1. Mampirisiky antsika hanao ino Jehovah?

TENA teani-Jehovah ty hasoa fanahy feno fitiava. (Mika 7:18) Mampirisiky ty mpanompony hanao manahaky ani-zay koa ie. Nampanoratiny ho zao, ohatsy, Mika mpaminany: ‘Ino moa ty raha takìni-Jehovah aminao, ankoatsini-hoe tea hasoa fanahy [zany hoe hasoa fanahy feno fitiava]?’ (Mika 6:8) Fe tsy afaky hanao ani-zay tsika laha tsy haintsika tse ty atao hoe hasoa fanahy feno fitiava.

2. Manao akory fitiava tsy miovaova zao?

² Mimpoly in-230 eo ho eo ty safà hoe “hasoa fanahy feno fitiava” amy Soratra Masina—Fandikan-tenin’ny Tontolo Vaovao ao. Azo adika hoe fitiava tsy miovaova koa safà io. Ka lafa miresaky hoe hasoa fanahy na hasoa fanahy feno fitiava ty andinin-teny amy lahatsoratsy toy noho amy lahatsoratsy manaraky ao, le fitiava tsy miovaova ty teany hovolany. Ka manao akory marina zany fitiava tsy miovaova zao? Mana fitiava tsy miovaova ty olo raiky laha tena tea olo raiky ka tsy ta hivaliky aminy sady ta hivahatsy aminy noho tsy ta hiala anilany eo mihintsy. Io matetiky ty fampiasà lafa hiresaky ty fitiava-Ndranahary ty olombelo, fe ampiasà hivolana fitiavan’olombelo samby olombelo avao koa raha io. Tsy miovaova ty fitiavani-Jehovah, le ie ty modely farani-ze soa amy ze olo mety hana ani-toetsy io. Horesahintsika amy lahatsoratsy toy hoe akory ty ampisehoany ani-fitiava tsy miovaova io amy ty olombelo. Hodihinintsika amy lahatsoratsy manaraky hoe akory ty hanahafantsika ani-Jehovah, ka hampisehoantsika ani-toetsy io amy mpiara-manompo.

3. Ino ty raha nambarani-Jehovah ani-Mosesy?

³ Lafa niala kelikely ta Ejipta any ty Israelita, le nambarani-Jehovah ani-Mosesy ty anarany noho ty toetsiny. Hoy ty asany: ‘Jehovah, Jehovah, Ndranahary mamindra fo noho soa fanahy, tsy mora meloky, atsiky hasoa fanahy feno fitiava sady tena tea  fahamarina, manajary hasoa fanahy feno fitiava ho ahi-ty taranaky an’arivo, manenga hadisoa noho fahotà.’ (Eks. 34:6, 7) Misy raha miavaky nambarani-Jehovah ani-Mosesy mikasiky ty fitiavany tamy safàny reo. Ino lahy zay e?

4-5. a) Ino ty raha nivolanini-Jehovah mikasiky ty vatany? b) Ino iaby ty fanontanea hodihinintsika ato?

⁴ Tsy nivola avao Jehovah hoe mana hasoa fanahy feno fitiava ie, fa nivolaniny hoe “atsiky hasoa fanahy feno fitiava” ie. In-6 ty Baiboly ro mivola ani-zay, ankoatsini-andininy io. (Nom. 14:18; Neh. 9:17; Sal. 86:15; 103:8; Joela 2:13; Jona 4:2) Amy andininy 6 reo, le Jehovah raiky avao ro volaniny hoe atsiky hasoa fanahy feno fitiava fa tsy olombelo mihintsy. Hita hoe tena teani-Jehovah ho haintsika hoe tsy miovaova ty fitiavany. Azo antoky zany fa tena bevata aminy raha io. * Tsy mahatseriky laha nivola Davida Mpanjaka hoe: “Nao lahy Jehovah, [avy zisiky] an-danitsy any ty hasoa fanahinao feno fitiava ... Lafovily vatany lahy Ndranahary ty hasoa fanahinao feno fitiava! Ambany elatsinao eo ro ialofani-anak’olombelo.” (Sal. 36:5, 7) Nifalifaly vatany Davida hoe tsy miovaova ty fitiava-Ndranahary. Lafovily aminao koa va toetsini-Jehovah io?

