1. Laha hentea ty Matio 28:18-20, ino ty didy nameani-Jesosy?

LAFA nivelomy tamy maty Jesosy, le niseho tamy mpianatsiny nivory ta Galilia any rey. Nisy resaky bevata teany hatao amin-drozy. Ino zay? Hitantsika amy Matio 28:18-20 ao ty raha nivolaniny. (Vakio.)

2. Ino iaby ty fanontanea hodinihintsika?

² Natao ho ani-mpanompo-Ndranahary kiraidraiky henanizao koa ty didini-Jesosy mba hanao mpianatsy. Retoa misy fanontanea telo hodinihintsika, mifandramby amy andraikitsy nameani-Jesosy antsika io. Voalohany, ino koa ty raha tokony hataontsika ankoatsini-hoe mampianatsy ty raha taki-Ndranahary amy mpianatsy vaovao? Faharoe, ino ty azoni-mpitory iaby atao mba handroso ty mpianatsy Baiboly amy fiangona eo? Fahatelo, akory ty hanampea ani-ze rahalahy noho anabavintsika fa tsy mitory sasy mba handramby anjara ndraiky amy asa fanaova mpianatsy?

3. Ino ty toromariky voafaritsy soa anatini-didy nameani-Jesosy iny ao?

³ Mazava ty toromariky nameani-Jesosy. Tsy maintsy ampianarintsika ty raha iaby nandidiany ty olo. Fe misy hevitsy bevata raiky tsy tokony hohalinontsika. Tsy nivola Jesosy hoe: ‘Ampianaro an-drozy ze raha iaby nandidiako anareo.’ Fa hoy ty asany: “Ampianaro rozy hanaraky ze raha iaby nandidiako anareo.” Ta hanaraky ani-toromariky io tsika lafa mampianatsy Baiboly, ka tsy ambarantsika avao hoe ino tokony hataony  fa atorontsika koa hoe akory ty anaova azy. (Asa. 8:31) Manino tsika ro mila manao ani-zay?

4. Ino ty fanohara manampy antsika hahay hampianatsy olo hanoriky ty didini-Kristy?

⁴ Akory ty hampianarantsika olo mba hanoriky ani-ze raha nandidiani-Kristy? Toy misy ohatsy. Eritsereto hoe misy olo raiky ampianary manday tomabily. Akory ty hampianara azy mba hanoriky ty lalàna amy fivezivezea? Mety hambarani-mpampianatsy azy iny tse hoe ino ty lalàna tokony horihiny lafa an-dala eny. Fe mbo misy raha hafa tokony hataoni-mpampianatsy iny laha teany hanoriky ani-lalàna rey olo ampianariny iny. Mila ampandesiny tomabily an-dala eny mpianatsy iny, le miaraky aminy eo ie mba hanoro azy ty tokony hataony mba hanoriha ani-raha nianarany rey. Ino ty ianarantsika baka amy fanohara io?

5. a) Laha hentea ty Jaona 14:15 noho 1 Jaona 2:3, mila ampianarintsika hanao ino ty mpianatsy Baibolintsika? b) Akory ty azontsika anampea ty mpianatsintsika mba hanoriky ani-ze volanini-Baiboly?

⁵ Lafa mampianatsy Baiboly olo tsika, le ampianarintsika azy ty raha taki-Ndranahary amintsika. Fe tsy ampy zay, fa mila ampianarintsika koa ie mba horihiny amy fiainany ty raha nianarany. (Vakio Jaona 14:15; 1 Jaona 2:3.) Azontsika atoro azy, ohatsy, hoe akory ty azony anoriha ani-torolala amy Baiboly ao rey lafa an-dakilasy any, am-piasà any, na lafa miala voly. Azontsika tantarà koa ty raha niainantsika mba hahitany hoe voaaro tsika lafa nanoriky ty tari-dalani-Baiboly, sady nahay nandramby fanapahan-kevitsy. Afaky mivavaky miaraky amy mpianatsiny koa tsika, le mangataky fanahy masy amy Jehovah mba hitari-dala azy.​—Jaona 16:13.

6. Ino koa ty tafilitsy amy hoe mampianatsy olo hanoriky ty didini-Jesosy?

⁶ Ino koa ty tafilitsy amy hoe mampianatsy olo hanoriky ty didini-Jesosy? Mila ampeantsika olo ampianarintsika rey mba hampitombo ty faniriany hanao mpianatsy. Mety hatahotsy ty mpianatsy sisany laha vo mieritseritsy hoe hitory. Ka mila manam-pahareta tsika lafa manampy azy hahazo soa ty fahamarina amy Baiboly ao noho hana finoa matanjaky. Hidosiky ty fony raha zay ka ho voatosiky hanao raha ie. Ino ty azontsika atao mba hanampea ty mpianatsintsika haniry hitory ty vaovao soa?

