1. Ino ty fanontanea mety hoeritseretintsika?

KELY sisa le ho avy ty fandravà ty fivavahan-diso, ty fanafihani-Goga baka a Magoga, noho ty aly Hara-magedona. Matahotsy va iha kindraiky lafa mieritseritsy hoe fa marìny raha reo? Fa nisy fotoa va iha nieritseritsy hoe: ‘Hahavita tsy hivaliky avao va aho lafa miseho raha mampatahotsy reo?’ Laha mieritseritsy raha manahaky reo iha, le hanampy anao raha nivolanini-Jesosy amy andinin-teny fototsini-fianarantsika toy. Nivola tamy mpianatsiny reo ie hoe: “Ka engà hatahotsy ty fonareo. Minoa a Ndranahary.” (Jaona 14:1) Hanampy antsika tsy hatahotsy ty finoa matanjaky ndre ino ino ty raha hiseho amy hoavy.

2. Ino ty azontsika atao mba hanatanjaha ty finoantsika, le ino ty hodinihintsika amy lahatsoratsy toy ato?

² Hahavita hiatriky ty raha hiseho amy hoavy tsika laha mana finoa matanjaky. Ino ty hanampy antsika amy zay? Soa laha dinihintsika sandrany hoe ino ty hataontsika laha tratsini-fitsapà tsika. Laha mieritseritsy ani-zay tsika le ho haintsika hoe aia amy finoantsika ro mila hatanjahy. Vomaiky hihamatanjaky ty finoantsika arakaraky ty iatrehantsika fitsapà. Hanampy antsika hiatriky ty raha sarotsy hoavy raha zay. Amy lahatsoratsy toy ato tsika hahita raha efatsy mampiseho hoe tena nila nana finoa matanjaky mpianatsini-Jesosy rey. Bakeo hodinihintsika hoe akory ty ahafahantsika miatriky raha sarotsy mitovy amy reo henanizao, le manino raha reo ro manoma antsika amy ty raha hiseho amy hoavy.

3. Laha hentea ty Matio 6:30, 33, ino ty raha nivolanini-Jesosy mazava mikasiky finoa?

³ Ara-dalàna laha maniry hanome hany, siky, noho trano ho ahi-ty valy amin’anany ty lahilahy. Fe tsy mora ty manao ani-zay  amy fotoa sarotsy zao. Very asa, ohatsy, ty mpiara-manompo amintsika sisany, le mbo tsy mahita asa hafa rozy ndre fa miezaky marè. Ty ilany koa tsy maneky hanao asa tsy mety amy Kristiana. Amy raha manahaky ani-reo, le tena mila matoky tsika hoe tsy maintsy hanao raha Jehovah mba hahazoantsika ze raha ilàni-fianakaviantsika. Nanazava soa ani-zay tamy mpianatsiny rey Jesosy lafa nanao ani-Toriteny Tam-bohitsy eny iny. (Vakio Matio 6:30, 33.) Hahavita hifantoky amy fanompoa ani-Jehovah avao tsika laha tena matoky hoe tsy hanenga antsika mihintsy ie. Lafa hitantsika amy zay hoe manampy antsika amy ze raha ilàntsika Jehovah, le lasa hifandramby marìny aminy tsika sady hihamatanjaky ty finoantsika.

4-5. Niasa loha ty fianakaviani-Castro satria sarotsy amin-drozy ty nahazo ze raha nilan-drozy. Ino ty nanampy an-drozy hiatriky ani-zay?

⁴ Niasa loha amy ty raha nilan-drozy amy fiaina ty fianakaviani-Miguel Castro, mipetraky a Venezielà any. Henteo moa hoe akory nahazoan-drozy ty fanampeani-Jehovah. Nanan-drala ampy soa mba hiveloma fianakavia toy taloha, satria rozy nanan-tany fambolea noho fiharea. Fe nisy lahilahy rezay nanafiky an-drozy, le nangalaky ani-tanin-drozy iny sady nandroaky an-drozy hiala teo. Hoy Miguel: “Tanin’olo henanikio ro amboleanay kanefa kelikely tany io. Saky mifoha maray aho le mangataky amy Jehovah mba hanome ze raha ilànay amy andro iny.” Tsy mora ty raha iainani-fianakavia io, fe tena matoky rozy hoe hanome ze raha ilàn-drozy sanandro Babantsika be fitiava iny, ka tsy mieny rozy fa mbo mivory noho mitory avao. Tsy ataon-drozy ambanin-draha mihintsy ty fanompoan-drozy ani-Jehovah, ka manome ze raha ilàn-drozy Jehovah.