⁵ Handiniky fanontanea roe retoa tsika henanizao, mba hanampy antsika hahay soa mikasiky fitiava tsy miovaova io: Amin’ia ty ampisehoani-Jehovah ani-fitiava io? Ino ty soa azontsika lafa ampisehoani-Jehovah ani-fitiava io tsika?

6. Amin’ia ty ampisehoani-Jehovah fitiava tsy miovaova?

⁶ Mivola ty Baiboly hoe maro ty raha mety ho teantsika, ohatsy hoe “fambolea”, “fahaiza”, “anatsy”, “divay noho menaky”, “fahendrea” na ty manahaky ani-reo. (2 Tan. 26:10; Ohab. 12:1; 21:17; 29:3) Fe olo avao ro ampisehoa fitiava tsy miovaova fa tsy raha na hevitsy. Fe ndre zay, tsy lafa kila olo le ampisehoani-Jehovah ani-raha io. Ze mifandramby soa aminy avao ro ampisehoany ani-fitiava tsy miovaova io. Tsy mivaliky amy ty namany Ndranaharintsika iny. Fa manoma raha soa ho an-drozy ie sady tea an-drozy avao.

7. Akory ty ampisehoani-Jehovah hoe teany ty olo iaby?

⁷ Mampiseho fitiava amy ty olo iaby Jehovah. Nivola tamy lahilahy mana anara Nikodemosy zay Jesosy hoe: “Bevata vatany ty fitiava-Ndranahary ani-zao tontolo zao, ka nameany ty Anakilahiny toka mba tsy ho ripaky ze mampiseho finoa azy, fa hana fiaina zisiky farany.”—Jaona 3:1, 16; Mat. 5:44, 45.

8-9. a) Manino Jehovah ro mampiseho fitiava tsy miovaova amy ty mpanompony? b) Ino koa henanizao ty raha hodinihintsika?

 ⁸ Niresahintsika taloha eroy hoe ty mpanompony avao, zany hoe ze olo mifandramby soa aminy avao ro ampisehoani-Jehovah fitiava tsy miovaova. Manamarina ani-zay ty raha nivolanini-Davida Mpanjaka noho Daniela mpaminany. Nivola, ohatsy, Davida hoe: “Ka mieny mampiseho hasoa fanahy feno fitiava amy ty olo mahay anao.” Mbo nivola koa ie hoe: ‘Ho mandrakizay ty hasoa fanahini-Jehovah ho ani-ze matahotsy azy.’ (Sal. 36:10; 103:17) Hoy koa Daniela: ‘Nao lahy Jehovah, mampiseho hasoa fanahy feno fitiava amy ze olo tea anao noho manoriky ty didinao iha.’ (Dan. 9:4) Hita baka amy zay fa mampiseho fitiava tsy miovaova amy ty mpanompony Jehovah, satria rozy mahay azy noho matahotsy azy, sady tea azy le manoriky ty didiny. Ze olo tena manompo azy avao zany ro ampisehoani-Jehovah ani-fitiava io.

⁹ Fa nampisehoani-Jehovah fitiava avao tsika tamy mbo tsy nanompo azy, fe azy fitiava asehony amy ty olo iaby iny. (Sal. 104:14) Fe lafa nanompo azy tsika, le lasa ampisehoany fitiava tsy miovaova koa. Manome toky ty mpanompony Jehovah hoe: ‘Tsy halà aminao ty hasoa fanahiko feno fitiava.’ (Isaia 54:10) “Miavaky ty fomba handaisani-Jehovah ty olony tsy mivaliky.” Tena nahatsapa ani-zay Davida. (Sal. 4:3) Hafa mihintsy zany ty fomba ikarakarani-Jehovah antsika. Ka ino ty tokony hataontsika mba hamalea ty fitiavany antsika? Hoy mpanao salamo raiky zay: “Ty hendry mandiniky ani-zay noho mampifantoky ty sainy amy hasoa fanahy feno fitiava nasehoni-Jehovah.” (Sal. 107:43) Baka amy Jehovah torohevitsy soa io. Ndao moa tsika handiniky fomba telo ampisehoani-Jehovah fitiava tsy miovaova. Hohenteantsika koa hoe ino ty soa azontsika lafa ampisehoany ani-fitiava io tsika.

