1. Ino iaby ty ezaky ataontsika mba hampitomboa ty fanompoantsika ani-Jehovah?

 VOMAIKY mihamaro asa tsika arakaraky ty mamparìny ty farani-tontolo toy. (Mat. 24:14; Lioka 10:2; 1 Pet. 5:2) Samby ta hanao ze fara herintsika amy fanompoa ani-Jehovah iaby tsika. Maro amy zay ty mampitombo ty fanompoany. Misy ta hanao mpisava lala. Ty sisany maniry hanompo amy Betela na handramby anjara amy fanorena trano ampiasani-fandamina rey. Maro koa ty rahalahy miezaky hahafeno fepetra ho mpanampy amy fanompoa na anti-panahy. (1 Tim. 3:1, 8) Azo antoky fa falifaly Jehovah lafa mahita ty mpanompony parè hanao fanompoa ho azy!—Sal. 110:3; Isaia 6:8.

2. Mety hanao akory tsika lafa tsy tratsintsika ty raha kendrentsika amy fanompoa ani-Jehovah?

² Fe mety halahelo tsika laha fa mandeha elaela ty fotoa kanefa mbo tsy tratsintsika avao ty raha sisany nikendrentsika. Na mety ho kivy koa tsika laha tsy afaky manao raha sisany amy fandaminani-Jehovah eo sasy, satria fa mihaantitsy na misy antony hafa. (Ohab. 13:12) Ho zay ty nahazo ani-Melissa. * Naniry hanompo amy Betela ie na hanao Sekolini-Mpitory Fanjakà Iny, fe zao ty nivolaniny: “Fa tsy mahafeno fepetra hanao ani-fanompoa reo sasy aho satria fa be. Lasa nofinofy avao raha reo amiko. Somary kivikivy amy zay aho kindraiky.”

3. Mety mila manao ino ty olo sisany mba hahafeno fepetra ho amy tombontsoa sisany?

³ Misy Kristiana sisany zao mbo tanora sady salama soa, fe mbo mila miezaky ie mba hihamatotsy noho hana toetsy soa, zay vo mety hahafeno fepetra ho amy tombontsoa fanampiny. Mety misy amin-drozy, ohatsy, mahay raha, mora mandramby fanapahan-kevitsy noho parè hiasa, fe mbo mila miezaky rozy  mba hahaliny raha, hanao soa ty asany, noho hanaja ty hafa. Laha miezaky hana ze toetsy soa tokony hanananao iha, le mety hahazo tombontsoam-panompoa fanampiny. Mety ho tampoky anao mihintsy raha iny. Henteo moa tantarani-Nick toy. Lafa ie ni-20 tao, le tena nidiso fanantenà satria tsy nivoatendry mpanampy amy fanompoa. Hoy ty asany: “Nieritseritsy aho hoe nisy raha tsy nety nataoko vasa.” Fe tsy nikivy Nick. Nanao ze fara heriny ie tamy ze asa iaby tamy fiangona teo noho tamy asa fitoria. Lasa anatini-Komitini-Sampana ie henanizao.

4. Ino ty hodinihintsika amy lahatsoratsy toy ato?

⁴ Kivy va iha satria misy raha kendrenao amy fanompoa ani-Jehovah kanefa mbo tsy tratsinao? Laha zay ty mahazo anao, le mivavaha amy Jehovah. Resaho aminy ty raha tsapanao. (Sal. 37:5-7) Azonao atao koa ty mangataky soso-kevitsy amy Kristiana matotsy. Anontaneo azy hoe akory ty azonao anasoava ty fanompoanao a Ndranahary, bakeo oriho soa torohevitsy iny. Laha manao ani-zay iha, le mety ho tratsinao raha kendrenao iny. Fe manahaky ani-Melissa, ranabavy niresahintsika taloha teroy iny, le mety tsy afaky ho azonao henanizao tombontsoam-panompoa irinao iny. Ino zany ty azonao atao mba ho falifaly avao iha? Hamaly ani-zay tsika amy lahatsoratsy toy ato ka hodinihintsika hoe: 1) Ino ty hanampy anao ho falifaly? 2) Akory ty hampitomboanao ty hafaleanao? Le 3) ino iaby ty azonao atao raha kendrè mba hanovo ty hafaleanao?