⁵ Nieritseritsy ty fomba nikarakarani-Jehovah an-drozy avao Miguel noho Yurai valiny tanatini-fotoa sarotsy nahazo an-drozy iny. Nisy fotoa Jehovah nampiasa mpiara-manompo mba hanomeza an-drozy ty raha sisany nilan-drozy, na hanampea ani-Miguel hahita asa. Tamy fotoa hafa koa ie nampiasa ty biròni-sampana mba hanampea an-drozy hahazo ze raha nilan-drozy. Tsy nanenga an-drozy mihintsy Jehovah. Ino ty vokany? Lasa nihanatanjaky ty finoan-drozy moroanaky. Lafa baka niresaky raha raiky nanampeani-Jehovah an-drozy Yoselin anakampelan-drozy voalohany zay, le nivola hoe: “Tena nampahery ahy ty nahita ty fomba nanampeani-Jehovah anay. Namako ie ka matoky aho fa hanampy ahy avao ie.” Mbo nivola koa ie hoe: “Nanoma anay amy ty raha sarotsy hiseho amy hoavy, raha sarotsy nahazo anay iny.”

6. Ino ty azonao atao mba hanatanjaha ty finoanao laha sahira amy resaky drala iha?

⁶ Sahira amy resaky drala va iha? Laha zay ie, le tsy mora ty raha mahazo anao. Fe azonao ampiasà koa fotoa io mba hanatanjaha ty finoanao. Mivavaha amy Jehovah, le vakio raha nivolanini-Jesosy amy Matio 6:25-34 ao rey sady vetsevetseo. Mieritsereta tantaran’olo amy androntsika zao mampiseho  hoe mikarakara ani-ze miezaky marè manompo azy Jehovah. (1 Kor. 15:58) Laha manao ani-zay iha, le vomaiky hatòky hoe hanampy anao koa Jehovah manahaky ty fa nanampeany ty olo hafa niatriky raha sarotsy mitovy aminao. Hainy hoe ino ty raha ilànao, le hainy koa hoe akory ty hanomeza anao ani-raha zay. Lafa mahazo ty fanampeani-Jehovah iha, le hihamatanjaky ty finoanao ka ho vitanao ty hiatriky ty raha sarotsy hiseho amy hoavy.—Hab. 3:17, 18.

7. Laha hentea ty Matio 8:23-26, manino tsika ro mivola hoe nitsapa ty finoani-mpianatsy rey “tsioky be” iny?

⁷ Lafa nandeha an-tsambo Jesosy noho mpianatsiny rey, le nisy tsioky be tampoky. Nampiasa ani-raha niseho iny amy zay Jesosy mba hanampea an-drozy hahatakatsy hoe nila nanatanjaky ty finoan-drozy rozy. (Vakio Matio 8:23-26.) Nahery biby tsioky iny ka nihafeno rano sambo iny, kanefa Jesosy niroro soa tamy zay. Natahotsy mpianatsy rey ka namoha azy, le nangataky azy mba hanavotsy an-drozy. Nanontany an-drozy moramora Jesosy Tompo hoe: “Manino nareo mavaka raty io, kely finoa retỳ?” Tokony mba fa ho niazoni-mpianatsy rey amy zay hoe afaky niaro ani-Jesosy noho ze niaraky taminy Jehovah. Ino ty ianarantsika baka amy zay? Laha matanjaky ty finoantsika le ho vitantsika ty hiatriky “tsioky be”, ndre tsioky an’ohatsy zay ndre tena tsioky.

8-9. Ino ty raha nitsapa ty finoani-Anel, le ino ty nanampy azy?