7. Akory ty hanampeantsika mpianatsy Baiboly hampitombo ty faniriany hizara ty vaovao soa?

⁷ Azontsika atao ty mametraky fanontanea manahaky ani-retoa amin’olo ampianarintsika: “Ino ty raha soa nihitanao tamy fiainanao lafa nanoriky ty raha ampianarini-Baiboly iha? Araky ty hevitsinao, mila maharè ani-hafatsy io koa va ty olo hafa? Ino ty azonao atao mba hanampea an-drozy?” (Ohab. 3:27; Mat. 9:37, 38) Asehò ani-mpianatsy iny taratasy mivalo amy Fitaova Fampianara ao rey, le ampifilio azy ze hitany hoe hahakinto ty longony, namany, na ty mpiaraky miasa aminy. Anomezo maromaro amy taratasy mivalo iny ie. Anoharo hoe akory ty azony atao mba ho soa fanahy ie lafa mametraky ani-taratasy mivalo iny. Mazava ho azy fa lafa mpitory tsy vita batisa ie, le teantsika ty hiaraky mitory aminy mba hahafahantsika manampy azy.​—Mpito. 4:9, 10; Lioka 6:40.

8. Manino ty mpianatsintsika ro tena mila mampitombo ty fitiavany a Ndranahary noho ty olo hafa? (Henteo koa ty efajoro hoe “ Ino ty Azontsika Atao mba ho Tena Tea a Ndranahary ty Mpianatsintsika?”)

⁸ Ka halino fa nivola amintsika Jesosy mba hampianatsy ty hafa “hanaraky ani-ze raha iaby” nandidiany. Tafilitsy amy zay didy roe farani-bevata rey, tsy ino zay fa ty fitiava a  Ndranahary noho ty nama. Mifandramby amy asa fitoria noho fampianara didy roe reo. (Mat. 22:37-39) Fa manino? Fitiava ro tena manosiky antsika hanao ty asa fitoria, fitiava a Ndranahary noho fitiava nama. Mety hatahotsy handramby anjara amy fitoria aloha ty mpianatsy Baiboly sisany. Fe azontsika amea toky ie hoe hanampy azy Jehovah ka ho vitany ty handresy ani-tahotsy zay tsikelikely. (Sal. 18:1-3; Ohab. 29:25) Misy efajoro amy lahatsoratsy toy ato, manazava ty raha azontsika atao mba hanampea ty mpianatsintsika hampitombo ty fitiavany a Ndranahary. Afaky manampy ani-mpianatsy vaovao rey koa ty fiangona. Ino ty azon-drozy atao?

9. Ino ty tokony hataoni-olo mianatsy manday tomabily iny mba handrambesany fianara lafovily?

⁹ Eritsereto ndraiky fanohara mikasiky ani-olo mianatsy manday tomabily iny. Ino ty tokony hataony lafa manday tomabily an-dala eny ie, miaraky amy mpampianatsy azy iny? Mila mijanjy ani-mpampianatsy iny ie sady mandiniky ty raha ataoni-mpanday tomabily mahay hafa. Mety hivola aminy, ohatsy, mpampianatsy iny mba hanenty mpanday tomabily raiky soa fanahy ka manenga ty hafa hilitsy alohany eo. Na atorony azy ty mpanday tomabily raiky mahalala fomba, ka mampihena ty jirony mba hahafahani-mpanday hafa mahita lala soa. Fianara lafovily ho ani-mpianatsy iny reo, ka azony orihy lafa ie manday tomabily.

10. Ino ty hanampy ty mpianatsy Baiboly handroso ara-panahy?

¹⁰ Manahaky ani-zay koa ty ataoni-mpianatsy Baiboly raiky manomboky mandeha amy lala mana amy fiaina. Tsy amy mpampianatsy azy iny avao ie ro mandramby fianara, fa hitany koa ty modely soani- mpanomponi-Jehovah hafa. Ka ino zany ty tena hanampy ani-mpianatsy iny handroso ara-panahy? Ty fanatreha fivoria. Ino ty antony? Lafa mijanjy ty raha ampianary am-pivoria any ie, le hitombo ty fahaizany, hihamatanjaky ty finoany, sady hitombo ty fitiavany a Ndranahary. (Asa. 15:30-32) Ankoatsini-zay, le mety hataoni-mpampianatsy iny ze hifankazarany amy rahalahy noho anabavy mana fiaina mitovitovy amy ty azy. Ho hitany hoe mifankatea vatany ty rahalahy noho anabavy amy fiangona ao. Diniho moa ohatsy manaraky retoa.

