1. Manao akory olo mamindra fo zao, le ino ty tantara mampiseho olo raiky namindra fo?

LAHA vo hoe olo mamindra fo, le olo soa fanahy, miferinay olo, noho matariky ro avy an-tsaintsika ao. Mety hieritseritsy ani-Samaritana soa fanahy tamy tantara niresahini-Jesosy iny koa tsika. Tsy Jiosy lahilahy io fe lafa nahita Jiosy nitratsini-malaso zay ie, le “niferinay” azy. Nampalahelo azy lahilahy jiosy naratsy iny ka nikarakarany tam-pitiava. (Lioka 10:29-37) Misy toetsi-Ndranahary tena soasoa hitantsika baka amy fanohara io. Tsy ino zay fa ty famindram-po. Mamindra fo Ndranahary satria teany tsika. Mamindra fo amintsika avao ie sanandro sady maro ty fomba ampisehoany ani-raha zay.

2. Ino ty fomba hafa azon’olo raiky ampisehoa hoe mamindra fo ie?

² Misy fomba hafa koa afaky ampisehoan’olo raiky hoe mamindra fo ie. Mety hanapa-kevitsy tsy hanasazy olo ty olo raiky mamindra fo ndre maeva hosazỳ aza olo iny. Manahaky ani-zay koa Jehovah. Tena mamindra fo amintsika ie. Nivola ty mpanoratsy salamo hoe “tsy mamaly antsika araky ty fahotantsika ie.” (Sal. 103:10) Fe kindraiky Jehovah mety hananatsy marerè ani-ze olo manota.

3. Ino iaby ty fanontanea hodinihintsika?

³ Misy fanontanea telo retoa hodinihintsika amy lahatsoratsy toy ato: Manino Jehovah ro mamindra fo? Misy ifandrambesany va ty hoe mananatsy marerè noho mamindra fo? Le ino ty hanampy antsika hahay hamindra fo? Ndao hohenteantsika hoe ino ty valiny ameani-Safà-Ndranahary mikasiky ani-fanontanea reo.

4. Manino Jehovah ro mamindra fo?

⁴ Mamindra fo Jehovah satria be fitiava. Nanoratsy apostoly Paoly hoe “mpanarivo famindram-po” Ndranahary. Nanazava  Paoly amy andininy io hoe tena mamindra fo Ndranahary satria nampitamà ie hoe hiay an-danitsy any ty mpanompony voahosotsy ndre tsy lavorary aza. (Efes. 2:4-7) Fe tsy amy ty voahosotsy avao Jehovah ro mamindra fo. Hoy Davida mpanoratsy salamo: “Soa fanahy amin’olo iaby Jehovah, sady hita amy ty raha iaby ataony fa mamindra fo ie.” (Sal. 145:9) Tea olo Jehovah ka mamindra fo avao ie lafa hitany hoe misy olo tokony hamindrà fo.

5. Akory ty nahaizani-Jesosy hoe mamindra fo Jehovah?

⁵ Tsy misy olo nahay soa ani-Jehovah mandilatsy ani-Jesosy. Hainy hoe tena mamindra fo Jehovah. Fa an-taony maro rozy mianaky ro niaraky niay tan-danitsy any, talohani-niaviani-Jesosy tan-tany etoy. (Ohab. 8:30, 31) Hitani-Jesosy fa namindra fo tamin’olombelo mpanota avao Babany io, sady tsy indraiky avao fa imaro mihintsy. (Sal. 78:37-42) Matetiky Jesosy niresaky ani-toetsy mampiavaky ani-Babany io saky nampianatsy.

