1. Ino ty raha nampianary anao mikasiky ty Mpamoro?

METY mbo nikely iha le fa nahay ani-Jehovah laha Vavolombeloni-Jehovah ty niteza anao. Nampianary anao hoe Jehovah ro Mpamoro, mana toetsy soa maro ie, le teany ho lasa paradisa koa tany toy.​—Gen. 1:1; Asa. 17:24-27.

2. Manao akory ty fahitan’olo sisany ty olo mino hoe misy ty Mpamoro?

² Fe maro ty olo tsy mino hoe misy Ndranahary na tsy mino hoe ie ro namoro ty raha iaby. Mino rozy fa nisinisy ho azy avao ty fiaina. Nivoatsy tsikelikely baka amy raha mananay tsotsotra tse, hoasan-drozy, ty fiaina le bakeo iny amy zay lasa raha mananay sankarazany sady be tsipiriany. Manam-pahaiza ty sisany amin’olo mino ani-raha zay. Mety hivola rozy hoe voaporofoni-siansy fa diso ty raha volanini-Baiboly sady olo tsy nianatsy, tsy mahataka-draha, noho mora voafitaky ro mino hoe misy ty Mpamoro.

3. Manino tsika ro tena mila manatanjaky ty finoantsika?

³ Laha ho zay ty raha volanini-manam-pahaiza, hanjary hisalasala va tsika hoe Mpamoro be fitiava vatany Jehovah? Mianky amy ty antony inoantsika ani-Jehovah raha zay. Manino tse moa tsika ro mino hoe ie ro namoro ty raha iaby? Mino azy va tsika satria nisy nampirisiky, sa tsika mihintsy ro nanoka fotoa mba hianara mikasiky ani-zay? (1 Kor. 3:12-15) Ndre fa ela ty naha Vavolombeloni-Jehovah antsika ndre vo tsiela, le samby mila manatanjaky ty finoantsika iaby tsika. Laha manao ani-zay tsika, le tsy ho voafitakini-“filozofỳ noho ty famitaha poakaty” ampianarin’olo tsy mino ty Safà-Ndranahary. (Kol. 2:8; Heb. 11:6) Hanampy antsika amy zay ty fandiniha ty valini-fanontanea retoa: 1) Manino ro maro ty olo tsy mino hoe misy ty Mpamoro? 2) Ino ty azonao atao mba hanatanjaha ty finoanao ani-Jehovah, azy namoro anao iny? Le 3) ino ty azonao atao mba  hampatanjaky avao ty finoanao? Handiniky ani-reo tsika amy lahatsoratsy toy ato.

4. Laha hentea ty Hebreo 11:1, ino ty atao hoe finoa?

⁴ Misy mieritseritsy hoe minomino raha tsy misy porofo ty hoe manam-pinoa. Fe tsy zay ty atao hoe tena finoa laha hentea ty raha volanini-Baiboly. (Vakio Hebreo 11:1.) Mivola ty Baiboly hoe mifototsy amy “porofo mazava” ty finoa. Ka ndre tsy hitantsika maso zany Jehovah, Jesosy, noho ty Fanjakà an-danitsy any, le mana porofo tsika hoe tena misy rozy. (Heb. 11:3) Nisy mpahay siansy raiky zay lasa Vavolombeloni-Jehovah, le zao ty nivolaniny: “Misy porofo ty raha inoani-Vavolombeloni-Jehovah. Mandiniky soa ani-ze porofo ameani-mpahay siansy rozy.”

5. Manino ro maro ty olo mino hoe tsy misy ty Mpamoro?

⁵ Mety hieritseritsy tsika hoe: ‘Laha tena misy porofo mazava hoe misy ty Mpamoro, manino ro maro ty olo tsy mino hoe Ndranahary ro namoro ty raha mananay iaby?’ Misy tsy mino satria mbo tsy nandiniky ani-porofo rey mihintsy. Hoy Robert, fa lasa Vavolombeloni-Jehovah amy zao: “Tsy nisy resaky famorona mihintsy tan-dakilasy tany, ka lasa nieritseritsy aho hoe tsy misy ty mpamoro. Fe niova raha zay tamy zaho ni-20 tao teo ho eo. Niresaky tamy Vavolombeloni-Jehovah aho tamy zay, le natoron-drozy ahy hoe misy antony mazava soa resahini-Baiboly fa Ndranahary ro namoro ty raha iaby.” *​—Henteo ty efajoro hoe “ Hafatsy ho ahi-ty Olo Manan’Anaky.”

