1. Engàni-Jehovah hanao ino ty mpanompony tsy mivaliky?

BABA be fitiava Jehovah ka nengany hanompo azy tsika kiraidraiky. Fe ndre samby hafa aza ty anjara asantsika, le samby lafovily iaby tsika. Akory ty hanampeani-apostoly Paoly antsika mba handramby fianara baka amy raha zay?

2. Laha hentea ty Efesianina 4:16, manino tsika ro tokony hanaja olo noho hahay miaraky miasa?

² Araky ty fa hitantsika baka amy andinin-teny fototsy amy lahatsoratsy toy, le nihamafisini-Paoly hoe tsy misy amintsika mpanomponi-Jehovah hivola ho zao amy ty hafa hoe: “Tsy mila anao aho.” (1 Kor. 12:21) Tokony hanaja olo noho hahay miaraky miasa tsika laha teantsika hisy filamina ty amy fiangona eo. (Vakio Efesianina 4:16.) Lafa miharo raiky tsika ka miaraky miasa, le hifankatea sady hihamatanjaky ty fiangona.

3. Ino ty horesahintsika amy lahatsoratsy toy ato?

³ Ino iaby ty fomba hampisehoantsika hoe manaja ani-Kristiana amy fiangona eo reo tsika? Horesahintsika amy lahatsoratsy toy ato hoe akory ty ampisehoani-anti-panahy fa manaja ty namany ie. Bakeo, hohenteantsika hoe akory ty ampisehoantsika iaby fa manaja ty rahalahy na anabavy tsy manambaly tsika. Farany, hianatsy tsika hoe akory hampisehoa fankasitraha amin’olo tsy mitovy fivolana amintsika.

4. Manino ty torohevitsini-Paoly amy Romanina 12:10 ao ro tokony horihini-anti-panahy?

⁴ Samby nivoatingini-fanahy masini-Jehovah iaby ty anti-panahy. Fe tsy mitovy ty fahaiza ananan-drozy. (1 Kor. 12:17, 18) Mety nivoatendry vo tsiela ty sisany ka tsy maharaky raha maro manahaky ani-anti-panahy fa ela rey. Mety tsy afaky mamita iaby ty andraikitsiny koa, ohatsy, ty hafa satria fa be tao na tsy salama. Fe tsy misy amy ty anti-panahy reo ro hivola amy ty namany hoe: “Tsy mila anao aho.” Mifanohitsy amy zay, fa orihin-drozy soa ty torohevitsini-Paoly voaresaky amy Romanina 12:10.​—Vakio.

5. Akory ty ampisehoni-anti-panahy hoe manaja ty namany ie, le manino ro vatan-draha laha samby manao ani-zay rozy?

⁵ Mifanaja ty anti-panahy lafa mijanjy soa ty hevitsini-anti-panahy namany. Vatan-draha ty hanaovan-drozy ani-zay lafa mivory ty anti-panahini-fiangona. Ino ty antony? Diniho moa ty raha resahini-Tilikambo Fiambena 1 Zanviè 1989 toy: “Tokony hieky anti-panahy reo hoe afaky mampiasa ty fanahy masy Kristy, ka ndre ia ndre ia amin-drozy, le azony tarihy mba hahita torolala baka amy Baiboly hanampy an-drozy hahita ze tokony hatao na handramby fanapahan-kevitsy bevata. (Asa. 15:6-15) Ty anti-panahy iaby amy fiangona eo ro ampeani-fanahy masy, fa tsy ty raiky amin-drozy avao.”

6. Ino ty hanampy ty anti-panahy hiaraky hiasa noho hiharo raiky, le manino raha zay ro mahasoa ty fiangona?

⁶ Laha manaja ty anti-panahy namany ty anti-panahy, le tsy ie avao ro hiresaky voalohany lafa misy fivoria ataon-drozy. Tsy ho be resaky ie, sady tsy hieritseritsy hoe ty hevitsiny avao ro marina. Hiambany avao ie lafa mivola ty hevitsiny, le hijanjy soa lafa miresaky ty namany. Fa mbo vatan-draha mandilatsy ani-zay, mazoto mizara torolala baka amy Soratsy Masy ao ie sady parè hijanjy ty tari-dala baka amy “mpanompo azo atokisa noho mahihitsy.” (Mat. 24:45-47) Laha mampiseho fitiava noho fanajà ty anti-panahy lafa mifampiresaky, le hiasa amin-drozy  ty fanahy masi-Ndranahary sady hitariky an-drozy hanao fanapahan-kevitsy manatanjaky ty fiangona.​—Jak. 3: 17, 18.

