SANTAO, le maro ty aondry lafovily tafimpoly ndraiky amy fiangona kristiana. Mba eritsereto moa ty hafalea “an-danitsy” any lafa mimpoly ty raiky amin’olo rey! (Lioka 15:7, 10) Laha iha nivoaramby ndraiky, le afaky matoky iha fa falifaly biby Jesosy, ty anjely iaby an-danitsy any, noho Jehovah satria anisani-fiangona ndraiky iha. Fe mety hisy raha sarotsy lafa miezaky manasoa ty fifandrambesanao amy Jehovah ndraiky iha. Ino ty sisany amy raha rezay, le ino ty hanampy anao?

Mbo mahatiaro kivy avao ty ankamaroani-rahalahy noho anabavy ndre fa tafimpoly amy fiangona eo aza. Mety ho azonao soa vasa ty raha nitsapani-Davida Mpanjaka. Ndre fa nengani-Jehovah aza ty hadisoany, le mbo nivola avao ie hoe: “Maro ty hadisoa vitako.” (Sal. 40:12; 65:3) Lafa nimpoly amy Jehovah ty olo raiky, le mety mbo hanea azy avao ty eritseriny na mety mbo hahatiaro menatsy avao ie anatini-tao maro. Eritsereto, ohatsy, Isabelle. * Fa nivoaroaky tanatini-20 tao eo ho eo ie, le hoy ty asany: “Sarotsy amiko ty nino hoe afaky manenga ty hadisoako Jehovah.” Laha iha kivy le hihamalemy ndraiky ty fifandrambesanao amy Jehovah. (Ohab. 24:10) Ka engà hahazo anao mihintsy raha zay.

Matahotsy ty olo sisany hoe tsy ho vitany ty hanao raha hahavy azy hifandramby soa amy Jehovah ndraiky. Hoy Antoine lafa ie nivoaramby: “Atao raha nihalinoko iaby ty ankamaroani-raha nianarako na nivitako tamy zaho mbo ni-Vavolombeloni-Jehovah rey.” Mitovy amy zay koa ty raha tsapan’olo sisany. Lasa misalasala amy zay rozy ka tsy manao ze azon-drozy atao ho ani-Jehovah.

Eritsereto hoe niropakini-sikilony ty tranon’olo raiky. Mety ho kivy ie lafa mieritseritsy ty fotoa ho laniny noho ty asa mandiny azy mba hanamboara ani-trano iny ndraiky. Mitovy amy trano simba zay  koa ty fifandrambesanao amy Jehovah laha nanao fahotà bevata iha. Laha nisimba ty fifandrambesanao amy Jehovah, le mety hahatsapa iha hoe mitaky asa mafy vo himpoly amy pilasiny ndraiky raha zay. Fe tsy ho vitanao amy ty herinao manoka avao raha zay.

Manasa antsika Jehovah hoe: “Avia hifandamy tsika.” (Isaia 1:18) Fa niezaky mafy iha mba hahafahanareo ‘mifandamy.’ Teani-Jehovah iha satria manao ani-ezaky zay. Eritsereto tse moa zao: Satria iha nimpoly amy Jehovah, le afaky mampiasa anao ie mba hanaporofoa hoe mpavandy ty Devoly.​—Ohab. 27:11.

Namonjy ani-Jehovah iha lafa nimpoly aminy, le mampitamà ie fa hamonjy anao koa. (Jak. 4:8) Falifaly aloha ty rahalahy noho anabavy satria lasa anisani-fiangona ndraiky iha. Fe tsy ampy zay. Mbo misy raha mila ataonao. Mila miezaky avao iha mba hampatanjaky ty fitiavanao ani-Jehovah, azy Babanao noho Namanao iny. Akory ty hanaovanao ani-zay?

Miezaha hametraky raha ho azonao tratsiry. Mety mbo tiaronao ty hevitsy fototsy nianaranao mikasiky ani-Jehovah noho ty fampitamanany hoe hisy Paradisa. Fe mila mana fahazara ara-panahy soa ndraiky iha henanizao, ohatsy hoe mitory tsy tampaky, manatriky fivoria, noho miaraky matetiky amy rahalahy noho anabavinao reo. Retoa misy raha azonao kendrè.