10. Manino ro mahasoa antsika ty mahay hoe tsy hiova mihintsy ty fitiavani-Jehovah antsika? (Salamo 31:7)

¹⁰ Tsy hoe tsy miova avao ty fitiavani-Jehovah fa maharitsy zisiky farany mihintsy. Mimpoly in-26 amy Salamo faha-​136 ao hevitsy io. Mivola, ohatsy, ty andininy voalohany hoe: “Misaora ani-Jehovah fa soa ie: Maharitsy zisiky farany ty hasoa fanahiny feno fitiava.” (Sal. 136:1)  Mbo mimpoly amy andininy faha-2 zisiky 26 any koa ty safà hoe “maharitsy zisiky farany ty hasoa fanahiny feno fitiava.” Lafa mandiniky andinin-teny hafa amy Salamo io tsika, le tena ho tseriky satria maro biby ty fomba ampisehoani-Jehovah hoe tsy miovaova ty fitiavany sady tsy mieny mampiseho ani-raha zay ie. Nampolimpoly ty safà hoe “maharitsy zisiky farany ty hasoa fanahiny feno fitiava.” Manome toky antsika raha io hoe tsy miova mihintsy ty fitiava-Ndranahary ty mpanompony. Tena mampahery ty mahay hoe tsy malaky miala amy ty mpanompony Jehovah! Lafa ie mifankahazo am-po amin’olo raiky manompo azy, le mivahatsy aminy avao, sirtò moa lafa misy raha sarotsy. Ino ty soa azontsika baka amy zay? Manjary falifaly noho mahazo hery tsika lafa mahay hoe mivahatsy amintsika Jehovah. Lasa mahavita miatriky ty problemo mahazo antsika amy zay tsika sady mahavita manompo azy avao.​—Vakio Salamo 31:7.

11. Laha hentea ty Salamo 86:5, ino ty mahavy ani-Jehovah hanenga hadisoa?

¹¹ Manenga hadisoa Jehovah satria tsy miovaova ty fitiavany. Lafa hitani-Jehovah hoe mibebaky ty mpanota raiky sady miala amy fahazaran-dratiny, le manenga hadisoa ie satria tsy miovaova ty fitiavany. Ho zao ty nivolanini-Davida mpanao salamo mikasiky ani-Jehovah: “Tsy mamaly antsika araky ty fahotantsika ie, na mamaly ty hadisoantsika araky ty tokony haeva antsika.” (Sal. 103:8-11) Tsy mora mihintsy hianini-eritseritsy zao. Nihaini-Davida soa raha zay satria fa nahazo azy. Fe nihitany koa tamy zay hoe “parè hanenga hadisoa” Jehovah. Ino ty mahavy ani-Jehovah hanao ani-zay? Mamaly ani-zay ty Salamo 86:5. (Vakio.) Hitantsika amy vavaky nataoni-Davida io hoe manenga hadisoa Jehovah satria ie tena soa fanahy noho be fitiava amy ze mikaiky azy.

12-13. Ino ty hanampy antsika laha mbo malahelo marè amy ty raha tsy nety nataontsika taloha tsika?

¹² Soa laha mahatiaro maneny amy ze raha raty nataontsika tsika. Mahasoa antsika mihintsy aza raha zay satria mety handrisiky antsika hibebaky noho hanova ty fomba fiainantsika. Fe misy mpanomponi-Jehovah malahelo lava, satria mbo manea azy avao ty eritseriny amy ty raha tsy nety nataony taloha. Maninjy azy ty fony ka lasa mieritseritsy ie hoe tsy hanenga  ty hadisoany mihintsy Jehovah, ndre mibebaky manao akory aza ie. Mahatsapa manahaky ani-zay koa va iha? Hanampy anao ty fahaiza hoe tena ta hampiseho fitiava tsy miovaova amy ty mpanompony Jehovah.

