1. Ino ty hampahery antsika lafa mahatiaro ho mialy raiky tsika, na tsy mahavita miatriky ty raha manahira mahazo antsika? (Salamo 118:5-7)

FA NISY fotoa va iha nahatsapa ho nialy raiky, sady tsy nisy olo nanampy anao hiaritsy ty raha manahira nahazo anao? Maro ty nahatsapa ani-zay, anatini-zay mpanomponi-Jehovah tsy nivaliky rey. (1 Mpanj. 19:14) Laha zay ty mahazo anao, le tiarovo fampitamanani-Jehovah toy: “Tsy hanenga anao mihintsy aho, sady tsy hahafoy anao mihintsy.” Afaky matoky tanteraky tsika, le hivola hoe: “Jehovah ro mpanampy ahy, ka tsy hatahotsy aho.” (Heb. 13:5, 6) Nanoratsy ani-safà reo ho ani-Kristiana ta Jodia any ty apostoly Paoly, tamy tao 61 tany ho any. Mampitiaro antsika ani-raha nisoratini-mpanao salamo amy Salamo 118:5-7 ao iny safàny reo. (Vakio.)

2. Ino ty hodinihintsika amy lahatsoratsy toy ato, le ino ty antony?

² Manahaky ani-mpanao salamo iny, le nihaini-Paoly baka amy ty raha niainany hoe nanampy azy avao Jehovah. Roe tao mahery talohani-nanoratani-Paoly taratasy ho ani-Hebreo reo, ohatsy, le nanao lia an-tsambo mampatahotsy ie satria nisy tsioky be tamy zay. (Asa. 27:4, 15, 20) Hita tamy liani-Paoly io noho tanatini-tao maro talohan’io hoe Mpanampy ani-Paoly vatany Jehovah. Tamy fomba sankarazany ty nanaovani-Jehovah ani-zay, fa hodinihintsika ty telo aminy. Ho hitantsika hoe nanome fanampea tamy alalani-Jesosy noho ty anjely Jehovah, le tamy alalani-manam-pahefà noho tamy alalani-mpiara-manompo. Lafa mandiniky ani-raha niseho tamy fiainani-Paoly reo tsika, le vomaiky hatòky ani-fampitamana-Ndranahary antsika iny hoe hamaly ty koiky vonjy ataontsika ie.

3. Ino ty raha mety ho nampiasa loha ani-Paoly, le ino ty antony?

³ Nila fanampea Paoly. Tamy tao 56 tany ho any, le nisy vahoaky nitaritariky azy ambalikini-tempoly a Jerosalema any, sady nanao ze hahafaty azy. Hamarain’iny lafa nandesy tamy Fitsarà Anabo eo Paoly, le fa ho nifandritaritani-fahavalony rey. (Asa. 21:30-32; 22:30; 23:6-10) Mety ho niasa loha amy zay Paoly hoe: ‘Zisiky ombia lahy ty hahavitako miaritsy ani-fampijalea toy?’

4. Akory ty nampiasani-Jehovah ani-Jesosy mba hanampea ani-Paoly?

⁴ Ino ty fanampea niazoni-Paoly? Tamy haly tafarani-nanambora azy iny, le nitsanga tanilany eo “ty Tompo”, zany hoe Jesosy, ka nivola hoe: “Mahereza! Fa manahaky ty nanazavanao soa ty mikasiky ahy ta Jerosalema etoa ro tsy maintsy hitorianao a Roma any koa.” (Asa. 23:11) Tena nampahery ani-Paoly fampitamana zay! Nidera ani-Paoly tse Jesosy amy ty fitoria nataony ta Jerosalema eo. Bakeo nampitamà ie hoe ho avy soa a Roma any Paoly, le hitory koa. Tsy maintsy nahatsapa ho voaaro Paoly lafa nahazo ani-fampitamana zay, manahaky anakajà tsy matahotsy lafa mianky an-tratrani-babany eo rey.