7. Manao akory ty fahitani-Jesosy ty olo tsy manambaly?

⁷ Misy olo manambaly ty amy fiangona eo, le ty sisany amin-drozy manan’anaky. Fe misy rahalahy noho anabavy tsy manambaly koa. Manao akory ty tokony ho fahitantsika ty olo tsy manambaly? Diniho ty hevitsini-Jesosy. Tsy nanambaly Jesosy tanatini-fotoa nanompoany tan-tany etoy. Nanoka ty fotoany tamy asa nanendrea azy ie. Tsy nampianatsy mihintsy Jesosy hoe tsy maintsy manambaly ty Kristiana na tsy mahazo manambaly. Fe nivola ie hoe mety hifily tsy hanambaly ty Kristiana sasany. (Mat. 19:11, 12) Nanaja an’olo tsy nanambaly rey Jesosy. Tsy nieritseritsy ie hoe ambany olo rey laha ampitovizy amin’olo manambaly, na misy raha tsy ampy amy ty fiainan-drozy.

8. Ino ty nampirisihini-Paoly hoeritseretini-Kristiana, laha hentea ty 1 Korintianina 7:7-9?

⁸ Tsy nanambaly nanahaky ani-Jesosy ty apostoly Paoly lafa nanatanteraky ty fanompoany. Tsy nampianatsy mihintsy Paoly hoe tsy mety amy Kristiana ty manambaly. Hainy hoe fanapahan-kevitsy manoka raha zay. Fe nampirisiky ty Kristiana ie mba handiniky laha mety amin-drozy ty tsy manambaly fa manompo ani-Jehovah. (Vakio 1 Korintianina 7:7-9.) Azo antoky fa tsy nieritseritsy Paoly hoe ambany ty Kristiana tsy manambaly. Nanendry ani-Timoty, rahalahy tsy manambaly aza ie mba hanao andraikitsy bevata amy fanompoa ani-Jehovah. * (Fil. 2:19-22) Fe tsy mety ty mieritseritsy hoe mianky ty hoe manambaly na tsy manambaly ro hahavy ty rahalahy raiky hahafeno fepetra na tsy hahafeno.​—1 Kor. 7:32-35, 38.

9. Ino ty raha azontsika volany mikasiky ty hoe manambaly noho tsy manambaly?

⁹ Ndre Jesosy ndre Paoly le samby tsy nampianatsy hoe tsy maintsy manambaly ty Kristiana na tsy mahazo manambaly. Ka ino ty raha azontsika volany mikasiky ty hoe manambaly noho tsy manambaly? Mamaly ani-zay ty Tilikambo Fiambena 1 Oktobra 2012. Hoy ty asany: “Samby fanomeza baka amy Ndranahary [ndre ty hoe manambaly, ndre ty hoe tsy manambaly] ... Tsy hoe afa-baraka na mampalahelo ty fahitani-Jehovah ty olo tsy manambaly.”  Laha zay ie, le tokony hanaja ani-rahalahy noho anabavy tsy manambaly amy fiangona misy antsika eo reo tsika.

10. Akory ty ampisehoantsika hoe manaja ty rahalahy noho anabavintsika tsy manambaly tsika?

¹⁰ Akory ty ampisehoantsika hoe manaja ty fihetseham-po noho ty raha iainani-rahalahy noho anabavintsika tsy manambaly rey tsika? Soa hotiarovintsika hoe nanapa-kevitsy tsy hanambaly mihintsy ty Kristiana sasany. Ty ilany ta ho nanambaly, fe tsy nahita olo mety aminy. Fa ty sisany mety nimaty valy. Ndre ino ndre ino ty antony, le tsy tokony hanontanintany an-drozy ty olo amy fiangona eo hoe manino rozy ro tsy manambaly, na hanao ho zao hoe hila valy ho an-drozy. Marina fa mety hisy amy Kristiana tsy manambaly reo mila fanampea mba hahita valy. Fe ino ty ho tsapany laha misy olo manao ani-zay ho azy kanefa ie tsy nieritseritsy ani-zay? (1 Tes. 4:11; 1 Tim. 5:13) Ndao tsika handiniky ty raha nivolanini-rahalahy noho anabavy sasany tsy manambaly.

11-12. Ino amy ty raha ataontsika ro mety hahakivy ty olo tsy manambaly?

¹¹ Hitani-mpiandraikitsini-faritsy raiky tsy manambaly hoe maro ty tombony azo lafa tsy manambaly. Fe kivy hoasany ie lafa misy rahalahy noho anabavy manontany azy hoe: “Manino iha tsy manambaly io?” Hoy ty rahalahy raiky tsy manambaly manompo amy biròni-sampana: “Ataoni-rahalahy noho anabavy reo kindraiky ze hahatsapako hoe mahaferinay tsy manambaly zao. Manjary atao raha enta-mavesatsy ty hoe tsy manambaly fa tsy fanomeza.”