5. Ino ty raha tokony hifantohantsika mba hahavy antsika ho falifaly? (Mpitoriteny 6:9)

⁵ Resahini-tampany voalohany amy Mpitoriteny 6:9 io hoe ino ty tokony hataontsika mba hahavy antsika ho falifaly. (Vakio Mpitoriteny 6:9a.) Falifaly “amy ze hitani-maso” ty olo raiky laha afa-po amy ze raha ananany, ohatsy hoe afa-po amy ty raha iainany henanizao. Fe tsy ho zay ty olo avezivezini-faniriany, satria teany ho azo avao raha iriny iny ndre fa hita hoe tsy mety ho azony mihintsy. Tsy ho afa-po zao mihintsy ie. Ka ino ty ianarantsika baka amy zay? Laha ta ho falifaly zany tsika, le tokony hifantoky amy ze raha ananantsika noho ze raha azontsika tratsiry.

6. Ino ty fanohara hodinihintsika, le ino ty hianarantsika baka amy fanohara io?

⁶ Tena afaky ho afa-po amy ze raha fa ananany vatany va ty olombelo? Maro ty olo mieritseritsy hoe tsy ho vitantsika zay, satria ta hanandra raha vaovao avao tsika. Fe azo atao soa raha zay, zany hoe tena afaky ho falifaly amy ze raha fa ananantsika tsika. Ino ty hanampy antsika hanao ani-zay? Ndao hodinihintsika fanoharani-Jesosy mikasiky talenta amy Matio 25:14-30 ao iny, mba hahaizantsika ty valini-zay. Hianarantsika baka amy fanohara io hoe ino ty hanampy antsika ho falifaly, le akory ty hampitomboantsika ani-hafaleantsika zay ndre tsy miova aza ty raha iainantsika.

7. Resadresaho kelikely fanoharani-Jesosy mikasiky talenta iny.

⁷ Handeha lavitsy lahilahy resahini-fanohara io. Fe alohani-handehanany, nikaihiny iaby mpanompony rey le samby nameany talenta rozy mba hahafahan-drozy mamarotsy. * Haini-lahilahy iny fa tsy mitovy ty fahaizani-mpanompony rey, farany tsy nampitoviny koa ty isakini-talenta nameany an-drozy kiraidraiky. Ty raiky nameany talenta limy, azy faharoe iny nameany talenta roe, le azy fahatelo iny nameany talenta raiky. Niasa mafy mpanompo  roe voalohany rey mba hampitomboa ani-dralani-tompon-drozy iny. Fa azy fahatelo iny tsy nanao raha ndre raiky, farany niroasini-tompony iny ie.

8. Ino ty tena nahafalifaly ani-mpanompo voalohany tamy fanoharani-Jesosy iny?

⁸ Tsy maintsy nifalifaly aloha mpanompo voalohany iny lafa nameani-tompony iny talenta limy. Drala be raha iny, ka hita baka amin’io fa tena natoky azy tompony iny! Ka nanao akory mpanompo faharoe iny? Azony natao aloha ty nikivy satria ie tsy nahazo talenta maro mitovy amy niazoni-mpanompo voalohany iny. Fe ino ty nataony?

9. Ino ty raha tsy niresahini-Jesosy mikasiky ani-mpanompo faharoe iny? (Matio 25:22, 23)

⁹ Vakio Matio 25:22, 23. Tsy nivola Jesosy hoe nimeloky na nialona mpanompo faharoe iny satria talenta roe avao ty niazony. Tsy nivola koa ie hoe nimenimeny mpanompo iny le nanao ho zao hoe: ‘Le toy avao ty niazoko? Zaho koa ane mba miasa mafy manahaky ani-mpanompo nahazo talenta limy tia! Laha zao ty ataoni-tompoko ahy, haleviko any dralany toy le aleoko miasa ho ahy am-batako.’

10. Ino ty nataoni-mpanompo faharoe iny amy talentany iny?

¹⁰ Manahaky ani-mpanompo voalohany iny, le nahatsapa mpanompo faharoe iny hoe andraikitsy bevata ty namea azy, ka tena niasa mafy ho ani-tompony ie. Ino ty vokany? Lasa nitombo efatsy talenta roe iny. Nifalifaly tompony iny ka namaly soa azy amy ty asa mafy nataony. Nidera azy ie sady nanome azy andraikitsy hafa fanampiny.