5. Akory ty nampiasani-Jehovah anjely mba hanampea ani-Paoly? (Henteo sary amy fononi-gazety toy.)

⁵ Ino koa ty raha sarotsy natrehini-Paoly? Roe tao teo ho eo tafarani-raha niseho ta Jerosalema any iny, le nandeha sambo ho an’Italỳ any Paoly. Nisy tsioky be tamy zay, le nieritseritsy mpiasa an-tsambo rey noho ty mpandeha hoe ho maty rozy. Fe tsy natahotsy Paoly. Ino ty antony? Hoy ty asany tamin’olo iaby tanatini-sambo iny ao: “Nisy anjelini-azy Ndranahary tompoko noho anaovako fanompoa masy iny nitsanga tanilako eo nankaly, le nivola hoe: ‘Ka matahotsy, Paoly, fa tsy maintsy mitsanga anatrehani-Kaisara eo iha. Soa fanahy Ndranahary ka hiaro ty aini-ze olo iaby miharo lia aminao anatini-sambo toy ato.’ ” Nampiasa anjely Jehovah, le nampoliny ndraiky raha nampitamaniny ani-Paoly tamy alalani-Jesosy iny. Niavy soa ta Roma any vatany Paoly.​—Asa. 27:20-25; 28:16.

6. Ino ty fampitamanani-Jesosy mampahery antsika, le ino ty antony?

⁶ Akory ty anampeani-Jesosy antsika? Hanoha antsika Jesosy, manahaky ty nataony tamy Paoly. Nampitamà ze olo iaby manori-dia azy, ohatsy, Jesosy hoe: “Hiaraky aminareo avao aho, zisiky hiaviani-fitamperani-rafitsini-tontolo toy.” (Mat. 28:20) Mampahery antsika safàni-Jesosy reo. Fa manino? Satria sarotsy amintsika ty miatriky ty andro sisany. Lafa misy longontsika maty, ohatsy, le tsy malahelo  anatini-andro vitsivitsy avao tsika fa mety ho an-taony maro mihintsy. Ty sisany miatriky fotoa sarotsy satria fa mihaantitsy. Ty ilany koa kivy. Fe ndre zay, le mana hery hiareta tsika satria haintsika hoe miaraky amintsika “avao”  Jesosy, tafilitsy amy zay ty fotoa farani-ze sarotsy amy fiainantsika.—Mat. 11:28-30.

7. Akory ty anampeani-Jehovah antsika henanizao, laha hentea ty Apokalypsy 14:6?

⁷ Manome toky antsika ty Safà-Ndranahary hoe manampy antsika amy alalani-anjely Jehovah. (Heb. 1:7, 14) Manoha noho mitari-dala antsika, ohatsy, ty anjely lafa tsika mitory ty “vaovao soani-Fanjakà iny” amy “firenena noho foko noho olo samby hafa fivolana.”​—Mat. 24:13, 14; vakio Apokalypsy 14:6.

8. Akory ty nampiasani-Jehovah ani-sefoni-maramila iny mba hanampy ani-Paoly?

⁸ Ino ty fanampea niazoni-Paoly? Tamy tao 56, le nameani-Jesosy toky Paoly fa ho avy soa a Roma any ie. Fe nisy Jiosy ta Jerosalema ao nanao tetiky mba hamonoa ani-Paoly. Lafa naharè mikasiky ani-tetiky iny Klaodio Lysia, sefoni-maramila romanina, le nanao raha mba hanavota ani-Paoly. Avy le naniraky maramila maro Klaodio mba hiaro ani-Paoly noho hanatitsy azy a Kaisaria any, amy lala 105 kilomety baka a Jerosalema eo. Nandidy Feliksa Governera lafa ta Kaisaria any hoe ‘hambena amy lapam-panjakàni-Heroda ao’ Paoly. Tsy afaky nanao na ino na ino sasy Jiosy ta ho namono azy rey.​—Asa. 23:12-35.