¹³ Ino ty soa azontsika baka amy zay? Afaky ho falifaly manompo ani-Jehovah noho hana feoni-fieritsereta malio tsika, ndre mbo tsy lavorary aza. Ino ty antony? Satria “ty lioni-Jesosy Anany ro mampalio antsika ho afaky amy ota iaby.” (1 Jaona 1:7) Ino zany ty azonao atao lafa iha kivy amy ty raha tsy nety nataonao? Tiarovo hoe parè hanenga ty hadisoani-mpanota mibebaky Jehovah sady tena ta hanao ani-zay. Misy ifandrambesany ty hasoa fanahy feno fitiava noho ty fanengà hadisoa. Nanoratsy mikasiky ani-zay Davida. Hoy ty asany: “Manahaky ty haaboni-lanitsy laha ohary amy tany ty habeni-hasoa fanahy feno fitiava asehony amy ze matahotsy azy. Manahaky ty halavirani-antinana noho ty andrefa, ro anafahany ty fahotantsika ho lavitsy antsika.” (Sal. 103:11, 12) Tena parè ‘hanenga hadisoa vatany’ Jehovah satria tsy miovaova ty fitiavany.​—Isaia 55:7.

14. Manao akory ty fomba niresahani-Davida hoe miaro antsika ty fitiava tsy miovaova asehoni-Jehovah?

¹⁴ Miaro ty fifandrambesantsika aminy ty fitiava tsy miovaova aseho-Ndranahary. Lafa nivavaky tamy Jehovah Davida le nivola hoe: ‘Iha ro pilasy fivoniako, noho hiaro ahy tsy ho tratsini-fijalea. Fifalea ro hataonao manodidy ahy satria manavotsy ahy iha. Feno hasoa fanahy feno fitiava ty manodidy ani-ze olo matoky anao.’ (Sal. 32:7, 10) Miaro ty olo mipetraky amy tanà raiky ty lakorobe manodidy azy. Manahaky ani-zay koa ty fitiava tsy miovaova asehoni-Jehovah. Sahala amy lakorobe manodidy antsika raha io, ka miaro antsika amy ze raha iaby mety hanimba ty fifandrambesantsika aminy. Fitiava tsy miovaova ananani-Jehovah io koa ro mahavy azy hitao antsika hamonjy azy.​—Jer. 31:3.

15. Manino ro azo volany hoe fialofa noho fiarova matanjaky ty fitiava tsy miovaova asehoni-Jehovah?

¹⁵ Nampiasa ohatsy hafa koa Davida mba hanazavà hoe manao akory ty fomba iarova-Ndranahary ty vahoakiny. Hoy ty asany: “Ndranahary ro vohitsy filaisako, azy Ndranahary nampiseho hasoa fanahy tamiko iny.” Mbo nivola koa ie hoe: ‘Mampiseho hasoa fanahy amiko ie sady fiarova matanjaky ho ahy, Vohitsy filaisako noho Mpanavotsy ahy, Ampingako noho Fialofako.’ (Sal. 59:17; 144:2) Manino ro nampitovizini-Davida tamy vohitsy filaisa noho fiarova matanjaky ho azy ty fitiava tsy miovaova asehoni-Jehovah? Satria ndre aia ndre aia ty misy antsika an-tany etoy, laha mbo manompo ani-Jehovah avao tsika, le hameany ze raha iaby ilàntsika mba hiarova ty fifandrambesantsika aminy. Mbo manome toky antsika manahaky ani-zay koa ty Salamo faha-​91. Hoy ty asani-mpanoratsy ani-​Salamo io: “Hivola amy Jehovah aho hoe: ‘Fialofako iha, sady fiarova matanjaky ho ahy.’ ” (Sal. 91:1-3, 9, 14) Nampiasa safà mitovitovy amy zay avao koa Mosesy mba hampisehoa hoe miaro antsika Jehovah. (Sal. 90:1) Hoy ty asany lafa narìny ho maty ie: “Azy Ndranaharini-andro taloha iny ro fivonianao [na fialofanao], le manoha anao sandriny maharitsy zisiky amy fotoa tsy voafaritsy rey.” (Deot. 33:27) Misy tsipiriany mampahery raha niresahini-Mosesy io. Nivola ie hoe “le manoha anao sandriny maharitsy zisiky amy fotoa tsy voafaritsy rey.” Ino ty teany hovolany?