6. Manino ty olo sisany ro mino hoe tsy misy ty Mpamoro?

⁶ Tsy mino ty fisiani-Mpamoro ty olo sisany satria ze raha hitan-drozy maso avao  hoasan-drozy ro inoan-drozy. Kanefa misy avao ty raha tsy hitan-drozy maso fe inoan-drozy, ohatsy hoe tsioky. Tsy hita maso raha io fe inoan-drozy hoe tena misy satria ahitan-drozy porofo. Manahaky ani-zay koa finoa resahini-Baiboly io satria mifototsy amy raha “tena misy kanefa tsy hita maso.” (Heb. 11:1) Mitaky fotoa noho ezaky ty mandiniky porofo rey, farany tsy ta hiezaky hanao ani-zay ty olo. Ze olo tsy mandiniky ty raha misy ro mivola hoe tsy misy Ndranahary.

7. Tsy mino a Ndranahary iaby va lafa kila olo nahita fianara? Hazavao.

⁷ Lafa baka nandiniky ty raha misy ty mpahay siansy sisany vo niresy lahatsy hoe Ndranahary ro namoro ani-raha iaby zao. * Manahaky  ani-Robert, azy niresahintsika taloha teroy iny, ohatsy, tsy nino ie hoe misy ty Mpamoro satria tsy nampianary tan-dakilasy any raha zay. Mety hieritseritsy manahaky azy koa ty olo sisany. Fe maro ty mpahay siansy lasa nahay ani-Jehovah noho tea azy. Manahaky ty nataoni-mpahay siansy reo, le mila manatanjaky ty finoantsika a Ndranahary koa tsika, ndre ino ino fianara nivitantsika. Ty vatatenantsika mihintsy ro mila manao ani-zay, fa tsy misy olo afaky manao ani-zay ho antsika.

8-9. a) Ino ty fanontanea hodinihintsika henanizao? b) Manino ro hahasoa anao ty mandiniky ty zavaboary manodidy anao?

⁸ Ino ty azonao atao mba hanatanjaha ty finoanao ty Mpamoro? Ndao tsika handiniky fomba efatsy.

⁹ Diniho ty zavaboary manodidy anao. Hatanjaky ty finoanao ty Mpamoro laha dinihinao soa ty biby, ty raha mitiry, noho ty basia. (Sal. 19:1; Isaia 40:26) Arakaraky ty ianaranao ani-raha reo, le vomaiky iha hatòky hoe Jehovah ro Mpamoro. Matetiky amy gazetintsika rey misy lahatsoratsy manazava ty tsipiriany mikasiky zavaboary. Diniho soa avao lahatsoratsy rey ndre somary sarotsarotsy aza ty mahazo ty raha volaniny. Ianaro iaby ze azonao ianara. Ka halino koa ty mampimpoly manenty ty tranonkalantsika jw.org. Nisy video soasoa mikasiky zavaboary rezay niboaky tamy fivoriambeni-vondrom-paritsy tato ho ato.

10. Manomeza ohatsy ahità hoe tena manaporofo ty fisiani-Mpamoro ty zavaboary. (Romanina 1:20)

¹⁰ Lafa iha mandiniky zavaboary, le henteo soa hoe ino ty azonao ianara mikasiky ani-Mpamoro antsika iny. (Vakio Romanina 1:20.) Mety fa hainao zao, ohatsy, hoe manome hafanà noho hazavà tena ilà amy fiaina an-tany etoy ty masoandro. Fe mety manimba koa ty taratsy sisany aboakini-masoandro, ka mila arova tsika olombelo. Le tena voaaro vatany tsika! Amy fomba akory? Misy karaza gazy kaihy hoe ôzôny manodidy ani-tany toy, le iny miaro antsika amy taratsy manimba io. Lafa mihamarè taratsy baka amy masoandro io, le mihamitombo koa gazy io. Ka manao akory, tsy resy lahatsy va iha hoe nisy namoro raha zay, sady be fitiava noho mahay azy namoro azy io?

11. Aia ty ahitanao fanazavà afaky manatanjaky ty finoanao hoe misy ty Mpamoro? (Henteo ty efajoro hoe “ Fanazavà Hanatanjaky ty Finoanao hoe Misy ty Mpamoro.”)

¹¹ Misy raha maro afaky manatanjaky ty finoanao ty Mpamoro. Hahita ani-zay iha laha manenty ty Fanondroana Bokin’ny Vavolombelon’i Jehovah noho manao fikaroha amy jw.org ao. Ho fanomboha azy, ohatsy, afaky henteanao tse ty lahatsoratsy noho video baka amy lahatsoratsy mifampitohy hoe “Nisy Namorona Ve?” Boribory raha reo sady ahità fanazavà tena mahatseriky mikasiky ty biby noho ty zavaboary hafa. Misy ohatsy maro koa ao ahità hoe nangala tahaky baka amy zavaboary ty mpahay siansy.