9. Ino ty nataoni-Festosy Governera mba hanampea ani-Paoly?

⁹ Mbo nigadra ta Kaisaria any Paoly roe tao tafara atoy. Festosy ro governera nisolo ani-Feliksa tamy zay. Nisoloho tamy Festosy Jiosy reo mba handesy hotsarà a Jerosalema any Paoly, fe tsy naneky Festosy. Mety fa nihainy vasa hoe nivony ty sisany amy Jiosy reo “mba hanafiky noho hamono ani-Paoly an-dala eny.”​—Asa. 24:27–25:5.

10. Ino ty nataoni-Festosy Governera lafa nivola Paoly hoe hampakatsy ty fitsarà amy Kaisara any?

¹⁰ Tafara atoy, le nitsarà ta Kaisaria ao Paoly. “Nila hatò tamy Jiosy reo” Festosy, ka nanontaneany Paoly hoe: “Teanao va ty hiakatsy a Jerosalema any noho hotsarà alohako eo mikasiky ani-raha zay?” Haini-Paoly fa tsy maintsy ho maty ie laha a Jerosalema any. Hainy koa hoe ino ty tokony hataony mba hanavota ty ainy, le ho avy a Roma any, ka hanohy ty fanompoany. Hoy ty asany: “Ampiakariko amy Kaisara any raha toy!” Lafa baka niresaky tamy mpanoro hevitsiny rey Festosy, le nivola tamy Paoly hoe: “Nampiakarinao amy Kaisara any raha toy, ka le ho amy Kaisara any vatany iha.” Nanapa-kevitsy handefa ani-Paoly a Roma any Festosy mba hanavota azy amy fahavalony rey. Kely sisa le ho a Roma any Paoly, ka ho lavitsy ani-Jiosy ta ho namono azy rey.​—Asa. 25:6-12.

11. Ino ty fanomezan-toky nisoratini-Isaia ka mety ho nieritseretini-Paoly?

¹¹ Mety ho nametsivetsy ty fampitandremani-Isaia mpaminany Paoly lafa nandiny ty fotoa handehanany an’Italỳ any. Zao ty nampanoratini-Jehovah ani-Isaia: “Manaova tetiky, fa ho rava zay! Volano ze hovolaninao, fa tsy ho vano zay satria miaraky aminay Ndranahary!” (Isa. 8:10) Haini-Paoly hoe hanampy azy Ndranahary. Azo antoky fa nampahery azy raha zay sady nanampy azy hiaritsy ty raha sarotsy mandiny azy.

12. Akory ty nandaisani-Julio ani-Paoly, le ino ty raha nihaini-Paoly vokatsini-zay?

¹² Tamy tao 58, le nanomboky ty liany ho an’Italỳ any Paoly. Mbo nigadra ie tamy zay, ka Julio sefoni-maramila romanina ro niandraikitsy  azy. Nana fahefà amy Paoly zany Julio nanomboky teo, na hampijaly azy na ho soa fanahy aminy. Akory ty hampiasany ani-fahefàny zay? Hamarain’iny, lafa niavy amy tanà raiky nijanonan-drozy voalohany rozy, le “nisoa fanahy tamy Paoly Julio ka nengany ie handeha amy namany rey any.” Nanavotsy ani-Paoly mihintsy aza Julio tafarani-zay. Tamy fomba akory? Niteani-maramila rey hovonoa ty gadra iaby tanatini-sambo iny ao, fe nanaka an-drozy tsy hanao ani-zay Julio. Ino ty antony? “Ta hiaro ty aini-Paoly” ie. Mety ho nihaini-Paoly baka amy zay hoe niaro noho nanampy azy Jehovah, ka manam-boninahitsy soa fanahy io ro nampiasany.​—Asa. 27:1-3, 42-44.

