1. Ino ty tombontsoa ananantsika?

TOMBONTSOA vatany ty hoe anatini-fiangonani-Jehovah! Amy paradisa ara-panahy ato tsika, miaraky amin’olo falifaly sady tea filongoa. Ka manino iha ro tena ilà amy fiangona eo?

2. Ino ty fanohara nampiasani-apostoly Paoly amy taratasiny maromaro amy Baiboly ao?

² Ho haintsika soa ty mikasiky ani-foto-kevitsy io lafa mandiniky ty fanohara nampiasani-apostoly Paoly amy taratasiny maromaro amy Baiboly ao tsika. Hita amy taratasy reo fa nampitovizini-apostoly Paoly amy vatan’olombelo ty fiangona, le ty olo kiraidraiky amy fiangona eo nampitoviziny amy rantsambata.​—Rom. 12:4-8; 1 Kor. 12:12-27; Efes. 4:16.

3. Ino iaby ty fianara telo hodinihintsika amy lahatsoratsy toy ato?

³ Tena ilà tsika kiraidraiky amy fiangonani-Jehovah eo. Samby afaky manatanjaky ty fiangona tsika iaby. Ndre samby hafa foko noho karaza tsika, ndre tsy mitovy ty fari-piaina noho ty kolontsay na ty fianara vitantsika, le samby lafovily amy fiangona tsika iaby. Handiniky fianara telo bevata baka amy fanoharani-Paoly iny tsika amy lahatsoratsy toy ato. Voalohany, hianarantsika hoe lafovily tsika kiraidraiky amy fiangonani-Jehovah eo. Faharoe, hodinihintsika hoe ino ty azontsika atao laha sarotsy amintsika ty mahatsapa hoe tena ilà tsika amy fiangona eo. Le fahatelo, horesahintsika hoe manino tsika ro mila manatanteraky soa ty anjara asantsika amy fiangona-Ndranahary eo.

4. Ino ty ianarantsika baka amy Romanina 12:4, 5?

⁴ Toy ty fianara voalohany rambesintsika baka amy fanoharani-Paoly iny: Samby lafovily tsika kiraidraiky amy fianakaviani-Jehovah eo. Nivola ho zao Paoly lafa nanomboky ani-fanoharany iny: “Mana rantsambata maro tsika amy vata raiky, fe tsy mitovy ty asan-drozy iaby. Manahaky ani-zay koa tsika, ndre maro aza, le vata raiky tafiharo amy Kristy sady rantsambata mifampianky.” (Rom. 12:4, 5) Ta hivola Paoly hoe tsy mitovy ty anjara asantsika amy fiangona eo, fe samby lafovily tsika kiraidraiky.

5. Ino ty “fanomeza” nameani-Jehovah ty fiangona?

⁵ Mety ho azy mitariky reo ro eritseretinao voalohany lafa miresaky olo mana anjara asa amy fiangona eo. (1 Tes. 5:12; Heb. 13:17) Nameani-Jehovah “lahilahy ho fanomeza” vatany ty fiangonany, tamy alalani-Kristy. (Efes. 4:8) Tafilitsy amy “lahilahy ho fanomeza” reo ty rahalahy anatini-Filan-kevi-pitantana, ty mpanampy ty Filan-kevi-pitantana, ty rahalahy anatini-Komitini-Sampana, ty mpiandraikitsini-faritsy, ty rahalahy mampianatsy amy sekoly mifototsy amy Baiboly rey, ty anti-panahini-fiangona, noho ty mpanampy amy fanompoa. Nitendreni-fanahy masy rahalahy iaby reo mba hikarakara ani-aondrini-Jehovah lafovily reo noho hikarakara ani-ze hahasoa ty fiangona.​—1 Pet. 5:2, 3.

6. Laha hentea ty 1 Tesalonianina 2:6-8, ino ty ezaky ataoni-rahalahy voatendrini-fanahy masy reo?

⁶ Mitanjaky andraikitsy maro samby hafa rahalahy voatendrini-fanahy masy reo. Miasa mafy ty rantsambata sisany, ohatsy hoe ty tomboky noho tana, mba hahasoa ty vata. Manahaky ani-zay koa rahalahy voatendrini-fanahy masy reo. Miasa mafy rozy mba hahasoa ty fiangona iaby iaby. Tsy mila voninahitsy ho ahi-ty vatan-drozy rozy, fa miezaky marè mba hampahery noho hampatanjaky ty rahalahy noho anabavin-drozy. (Vakio 1 Tesalonianina 2:6-8.) Misaotsy ani-Jehovah tsika satria tsy tea tena lahilahy mahafeno fepetra reo!

