1. Manino ty 2 Korintianina 3:1-3 ro manampy antsika hahita hoe tombontsoa ty manampy mpianatsy Baiboly raiky mba ho vita batisa? (Henteo sary amy fononi-gazety toy.)

INO ty tsapanao lafa mahita mpianatsy Baiboly raiky amy faritaninareo eo atao batisa? Azo antoky hoe falifaly biby iha! (Mat. 28:19) Laha iha ro nampianatsy Baiboly azy, le ho teanao ty hanatriky eo amy fotoa anaova batisa azy iny! (1 Tes. 2:19, 20) Azo ampitovizy amy “taratasy fiderà” azy mpianatsy vo vita batisa rey, tsy ho ani-azy nampianatsy azy iny avao fa ho ani-fiangona iaby iaby.​—Vakio 2 Korintianina 3:1-3.

2. a) Ino ty fanontanea bevata tokony hoeritseretintsika, le ino ty antony? b) Ino ty atao hoe fampianara Baiboly? (Henteo ty fanamariha ambany pejy.)

² Soasoa ty mahita hoe tamy tatitsy niazo tanatini-efatsy tao farany, le nisy 10 000 000 eo ty fampianara Baiboly * nataontsika sambola. Mbo tanatini-tao reo avao koa, le mandilatsini-280 000 ty olo natao batisa ka nanjary Vavolombeloni-Jehovah noho mpianatsini-Jesosy Kristy vaovao. Akory ty hanampeantsika ani-mpianatsy Baiboly an-tapitrisany rey mba ho vita batisa? Mbo mahaliny Jehovah ka manome fotoa mba hahafahan’olo hanjary mpianatsini-Kristy. Zay ro mahavy antsika hanao ze farany vitantsika mba hanampea an-drozy handroso malaky araky ze azo atao zisiky amy batisa. Fa kely sisa ty fotoa tavela!​—1 Kor 7:29a; 1 Pet. 4:7.

3. Ino ty hodinihintsika amy lahatsoratsy toy ato mikasiky fitariha fampianara Baiboly?

 ³ Tena ilà henanizao ty manao mpianatsy, ka nampanaovini-Filan-kevi-pitantana fanadihadia ty biròni-sampana mba hahità hoe ino ty azontsika atao, amy zay hihamaro ty olo ampianarintsika Baiboly mandroso zisiky amy batisa. Ho hitantsika amy lahatsoratsy toy noho amy lahatsoratsy manaraky ty fianara ho azontsika baka amy mpisava lala, misionera, noho mpiandraikitsini-faritsy mahay. * (Ohab. 11:14; 15:22) Natoron-drozy hoe ino ty azoni-mpampianatsy Baiboly iny noho ty mpianatsin-drozy atao, amy zay hisy vokany soa ty fianaran-drozy. Hodinihintsika amy lahatsoratsy toy ato ty raha limy mila ataoni-mpianatsy raiky mba hahafahany handroso ho amy batisa.

4. Ino ty soa ho haintsika mikasiky fampianara Baiboly am-baravara eo?

⁴ Mbo am-baravara eo ty ankamaroani-rahalahy noho anabavintsika le fa manomboky fampianara Baiboly. Tena fomba soa hanampea ani-olo iny ho kinto amy Baiboly avao raha zay. Fe tsela tampitsy fiaraha midiniky rey matetiky, sady mety tsy ho vita sankerinandro. Ho fanampini-zay, le mangataky nimero telefony na adiresy e-mail amin’olo iny ty mpitory sisany. Lafa anelanelani-fitsidiha rey amy zay rozy, mikaiky na mandefa hafatsy aminy mba hiresaha hevitsy baka amy Baiboly ao. Mety hiresaky kindraindraiky rozy anatini-vola maromaro, fe mbo tsy misy vokany ty fianara. Ho avy amy fanokanam-bata noho batisa va mpianatsy iny, laha zay avao ty ezaky ataony noho ty fotoa atokany hianara ty Safà-Ndranahary? Sarotsy aloha zay.