13. Akory ty mety hampiasani-Jehovah ty olo mana fahefà?

¹³ Ino ty fanampea azontsika? Mety hampiasa ty herini-fanahiny masy Jehovah, ka hataony ze hahavy ani-manam-pahefà rey hanatanteraky ty eritseritsiny, laha mifanaraky amy ty fikasàny raha zay. Zao ty raha nisoratini-Solomona Mpanjaka: “Sahala amy tabika an-tanani-Jehovah eo ty foni-mpanjaka, ka aviony hana amy ze itiavany azy.” (Ohab. 21:1) Ino ty teani-ohabola io hovolany? Azon’olombelo atao ty mihaly tabika, bakeo alefany amy ze lala teany handefasa azy rano iny. Manahaky ani-zay koa Jehovah. Afaky mampiasa ty fanahiny ie mba hampiova hevitsy ty olo raiky mana fahefà, amy zay hanao raha mifanaraky amy sitrapony. Lafa miseho raha zay, le manjary voatosiky hanao fanapahan-kevisy mahasoa ty vahoaki-Ndranahary ty manam-pahefà.​—Ampitovizo amy Ezra 7:21, 25, 26.

14. Laha hentea ty Asan’ny Apostoly 12:5, afaky mivavaky ho an’ia iaby tsika?

¹⁴ Ino ty azontsika atao? Azontsika atao ty mivavaky “ho ahi-ty mpanjaka noho ze mana pilasy anabo”, lafa rozy mandramby fanapahan-kevitsy mety hisy vokany amy fiaina noho fanompoantsika. (1 Tim. 2:1, 2; Neh. 1:11) Manahaky ty nataoni-Kristiana tamy taonjato voalohany, le tsy mieny mivavaky amy Ndranahary ho ani-rahalahy noho anabavintsika gadra rey koa tsika. (Vakio Asan’ny Apostoly 12:5; Heb. 13:3) Azontsika atao koa ty mivavaky mikasiky ty mpiamby gadra miandraikitsy ani-rahalahy noho anabavintsika rey. Afaky mangataky amy Jehovah tsika mba hitariky ty sain’olo rey, amy zay rozy ho voatosiky hanao raha manahaky ani-Julio noho ho “soa fanahy” amy mpiara-manompo amintsika gadra rey.

15-16. Akory ty nampiasani-Jehovah ani-Aristarko noho Lioka mba hanampea ani-Paoly?

¹⁵ Ino ty fanampea niazoni-Paoly? Lafa nandeha ho a Roma any Paoly, le ty mpiara-manompo aminy matetiky ro nampiasani-Jehovah mba hanampy azy. Retoa misy ohatsy vitsivitsy.

¹⁶ Lafa nandeha a Roma any Paoly, le nanapa-kevitsy hiaraky aminy namany roe rey, tsy ia zay fa Aristariko noho Lioka. * Tsy resahini-fitantarà iny hoe nahazo toky baka amy Jesosy rozy roe na ty raiky amin-drozy. Fe ndre zay le niparè hiaraky amy Paoly rozy, ndre mety hamoizan-drozy ty ain-drozy aza. Fa tanatini-lia nanahira iny rozy vo nahay hoe ho voaaro. Ka azo antoky fa lafa niondra an-tsambo ho a Kaisaria any Aristarko noho Lioka, le tsy maintsy ho nanao vavaky baka amy fo Paoly mba hisaora ani-Jehovah satria nampiasa ani-rahalahy roe be herim-po reo ie mba hanampy azy.​—Asa. 27:1, 2, 20-25.