11. Ino iaby, ohatsy, ty raha mety ho hitani-mpianatsy amy fiangona eo, le ino ty mety ho vokatsini-zay aminy?

¹¹ Miteza raiky ty anakiny ampela mpianatsy Baiboly toy. Mahita ranabavy miteza raiky ty anakiny koa ie. Tseriky ie satria tena miezaky mafy ranabavy io manday ani-anakiny rey mivory. Lahilahy raiky mianatsy Baiboly toy koa, mialy ay mba hiala amy sigara. Misy mpitory raiky zay nanahaky azy mihintsy, fe nahavita niala amy sigara. Lafa nifankazatsy rozy le nitantaranini-mpitory iny taminy hoe lafa nitombo ty fitiavany ani-Jehovah, le voatosiky hanoriky ty didi-Ndranahary ie. (2 Kor. 7:1; Fil. 4:13) Lafa baka niresaky ani-zay rahalahy iny, le nivola hoe: “Ho vitanao koa ty hiala an’io.” Nifalifaly mpianatsy iny sady natoky hoe afaky hanao ani-zay ie. Misy somonjara raiky mpianatsy Baiboly, mahita ranabavy tanora falifaly manompo ani-Jehovah. Lafa mahita ani-zay ie, le nanjary teany ho hay hoe manino ranabavy iny ro falifaly avao.

12. Manino tsika ro mivola hoe samby afaky manao raha ty olo kiraidraiky amy fiangona eo mba hanampea ty mpianatsy Baiboly?

¹² Lafa mifankahay amy mpitory sankarazany ty mpianatsy Baiboly, le manjary hainy hoe manao akory manoriky ani-didini-Kristy mikasiky fitiava a Ndranahary noho fitiava nama iny. (Jaona 13:35; 1 Tim. 4:12) Ankoatsini-zay, le ho azoni-mpianatsy Baiboly iny atao ty miana-draha baka amy mpitory miatriky raha sarotsy mitovy amy ty mahazo azy.  Hitany baka amy rey hoe ho vitany ty hanao ze fiovà ilà mba hanjary mpianatsini-Kristy. (Deot. 30:11) Samby afaky manao raha ty olo kiraidraiky amy fiangona eo mba hanampea ty mpianatsy Baiboly handroso ara-panahy. (Mat. 5:16) Ino iaby ty ezaky ataonao mba hampirisiha mpianatsy Baiboly hanatriky fivoria?

13-14. Akory ty nandaisani-Jesosy ani-apostoliny rey lafa nikivy rozy?

¹³ Ta hanampy ani-rahalahy noho anabavintsika fa tsy mitory sasy rey tsika, mba hahavy an-drozy handramby anjara amy asa fitoria noho fampianara ndraiky. Ho hitantsika amy fomba nandaisani-Jesosy ani-apostoliny kivy rey hoe ino ty azontsika atao henanizao.

¹⁴ Tamy farani-fanompoani-Jesosy tan-tany etoy, lafa narìny ty hahafaty azy, le “niala azy” apostoly rey “ka nilay.” (Mar. 14:50; Jaona 16:32) Ino ty nataoni-Jesosy tamy fotoa nahakivy ani-apostoliny rey? Tsiela tafarani-nameloma azy, le nivola tamy mpianatsiny vitsivitsy Jesosy hoe: “Ka matahotsy! Mandehana mivola amy rahalahiko rey [hoe nivelomy ndraiky aho].” (Mat. 28:10a) Tsy nanary ani-apostoliny rey Jesosy. Ndre nanenga azy aza rozy, le mbo nikaihiny hoe “rahalahiko.” Namindra fo noho nanenga hadisoa manahaky ani-Jehovah vatany Jesosy.​—2 Mpanj. 13:23.

15. Manao akory ty fahitantsika ani-azy fa tsy mitory sasy rey?

¹⁵ Tena mila ze hahasoa ani-azy nijano nitory rey tsika. Teantsika rahalahy noho anabavintsika rey! Mbo tiarontsika avao ty asa soa nataoni-mpiara-manompo amintsika rey tamim-pitiava, mety ho tanatini-tao maro mihintsy. (Heb. 6:10) Le vatany many an-drozy tsika! (Lioka 15:4-7) Laha manahaky ani-Jesosy tsika, akory ty ampisehoantsika hoe midary an-drozy tsika?