6. Akory ty nanampeani-Jesosy antsika mba hahay hoe mamindra fo vatany Babany?

⁶ Fa niresahy tamy lahatsoratsy taloha teo iny, fa nanao fanohara mikasiky anaky adala iny Jesosy mba hanampea antsika hahatakatsy hoe tena mamindra fo Jehovah. Niala tan-trano tao ie le “nandanilany fahatany ty hananany tamy fiainan-draty.” (Lioka 15:13) Bakeo nibebaky tamy ty raha raty nataony ie sady niambany, le noly tamy farany. Fa tsy linini-mpamaraky io ty hahita hoe hanao akory ty ho fihetsikini-babany. Nanao akory babany lafa nahita azy? Hoy Jesosy: “Laha mbo nilavitsy [mpamaraky iny], le nijiloni-babany. Niferinay azy babany, ka nilay le nandrakoky azy tamy vozony teo sady nanoroky azy tam-pitiava.” Tsy nandatsa ani-anakilahiny iny nahoda io, fa avy le niferinay azy noho nanenga ty hadisoany, sady nandramby soa azy ndraiky ho anatini-fianakavia. Tena nanao fahotà bevata anaky adala iny, fe lafa nibebaky ie le nanenga ty hadisoany babany. Mampiseho ani-Jehovah azy baba mamindra fo tamy fanoharani-Jesosy iny. Hitantsika baka amin’io fa teani-Jesosy hatoro antsika hoe parè hanenga ty hadisoani-ze mpanota tena mibebaky Babany.—Lioka 15:17-24.

7. Manino ty fomba ampisehoani-Jehovah famindram-po ro manaporofo fa tena hendry ie?

⁷ Mamindra fo Jehovah satria tena hendry. Mivola ty Baiboly fa “ty fahendrea baka anabo any” le “be famindram-po noho be voka-tsoa.” (Jak. 3:17) Manahaky ray aman-dreny be fitiava io Jehovah. Hainy fa hahasoa ty vahoakiny laha mamindra fo ie. (Sal. 103:13; Isaia 49:15) Mamindra fo amy vahoakiny avao Jehovah ka afaky mitamà hoavy soasoa rozy ndre tsy lavorary. Tena hendry Jehovah ka mamindra fo avao ie  saky mahita raha mila amindràny fo. Fe hainy koa hoe amy fotoa manao akory ie ro tsy tokony hamindra fo. Tsy mandefitsy ie laha hahabaliky ani-azy nanao raha raty iny ty famindram-po haseho aminy. Saky manapa-kevitsy zany Jehovah, le raha hahasoa ty zavaboariny avao ro ataony.

8. Ino ty raha tsy maintsy atao kindraiky, le ino ty antony?

⁸ Eritsereto hoe misy Kristiana raiky mifily hanao fahotà bevata. Ino ty tokony hataontsika? Nivola tamy Paoly Jehovah mba handidy ty fiangona hoe ‘ka mifandramby aminy sasy.’ (1 Kor. 5:11) Voaroaky tsy ho anisani-fiangona zany ze mpanota tsy mibebaky. Tena ilà ty manao ani-zay mba hiarova ani-rahalahy noho anabavintsika tsy mivaliky reo. Tena ilà koa zay satria mampiseho hoe manaja ty fitsipikini-Jehovah tsika. Fe mety misy mieritseritsy hoe tsy mamindra fo Ndranahary, kanao voaroaky ty olo raiky. Marina va raha zay? Ndao hodinihintsika zay.

9-10. Laha hentea ty Hebreo 12:5, 6, manino tsika ro afaky mivola hoe fampisehoa famindram-po ty fandroaha ani-mpanota tsy mibebaky iny? Ino ty fanohara hanampy antsika hahatakatsy ani-zay?

⁹ Malahelo biby tsika lafa maharè fampandrenesa am-pivoria any hoe “tsy Vavolombeloni-Jehovah sasy” ty olo haintsika na teantsika. Mety ho lasa eritseritsy amy zay tsika hoe: ‘Le tsy maintsy niroasy va ie?’ Tena fampisehoa famindram-po vatany va ty fandroaha? Eka ty valiny. Laha misy olo mila anary, le atorontsika hoe hendry tsika, mamindra fo, sady tea azy laha mananatsy azy. (Ohab. 13:24) Mety hanampy olo hiova noho hibebaky va ty fandroaha? Eka. Maro ty rahalahy noho anabavy nanao fahotà bevata taloha nivola hoe tena nila niroasy rozy, satria nanampy an-drozy handiniky raha zay hoe tena raty ty raha nataon-drozy. Nibebaky noho nanova ty fandaisam-batan-drozy amy zay rozy, ka nitafimpoly amy Jehovah ndraiky.​—Vakio Hebreo 12:5, 6.

