1. Ino ty nivolanini-Davida mikasiky ty fiambaneani-Jehovah?

AZONTSIKA atao va ty mivola hoe miambany Jehovah? Eka. Nivola ho zao Davida ndraiky zay: “Hanome ahy ty ampinga fanavotanao iha, le ty fiambaneanao ro mampisondrotsy ahy.” (2 Sam. 22:36; Sal. 18:35) Nitiaroni-Davida vasa ty andro niaviani-Samoela mpaminany tan-tranoni-babany tao mba hanosotsy azy ho mpanjakani-Israely manaraky. Hita hoe niambany Jehovah, satria Davida ro zainy marè amy mpamaraky valo rey, kanefa ie ro nifiliny ho mpanjaka handimby ani-Saoly.​—1 Sam. 16:1, 10-13.

2. Ino ty hodinihintsika amy lahatsoratsy toy ato?

² Azo antoky fa tsapani-Davida koa ty raha nisoratini-mpanao salamo raiky iny mikasiky ani-Jehovah hoe: “Miondriky ie mba hanenty ty an-danitsy any noho ty an-tany etoy, atsangany hiala amy lemboky ty olo ambany. Le ty mahantra asondrotsiny ... mba hiaraky mipetraky amin’olo ambony.” (Sal. 113:6-8) Handiniky fianara bevata mikasiky fiambanea tse tsika amy lahatsoratsy toy ato, ka hohenteantsika ty fomba sisany nampisehoani-Jehovah ani-toetsy io. Bakeo ho hitantsika hoe ino ty azontsika ianara mikasiky fiambanea baka amy ty raha nataoni-Saoly Mpanjaka, Daniela mpaminany, noho Jesosy.

3. Akory ty ataoni-Jehovah lafa mifandramby amintsika, le ino ty asehoni-raha zay?

³ Asehoni-Jehovah hoe miambany vatany ie lafa mifandramby amy ty olombelo tsy lavorary manompo azy. Tsy hoe ekeny  avao ty fanompoa ataontsika ho azy, fa mbo rambesiny ho namany koa tsika. (Sal. 25:14) Jehovah ro nanao raha voalohany mba ho afaky minama aminy tsika. Nameany Anakilahiny iny mba hatao soro hisolo ty fahotantsika. Tena namindra fo noho nahaferinay antsika vatany ie!

4. Ino ty nameani-Jehovah antsika, le ino ty antony?

⁴ Nisy fomba hafa koa nampisehoani-Jehovah hoe miambany ie. Jehovah ro Mpamoro ka azony natao ty namoro antsika mba tsy ho afaky mifily ty raha hataontsika amy fiainantsika. Fe tsy zay ty nataony. Nataony mitovy soraky aminy tsika sady nameany fahalalaha. Kelikely noho ambany tsika, fe teani-Jehovah tsika laha mifily hanompo azy an-tsitrapo satria tea azy sady mahay hoe mahasoa ty manoriky ty safàny. (Deot. 10:12; Isa. 48:17, 18) Tsy tokony hisaorantsika bevata va Jehovah satria tena miambany?

5. Akory ty ampianarani-Jehovah antsika hiambany? (Henteo sary amy fononi-gazety toy.)

⁵ Mampianatsy antsika hiambany Jehovah amy ty fomba ifandrambesany amintsika. Jehovah ro farani-hendry amy kila raha iaby zao. Fe ndre zay, le parè handramby soso-kevitsy baka amy ty hafa ie. Nengany hanampy azy, ohatsy, Anakilahiny iny lafa namoro ty raha iaby ie. (Ohab. 8:27-30; Kol. 1:15, 16) Ndre farani-ze mahery koa Jehovah, le manome andraikitsy ho ani-hafa koa ie. Nitendreny ho Mpanjakani-Fanjakà iny, ohatsy, Jesosy. Misy olombelo 144 000 mpiaraky manjaka amy Jesosy koa hameany fahefà. (Lioka 12:32) Mazava ho azy fa nampiofanini-Jehovah Jesosy mba ho Mpanjaka noho Mpisorobe. (Heb. 5:8, 9) Nampiofaniny koa mpiaraky manjaka amy Jesosy rey. Fe tsy hoe nitendreny rozy bakeo ilikilirany ze raha iaby ataon-drozy mba hamità ani-asa io. Matoky avao ie fa hanao ty sitrapony rozy.—Apok. 5:10.