12. Ino ty raha sisany tokony hodinihintsika soa lafa tsika mianatsy Baiboly?

¹² Ianaro ty Baiboly. Tsy avy le nino azy mpahay siansy niresahintsika taloha eroy iny hoe misy ty Mpamoro. Fe nanjary resy lahatsy ie lafa tafara atoy. Hoy ty asany: “Tsy ampy mba hahavy ahy hanam-pinoa ty fianarako mikasiky siansy, fa teo koa ty fianarako ty Baiboly.” Mety fa hainao soa ty raha ampianarini-Baiboly. Fe mila mianatsy tsy tampaky ty Safà-Ndranahary iha laha teanao hatanjaky ty finoanao ty Mpamoro. (Jos. 1:8; Sal. 119:97) Eritsereto, ohatsy, ty tantara resahini-Baiboly taloha tany. Tena marina raha rey. Diniho soa koa fa tanteraky ty faminania resahiny sady mifanaraky soa ty raha resahini-mpanoratsy Baiboly rey.  Laha manao ani-zay iha, le vomaiky hatòky hoe be fitiava noho hendry Mpamoro antsika iny. Ho resy lahatsy koa iha fa baka aminy ty hafatsy amy Baiboly ao. *​—2 Tim. 3:14; 2 Pet. 1:21.

13. Miresaha torohevitsy raiky mahasoa hita amy Safà-Ndranahary ao.

¹³ Lafa mianatsy ty Safà-Ndranahary iha, le henteo hoe manino ro mahasoa ty torohevitsy ameany. Fa liany fa ela, ohatsy, ty Baiboly ro nampitandrina hoe manimba ty hatea drala sady mahavy “raha maro mampararirary.” (1 Tim. 6:9, 10; Ohab. 28:20; Mat. 6:24) Mbo marina avao va raha volaniny io henanizao? Hoy ty boky raiky miresaky ty toe-tsain’olo amy androntsika zao: “Matetiky ty olo tea drala ro tsy de mahatiaro sambatsy sady tena mora kivy. Ndre azy mieritseritsy ta hahazo drala be rey koa tsy sambatsy zao mihintsy sady azon’arety sankarazany.” Tsy hitanao va hoe tena mahasoa fampitandremani-Baiboly iny hoe tsy tokony ho tea drala tsika! Mety mbo mahita torolalani-Baiboly hafa afaky manampy anao va iha? Soa laha mandiniky ani-torohevitsy mahasoa amy Baiboly ao rey tsika. Ho hitantsika amy zay hoe be fitiava azy Mpamoro antsika iny sady mahay ze raha hahasoa antsika. Tokony hiantehitsy aminy avao zany tsika. (Jak. 1:5) Tena ho soa ty fiainantsika amy zay.​—Isaia 48:17, 18.

14. Manino ty fianara Baiboly ro hanampy anao hahay ani-Jehovah?

¹⁴ Lafa mianatsy Baiboly, le anovo raha kendrè ty hoe hahay soa ani-Jehovah. (Jaona 17:3) Lafa ianaranao soa ty Soratsy Masy, le ho hitanao ty toetsy mampiavaky ani-Jehovah. Tsy niova toetsini-Jehovah reo fa mbo azy nihitanao tamy iha nianatsy mikasiky zavaboary iny avao. Lafa iha mandiniky soa ani-toetsini-Jehovah rey, le ho resy lahatsy hoe tena misy ie. (Eks. 34:6, 7; Sal. 145:8, 9) Hihamatanjaky ty finoanao ani-Jehovah arakaraky ty ahaizanao azy soa. Hitombo koa ty fitiavanao azy sady vomaiky nareo ho mpinama.

15. Manino ro mahasoa anao ty miresaky amin’olo hafa mikasiky a Ndranahary?

¹⁵ Resaho amin’olo hafa ty raha inoanao mikasiky a Ndranahary. Hihamatanjaky ty finoanao laha manao ani-zay iha. Fe manao akory laha misalasala olo itorianao iny hoe misy vatany va Ndranahary, kanefa tsy hainao ty havaly azy? Manaova fikaroha. Henteo boky noho gazetintsika rey fa misy andinin-teny mamaly ani-fanontaneany zay, le bakeo rey ro resaho aminy. (1 Pet. 3:15) Azonao atao koa ty mangataky fanampea amy mpitory hafa. Ndre tsy eken’olo iny ty valiny ameani-Baiboly, le handramby soa avao iha satria nanao fikaroha. Vomaiky hihamatanjaky ty finoanao. Ino ty ho vokany? Tsy ho voafitaky iha laha misy olo atao ho raha hendry na manam-pahaiza mivola hoe tsy misy ty Mpamoro.