¹⁰ Toy misy fanohara raiky mampiseho hoe manino ty fandroaha olo tsy mibebaky ro azo volany hoe fandahara natao hampisehoa famindram-po amy fiangona. Eritsereto hoe misy mpiaraky aondry mahita hoe marary ty raiky amy aondriny rey. Ka mba hahafaha mitsabo azy le tsy maintsy atokany pilasy ie mba tsy hifangaro amy ilany rey. Fe ty aondry moa anisani-biby mila nama. Ta hiaraky amy aondry ilany rey ie ka mety tsy hihina na halahelo lafa atoka pilasy. Fe midika va zay hoe raty fanahy mpiaraky aondry iny kanao nanapa-kevitsy fa hatoka pilasy aondry iny? Tsy zay mihintsy. Hainy fa hifindra amy aondry ilany rey arety iny laha engàny hifangaro amin-drozy azy raiky marary iny. Miaro ani-aondry iaby rey zany ie, ka natokany pilasy azy aondry raiky marary iny.​—Ampitovizo amy Levitikosy 13:3, 4.

11. a) Manino ty olo voaroaky ro azo ampitovizy amy aondry marary? b) Ino ty azon’olo voaroaky atao, le ino ty fanampea mety ho azony?

¹¹ Azo ampitovizy amy aondry marary io ty Kristiana raiky voaroaky. Manahaky olo marary io ie satria simba ty fifandrambesany amy Jehovah. (Jak. 5:14) Afaky mamindra arety amin’olo hafa ty olo marary. Mitovy amy zay koa ty olo nanimba ty fifandrambesany amy Jehovah. Mety hitao ty olo hafa hanao raha raty ie. Tsy maintsy roasy tsy ho anisani-fiangona zany ie. Hita baka amy fananara io hoe teani-Jehovah ty mpanompony tsy mivaliky amy fiangona ao. Mety hanampy ani-olo nanota iny hahatakatsy koa raha zay hoe tena raty ty raha nataony ka hibebaky ie. Afaky mivory, ohatsy, ty olo voaroaky, mba hahafahany mandramby fampianara baka amy Baiboly ao noho mba hahavy azy hanatanjaky ty finoany ndraiky. Afaky mahazo boky noho gazety ie mba hovakìny noho hianarany. Afaky manenty Tele JW koa ie. Lafa hitani-anti-panahy hoe  miova ie, le mety hanome torohevitsy azy rozy kindraiky mba hanampea azy hifandramby soa amy Jehovah. Afaky ho voaramby ho Vavolombeloni-Jehovah ndraiky ie. *

12. Laha be fitiava noho mamindra fo ty anti-panahy, ino ty azon-drozy atao lafa misy mpanota tsy mibebaky?

¹² Tsy tokony ho halinontsika mihintsy hoe ze mpanota tsy mibebaky avao ro roasy. Haini-anti-panahy fa raha bevata zay ka tsy maintsy mandiniky soa rozy vo manapa-kevitsy hoe handroaky olo. Hain-drozy hoe ‘mananatsy araky ty antonony’ Jehovah, le teany hanao manahaky ani-zay koa rozy. (Jer. 30:11) Tean-drozy ty mpiara-manompo amin-drozy, ka tsy ta hanao raha hanimba ty fifandrambesani-rahalahy noho anabavin-drozy reo amy Jehovah rozy. Fe ilà kindraiky ty mandroaky ani-olo mpanao raty iny mba tsy ho anisani-fiangona. Be fitiava noho mamindra fo ty anti-panahy laha manao ani-zay.

13. Nanino Kristiana raiky ta Korinto any io ro nila niroasy?

¹³ Eritsereto, ohatsy, ty raha nataoni-apostoly Paoly lafa nisy olo nanota fe tsy nibebaky. Nisy Kristiana raiky ta Korinto tany nijangajanga tamy valini-babany. Tena raty raha nataony zay! Haini-Paoly fa fa nivola tamy Israelita reo Jehovah taloha tany hoe: “Ty lahilahy manao firaisa amy valini-babany le mampizelazela ty hamenarani-babany. Tsy maintsy vonoa ho maty rozy.” (Lev. 20:11) Mazava ho azy fa tsy afaky nivola tamy fiangona Paoly hoe tokony hovonoa lahilahy io. Fe nivola tamy Kristiana ta Korinto tao rey ie hoe tsy maintsy roasy lahilahy io. Tena nisy vokany raty tamin’olo hafa tamy fiangona eo ty fandaisam-bata raty nataony. Nieritseritsy aza ty olo sisany hoe tsy de fahotà bevata raha nataoni-lahilahy io zay!​—1 Kor. 5:1, 2, 13.