7. Ino iaby ty fitahia azoni-azy manompo amy fotoa iaby reo?

⁷ Mety ho misionera, na mpisava lala manoka, na mpisava lala maharitsy ty olo sisany amy fiangona eo. Amy tany toy iaby, le maro ty rahalahy noho anabavy mitory noho manao mpianatsy, sady manao ani-raha zay ho asany amy fotoa iaby. Afaky nanampy olo maro mba hanjary mpianatsini-Kristy Jesosy rozy lafa manao ani-zay. Tsy manan-kanana firy ty ankamaroani-mpitory amy fotoa iaby rey, fe nanome kadò an-drozy Jehovah ka feno fitahia ty fiainan-drozy. (Mar. 10:29, 30) Tena lafovily amintsika rahalahy noho anabavy rey, ka mahatiaro ho mana vatany tsika amy fiangona eo satria misy an-drozy!

8. Manino ro lafovily amy Jehovah ty mpitory ty vaovao soa kiraidraiky?

⁸ Ty rahalahy voatendry noho ty mpanompo amy fotoa iaby avao va ro tena ilà amy fiangona eo? Aia koa! Samby lafovily amy Ndranahary noho ty fiangona ty mpitory ty vaovao soa kiraidraiky. (Rom. 10:15; 1 Kor. 3:6-9) Ino ty antony? Satria anatini-raha farani-ze bevata kendreni-fiangona ty fanampea olo mba hanjary mpianatsini-Jesosy Kristy Tompontsika. (Mat. 28:19, 20; 1 Tim. 2:4) Samby miezaky hanao voaloha lista ani-asa io ty mpitory iaby, ndre vita batisa ndre mbo tsy vita batisa.​—Mat. 24:14.

9. Manino ro lafovily amintsika ty anabavintsika amy fiangona eo?

⁹ Hita hoe manome voninahitsy ani-ranabavy amy fiangona eo reo Jehovah satria manome andraikitsy an-drozy. Lafovily aminy ty ampela manambaly, ty renim-pianakavia, ty  ampela maty valy, noho ty ampela tsy manambaly, satria tsy mivaliky aminy. Matetiky ty Soratsy Masy miresaky mikasiky ampela nanao raha nampifalifaly a Ndranahary. Niderà rozy satria modely tena soa amy fahendrea, finoa, zotom-po, herim-po, tea manome, noho manao asa soa. (Lioka 8:2, 3; Asa. 16:14, 15; Rom. 16:3, 6; Fil. 4:3; Heb. 11:11, 31, 35) Manao mahavelo bevata ani-Jehovah tsika satria misy ampela mana toetsy soasoa manahaky ani-reo ty amy fiangonantsika eo!

10. Manino ro lafovily amintsika be tao amy fiangonantsika eo reo?

¹⁰ Falifaly koa tsika fa mana be tao maro amy fiangona eo. Nanoka ty fiainany iaby iaby tamy fanompoa ani-Jehovah ty rahalahy noho anabavy be tao amy fiangona sisany. Fa ty ilany mety vo tsiela ro nahay ty fahamarina. Fe samby osaosa ty ankamaroani-mpiara-manompo amintsika reo lafa be tao, ka mety tsy hahavita firy sasy rozy amy ty raha atao amy fiangona eo noho amy asa fitoria. Fe mbo manao ze farani-vitan-drozy amy fanompoa eny avao be tao rey, sady mampiasa ty hery iaby ananany mba hampahereza noho hampiofana ty hafa! Andrambesantsika fianara koa ty raha niainan-drozy. Zatovo vatany rozy amy Jehovah, noho amintsika koa.​—Ohab. 16:31.

11-12. Ino ty raha nampahery anao tamy tanora amy fiangonanareo eo?

¹¹ Mba eritsereto koa tanorantsika reo. Miatriky raha sarotsy maro rozy satria nihabe tamy tontolo ambany fahefàni-Satana Devoly sady anjakàni-sain-dratiny toy. (1 Jaona 5:19) Fe mahazo fampahereza iaby tsika lafa mahita ani-tanorantsika reo manome valin-teny amy fivoria, mandramby anjara amy fanompoa, noho be herim-po miaro ty raha inoan-drozy. Eka, tena ilà amy fiangonani-Jehovah eo nareo tanora.​—Sal. 8:2.

¹² Fe sarotsy amy rahalahy noho anabavintsika sisany ty mino hoe lafovily amy fiangona rozy. Ino ty hanampy antsika hahatsapa hoe tena ilà amy fiangona eo tsika kiraidraiky? Hanenty ani-zay tsika henanizao.