6-7. Ino ty azontsika ianara baka amy Babantsika an-danitsy any iny mikasiky fahaiza mizara andraikitsy?

 ⁶ Tsy mila ty fanampean’olo hafa Babantsika an-danitsy any iny vo hahavita raha, fe nanome andraikitsy olo ie. Ka tsy vomaiky mila manahaky azy tsika! Loham-pianakavia va, ohatsy, iha sa anti-panahy amy fiangona eo? Tahafo Jehovah. Mahaiza mizara asa, le ka ilikilira ze fomba iaby anaovan-drozy ani-raha iny. Lafa manahaky ani-Jehovah iha, le tsy hoe ho vita avao asa ampanaovinao iny, fa hampiofana ty hafa koa iha sady hanampy azy hatòky ty vatany. (Isa. 41:10) Ino koa ty raha azoni-azy mana fahefà reo ianara baka amy Jehovah?

⁷ Hita amy raha resahini-Baiboly fa dareani-Jehovah koa ty hevitsini-anakiny an-danitsy any rey. (1 Mpanj. 22:19-22) Akory ty azonareo baba noho reny anahafa ani-Jehovah? Lafa hitanareo hoe mety, le anontaneo ty hevitsini-anakinareo reo mikasiky ty fomba tokony hanaova asa raiky. Bakeo oriho ty soso-kevitsin-drozy, laha azo atao.

8. Akory ty nampisehoani-Jehovah hoe nahaliny raha ie lafa nifandramby tamy Abrahama noho Saraha?

⁸ Mahaliny raha koa Jehovah ka hita baka amy zay hoe miambany ie. Nana fahareta, ohatsy, Jehovah lafa misy mpanompony manaja azy fe misalasala amy ty fanapahan-kevitsiny. Nijanjininy soa Abrahama lafa nivola hoe tsy tokony haripaky Sodoma noho Gomora. (Gen. 18:22-33) Tiarovo koa ty raha nataoni-Jehovah tamy Saraha valini-Abrahama. Nihehy Saraha lafa nampitamà Jehovah hoe ho bevoka ie ndre fa antitsy aza. Fe tsy nampeloky ani-Jehovah raha zay. (Gen. 18:10-14) Nanaja ani-Saraha avao ie.

9. Ino ty ianarani-baba noho reny noho ty anti-panahy baka amy modelini-Jehovah?

⁹ Ino ty azonareo baba noho reny noho anti-panahy ianara baka amy modelini-Jehovah? Eritsereto hoe manao akory ty fihetsikinao lafa misy tsy maneky ty fanapahan-kevitsinao ty olo ambany fahefànao. Avy le miaro tena va iha? Sa miezaky hahatakatsy ty hevitsiny? Azo antoky fa hahasoa ty fianakavia noho fiangona laha manahaky ani-Jehovah azy mana fahefà reo. Fa hitantsika henanizao hoe ino ty ianarantsika mikasiky fiambanea lafa hentea ty modelini-Jehovah. Ndao amy zay hohenteantsika hoe ino ty azontsika ianara mikasiky fiambanea baka amy tantaran’olo voaresaky amy Safà-Ndranahary ao.

10. Ino ty nataoni-Jehovah mba hahafahantsika mandramby fianara baka amy tantaran’olo hafa?

¹⁰ “Mpampianatsy Be Voninahitsy” Jehovah ka nasiany tantaran’olo amy Safàny ao mba hampianara antsika. (Isa. 30:20, 21) Afaky mandramby fianara tsika lafa mametsivetsy ty tantara amy Baiboly ao mikasiky olo nampiseho toetsy tea-Ndranahary, anatini-zay ty fiambanea. Mbo mandramby fianara koa tsika lafa mandiniky ty raha niseho amin’olo sisany tsy nampiseho toetsy soa.​—Sal. 37:37; 1 Kor. 10:11.

