1-2. Ino ty hodinihintsika amy lahatsoratsy toy ato?

ERITSERETO hoe misy namanao nanafaranao raha raiky tena ilànao, le mandiny azy iha. Fa nampitamà ie hoe ho avy, le nameany lera mihintsy iha. Ino amy zay hoasanao laha tara ie? Ho diso fanantenà va iha? Azo antoky fa hahatsapa manahaky raha volanini-​Ohabolana 13:12 toy iha: “Marary ty fo laha mihemotsy avao ty fahatanteraha ty raha tamany.” Fe manao akory amy zay laha renao hoe misy antony bevata mahavy ani-namanao iny mbo tsy avy io? Laha zay ie, le mety hahaliny iha sady ho parè handiny mihintsy aza.

² Amy lahatsoratsy toy ato tsika hanenty torolalani-Baiboly vitsivitsy hanampy antsika ho “parè handiny” avao. (Mika 7:7) Bakeo tsika handiniky raha roe mampiseho hoe tsy maintsy mahaliny ani-Jehovah tsika. Le amy farany, hodinihintsika ty raha soa ampitamanini-Jehovah ho ani-ze parè handiny azy.

3. Ino ty ianarantsika baka amy Ohabolana 13:11?

³ Atoroni-​Ohabolana 13:11 hoe manino tsika ro tokony hahaliny raha. Ho zao ty volaniny: “Hihena ty hanana azo malaky, fa ze mamory hanana tsikelikely ro hampitombo azy.” Ino ty ianarantsika baka amy andinin-teny io? Hendry zany tsika laha tsy malisalisa lafa manao raha fa mandiniky soa. Hisy vokany soa raha zay.

4. Ino ty teani-torolala amy Ohabolana 4:18 ao horesahy?

⁴ Hoy ty Ohabolana 4:18: “Ty lalani-marina le manahaky hazavà amy maraindray rey, mihamazava tsikelikely ie zisiky mampazava soa ty andro.” Asehoni-andinin-teny io mazava soa fa ampeani-Jehovah ty vahoakiny mba hahay tsikelikely hoe ino ty raha teany hatao. Fe haintsika baka amy andininy io koa  hoe akory ty ataoni-Kristiana lafa manao fiovà amy fiainany noho mamonjy ani-Jehovah. Lasa haintsika hoe mila fotoa elaela ty olo raiky vo hihamariny ani-Jehovah. Laha ianarantsika soa noho orihintsika ty torohevitsy azontsika baka amy Safà-Ndranahary noho baka amy fandaminany, le hanjary hana ty toetsini-Kristy tsikelikely tsika. Hahay soa a Ndranahary koa tsika amy zay. Nihazavanini-Jesosy tamy fanohara mihintsy raha zay. Ndao hohenteantsika tse fanohara io.

5. Ino ty fanohara nampiasani-Jesosy mba hampisehoa hoe mandeha tsikelikely ty fiovà ataon’olo raiky?

⁵ Nampiasa fanohara Jesosy mba hanazavà hoe mitombo tsikelikely anaty fon’olo tea fahamarina ty hafatsy torintsika mikasiky Fanjakà iny. Nampitoviziny amy voan-draha kelikely ambolè io raha zay. Hoy ty asany: “Mitiry voa iny sady mitombo, fe tsy hainy [mpamboly iny] hoe tamy fomba manao akory. Mamokatsy tsikelikely amy zao avao ty tany: Voalohany tse ty raviny, bakeo ty tahony, le farany feno voa tahony iny.” (Mar. 4:27, 28) Ino ty teani-Jesosy hovolany? Nanazava ie hoe mandeha tsikelikely ty fiovà ataon’olo raiky maneky ty hafatsy mikasiky Fanjakà iny, manahaky raha mitiry mitombo tsikelikely io. Lafa misy mpianatsy Baiboly, ohatsy, miezaky mifandramby soa amy Jehovah le manomboky hitantsika hoe nanao fanovà maro ie. (Efes. 4:22-24) Nisy raha soa nataony zany. Fe tokony hotiarovintsika fa Jehovah ro mampitombo ani-voa kelikely iny.​—1 Kor. 3:7.

6-7. Ino ty ianarantsika baka amy fomba nanamboarani-Jehovah ani-tany toy?

⁶ Tsy malisalisa Jehovah lafa manao raha. Tsy mampanino azy ndre firifiry ty fotoa ho laniny amy raha ataony iny. Misy antony roe mahavy azy manao ani-zay: Mba ho voninahitsini-anarany noho mba hanampea ty hafa koa. Mba eritsereto, ohatsy, ty raha nataoni-Jehovah lafa nanoma ani-tany toy ho ahi-ty olombelo ie. Nataony tsikelikely ty asa azy.