11. Ino ty azonao atao mba hampitomboa ty fifaleanao?

 ¹¹ Vomaiky ho falifaly koa tsika laha manao ze fara herintsika amy fanompoa ani-Jehovah. Miezaha ‘hifantoky tanteraky’ amy asa fitoria noho hiasa mafy ho ani-fiangona. (Asa. 18:5; Heb. 10:24, 25) Omano soa fivoria rey amy zay iha afaky manome valin-teny mampahery lafa any. Anovo soa ty anjara azonao amy fivoria andavanandro rey. Laha misy asa ampanaovy anao ty amy fiangona eo, le miezaha ho azo atokisa ka vitao ara-potoa raha iny. Ka mieritseritsy mihintsy hoe tsy tena vatan-draha asa ampanaovy anao iny ka tsy voatery manoka fotoa hanaova azy iha. Miezaha koa hahay soa ty asanao. (Ohab. 22:29) Laha iha miasa mafy ho ani-Jehovah, le vomaiky ho mpinama nareo sady hitombo ty fifaleanao. (Gal. 6:4) Hanampy anao ho falifaly avao koa raha zay ndre olo hafa aza ro nahazo ani-tombontsoa teanao ho niazo iny.​—Rom. 12:15; Gal. 5:26.

12. Ino ty nanampy ani-Melissa noho Nick ho falifaly avao?

¹² Tiaronao va Melissa, ranabavy niresahintsika tamy fehintsoratsy 2 teny iny? Mba faniriany ty hoe hanompo amy Betela na hanatriky Sekolini-Mpitory Fanjakà Iny, fe tsy afaky nanao ani-zay ie. Zao amy zay ty nivolaniny tafara atoy: “Manao ze fara heriko amy asani-mpisava lala aho, sady miezaky handramby anjara amy fomba fitoria sankarazany. Tena mahafalifaly ahy raha zay.” Ka ino koa ty nataoni-Nick lafa ie mbo tsy nivoatendry mpanampy amy fanompoa avao? Hoy ty asany: “Niezaky nifantoky tamy ze tombontsoa nananako aho, anatini-zay ty hoe mandramby anjara amy asa fitoria noho manome valin-teny mampahery lafa am-pivoria any. Nameno fangataha hanompo amy Betela koa aho, le tao raiky tafarani-zay nivoakaiky.”

13. Ino ty ho vokany laha imaneanao soa ty asa anendrea anao amy zao? (Mpitoriteny 2:24)

¹³ Laha imaneanao soa ty asa anendrea anao amy zao, midika va zay fa tsy maintsy hahazo tombontsoa fanampiny iha amy hoavy? Zay aloha ty raha niseho tamy Nick. Fe ndre tsy mahazo ani-zay aza iha, manahaky nahazo ani-Melissa iny, le mbo afaky ho falifaly avao sady tena ho afa-po amy ze azonao atao ho ani-Jehovah. (Vakio Mpitoriteny 2:24.) Vomaiky ho falifaly koa aza iha lafa mahay hoe mahafalifaly ani-Jesosy Kristy Tompontsika ty mahita ty ezaky ataonao.

14. Ino ty tokony hotiarovintsika avao lafa tsika hametraky raha kendrè amy fanompoa ani-Jehovah?

¹⁴ Laha fa manao ze fara herinao amy fanompoa ani-Jehovah iha henanizao, midika va zay hoe tsy tokony hiezaky sasy iha? Tsy zay! Tokony hametraky raha kendrè hanampy antsika ho lasa mpitory noho mpampianatsy mahay tsika. Tokony hataontsika raha kendrè koa ty hanampy ani-rahalahy noho anabavintsika reo. Ho vitantsika ty hanatratsy ani-raha reo laha mifantoky amy fanampea ty olo hafa tsika fa tsy mifantoky amy ty vatantsika avao.​—Ohab. 11:2; Asa. 20:35.

15. Ino, ohatsy, ty raha sisany azonao tratsiry mba hanovo ty hafaleanao?

¹⁵ Ino iaby, ohatsy, ty raha azonao tratsiry? Mba hahaizanao ani-zay, le angataho Jehovah hanampy anao. (Ohab. 16:3; Jak. 1:5) Iha va afaky manatratsy ty raiky amy raha niresahy tamy  fehintsoratsy voalohany teny rey, ohatsy hoe ho lasa mpisava lala mpanampy na maharitsy, hanompo amy Betela, na hanampy amy fanorena tranoni-fandamina rey? Na mety afaky mianatsy fivolana hafa koa vasa iha henanizao, amy zay mba afaky hifindra amy pilasy hafa na hitory ty vaovao soa amy vahiny.  Hahazo fanazavà misimisy mikasiky ty sisany amy raha reo iha laha mamaky ty toko faha-10 amy boky Voalamina mba Hanao ny Sitrapon’i Jehovah, na miresaky amy anti-panahy amy fiangona misy anao. * Laha iha miezaky manatratsy raha kendrè manahaky ani-reo, le ho hita hoe mihamandroso. Hitombo koa amy zay ty hafaleanao.