Miresaha matetiky amy Jehovah. Haini-Babanao io soa hoe sarotsy aminao ty hivavaky aminy lafa iha mieriseritsy lava avao ty raha raty nataonao. (Rom. 8:26) Fe “mahareta amy vavaky”, ka resaho aminy hoe tena ta hinama aminy iha. (Rom. 12:12) Hoy Andrej: “Nanome tsiny ty vatako aho sady nimenatsy. Fe lafa saky baka nivavaky aho, le niazoazoko ty aiko. Lasa nilamy biby ty saiko.” Laha tsy hainao hoe ino ty raha horesahinao amy vavaky, le diniho ty vavaky nataoni-Davida Mpanjaka tamy ie nibebaky. Amy Salamo 51 noho 65 ao ty misy azy.

Mazotoa mianatsy Baiboly. Hanampy anao hana finoa matanjaky raha zay sady hanampy anao hampitombo ty fitiavanao ani-Jehovah. (Sal. 19:7-11) Hoy Felipe: “Tsy tena nana fandahara famakia noho fianara Baiboly aho, ka nihanalemy ty finoako. Lasa nanao raha nampalahelo ani-Jehovah aho. Tsy ta hampimpoly ty hadisoako sasy aho ka nataoko azo antoky hoe tsy ho tampaky mihintsy ty fianarako Baiboly.” Afaky manao manahaky ani-zay koa iha. Laha somary sarotsy aminao ty hahita foto-kevitsy hodinihy amy fianara am-bata ataonao, manino laha mangataky fanampea amy nama mifandramby soa amy Jehovah?

Miezaha hinama soa amy rahalahy noho anabavinao reo ndraiky. Matahotsy ty olo sisany lafa nimpoly amy fiangona ndraiky tsy no ho hafahafa ty fahitani-mpiara-manompo reo azy. Hoy Larissa: “Nimenatsy biby aho. Tsapako hoe nampalahelo noho nandiso fanantenà ani-ranadahy noho rahavaviko rey aho. Tsy niala tan-tsaiko tao mihintsy eritseritsy zay.” Matokisa fa ta hanampy anao hifandramby soa amy Jehovah ndraiky ty anti-panahy noho ty olo hafa. (Henteo ty efajoro hoe “ Ino ty Azoni-Anti-panahy Atao?”) Falifaly rozy satria nimpoly tamy Jehovah iha, le tean-drozy ho falifaly manahaky ani-zay koa iha!​—Ohab. 17:17.

Ino ty azonao atao mba hifandramby marìny amy fiangona? Manatreha fivoria tsy tampaky miaraky amy rahalahy noho anabavinao reo, le mandrambesa anjara tsy tampaky amy fitoria. Tena hanampy anao va raha zay? Hoy Felix: “Fa tsy nilinini-rahalahy noho anabavy reo ty himpoliako. Tsapako hoe tena tea ahy rozy. Nanampy ahy rozy iaby mba hahatsapa ho anisani-fiangona ndraiky, noho hahatsapa hoe nanenga ty hadisoako Jehovah sady afaky manohy manompo azy avao aho.”—Henteo ty efajoro hoe “ Ino ty Azonao Atao?”

Tsy hieny Satana fa handefa problemo maro sankarazany aminao avao, ka hataony ze hahakivy anao, lafa iha miezaky hinama soa amy Jehovah ndraiky. (Lioka 4:13) Miomana zany ka hatanjaho ty fifandrambesanao amy Jehovah.

Ho zao ty nivolanini-Jehovah mikasiky ty aondriny: “Ty trobo hilàko, ze mivio lala hampoliko, ty folaky hofeheziko siky, le ze malemy hohatanjahiko.” (Ezek. 34:16) Fa maro ty olo nampeani-Jehovah ka lasa natanjaky ara-panahy ndraiky. Matokisa fa ta hanampy anao ie mba hahavy anao hifandramby soa aminy ndraiky.