5. Laha hentea ty Lioka 14:27-33, ino ty raha nihamafisini-Jesosy ka manampy antsika amy asa fanaova mpianatsy?

⁵ Ndraik’andro Jesosy nanazava hoe ino ty tsy maintsy ataon’olo raiky laha ta hanjary mpianatsiny. Niresaky mikasiky olo raiky ta hamboatsy tilikambo noho mpanjaka raiky ta handeha hialy ie. Nivola Jesosy fa mila “mipetraky tse” azy hamboatsy tilikambo iny, “le mikontikonty ze ho lany.” Mila “mipetraky tse” koa mpanjaka iny, “le mila hevitsy” laha ho vitani-maramilany reo raha eritseretin-drozy hatao iny. (Vakio Lioka 14:27-33.) Haini-Jesosy fa laha ta hanjary mpianatsiny koa ty olo raiky, le mila mandiniky soa hoe ino iaby ty raha tsy maintsy hataony lafa manori-dia azy. Ka soa laha ampirisihintsika ty mpianatsintsika mba hianatsy Baiboly  miaraky amintsika sankerinandro. Akory ty anaovantsika ani-zay?

6. Ino ty ezaky mety hataontsika laha teantsika handroso ty mpianatsintsika?

⁶ Anovo maharitsaritsy tse fianara Baiboly am-baravara eo rey. Afaky mandiniky andinin-teny raiky fanampiny, ohatsy, iha saky mitsidiky azy. Lafa zatsy miresaky lavalava tompon-trano iny, le anontaneo laha misy pilasy azonareo ipetraha mba hanohiza ani-resaky iny. Ho hita amy valin-tenini-tompon-trano iny laha tena vatan-draha aminy ty fianara Baiboly. Mba hampalaky ty fandrosoany, le mety hanontany azy iha lafa mandeha ty fotoa laha teany ty hianatsy indroe sankerinandro. Fe tsy ampy ty hoe mianatsy indraiky na indroe sankerinandro.

7. Ino ty ataoni-mpampianatsy mba hanomàna soa saky hampianatsy Baiboly?

⁷ Mila manoma soa ty mpampianatsy Baiboly saky hampianatsy. Azonao vakỳ tse raha hianaranareo iny, sady henteanao andinin-teny rey. Anovo mazava soa an-tsainao ao ty hevitsy bevata. Diniho ty lohatenini-fianara iny, ty lohatenikely, ty fanontanea, ty andinin-teny misy hoe “vakio”, ty sary, noho ze video mety hanampy anao hanazava ani-foto-kevitsy iny. Bakeo eritsereto mpianatsinao iny. Vetsevetseo sandrany hoe ino ty fomba tsotra noho mazava hanazavanao ani-fianara iny mba ho mora aminy ty hahazo azy noho hanoriky azy.​—Neh. 8:8; Ohab. 15:28a.

8. Ino ty raha ianarantsika mikasiky ty vavaky ataontsika ho ani-olo ampianarintsika Baiboly, lafa hentea ty safàni-apostoly Paoly amy Kolosianina 1:9, 10?

⁸ Anatini-fanomana mila ataonao koa ty mivavaky amy Jehovah mikasiky ani-mpianatsy iny noho ze raha ilàny. Angataho Jehovah mba hanampy anao hahay hidosiky fon’olo. (Vakio Kolosianina 1:9, 10.) Miezaha handiniky sandrany ze raha mety ho sarotsy amy mpianatsy iny na tsy hekeny. Tiarovo avao hoe ty hanampy azy handroso ho amy batisa ro kendrenao.

9. Akory ty azoni-mpampianatsy anampea ty mpianatsy Baiboly hanoma ty fianarany? Hazavao.

⁹ Teantsika laha mba manampy ani-mpianatsy iny hankasitraky ty raha nataoni-Jehovah noho Jesosy ty fianarany tsy tampaky, sady mbo haniry hahay raha maro ie. (Mat. 5:3, 6) Mila mifantoky soa amy ty raha ianarany mpianatsy iny amy zay handramby soa baka amy fianara iny. Mba hahavitany ani-zay, le hazavao aminy hoe mila manoma ie saky  hianatsy Baiboly, zany hoe mamaky sandrany ty toko hianara le mieritseritsy hoe akory ty azony anoriha ani-raha iny. Ino ty azoni-mpampianatsy atao mba hanampea azy hanoma? Miaraha manoma toko raiky aminy mba hampisehoa aminy ty fanaova azy. * Hazavao aminy hoe akory ty hahitany ty valini-fanontanea amy fianara iny, le atorò azy hoe ze hevitsy bevata na fehezan-teny hanampy azy hahatiaro ani-valiny iny avao ro tokony hotsipihy. Bakeo volano ie mba hanome valin-teny amy fomba fivolanany. Ho hainao amy zay laha azony soa fianara iny. Fe mbo misy raha hafa tokony hampirisihinao hataoni-mpianatsy iny koa.