11. Ino ty azontsika ianara baka amy ty raha raty nataoni-Saoly?

¹¹ Eritsereto ty raha niseho tamy Saoly Mpanjaka. Nieritseritsy ty vatany ho ambany ie tamy voalohany. Nahatakatsy ty raha mety ho vitany ie, ka nisalasala handramby andraikitsy mihintsy aza. (1 Sam. 9:21; 10:20-22) Fe lafa nandeha ty fotoa, le nanjary nientinenty ie. Niboaky toetsy ratiny io tafara kelikelini-naha mpanjaka azy. Tsy nana fahareta ie tamy ndraiky zay lafa nandiny ani-Samoela mpaminany. Tsy natoky ie hoe hanao raha ho ani-vahoakiny Jehovah, fa naleony nanao fanatitsy oroa ndre tsy niazony natao aza raha zay. Tsy  nahazo hatò tamy Jehovah Saoly vokatsini-zay, le tafara tatoy ie tsy nekeny ho mpanjaka. (1 Sam. 13:8-14) Hendry tsika laha mandramby fianara baka amy zay ka hiezaky tsy hientinenty mihintsy.

12. Manino Daniela ro modely soa ho antsika?

¹² Modely soa Daniela mpaminany fa tsy nanahaky ani-Saoly. Niambany ie ka nila tari-dala baka amy Jehovah avao amy ze kila raha nataony. Nampiasa ani-Daniela, ohatsy, Jehovah mba hanazava ty nofini-Nebokadnezara, fe tsy nila voninahitsy ho ahi-ty vatany ie. Mifanohitsy amy zay fa Jehovah ro nameany voninahitsy. (Dan. 2:26-28) Ino ty ianarantsika baka amy zay? Laha tean’olo ty mijanjy ty lahateny ataontsika na mahita vokatsy amy fanompoa eny tsika, le teantsika hotiarovy avao hoe Jehovah ro tokony hameantsika ty voninahitsy iaby. Tokony haneky tsika hoe tsy ho nivitantsika raha reo laha tsy nanampy antsika Jehovah. (Fil. 4:13) Laha mana ani-toe-tsay zay tsika, le manahaky ty modely tena soa nameani-Jesosy koa. Manino tsika ro mivola ani-zay?

13. Ino ty ianarantsika mikasiky fiambanea lafa hentea ty safàni-Jesosy amy Jaona 5:19, 30?

¹³ Anaki-Ndranahary lavorary Jesosy, fe niantehitsy tamy Jehovah avao ie. (Vakio Jaona 5:19, 30.) Tsy nanohatsy hangalaky ty fahefàni-Babany an-danitsy any iny ie. Mivola ty Filipianina 2:6 fa “tsy nieritseritsy handrava fahefà mihintsy” Jesosy, “na hoe hitovy amy Ndranahary.” Hainy soa ty pilasy misy azy ka nekeny ty fahefàni-Babany.

14. Ino ty nataoni-Jesosy lafa nisy olo nangataky aminy mba hanao raha tsy nananany fahefà?

¹⁴ Eritsereto ty raha nataoni-Jesosy lafa namonjy azy Jakoba noho Jaona mpianatsiny miaraky amy renin-drozy. Nangataky tombontsoa raiky taminy rozy, fe tsy nana fahefà hanome ani-zay Jesosy. Tsy nisalasala Jesosy nivola hoe Babany an-danitsy any iny avao ro manapa-kevitsy hoe ia ty hipetraky ankavanany noho ankaviany eo lafa amy Fanjakà-Ndranahary ao. (Mat. 20:20-23) Nekeni-Jesosy hoe zisiky aia ty raha azony atao. Niambany ie. Tsy nanao raha mandilatsy ty nandidiani-Jehovah azy mihintsy ie. (Jaona 12:49) Akory ty azontsika anahafa ty modely tena soa nameani-Jesosy?

15-16. Akory ty azontsika anoriha ty torohevitsini-Baiboly amy 1 Korintianina 4:6 ao?