16. Ino ty soa azontsika lafa mahay tsika hoe eo avao Jehovah hanoha antsika? (Salamo 136:23)

¹⁶ Mahatiaro ho voaaro tsika lafa Jehovah ro ataontsika Fialofantsika. Fe mety ho kivy tsika kindraiky ka le atao raha tsy ho afaky io raha zay. Ino ty ataoni-Jehovah amintsika amy fotoa rey? (Vakio Salamo 136:23.) Sahala hoe mampiongaky antsika tsikelikely amy sandriny ie, le manampy antsika hahavita hitsanga ndraiky. (Sal. 28:9; 94:18) Ino ty soa azontsika baka amy  zay? Haintsika hoe afaky miantehitsy amy Jehovah avao tsika. Tena manampy antsika amy raha roe retoa ty fahaiza ani-zay. Voalohany, matoky tsika hoe hiaro antsika avao Jehovah ndre aia ndre aia ty pilasy misy antsika. Faharoe, matoky tsika hoe tena mikarakara antsika Babantsika be fitiava an-danitsy any iny.

17. Ino ty raha azontsika atokisa? (Salamo 33:18-22)

¹⁷ Nihitantsika hoe ndre ino ino ty raha sarotsy mahazo antsika, le afaky matoky tsika fa hanampy antsika avao Jehovah amy zay tsika tsy hivaliky aminy mihintsy. (2 Kor. 4:7-9) Hoy Jeremia mpaminany: “Ty hasoa fanahy feno fitiava asehoni-Jehovah ro tsy maharipaky tanteraky antsika, satria tsy ho lany mihintsy ty famindram-pony.” (Fitom. 3:22) Afaky matoky tsika hoe tsy hiova mihintsy ty fitiavani-Jehovah antsika, satria mivola ty Baiboly hoe: “Ty masoni-Jehovah manenty ani-ze matahotsy azy, zany hoe ze olo mandiny ty hasoa fanahiny feno fitiava.”​—Vakio Salamo 33:18-22.

18-19. a) Ino ty tokony hotiarovintsika? b) Ino ty hodinihintsika amy lahatsoratsy manaraky?

¹⁸ Ino ty tokony hotiarovintsika? Fa nampisehoani-Jehovah ani-fitiava asehony amin’olo iaby iny tsika tamintsika mbo tsy nanompo azy. Fe lafa tsika lasa mpanompony, le manjary ampisehoany fitiava tsy miovaova koa. Fitiava io ro mahavy ani-Jehovah handrakoky antsika amy ty sandriny mahery mba hiarova antsika. Hotanjahini-Jehovah marìny azy eo avao tsika, le hotanterahiny ze raha iaby nampitamaniny antsika. (Sal. 46:1, 2, 7) Teany ho namany mandrakizay tsika! Matokisa fa ndre ino ino ty raha sarotsy atrehinao, le hameani-Jehovah ty hery ilànao iha mba hahafahanao tsy mivaliky aminy.

¹⁹ Nihitantsika tato hoe akory ty ampisehoani-Jehovah fa tsy miovaova ty fitiavany ty mpanompony. Teany hampiseho ani-toetsy io amy ty mpiara-manompo amintsika koa tsika. Akory ty hanaovantsika ani-zay? Hiresaky mikasiky ani-zay ty lahatsoratsy manaraky.