¹² Ho zao ty nivolanini-ranabavy raiky manompo amy Betela: “Mieritseritsy ty rahalahy noho anabavy sasany hoe mila valy iaby lafa atao olo tsy manambaly, na saky miaraky amin’olo maromaro ty olo tsy manambaly le mieritseritsy hoe fahafaha ho azy zay mba hahafahany mahita valy. Nandeha an-tany hafa any aho ndraiky zay fa nisy asa nataoko tany. Fotoa fivoria tamy zay. Nivola tamiko rahavavy nivantanako iny hoe misy ranadahy roe mitovy tao amiko ty amy fiangona ao. Nivola ie hoe tsy mila valy ho ahy. Kanefa lafa nilitsy tamy Efitrano Fanjakà ao zahay tsiela tafarani-zay, le nandesiny tamy ranadahy roe rey teny aho. Tena nahatiaro menatsy aloha zahay telo tamy zay.”

13. Ia ty modely nampahery ani-ranabavy raiky tsy manambaly?

¹³ Nivola ho zao koa ty ranabavy raiky hafa manompo amy Betela: “Maro ty mpisava lala fa be tao noho tsy manambaly haiko. Mahay mifandramby amin’olo rozy, mana raha kendrè, mana fahafoizam-bata, sady mahita fifalea amy ty fanompoa ataon-drozy. Tena manampy ty fiangona rozy. Mana toe-tsay soa mikasiky ty hoe tsy manambaly rozy. Tsy mieritseritsy rozy hoe ambony mandilatsy ty hafa satria hoe tsy manambaly, na hoe tsy afaky ho falifaly satria tsy manambaly amin’anaky.” Soasoa lafa mahatsapa ho lafovily noho misy hajany ho zay tena amy fiangona eo. Midary anao ty olo fe tsy hoe mahaferinay iha, manaja anao koa rozy fe tsy mandrengy anao tafahoatsy. Hainao hoe tea anao rozy.

14. Akory ty ampisehoantsika hoe manaja ani-azy tsy manambaly reo tsika?

¹⁴ Ho falifaly rahalahy noho anabavintsika tsy manambaly reo lafa mahay hoe lafovily amintsika rozy satria mana toetsy soa, fa tsy hoe satria tsy manambaly. Tsy tokony hieritseritsy tsika hoe mampalahelo rozy. Soa aza laha mankasitraky an-drozy tsika satria tsy mivaliky rozy. Tsy hieritseritsy mihintsy  rahalahy noho anabavintsika tsy manambaly reo amy zay hoe ta hivola aminy tsika hoe: “Tsy mila anao aho.” (1 Kor. 12:21) Vomaiky ho hain-drozy aza hoe manaja an-drozy tsika sady tena mila an-drozy amy fiangona eo.

15. Ino ty nataon’olo sasany mba hampitomboa ty fanompoany?

¹⁵ Maro ty mpitory nianatsy fivolana hafa tato ho ato, amy zay afaky mampitombo ty fanompoany. Mitaky fanovà ty fanaova ani-zay. Niala tamy fiangona mampiasa ty safàn-drazany rahalahy noho anabavy reo, mba hanompoa amy fiangona mampiasa safà hafa sady mila mpitory maro. (Asa. 16:9) Nanapa-kevitsy hanao ani-zay rozy mba hampitomboa ty fanompoan-drozy ani-Jehovah. Mety ho ela aloha rozy vo hahay soa ani-safà vaovao iny, fe mahavita raha soa maro rozy. Mampahery noho manatanjaky ty fiangona ty toetsy soan-drozy noho ty raha iainan-drozy. Lafovily amintsika rahalahy noho anabavy mana fahafoizam-bata rey!

16. Akory ty hahaiza hoe mahafeno fepetra ho anti-panahy na mpanampy amy fanompoa ty rahalahy raiky?

¹⁶ Tsy tokony hanapa-kevitsy ty anti-panahy hoe tsy hotendrè anti-panahy na mpanampy amy fanompoa ty rahalahy raiky satria hoe tsy mahay soa ty safà amy fiangona iny eo. Tsy ty fivolanani-rahalahy iny ani-safà amy fiangona misy azy ro tokony hohenteani-anti-panahy, fa hoe mahafeno ty fepetra volanini-Baiboly ho ahi-ty anti-panahy noho ty mpanampy amy fanompoa va ie.​—1 Tim. 3:1-10, 12, 13; Tit. 1:5-9.