16. Akory ty ampisehoantsika hoe midary ani-rahalahy noho anabavintsika fa tsy mitory sasy rey tsika?

¹⁶ Asao hivory rozy. Nampahery ani-apostoly kivy rey Jesosy ka nanasa an-drozy hivory. (Mat. 28:10b; 1 Kor. 15:6) Manahaky ani-zay koa ty ataontsika. Asantsika hanatriky fivoria azy fa tsy mitory sasy rey, laha mbo tsy manao ani-zay. Mety mila manao ani-zay matetiky tsika zisiky iavian-drozy. Azo antoky fa nifalifaly Jesosy lafa niavy tamy fanasany iny mpianatsiny rey. Ho falifaly manahaky ani-zay koa tsika!—Ampitovizo amy Matio 28:16 noho Lioka 15:6.

17. Ino ty tokony hataontsika laha misy olo fa tsy nitory sasy manatriky fivoria?

¹⁷ Rambeso soa rozy. Lafa nifankahita tamy mpianatsiny rey Jesosy, le nataony ze hahatsapan-drozy hoe nirambesy soa rozy. Tsy nandiny an-drozy hamonjy azy ie, fa ie ro namonjy an-drozy noho niresaky tamin-drozy. (Mat. 28:18) Ino ty tokony hataontsika laha misy olo fa tsy nitory sasy avy amy Efitrano Fanjakà any? Tokony hamonjy azy tsika, le handramby soa azy. Mety hatahotsy aloha tsika hoe tsy hahita raha hovolany. Azontsika atao avao ty mivola hoe falifaly tsika mahita azy, fe tsy manao ze hahamenatsy azy.

18. Ino ty azontsika atao mba hampahereza ani-azy fa tsy mitory sasy rey?

¹⁸ Ampaherezo rozy. Mety ho nieritseritsy mpianatsini-Jesosy rey hoe tsy ho vitan-drozy ty hitory amy tany toy iaby. Nanome toky ani-mpianatsiny rey Jesosy lafa nivola hoe: “Hiaraky aminareo avao aho.” (Mat. 28:20) Nisy vokany va raha zay? Eka. Tsy ela tafarani-zay, le nazoto “nampianatsy noho nitory ty vaovao soa” rozy. (Asa. 5:42) Mila amea toky koa azy fa tsy nitory sasy rey. Mety hatahotsy rozy lafa  mieritseritsy hoe hitory ndraiky. Azontsika amea toky rozy hoe tsy handeha raiky rozy. Lafa parè rozy, le afaky miaraky amin-drozy tsika. Azo antoky fa ho tean-drozy ty hampeantsika lafa manomboky mitory ty vaovao soa ndraiky rozy. Laha asehontsika amy azy fa tsy mitory sasy rey hoe rahalahy noho anabavintsika ty fahitantsika an-drozy, le mety himpoly ndraiky rozy, ka ho falifaly ty fiangona iaby.

19. Ino ty faniriantsika, le manino?

¹⁹ Zisiky ombia tsika ro tokony hitory noho hampianatsy? Zisiky hiaviani-fitamperani-rafitsini-tontolo toy. (Mat. 28:20) Ho vitantsika va ty hanatanteraky ani-asa nampanovini-Jesosy antsika io? Tapa-kevitsy hanao ani-zay tsika! Falifaly tsika manome ty fotoantsika, ty herintsika noho ty hananantsika mba hilà ani-ze olo mana “fo soa mba hahazoa fiaina zisiky farany.” (Asa. 13:48) Manaraky ty modelini-Jesosy tsika lafa manao ani-zay. Nivola ie hoe: “Ty haniko, le ty manao ty sitraponi-azy naniraky ahy iny noho mahavita ty asany.” (Jaona 4:34; 17:4) Zay koa ty faniriantsika. Ta hamita ani-asa nankiny tamintsika iny tsika. (Jaona 20:21) Sady teantsika haharitsy amy asa io miaraky amintsika koa ty olo hafa, anatini-zay azy fa tsy mitory sasy rey.​—Mat. 24:13.

20. Laha hentea ty Filipianina 4:13, manino tsika ro hahavita ani-asa nampanovini-Jesosy iny?

²⁰ Marina aloha fa tsy mora ty hanatanteraky ani-asa bevata nanirahani-Jesosy iny, fe tsy miasa raiky tsika. Fa nampitamà Jesosy hoe hiaraky amintsika ie. “Mpiaraky miasa amy Ndranahary” tsika lafa manao mpianatsy, sady “tafiharo amy Kristy.” (1 Kor. 3:9; 2 Kor. 2:17) Dikani-zay, ho vitantsika io. Tombontsoa bevata sady mahafalifaly ty mandramby anjara amy asa io noho manampy ty hafa hanao azy!—Vakio Filipianina 4:13.