14. Akory ty nampisehoani-Paoly hoe namindrany fo lahilahy nivoaroaky tamy fiangonani-Korinto tany iny, le ino ty antony? (2 Korintianina 2:5-8, 11)

¹⁴ Tafara atoy, nihitani-Paoly hoe tena niova lahilahy iny. Tena nibebaky ie! Marina fa nangala baraka ty fiangona ty raha nataoni-lahilahy iny. Fe hita tamy ty raha nivolanini-Paoly tamy anti-panahy rey hoe “tsy ta hampiasa safà mahery loatsy” amin’olo nanota io ie. Nivola tamin-drozy ie hoe tokony ho “parè hanenga ty hadisoany” rozy sady ho soa fanahy “ka hampionona azy.” Henteo moa hoe nanino Paoly ro nivola ani-zay tamy anti-panahy rey. Hoy ty asany: “Tsy no ho resini-alahelo tafahoatsy ie.” Tena niferinesani-Paoly lahilahy nibebaky io. Tsy teany ty hahita azy ho kivy na halahelo marè amy raha nataony taloha rey, tsy no  hanjary tsy ta hiezaky sasy ie.​—Vakio 2 Korintianina 2:5-8, 11.

15. Akory ty ampisehoani-anti-panahy hoe sady mananatsy an’olo iny marerè rozy ro mamindra fo?

¹⁵ Ta hanahaky ani-Jehovah ty anti-panahy ka tea mamindra fo. Anarin-drozy marerè azy nanao raha raty iny laha zay ro hitan-drozy hoe tena ilà. Fe mamindra fo koa rozy laha mbo misy azo amindrà fo. Tsy mamindra fo zany ty anti-panahy laha tsy manasazy ani-olo nanao raha raty iny. Vomaiky aza rozy mankasitraky ani-raha zay. Fe zao, ty anti-panahy avao va ro mila mamindra fo?

16. Laha hentea ty Ohabolana 21:13, ino ty hataoni-Jehovah amy ze olo tsy mamindra fo?

¹⁶ Samby miezaky ty Kristiana iaby mba hamindra fo manahaky ani-Jehovah. Fa manino? Toy misy antony raiky: Tsy hijanjy ani-ze olo tsy mamindra fo mihintsy Jehovah. (Vakio Ohabolana 21:13.) Azo antoky fa tsy teantsika laha tsy janjinini-Jehovah ty vavaky ataontsika. Miamby soa zany tsika mba tsy ho mafy fo ka lasa tsy hamindra fo. Tsy tokony hanampin-tsofy tsika lafa misy Kristiana mitaray amintsika. Tokony ho parè hijanjy ty “fitarainani-mahantra” avao tsika. Soa laha manao ze fara herintsika tsika mba hanoriha ani-torohevitsini-Baiboly toy: “Hotsarà tsy misy famindram-po ze olo tsy mpamindra fo.” (Jak. 2:13) Laha miambany tsika ka mitiaro avao hoe tena mila famindram-po, le tsy ho sarotsy amintsika ty hampiseho famindram-po. Tena mila mamindra fo tsika sirtò lafa misy olo mibebaky ka mimpoly amy fiangona eo.

17. Akory ty nampisehoani-Davida Mpanjaka hoe tena namindra fo ie?

¹⁷ Misy tantara maro amy Baiboly ao afaky manampy antsika mba hahay hamindra fo noho tsy hanao safà mahery. Eritsereto, ohatsy, Davida Mpanjaka. Natorony avao matetiky hoe tena namindra fo ie. Ndre ta ho namono azy aza Saoly, le namindra fo tamy mpanjaka voatendri-Ndranahary io avao ie. Tsy namaly faty ani-Saoly mihintsy Davida.​—1 Sam. 24:9-12, 18, 19.

18-19. Miresaha tantara roe ahità hoe tsy namindra fo Davida.

¹⁸ Fe tsy hoe namindra fo avao Davida. Nisy fotoa, ohatsy, nanao raha nampeloky azy Nabala lahilahy raty fanahy. Tsy nety nanome hany ani-Davida noho lahilahy niaraky taminy rey Nabala. Nanao akory Davida? Neloky biby ie ka nanapa-kevitsy hamono ani-Nabala miaraky amy ze lahilahy iaby tan-tranony ao. Fe soa avao fa nanao raha malaky Abigaila valini-Nabala. Soa fanahy ie sady nahaliny raha, ka nanome hany ani-Davida. Nisaka ani-Davida tsy hamono ani-Nabala noho ze lahilahy tan-tranony ao raha zay.​—1 Sam. 25:9-22, 32-35.

