani-Jesosy fanjakà io. Laha nanao ani-zay vatany Jesosy le ho neloky Romanina reo ka ho nalan-drozy ty fahefà namean-drozy ani-mpisoro rey. Maro ty Jiosy tsy nino ani-Jesosy satria niasa loha amy resaky politiky ho zay.

18. Ino amy faminania mikasiky Mesia rey ro tsy de nidarean’olo loatsy?

¹⁸ Ino ty raha volanini-Soratsy Masy? Maro ty faminania miresaky hoe ho Mpialy mahery ty Mesia sady ho mpandresy. Fe mivola koa ty  faminania hafa hoe tsy maintsy ho maty tse ie mba hanafaha ty fahotantsika. (Isaia 53:9, 12) Ka manino zany Jiosy tamy androni-Jesosy rey ro nidiso fanantenà? Satria lafa nandiniky ani-faminania rey rozy, le tsy nidarean-drozy loatsy ze faminania tsy miresaky fanafaha ty raha manahira an-drozy.​—Jaona 6:26, 27.

19. Manino ty olo sisany ro tsy mijanjy antsika?

¹⁹ Manahaky ani-zay koa va henanizao? Eka. Halan’olo tsika satria tsy militsy amy politiky mihintsy. Tokony hifily tsika hoasan-drozy. Kanefa haintsika soa hoe laha mifily olombelo hanjaka amintsika tsika le mandà ani-Jehovah zay. (1 Sam. 8:4-7) Mety hieritseritsy koa ty olo hoe tokony hananga lakilasy noho lapotaly tsika na manao asa soa hafa an-tanà eo. Tsy maneky ty hafatsy torintsika amy zay rozy satria tsy miezaky mamaha ty raha manahira amy tontolo toy eto tsika fa mifantoky amy fitoria ty vaovao soa.

20. Laha hentea ty safàni-Jesosy amy Matio 7:21-23 ao, ino ty raha tokony hifantohantsika?

²⁰ Ino ty hanampy antsika tsy hiala ani-Jesosy? (Vakio Matio 7:21-23.) Tokony hifantoky amy asa nampanaovini-Jesosy antsika iny tsika. (Mat. 28:19, 20) Tsy tokony ho tandrena hamaha ty raha manahira amy tontolo toy eto mihintsy tsika. Tea olo tsika sady miferinay olo. Zay ro mahavy antsika mampianatsy an-drozy mikasiky Fanjakà-Ndranahary noho manampy an-drozy hinama amy Jehovah. Haintsika fa zay ro fomba farani-ze soa azontsika anampea an-drozy.

21. Tokony ho tapa-kevitsy hanao ino tsika?

²¹ Maro ty olo tsy naneky ani-Jesosy tamy androny. Nandiniky antony efatsy nahavy ani-zay tsika tamy lahatsoratsy toy tato. Mety ho reo koa ro mahavy ty olo tsy haneky ty mpanori-dia ani-Jesosy henanizao. Fe reo avao va ty raha mila halavirintsika? Aha. Mbo hiresaky raha efatsy hafa koa ty lahatsoratsy manaraky. Loniky lahy tsika ho tapa-kevitsy tsy hiala amy Jesosy mihintsy sady hiezaky hana finoa matanjaky avao!