16. Mety hanao akory ty ho vokany laha tsy miezaky manatanjaky ty finoantsika avao tsika?

¹⁶ Ndre fa ela tsika ro nanompo ani-Jehovah ndre vo tsiela, le tokony hiezaky avao tsika hanatanjaky ty finoantsika azy sady tsy hanenga ani-raha zay hihena mihintsy. Ino ty antony? Satria mety hihamalemy ty finoantsika laha tsy mitandrina tsika. Tiarovo koa fa niresahintsika tato hoe mifototsy amy raha tsy hita maso ty finoa. Ka lafa ty raha tsy hitantsika maso, le mora halino. Zay nahavy ani-Paoly nivola io hoe “ota mora mamehifehy antsika” ty tsy fahampea finoa. (Heb. 12:1) Ka ino zany ty azontsika atao mba hatanjaky avao ty finoantsika?​—2 Tes. 1:3.

17. Ino ty afaky manampy antsika hana finoa matanjaky avao?

 ¹⁷ Voalohany, mangataha fanahy masy amy Jehovah, le ka mieny manao ani-zay. Fa manino? Satria anatini-toetsy vokatsini-fanahy masi-Ndranahary ty finoa. (Gal. 5:22, 23) Tsy ho afaky hanatanjaky ty finoantsika ani-Mpamoro iny mihintsy tsika laha tsy manampy antsika ty fanahy masy. Lafa tsika tsy mieny mangataky fanahy masy amy Jehovah, le hameany antsika raha zay. (Lioka 11:13) Afaky mivavaky mihintsy tsika hoe: “Ampitombò ty finoanay.”​—Lioka 17:5.

18. Laha hentea ty Salamo 1:2, 3, ino ty fanomeza tena soa namea antsika henanizao?

¹⁸ Faharoe, ianaro tsy tampaky ty Safà-Ndranahary. (Vakio Salamo 1:2, 3.) Tamy salamo io nisoraty, le Israelita vitsivitsy avao ro nana ty boky misy ty Lalàna-Ndranahary. Ty mpanjaka noho mpisoro avao ro nahazo amy raha io. Le saky fito tao amy zay, navory ty vahoaky iaby, zany hoe “ty lahilahy, ty ampela, ty ajà” noho ze vahiny nipetraky tamy Israely teo mba hijanjy ty famakia ty Lalàna-Ndranahary. (Deot. 31:10-12) Olo vitsivitsy avao koa ro nana boky mihoro nisy andinin-teny baka amy Soratsy Masy tamy androni-Jesosy. Najarỳ tamy synagoga tao ty ankamaroani-raha rey. Fe tsy manahaky ani-zay henanizao. Maro ty olo afaky mamaky ty Safà-Ndranahary iabiaby na ty tampany aminy avao. Tena tombontsoa bevata raha zay. Akory ty ampisehoantsika hoe tena ankasitrahantsika fanomeza io?

19. Ino ty tokony hataontsika soa hatanjaky avao ty finoantsika?

¹⁹ Asehontsika hoe mankasitraky ty Safà-Ndranahary tsika laha mamaky azy tsy tampaky. Tokony manao fandahara mihintsy tsika mba hamakia noho hianara Baiboly, fa tsy hoe saky mana fotoa avao tsika vo manao ani-zay. Lafa tsika mianatsy tsy tampaky, le hatanjaky avao ty finoantsika.

20. Tokony ho tapa-kevitsy hanao ino tsika?

²⁰ Tsy manahaky ty olo “hendry noho mahihitsy” amy tontolo toy eto tsika satria mifototsy amy Safà-Ndranahary ty finoantsika. (Mat. 11:25, 26) Mianatsy ty Soratsy Masy tsika ka haintsika hoe manino ro miharaty ty fiaina an-tany etoy, le ino ty hataoni-Jehovah mba hanarena ani-zay. Soa zany tsika laha tapa-kevitsy hanatanjaky ty finoantsika avao noho hanampy olo farani-ze maro mba hino ty Mpamoro. (1 Tim. 2:3, 4) Ka loniky lahy tsika handiny avao ty fotoa hahatanteraky ty raha volanini-​Apokalypsy 4:11. Hidera ani-Jehovah ty raha mananay an-tany etoy amy zay ka hivola hoe: “Maeva handramby voninahitsy ... iha Jehovah Ndranaharinay, satria iha ro namoro ty kila raha iaby.”