¹⁹ Nisy fotoa koa Natana mpaminany niresaky tamy Davida mikasiky lahilahy raiky mpanarivo kanefa nangalatsy ty aondrini-namany. Nana aondry raiky farani-ze teany lahilahy nahantra iny, fe niravàni-lahilahy mpanarivo io aondry iny. Nanao akory Davida lafa naharè ani-zay? Neloky biby ie le hoy ty asany: “Laha mbo velo koa Jehovah, le maeva ani-lahilahy nanao ani-raha zay ty ho maty!” (2 Sam. 12:1-6) Haini-Davida soa ty Lalànani-Mosesy. Laha misy olo nangalatsy  aondry raiky, le tsy maintsy onerany aondry efatsy raha zay. (Eks. 22:1) Ka faty va zany ty tokony ho sazini-lahilahy iny? Tena tsy mety ty nivolanany hoe maeva ho maty mpangalatsy iny. Niresaky ani-tantara iny Natana mba hanampea ani-Davida hahatakatsy hoe tena raty ty fahotà nataony. Mbo raty mandilatsy ani-halatsy aondry iny aza raha nataony io. Fe tena namindra fo taminy Jehovah ndre tsy manahaky ani-zay ty raha ho nataony tamy mpangalatsy aondry tamy fanoharani-Natana iny!​—2 Sam. 12:7-13.

20. Ino ty azontsika ianara baka amy ty raha niainani-Davida?

²⁰ Lafa neloky biby Davida, le nanapa-kevitsy ie hoe maeva hovonoa Nabala miaraky amy ze lahilahy tan-tranony ao. Tafarani-zay, nivola koa Davida fa maeva hovonoa lahilahy tamy fanoharani-Natana iny. Lahilahy soa fanahy Davida, fe nanino ie ro nivola hoe tokony hovonoa mpangalatsy iny? Diniho tse moa ty raha nahazo ani-Davida. Tamy fotoa io ie, niasa loha satria nanea azy ty eritseriny. Ka laha tsy mamindra fo ty olo raiky lafa mitsara ty hafa, le hita hoe fa tsy de mifandramby soa amy Jehovah ie. Namepetsy ty mpanori-dia azy Jesosy hoe: “Ka mitsara sasy mba tsy hotsarà, fa araky ty fitsarà ataonareo ro hitsarà anareo, le araky ze meza ampiasànareo ro hanamezà anareo.” (Mat. 7:1, 2) Enga anie tsika mba tsy ho raty fanahy, fa hiezaky ho “mpanarivo famindram-po” manahaky ani-Ndranaharintsika iny.

21-22. Ino, ohatsy, ty raha sisany azontsika ampisehoa hoe mamindra fo tsika?

²¹ Tsy hoe fihetseham-po avao ty hoe mamindra fo. Ty olo mamindra fo, manao ze azony atao mba hanampea olo. Azontsika hentea soa zany hoe ia ty olo mila fanampea amy fianakaviantsika ao, amy fiangona eo, noho an-tanà eo. Maro ty fomba azontsika ampisehoa hoe mamindra fo tsika! Eritsereto hoe: Mila fampahereza va olo iny? Afaky manampy va tsika, ohatsy hoe manome hany na ze raha hafa ilàny? Misy Kristiana vo nivoaramby va mety hila olo hataony nama mba hampahery azy? Afaky miresaky ty vaovao soani-Fanjakà iny amin’olo va tsika? Raha zay, anisani-fomba farani-ze soa ampisehoantsika hoe miferinay ani-ze olo hitantsika tsika.​—Joba 29:12, 13; Rom. 10:14, 15; Jak. 1:27.

²² Laha henteantsika hoe ia ty olo mila ani-reo, le ho hitantsika hoe maro ty raha azontsika atao mba hampisehoa famindram-po amy ty manodidy antsika. Laha mamindra fo tsika, le tena ho falifaly Babantsika an-danitsy any iny satria Ndranahary “mpanarivo famindram-po” ie!