17. Akory ty nampiasani-Jehovah ty rahalahy amy fiangona eo mba hanampea ani-Paoly?

¹⁷ Imaro Paoly ro nahazo fanampea baka amy ty mpiara-manompo taminy, tamy lia nataony iny. Lafa nijano tamy tanàni-Sidona teo, ohatsy, rozy le nengani-Julio Paoly mba “handeha amy namany rey any soa hokarakaran-drozy.” Tafarani-zay, lafa tamy tanàni-Potioly ao Paoly miaraky amy namany rey, le “nahita rahalahy.” ‘Nisoloho amin-drozy rahalahy rey mba hijano amin-drozy eo fito andro.’ Nikarakara ani-ze raha nilàni-Paoly noho ty namany ty Kristiana tamy pilasy rey. Azo antoky fa nifalifaly biby koa rozy lafa niresaky tantara mampahery amin-drozy Paoly. (Ampitovizo amy Asan’ny apostoly 15:2, 3.) Nanohy ty lian-drozy ndraiky Paoly noho namany rey tafarani-zay.​—Asa. 27:3; 28:13, 14.

18. Ino ty nahavy ani-Paoly hisaotsy a Ndranahary noho hahazo hery?

¹⁸ Azo antoky fa nieritseritsy ty raha nisoratiny ho ani-fiangonani-Roma Paoly, tamin’ie  tan-dala handeha mbeo. Zao ty nisoratiny ho an-drozy fa telo tao lasa zay: “Fa maromaro tao zay ty naniriako mafy handeha aminareo any.” (Rom. 15:23) Fe tsy nieritseritsy ie hoe hagadrà ro hiaviany any. Tena nampahery azy ty nahita fa nisy rahalahy baka a Roma any nandiny azy tan-dala eny mba hitsena azy! “Nisaotsy a Ndranahary Paoly laha vo nahita an-drozy, sady nahazo hery.” (Asa. 28:15) Henteo fa nisaotsy a Ndranahary Paoly lafa niavy teo rahalahiny reo. Fa nanino? Satria hitani-Paoly hoe nanampy azy Jehovah ka nampiasa ani-mpiara-manompo reo.

19. Laha hentea ty 1 Petera 4:10, akory ty ampiasani-Jehovah antsika mba hanampea ani-ze mila fanampea?

¹⁹ Ino ty azontsika atao? Hitanao va hoe misy rahalahy na anabavy ampijalin’arety na miatriky fahasahirana hafa amy fiangonanareo eo? Misy amin-drozy va nimaty longo? Lafa hitansika hoe mila fanampea ty olo raiky, le afaky mangataky amy Jehovah tsika mba hanampy antsika ho soa fanahy noho be fitiava ka hivola na hanao raha ho an’olo iny. Mety ho safàntsika iny, na raha nataontsika iny mihintsy ro tena nilàny mba hampahery azy. (Vakio 1 Petera 4:10.) * Hihamatanjaky ty finoani-olo ampeantsika rey, ka vomaiky rozy hatòky ty fampitamanani-Jehovah hoe: “Tsy hanenga anao mihintsy aho, sady tsy hahafoy anao mihintsy.” Azo antoky fa hahafalifaly anao ty mahita ani-zay!

20. Manino tsika ro afaky mivola hoe: “Jehovah ro mpanampy ahy”?

²⁰ Manahaky ani-Paoly noho namany rey, le mety hiatriky raha sarotsy koa tsika. Fe matoky koa tsika fa afaky mahazo hery, satria miaraky amintsika Jehovah. Mampiasa ani-Jesosy noho ty anjely ie mba hanampea antsika. Afaky mampiasa ty manam-pahefà koa Jehovah mba hanampea antsika, laha mifanaraky amy ty fikasàny raha zay. Maro amintsika koa ro fa nahita maso hoe nanampy ty rahalahy noho anabaviny ty mpanomponi-Jehovah satria nampiasa ty fanahiny masy Jehovah mba handrisiky ty fon-drozy. Ka tsy itsereha laha matoky manahaky ani-safàni-Paoly iny tsika hoe: “Jehovah ro mpanampy ahy ka tsy hatahotsy aho. Ino ty azon’olo atao amiko?”​—Heb. 13:6.