⁸ Diniho tse moa Anel, ranabavy tsy manambaly mipetraky a Porto Rico any toy. Niatriky raha tena sarotsy ie, fe vomaiky nanatanjaky ty finoany raha zay. Ino ty raha niseho? Nisy “tsioky be” nitsapa ty finoany. Niravaravani-siklony Maria ty tranoni-Anel tamy 2017. Vokatsini-zay, le nivery asa koa ie. Hoy ty asany: “Tena niasa biby ty lohako tamy fotoa sarotsy rey, fe nianatsy niantehitsy tamy Jehovah tamy vavaky aho, le tsy nengako hisaka ahy tsy hanao ty raha tokony hataoko ty fiasan-dohako.”

⁹ Nivola koa Anel fa nanampy azy hiatriky ani-raha sarotsy rey ty fanoriha safà. Hoy ty asany: “Nanampy ahy ho kalma avao ty fanoriha ty torohevitsini-fandamina. Hitako hoe nanampy ahy ty tanani-Jehovah. Nampiasa ani-ranadahy noho rahavavy reo ie mba hampahery ahy noho hanome ahy ze raha nilàko.” Nivola koa ie hoe: “Nanome ahy maro mandilatsy ani-ze nangatahiko mihintsy aza Jehovah. Tena nampatanjaky ty finoako raha zay.”

10. Ino ty azonao atao lafa iha miatriky raha tena sarotsy?

¹⁰ Miatriky “tsioky be” koa va iha? Mety mijaly iha satria nitratsini-siklony na loza hafa manahatahaky ani-zay. Na koa iha mety marary mafy ka tena kivy, le tsy hainao ty tokony hatao. Mety miasa loha matetiky iha, fe ka engà hahavy anao tsy hatòky ani-Jehovah raha  zay. Mamonjea azy amy vavaky. Hatanjaho ty finoanao ka vetsevetseo ty fotoa nanampeani-Jehovah anao taloha tany. (Sal. 77:11, 12) Afaky matoky iha fa tsy hanenga anao mihintsy ie.

11. Manino tsika ro tokony ho tapa-kevitsy hanoriky ty safàni-azy mitariky reo?

¹¹ Ino koa ty hanampy anao hiatriky raha sarotsy? Nivola Anel hoe ty fanoriha safà. Miezaha zany hatòky ani-ze olo atokisani-Jehovah noho Jesosy. Mety hanome toromariky somary hafahafa kindraiky olo nitendreni-Jehovah hitariky antsika reo. Fe hotahini-Jehovah tsika laha manoriky avao. Hitantsika amy Safàny ao noho amy raha niainani-mpanompony tsy nivaliky rey fa manavotsy ay ty fanoriha safà. (Eks. 14:1-4; 2 Tan. 20:17) Vetsevetseo ty tantara manahaky ani-reo. Laha manao ani-zay iha, le vomaiky ta hanaraky ty tari-dala ameani-fandaminani-Jehovah amy henanizao noho amy hoavy. (Heb. 13:17) Tsy misy antony tokony hatahoranao ani-fijalea bevata ho avy tsy ho ela io zany.​—Ohab. 3:25.

12. Ino ty ifandrambesani-​Lioka 18:1-8 io amy fanana finoa noho fiareta tsy rariny?

¹² Haini-Jesosy fa hitsapa ty finoani-mpianatsiny reo ty tsy rariny. Ka mba hanampea an-drozy hiaritsy ani-zay, le nanao ani-fanohara voaresaky amy bokini-Lioka ao io ie. Niresahiny hoe nisy ampela raiky maty valy tsy nieny nisoloho tamy mpitsara raiky tsy manao ty marina. Nijanjy ani-ampela iny avao mpitsara iny tamy farany. Ino ty ianarantsika baka amy zay? Tsy manao tsy rariny mihintsy Jehovah. Zay nahavy ani-Jesosy nivola io hoe: “Tsy hatao-Ndanahary koa va ze hanomeza rariny ty olo nifiliny, kanefa rozy mitaraintaray aminy avao sanandro?” (Vakio Lioka 18:1-8.) Mbo nivola koa Jesosy hoe: “Lafa avy ty Anak’olo, hahita finoa manahaky ani-zay vatany va ie ambony tany etoy?” Mila manam-pahareta noho miaritsy avao tsika lafa tratsini-tsy rariny. Asehontsika baka amy zay hoe mana finoa matanjaky manahaky ani-ampela maty valy iny tsika. Finoa io ro mahavy antsika hatòky hoe hanampy antsika avao Jehovah ndre ho ela ndre halaky. Mila mino koa tsika hoe tena misy heriny ty vavaky. Mety tsy hampoizintsika kindraiky ty fomba amaleani-Jehovah ty vavakintsika.