17. Ino iaby ty fanontanea mila eritseretini-fianakavia sisany lafa hifindra amy tany hafa?

¹⁷ Nifindra an-tany hafa ty fianakavia kristiana sisany satria nilay baka an-taniny any na nila asa. Mety ty safà ampiasà amy tany iny any ro ampianara ani-anakin-drozy rey lafa an-dakilasy any. Mety mila mianatsy ty safà ampiasà any koa ty baba noho reny mba hahità asa. Ka manao akory laha misy fiangona na antoko-mpitory mampiasa ty safàn-drazan-drozy ty amy tany iny eo? Aia ty fiangona tokony hivoriani-fianakavia reo? Ze fiangona mampiasa ty safà amy tany iny eo sa ty fiangona mampiasa ty safàn-drazan-drozy?

18. Akory ty ampisehoantsika hoe manaja ty fanapahan-kevitsini-loham-pianakavia tsika, laha hentea ty Galatianina 6:5?

¹⁸ Ty loham-pianakavia ro tsy maintsy manapa-kevitsy hoe aia ty fiangona hivoriani-fianakaviany. Satria fanapahan-kevitsy manoka raha io, le tokony hoeritseretiny ze tena hahasoa ty fianakaviany. (Vakio Galatianina 6:5.) Mila manaja ty fanapahan-kevitsini-loham-pianakavia tsika. Ndre ino ndre ino ty tapakiny, le soa laha ekentsika raha zay ka horambesintsika soa ty fianakaviany lafa avy amy fiangonantsika eo sady hampisehoantsika fitiava.​—Rom. 15:7.

19. Tokony handiniky noho hivavaky mikasiky ino ty loham-pianakavia?

 ¹⁹ Misy fianakavia manompo amy fiangona mampiasa ty safàn-drazany, fe tsy mahay mivola soa ani-safà io ty anakin-drozy. Laha amy tany nifindran-drozy any ro misy ani-fiangona ivoriani-fianakavia io, le mety ho sarotsy amy anakin-drozy rey ty hahazo ty raha ianara am-pivoria any sady tsy handroso koa rozy. Ino ty antony? Satria mety ty safà ampiasà amy tany iny eo ro ampianara ani-ajà rey an-dakilasy any, fa tsy ty safà ampiasani-baba amy renin-drozy. Laha zay ro miseho, le tokony handiniky soa ty loham-pianakavia sady hivavaky hoe ino ty azon-drozy atao mba hanampea ty anakin-drozy hifandramby marìny amy Jehovah noho ty vahoakiny. Na rozy manampy ty anakin-drozy hahay soa ty safàn-drazan-drozy, na rozy mifindra amy fiangona mampiasa ani-safà azoni-anakin-drozy rey soa. Ndre ino ndre ino ty fanapahan-kevitsini-loham-pianakavia iny, le tokony hataoni-fiangona nifilin-drozy iny ze hahavy an-drozy hahatsapa hoe voahaja noho lafovily.

20. Akory ty ampisehoantsika hoe manaja ani-rahalahy noho anabavintsika nianatsy fivolana vaovao rey tsika?

²⁰ Niresaky raha manahira maro tsika teo. Tsy maintsy ho maro avao zany ty fiangona hisy rahalahy noho anabavy sahira mianatsy safà vaovao. Mety ho sarotsy amin-drozy ty miresaky ty raha eritseretin-drozy. Fe laha tsy mifantoky marè amy ty fomba fivolanan-drozy tsika, le ho hitantsika hoe tea ani-Jehovah rozy sady maniry hanompo azy. Lafa tsika mahita ani-toetsy soa rezay, le vomaiky ho lafovily amintsika rahalahy noho anabavy rey sady hohajantsika. Ndre tsy mahay soa ty fivolanantsika aza rozy, le tsy hanao ho zao tsika hoe: “Tsy mila anao aho.”

21-22. Ino ty tombontsoa ananantsika?

²¹ Nameani-Jehovah tombontsoa bevata tsika, satria mana anjara asa amy fiangonany eo. Ka ndre lahilahy tsika ndre ampela, ndre manambaly ndre tsy mana, ndre antitsy ndre tanora, ndre mahay fivolana hafa ndre tsy tena mahay, le lafovily amy Jehovah noho amy rahalahy noho anabavintsika reo tsika.​—Rom. 12:4, 5; Kol. 3:10, 11.

²² Loniky lahy horihintsika avao ty raha soa maro nianarantsika baka amy fanoharani-Paoly mikasiky ty vatan’olombelo iny. Hanampy antsika raha zay mba hahay hoe ino ty azontsika atao mba hampahereza ani-rahalahy noho anabavintsika reo. Hanampy antsika ho tea noho hanaja an-drozy koa raha zay.