13-14. Ino ty mety hahavy ty olo sisany hahatsapa hoe tsy lafovily amy fiangona ie?

¹³ Mahakinto ty raha faharoe ianarantsika baka amy fanoharani-Paoly iny, satria manampy antsika hahita ty raha raiky manahira olo maro amy fiangonantsika eo. Sarotsy amin-drozy ty mino hoe lafovily rozy amy fiangona eo. Nanoratsy ho zao Paoly: “Laha hoy ty tomboky hoe: ‘Tsy anatini-vata aho satria tsy tana’, le tsy zay ro hahavy azy tsy ho anatini-vata. Le laha hoy ty sofy hoe: ‘Tsy anatini-vata aho satria tsy maso’, le tsy zay ro hahavy azy tsy ho anatini-vata.” (1 Kor. 12:15, 16) Ino ty teani-Paoly hambara?

¹⁴ Laha mampitovy ty vatanao amin’olo hafa amy fiangona eo iha, le mety tsy ho hitanao ty maha lafovily anao. Mety mahay mampianatsy, ohatsy, ty olo sisany amy fiangona eo, na mahay mandamin-draha, na mahay mampahery noho mampionona ty hafa. Mety hanao ho zao iha hoe: ‘Zaho tsy de mahay ho zay.’ Laha zay ty tsapanao le hita hoe miambany iha. (Fil. 2:3) Fe mila miamby soa iha, satria ho kivy iha laha zatsy mampitovy ty vatanao amin’olo mana fahaiza manoka. Mety ho tsapanao raha niresahini-Paoly iny, ka hieritseritsy iha hoe tsy misy ilà anao ty amy fiangona eo. Ino ty hanampy anao tsy hieritseritsy ho zay?

15. Manino tsika ro tokony hankasitraky ty fanomeza ananantsika, laha hentea ty 1 Korintianina 12:4-11?

¹⁵ Mba diniho moa raha niseho toy: Nameani-Jehovah fanomeza miavaky baka amy fanahy masy ty Kristiana tamy taonjato voalohany, fe tsy nitovy ty fanomeza niazon-drozy. (Vakio 1 Korintianina 12:4-11.) Samby hafa ty fanomeza nameani-Jehovah an-drozy, fe samby lafovily ty Kristiana kiraidraiky. Marina fa tsy mahazo fanomeza miavaky baka amy fanahy masy tsika henanizao. Fe mbo marina avao torolala io. Mety tsy hitovy ty fahaiza ananantsika iaby, fe samby lafovily amy Jehovah tsika iaby.

16. Ino ty torohevitsini-apostoly Paoly mila orihintsika?

¹⁶ Mba tsy hahavy antsika hampitovy ty vatantsika amy ty Kristiana hafa, le mila manoriky ani-torohevitsini-apostoly Paoly toy  tsika, hoe: “Soa tsika kiraidraiky laha samby mandiniky ty raha ataony. Amy zay le hana antony mahafalifaly amy ty vatany avao ie, fa tsy amy fampitahà ty vatany amin’olo hafa.”​—Gal. 6:4.

17. Ino ty soa ho azontsika laha manoriky ty torohevitsini-Paoly tsika?

¹⁷ Laha manoriky ty torohevitsini-Paoly tsika sady mandiniky ty raha ataontsika, le mety ho hitansika tsikelikely hoe misy raha haintsika fe tsy hain’olo hafa. Mety tsy mpandahateny tena mahay, ohatsy, ty anti-panahy raiky, fe tena mahita vokatsy ie lafa manampy olo ho mpianatsini-Kristy. Na mety tsy de mahay mandamin-draha ie, laha ampitovizy amy anti-panahy hafa amy fiangona eo, fe soa fanahy noho be fitiava ie ka tsy misalasala mangataky torohevitsy aminy ty rahalahy noho anabavy. Na mety malaza ho mahay mandramby vahiny ie. (Heb. 13:2, 16) Lafa haintsika hoe mana ani-fanomeza rezay tsika, le azo antoky fa ho falifaly satria afaky manao raha ho ani-fiangona. Tsy hialonantsika koa ze rahalahy noho anabavintsika mana fahaiza hafa tsy mitovy amy ty ahintsika.

18. Akory ty hampitomboantsika ty fahaizantsika mampianatsy?

¹⁸ Ndre ino ndre ino ty andraikitsy ataontsika amy fiangona eo, le samby maniry hanasoa ty fanompoantsika tsika sady hampitombo ty fahaizantsika. Manome fampiofana soasoa amy alalani-fandaminany Jehovah mba hanampea antsika. Mahazo toromariky hanampy antsika hahita vokatsy amy fanompoa, ohatsy, tsika amy fivoria andavanandro rey. Mandramby soa feno baka amy fandahara fampiofana zay va iha?