 ¹⁵ Manahaky ty modelini-Jesosy tsika lafa manoriky ty torohevitsini-Baiboly amy 1 Korintianina 4:6 ao. Mivola amintsika andinin-teny io hoe: “Ka mandilatsy ani-ze voasoratsy.” Ka lafa misy mangataky torohevitsy amintsika, le tsy hoforosevantsika hanoriky ty hevitsintsika ie, sady tsy ze raha avy an-tsaintsika ao ro hovolanintsika. Ty torohevitsy ameani-Baiboly noho amy boky noho gazetintsika rey ro teantsika horesahy aminy. Lafa manao ani-zay tsika, le ekentsika hoe zisiky aia ty raha azontsika atao. Lafa miambany tsika le maneky ty “didim-pitsarà ara-drariny” baka amy azy Farani-Ze Mahery iny.​—Apok. 15:3, 4.

¹⁶ Mbo misy antony hafa mahavy antsika hiambany koa, ankoatsini-hoe manome voninahitsy ani-Jehovah. Hohenteantsika henanizao hoe manino ro manampy antsika ho falifaly noho hifandramby soa amin’olo ty fiambanea.

17. Manino ro falifaly ty olo miambany?

¹⁷ Laha miambany tsika, le ho mora falifaly. Ino ty mahavy ani-zay? Satria lafa tsika maneky hoe tsy vitantsika ty raha raiky, le hahay hisaotsy sady ho falifaly lafa misy manampy. Tiarovo, ohatsy, ty raha niseho lafa nitaha ani-boka folo rey Jesosy. Ty raiky amin-drozy avao ro nimpoly mba hisaotsy ani-Jesosy lafa niafaky arety raty nahazo azy iny. Tsy ho nivitani-lahilahy io raiky avao raha zay. Niambany ie ka nahay nisaotsy lafa nahazo fanampea, sady nanome voninahitsy a Ndranahary.​—Lioka 17:11-19.

18. Manino tsika ro hifandramby soa amin’olo lafa miambany? (Romanina 12:10)

¹⁸ Mora mifandramby marìny amin’olo noho mora mahazo nama ty olo miambany.  Ino ty mahavy ani-zay? Satria matoky olo ie sady maneky hoe mana toetsy soa ty olo hafa. Falifaly ty olo miambany lafa nahavita soa ty raha nampanaovy azy ty olo hafa ka teany ty hidera ani-olo iny noho hanome voninahitsy azy.​—Vakio Romanina 12:10.

19. Ino iaby ty antony tokony hanalavirantsika ty fanambonia tena?

¹⁹ Mifanohitsy amy zay ty olo manambony tena, satria sarotsy aminy ty hidera olo, fa nainany ho ie avao ro horengè. Ta hampitovy ty vatany amin’olo hafa avao ie, ka manjary tea manao kirebaky. Tsy mampiofana ty hafa ie na manome andraikitsy olo, satria mieritseritsy fa tsy ho vita soa raha iny laha tsy ie ro manao azy. Mora mirengirengy noho mialona ty olo manambony tena. (Gal. 5:26) Kindraiky avao vo maharitsy ty finamà amin’olo manahaky ani-zay. Laha vo tsapantsika hoe somary manambony tena tsika, le tokony hivavaky marè amy Jehovah tsika mba ‘hanavao ty saintsika’ ka tsy hahazo vahatsy anaintsika ao toetsy raty io.​—Rom. 12:2.

20. Manino tsika ro mila miambany?

²⁰ Manao mahavelo bevata ani-Jehovah tsika amy ty modely soa nameany antsika! Hitantsika amy ty fomba ifandrambesany amy ty mpanompony hoe miambany vatany ie, ka teantsika ty hanahaky azy. Teantsika koa ty hanahaky ani-modely amy Baiboly ao rey. Niambany rozy sady niaraky nandeha tamy Ndranahary. Loniky lahy hameantsika ani-Jehovah avao ty voninahitsy noho haja maeva azy. (Apok. 4:11) Ho azontsika atao amy zay ty miaraky mandeha amy Babantsika an-danitsy any iny, satria teany ty olo miambany.