13. Akory ty nanampeani-vavaky ani-fianakavia raiky toy?

¹³ Eritsereto, ohatsy, ty raha niseho tamin-dry ranabavy Vero, mipetraky amy Repibliky Demokratikini-Congo any. Nisy maramila nanafiky tamy tanà nisy an-drozy eo, ka tsy maintsy nilay niala bakao rozy miaraky amy valiny noho anakampelan-drozy 15 tao zay. Tsy Vavolombeloni-Jehovah valiny io. Lafa rozy tan-dala teny le nitojiky maramila nanaka lala rezay. Nitanjahan-drozy teo rozy le nampitahorin-drozy hoe hovonoa. Nitany amy zay Vero, le anakampelany iny niezaky nanambitamby azy sady nivavaky, le nampolimpoliny nitonony ty anarani-Jehovah. Nataony rè vavaky iny. Lafa nitampitsy amy zay vavakiny iny, le  nanontany azy sefoni-maramila iny hoe: “Nao aka, ia nampianatsy anao nivavaky io?” Nivola ajà iny hoe: “Mamako! Natorony ahy vavaky modely amy Matio 6:9-13 ao iny.” Hoy amy zay sefo iny: “Ndany aka iha mandeha, miaraky amy babanao noho reninao. Jehovah Ndranaharinareo lahy hiaro anareo!”

14. Ino ty raha mety hitsapa ty finoantsika, le ino ty hanampy antsika hiaritsy?

¹⁴ Hitantsika baka amy tantara io fa tena vatan-draha ty vavaky. Fe manao akory laha tsy avy le mivaly eo noho eo ty vavakintsika na tsy mivaly amy fomba miavaky? Tahafo ampela maty valy tamy fanoharani-Jesosy iny. Amy fomba akory? Ka mieny mivavaky, le matokisa koa fa tsy hanenga anao mihintsy Ndranaharintsika iny sady tsy maintsy hamaly ty vavakinao avao ie. Mety tsy ho araky ty nieritseretanao azy aza ty fotoa noho ty fomba hamaleany azy. Ka mieny mangataky fanahy masy amy Jehovah. (Fil. 4:13) Ka halino fa hanome fitahia maro ho anao Jehovah tsy ho ela, le tsy ho tiaronao sasy ze raha iaby nampijaly anao. Hanampy anao Jehovah lafa misy fitsapà mahazo anao. Hihamatanjaky iha amy zay ka hahavita hiatriky fitsapà amy hoavy.—1 Pet. 1:6, 7.

15. Laha hentea ty Matio 17:19, 20, ino ty raha sarotsy nahazo ani-mpianatsini-Jesosy rey?

¹⁵ Nampianarini-Jesosy ty mpianatsiny fa hanampy an-drozy handresy raha sarotsy ty finoa. (Vakio Matio 17:19, 20.) Nisy fotoa, ohatsy, rozy tsy nahavita nandroaky demonia kanefa nahavita nanao ani-zay rozy talohani-zay. Ino ty antony? Nanazava Jesosy fa nila nampitombo ty finoan-drozy rozy. Laha ampy finoa rozy, hoasani-Jesosy, le hahavita hiaritsy avao ndre sarotsy manao akory aza raha iny, ndre atao hoe bevata manahaky vohitsy io! Mety miatriky raha sarotsy koa tsika henanizao ka atao raha tsy ho vitantsika io ty hiaritsy azy.