19. Akory ty azonao atao mba ho afaky hanatriky ty Sekolini-Mpitory Fanjakà iny?

¹⁹ Fandahara fampiofana tena soa koa ty Sekolini-Mpitory Fanjakà Iny. Afaky manatriky ani-sekoly io ty rahalahy noho anabavy manompo amy fotoa iaby, anelanelani-23 zisiky 65 tao. Mety hanao ho zao iha hoe tsy ho vitanao mihintsy ty hanatratsy ani-raha kendrè io. Ka mifantoky amy raha manaka anao tsy ho afaky hanatriky ani-sekoly io, fa aleo ze antony mandrisiky anao ta hanatriky azy ro anovo lista. Bakeo anovo ze azonao atao mba hahafeno fepetra amy raha io. Laha miezaky marè iha, le hanampy anao Jehovah ka ho vitanao ty raha tsy eritseretinao ho vita.

20. Ino ty ianarantsika baka amy Romanina 12:6-8?

²⁰ Hita amy Romanina 12:6-8 ao ty raha fahatelo ianarantsika baka amy fanoharani-Paoly iny. (Vakio.) Asehoni-Paoly etoa ndraiky hoe mahazo fanomeza samby hafa ty olo amy fiangona eo. Fe nihamafisiny hoe ndre ino ndre ino ty fanomeza ananantsika, le tokony hampiasantsika mba hanatanjaha noho hampahereza ty fiangona raha zay.

21-22. Ino ty ianarantsika baka amy Robert noho Felice?

²¹ Diniho ty raha niseho tamy rahalahy raiky atao hoe Robert. Nanompo tan-tany hafa any ie, fe nivoatendry hanompo amy Betela amy tany misy azy. Nanome toky azy rahalahy rey hoe tsy hoe nanao raha raty ie, le nanjary niova fanendrea. Fe ndre zay, le hoy ty asany: “Tsy nifalifaly aho tanatini-vola maro satria nieritseritsy aho hoe tsy nahita vokatsy tamy fanompoa nataoko. Nisy fotoa mihintsy aza aho ta hiala amy Betela.” Ino ty nanampy azy ho falifaly ndraiky? Nisy anti-panahy namany nampitiaro azy hoe fampiofanani-Jehovah antsika ty fanendrea antsika taloha, amy zay tsika vomaiky ho azo ampiasà amy fanendrea vaovao. Nieky Robert hoe tsy tokony hieritseritsy mikasiky ty lasa ie, fa tokony hifantoky amy ze raha azony atao henanizao.

 ²² Nitovy amy zay koa ty raha natrehini-Rahalahy Felice Episcopo. Nahazo diplomy tamy sekolini-Gileada rozy morovaly tamy 1956, le nivoatendry hanao ty asani-faritsy ta Bolivỳ any. Niteraky rozy tamy 1964. Hoy Felice: “Niteanay marè ty fanendrea anay, ka tena nisarotsy aminay ty niala azy. Tsy avoriko aloha ty vandy fa nikivy aho tamy voalohany. Fe nanampy Jehovah, ka nanova ty toe-tsaiko aho le nifantoky tamy andraikitsy vaovao niazoko amy maha loham-pianakavia.” Mahatsapa manahaky ani-Robert na Felice koa va iha? Kivy va iha satria niova ty tombontsoam-panompoanao? Laha zay ie, le ho falifaly iha laha manova ty raha eritseretinao noho mifantoky amy ze raha azonao atao henanizao mba hanompoa ani-Jehovah noho ty mpiara-manompo aminao. Mazotoa avao, ampiasao hanampea olo hafa ty fahaizanao, le ho falifaly iha satria hihamatanjaky ty fiangona.

23. Tokony hanoka fotoa hanaova ino tsika, le ino ty hodinihintsika amy lahatsoratsy manaraky?

²³ Samby lafovily amy Jehovah tsika kiraidraiky. Teany ho anatini-fianakaviany tsika. Ka mila eritseretsintsika hoe ino ty azontsika atao mba hanatanjaha ani-rahalahy noho anabavintsika reo. Tsy mora raha zay. Fe laha manoka fotoa hanaova ani-zay tsika, le ho tsapantsika hoe ilà amy fiangona eo tsika. Fe manao akory ty tokony ho fahitantsika ty olo hafa amy fiangona eo? Akory ty ampisehoantsika hoe mankasitraky an-drozy tsika? Handiniky ani-foto-kevitsy bevata zay tsika amy lahatsoratsy manaraky.