10. Manino ro tena ilà ty mamaky Baiboly sanandro, le ino ty raha mila atao mba hahafaha mandramby soa farani-ze maro baka amy famakia Baiboly?

¹⁰ Ankoatsini-fianara Baiboly sankerinandro miaraky amin’olo mampianatsy azy iny, le soa laha manao raha am-batany koa mpianatsy iny. Mila mifampiresaky amy Jehovah ie. Amy fomba akory? Mila mijanjy ani-Jehovah ie sady miresaky aminy. Afaky mijanjy a Ndranahary ie lafa mamaky Baiboly sanandro. (Jos. 1:8; Sal. 1:1-3) Atorò azy ty fomba fampiasà ani-“Fandahara Famakia Baiboly” azo atao printy amy jw.org ao iny. * Mazava ho azy fa hisy vokany soa ty famakiany Baiboly, laha ampirisihinao ie mba hametsivetsy hoe ino ty ianarany ao mikasiky ani-Jehovah, le akory ty azony anoriha ani-raha zay amy fiainany.​—Asa. 17:11; Jak. 1:25.

11. Ino ty afaky manampy ani-mpianatsy Baiboly raiky hahay hivavaky, le manino ie ro mila mivavaky matetiky?

¹¹ Ampirisiho ty mpianatsinao mba hiresaky amy Jehovah, ka hivavaky sanandro. Manaova vavaky baka amy fo saky hanomboky hianatsy noho amy farani-fianara. Resaho anatini-vavaky rey ao ty mikasiky ani-mpianatsinao iny. Lafa maharè ty vavaky ataonao ie, le manjary hahay hoe manao akory mivavaky baka am-po zao. Ho hainy koa hoe tokony hivavaky amy Jehovah Ndranahary ie, le atao amy anarani-Jesosy Kristy. (Mat. 6:9; Jaona 15:16) Hihamariny a Ndranahary vatany ty mpianatsinao laha mamaky Baiboly sanandro (mijanjy ani-Jehovah) noho mivavaky (miresaky amy Jehovah)! (Jak. 4:8) Laha zatsy manao ani-zay ie, le ho voatariky hanokam-bata ho ani-Jehovah noho hatao batisa. Ino koa ty raha hafa hanampy azy?

12. Akory ty azoni-mpampianatsy Baiboly atao mba hanampea ty mpianatsiny hifandramby marìny amy Jehovah?

¹² Lafa mianatsy Baiboly ty olo raiky, le tsy tokony hanaitsy ty sainy avao ty raha ianarany, fa tokony hidosiky ty fony koa. Ino ty antony? Satria ty fontsika, anatini-zay ty faniriantsika noho ty fihetseham-pontsika ro manosiky antsika hanao raha. Maharesy lahatsy soa ty fomba fanazavani-Jesosy ka nitean’olo ty nianatsy taminy. Fe nahay nidosiky ty fon-drozy koa ie, ka zay ro nahavy an-drozy nanaraky azy. (Lioka 24:15, 27, 32) Tokony ho hitani-mpianatsinao hoe tena misy Jehovah sady azony ifandrambesa. Tokony ho rambesiny sahala amy Babany ie, sady Ndranahariny, noho Namany. (Sal. 25:4, 5) Lafa mampianatsy Baiboly iha, le anovo mazava soa an-tsaini-mpianatsy iny ao ty toetsi-Ndranahary. (Eks. 34:5, 6; 1 Pet. 5:6, 7) Azonao atao raha zay ndre ino ndre ino ty foto-kevitsy ianaranareo. Ampeo ty mpianatsinao mba hahay ani-toetsy soa ananani-Jehovah rey, anatini-zay ty fitiavany, hasoa fanahiny, noho fiferinesany. Nivola Jesosy fa “didy farany bevata sady voalohany” ty hoe “tiavo Jehovah Ndranaharinao.” (Mat. 22:37, 38) Ampeo ty mpianatsinao mba ho tea ani-Jehovah vatany.