16. Nanino ty finoani-Geydi ro nanampy azy hiaritsy lafa nimaty valiny?

¹⁶ Diniho moa ty raha nahazo ani-Geydi, ranabavy baka a Goatemalà any. Handeha holy rozy morovaly ndraiky zay fa baka nivory. Tamy fotoa zay mihintsy Edi valiny ro nisy namono. Ino ty nanampy ani-Geydi hahazaka ty alahelony? Ty finoany. Nivola ie hoe: “Ty vavaky ro manampy ahy hametraky ani-ze raha manavesatsy ahy amy Jehovah, ka lasa maivaiva aho. Tsapako hoe mikarakara ahy Jehovah le mampiasa ty fianakaviako noho namako amy fiangona eo reo. Miezaky ho be atao amy fanompoa ani-Jehovah aho. Manampy ahy tsy halahelo marè raha zay sady manampy ahy tsy hiasa loha marè mikasiky ty hamaray. Hitako baka amy raha nandalovako iny fa ndre ino ino ty fitsapà mety hiseho amy hoavy, le hahavita hiaritsy aho satria manampy ahy Jehovah, Jesosy noho ty fandamina.”

17. Ino ty azontsika atao lafa tsika miatriky raha sarotsy manahaky vohitsy io?

¹⁷ Malahelo va iha satria nimaty ty longonao marìny anao? Anovo ze hahavy anao hino tanteraky hoe hovelomy ndraiky ty maty, ka vakio  tantaran’olo nivelomy amy maty resahy amy Baiboly ao rey. Malahelo va iha satria misy longonao nivoaroaky? Diniho ty raha volanini-Baiboly, amy zay iha ho resy lahatsy hoe mahasoa avao ty fananara amea-Ndranahary. Ndre ino ino ty raha sarotsy mahazo anao, le hararaoto raha rey mba hanatanjaha ty finoanao. Aboraho amy Jehovah iaby ze raha tsapanao. Ka mitokatoka, fa miezaha hifandramby soa amy rahalahy noho anabavinao reo avao. (Ohab. 18:1) Manaova raha hanampy anao hiaritsy, ndre mety hahavy anao halahelo aza raha zay satria hoe mampitiaro anao ty raha niseho. (Sal. 126:5, 6) Tohizo avao ty fahazaranao mandeha mivory, mitory, noho mamaky Baiboly. Le miezaha hifantoky amy raha soasoa nampitamanini-Jehovah anao amy hoavy. Laha iha mandiniky ty fomba anampeani-Jehovah anao henanizao, le vomaiky hihamatanjaky ty finoanao azy.

18. Laha hitanao hoe tsy ampy finoa iha, ino ty azonao atao?

¹⁸ Laha hitanao amy ty raha mahazo anao hoe tsy ampy finoa iha, le ka kivy. Hararaoto raha zay mba hanampy anao hana finoa matanjaky. Mangataha manahaky apostolini-Jesosy rey hoe: “Ampitombò ty finoanay.” (Lioka 17:5) Vetsevetseo koa tantara niresahintsika tamy lahatsoratsy toy ato rey. Tahafo Miguel noho Yurai ka tiarovo ze fotoa iaby nanampeani-Jehovah anao. Misolohoa marè amy Jehovah sirtò lafa miatriky raha sarotsy, manahaky nataoni-Anel noho anakampelani-Vero iny. Tahafo koa Geydi ka ekeo hoe mety hampiasa ty fianakavianao na ty namanao Jehovah mba hanampea anao hahazo ze raha ilànao. Laha enganao hanampy anao hahay hiatriky ze raha sarotsy mahazo anao henanizao Jehovah, le vomaiky iha hatòky hoe hanampy anao koa ie ndre ino ino ty raha sarotsy mety hiseho amy hoavy.

19. Ino ty raha natokisani-Jesosy, le ino ty raha azonao atokisa?

¹⁹ Nampeani-Jesosy mpianatsiny rey mba hahita hoe ino ty tsy ampy tamy finoan-drozy, fe ndre zay le tsy nisalasala mihintsy ie hoe hahavita hiaritsy fitsapà rozy amy hoavy satria manampy an-drozy Jehovah. (Jaona 14:1; 16:33) Natoky ie hoe hisy vahoaky be ho tafaboaky velo amy fijalea bevata satria tena manam-pinoa. (Apok. 7:9, 14) Ho anatini-zay koa va iha? Ho eo iha satria hanampy anao Jehovah laha miezaky manatanjaky ty finoanao sandrany iha henanizao!—Heb. 10:39.