16. Ino ty azonao atao laha mbo tsy afaky manatratsy ty raha kendrenao iha?

¹⁶ Fe manao akory laha mbo tsy afaky manatratsy ty raiky amy raha kendrè niresahy taloha teo rey iha? Miezaha hametraky raha hafa azonao tratsiry. Retoa, ohatsy, misy raha vitsivitsy.

17. Laha hentea ty 1 Timoty 4:13, 15, mila manao ino ty rahalahy raiky laha ta hahay mampianatsy?

¹⁷ Vakio 1 Timoty 4:13, 15. Laha rahalahy vita batisa iha, le mety azonao atao ty miezaky manasoa ty fahaizanao miresaky noho mampianatsy. Ino ty antony? Satria laha iha miezaky mafy mba hahay hamaky teny, hahay handahateny, noho hahay hampianatsy, le ho afaky hanampy ty olo mijanjy anao. Anovo raha kendrè zany ty hianatsy noho hanoriky ty fianara kiraidraiky amy bokikely Miezaha Marè amy Vakiteny Noho Fampianara. Mifiliana fianara raiky, ohatsy, le ampolimpolio an-trano ao, bakeo oriho amy zay raha nianaranao iny lafa iha manao lahateny. Mangataha fanampea amy mpanome torohevitsy mpanampy na amy anti-panahy “miezaky marè amy fivolana noho fampianara” rey. * (1 Tim. 5:17) Henteo soa  hoe manao akory ty azonao anoriha ani-fianara amy bokikely ao iny. Fe tsy zay avao fa diniho koa hoe ino ty azonao atao mba hanampea ty mpijanjy anao hana finoa matanjaky noho hanoriky ani-fampianara iny. Laha manao ani-zay iha, le samby ho falifaly iaby nareo.

18. Ino ty hanampy antsika hahay hitory noho hampianatsy?

¹⁸ Samby mana andraikitsy hitory noho hanao mpianatsy iaby tsika. (Mat. 28:19, 20; Rom. 10:14) Teanao va ty hahay soa ani-asa tena bevata io? Ianaro bokikely Fampianara iny, le bakeo mametraha raha kendrè voafaritsy soa hanampy anao hanoriky ty raha ianaranao. Misy soso-kevitsy afaky manampy anao koa amy Kahiem-pivoria noho video fifampiresaha modely alefa amy fivoria andavanandro rey. Anoharo kiraidraiky soso-kevitsy rey, amy zay ho hitanao hoe azy raiky manao akory iny ty tena misy vokany. Laha orihinao iaby soso-kevitsy niresahy teo rey, le tena hahay hitory noho hampianatsy iha. Ho falifaly biby iha amy zay.—2 Tim. 4:5.

19. Ino ty azonao atao mba hanana ani-toetsy tea-Ndranahary rey?

¹⁹ Lafa hametraky raha kendrè iha le ka halino mihintsy raha raiky tena bevata toy, tsy ino zay fa ty hana ani-toetsy tea-Ndranahary rey. (Gal. 5:22, 23; Kol. 3:12; 2 Pet. 1:5-8) Ino ty azonao atao mba hanatratsira ani-zay? Ndao ataontsika hoe ta hana finoa matanjaky iha. Laha zay ie, le mety hamaky lahatsoratsy miresaky mikasiky fomba hanatanjaha finoa rey iha. Hahasoa anao koa ty manenty raha sisany amy Tele JW ao. Atorony ao hoe nisy rahalahy noho anabavy niatriky raha sarotsy sankarazany, fe nampiseho finoa avao. Bakeo diniho hoe ino ty azonao atao mba hanahafa ty finoan-drozy.

20. Ino ty azontsika atao mba ho falifaly avao sady tsy de hahatiaro kivy?

²⁰ Azo antoky fa samby ta hanao raha maro ho ani-Jehovah iaby tsika henanizao. Fe lafa amy tontolo vaovao any tsika vo afaky hanompo azy amy fomba feno. Ka zisiky hiaviani-zay, le miezaky manao ze fara herintsika tsika henanizao. Ho falifaly avao tsika amy zay sady tsy de hahatiaro kivy. Fa ty tena vatan-draha, le hahazo dera noho voninahitsy Jehovah, azy ‘Ndranaharintsika falifaly’ iny. (1 Tim. 1:11) Soa tsika zany laha miezaky ho falifaly amy ze tombontsoa ananantsika!