13. Ino, ohatsy, ty azo atao mba hanampea ty mpianatsy Baiboly hahay ty toetsy mampiavaky ani-Jehovah?

¹³ Volano amy mpianatsinao iny hoe ino ty tena antony itiavanao ani-Jehovah. Mety hanampy azy raha zay mba hahatakatsy hoe mila mifandramby marìny amy Ndranahary koa ie. (Sal. 73:28) Mety misy fehezan-teny miresaky ty fitiavani-Jehovah, ty fahendreany, ty fitiavany ty rariny, na ty heriny amy boky iny ao na amy andinin-teny raiky. Midosiky ty fonao va raha iny? Resaho amy mpianatsinao iny raha zay, le ambarao azy fa tsy raiky zay avao ty antony itiavanao ani-Babanao an-danitsy any iny, fa mbo misy maro hafa. Misy raha hafa koa tokony hataoni-mpianatsy Baiboly iaby iaby mba hahafahan-drozy handroso ho amy batisa.

14. Ino ty raha volanini-​Hebreo 10:24, 25 amintsika mikasiky ty fivoriani-fiangona ka mety hanampy ty mpianatsy Baiboly handroso?

¹⁴ Teantsika iaby laha mandroso ho amy batisa ty olo ampianarintsika. Hanampy an-drozy hanao ani-zay tsika laha mampirisiky an-drozy hanatriky ty fivoriani-fiangona. Volanini-mpampianatsy fa zatsy rey hoe malaky mandroso ty mpianatsy Baiboly lafa manatriky fivoria. (Sal. 111:1) Hazavanini-mpampianatsy  sisany amy ty olo ampianarin-drozy hoe mbo antsasany amy ty raha amy Baiboly ao avao ro azon-drozy amy fianara Baiboly, fa ty antsasany ianara am-pivoria any. Vakio amy mpianatsinao iny ty Hebreo 10:24, 25, le hazavao aminy ty soa ho azony laha mandeha mivory ie. Atorò azy ty video hoe Ino ty Raha Atao amy Efitrano Fanjakà Any? * Ampeo ty mpianatsinao mba hahatsapa hoe vatan-draha amy fiainany ty fivoria sankerinandro.

15. Ino ty azontsika atao mba hampirisiha mpianatsy Baiboly hanatriky fivoria tsy tampaky?

¹⁵ Ino ty azonao atao laha mbo tsy namonjy fivoria mihintsy ty mpianatsinao na mivory kindraindraiky avao? Tantarao aminy ty raha nianaranao tamy fivoria farany. Lafa hitany ty hafanam-ponao miresaky ani-fivoria rey, le mety ho zay ro tena handrisiky azy hivory. Ameo azy ty Tilikambo na Kahiem-pivoria hianara amy fivoria manaraky. Atorò azy ty raha hodinihy any, le anontaneo ie hoe azy tampany manao akory iny ty tena mahakinto azy. Ho hafa mihintsy ty raha ho hitany noho ho reny am-pivoria any laha vo manatriky fivoria voalohany ie, fa tsy hanahaky ty nihitany tamy fivavaha hafa any. (1 Kor. 14:24, 25) Hisy modely soa azony tahafy noho olo hanampy azy handroso ho amy batisa ho hitany any.

16. Ino ty mila atao mba ho avy amy batisa ty mpianatsy Baiboly, le ino ty horesahintsika amy lahatsoratsy manaraky?

¹⁶ Ino ty azontsika atao mba ho avy amy batisa ty olo ampianarintsika Baiboly? Azontsika ampea ty mpianatsy kiraidraiky mba hahita hoe vatan-draha fianara iny, ka ampirisihintsika ie mba hianatsy sankerinandro noho hanoma saky hianatsy. Teantsika koa laha voatosiky hiresaky amy Jehovah sanandro ie sady hiezaky hifandramby marìny aminy. Ta hampirisiky ani-mpianatsy iny tsika mba hanatriky ty fivoria iaby alamini-fiangona. (Henteo ty efajoro hoe “ Mila Manao Ino ty Mpianatsinao mba ho Avy amy Batisa?”) Fe mbo misy raha limy hafa koa mila ataoni-mpampianatsy Baiboly mba hahafahany manampy ty mpianatsiny ho avy zisiky amy batisa. Hiresaky ani-zay ty lahatsoratsy manaraky.