⁷ Lafa miresaky ty fomba nanamboarani-Jehovah ani-tany toy ty Baiboly, le volaniny  ao hoe nametraky “ty refiny” ie, nandatsaky ‘ty fototsiny’, sady nametraky “ty vato fehizorony.” (Joba 38:5, 6) Nanoka fotoa mihintsy aza ie mba handiniha ty raha nataony. (Gen. 1:10, 12) Mba eritsereto moa hoe nanao akory anjely rey saky nahita ty raha vaovao namboarini-Jehovah? Tsy maintsy nanitranitra biby rozy sady “nifalifaly iaby.” (Joba 38:7) Ino ty ianarantsika baka amy zay? Tanatini-tao maro ty nanamboarani-Jehovah ty tany, ty basia, noho ty raha iaby mananay. Niamby soa ie lafa nanao ani-raha iaby namboariny reo. Lafa nihenteany amy zay asany rey, le nivola ie hoe “soa vatany” raha rey.​—Gen. 1:31.

8. Ino ty raha hodinihintsika henanizao?

⁸ Nahita ohatsy maromaro tsika tanabo teo. Hitantsika baka amy rey fa maro ty torolalani-Baiboly mampianatsy antsika hoe mila mahaliny raha tsika. Henanizao amy zay tsika handiniky raha roe mampiseho hoe tsy maintsy parè handiny ani-Jehovah tsika.

9. Amy raha manao akory tsika ro mila mandiny ani-Jehovah?

⁹ Mila mandiny ani-Jehovah hamaly ty vavaky ataontsika tsika. Mety misy fotoa tsika mangataky hery amy Jehovah mba hahafahantsika miaritsy ty raha sarotsy mahazo antsika, na hanampy antsika hiala amy raha tsy teany. Fe mety hahatsapa tsika hoe mandiny ela marè Jehovah vo mamaly ani-vavaky iny. Manino moa Jehovah ro tsy avy le mamaly avao saky mivavaky tsika?

10. Manino tsika ro mila mahaliny laha mbo tsy mamaly ty vavaky ataontsika Jehovah?

¹⁰ Janjinini-Jehovah soa ty vavaky ataontsika. (Sal. 65:2.) Amy vavaky ataontsika rey ro ahitany hoe mino azy vatany tsika. (Heb. 11:6) Teani-Jehovah ho hita koa hoe tena parè hanao raha mifanaraky amy vavakintsika iny noho hanao ty sitrapony va tsika. (1 Jaona 3:22) Ka lafa mangataky aminy zany tsika mba hampeany tsy hanao ty raha halany, le mila mahaliny tsika sady manao ze azontsika atao mba handresea ani-raha rey. Teani-Jesosy ho haintsika koa hoe tsy voatery hivaly eo noho eo ty vavakintsika sisany. Hoy ty asany: “Mangataha avao, le hamea nareo. Milà avao, le hahita nareo. Paipaiho avao, le hovohà nareo. Fa ze mangataky ro mahazo, ze mila ro mahita, le ze mamaipaiky ro hovohà.” (Mat. 7:7, 8) Laha manaraky ani-torohevitsy io tsika ka ‘tsy mieny mivavaky’, le afaky matoky hoe hijanjy antsika Babantsika an-danitsy any iny sady hamaly ty vavaky ataontsika.​—Kol. 4:2.

11. Ino ty tokony hotiarovintsika laha mahatsapa tsika hoe tsy mamaly ty vavakintsika Jehovah? (Hebreo 4:16)

¹¹ Atao raha tara kindraiky vo mivaly ty vavakintsika, fe mampitamà Jehovah hoe hovaleany “amy fotoa mety” raha rey. (Vakio Hebreo 4:16.) Tsy tokony hieritseritsy mihintsy zany tsika hoe tsy mety ty ataoni-Jehovah satria tsy avy le mamaly ty vavakintsika araky ty ieritseretantsika azy ie. Fa maro amintsika, ohatsy, ro nivavaky mba hahita ty handripahani-Fanjakà-Ndranahary ani-tontolo toy. Jesosy mihintsy aza nampirisiky antsika hivavaky mikasiky ani-zay. (Mat. 6:10) Fe mampalahelo laha engantsika hihena ty finoantsika a Ndranahary satria avao hoe mbo tsy avy amy fotoa nieritseretantsika azy ty farany. Tena tsy fahendrea raha zay! (Hab. 2:3; Mat. 24:44) Hendry tsika laha mandiny ani-Jehovah avao sady mivavaky amim-pinoa. Ho avy amy fotoany ty farany fa tsy ho tara, satria Jehovah fa nifily “andro noho lera” hiaviani-raha zay. Fotoa farani-ze soa ho ani-ze olo tea  ani-Jehovah fotoa zay.​—Mat. 24:36; 2 Pet. 3:15.

12. Amy raha manao akory ro mety ho tena sarotsy amintsika ty mandiny?

¹² Mety mila mahaliny tsika zisiky hampisy ty rariny. Amy tontolo toy eto, matetiky ty lahilahy noho ampela samby mifanararaotsy. Ampijalin-drozy koa iha laha hafa karaza, foko, firenena, noho fomban-tany. Ataon-drozy ho zay koa ze olo kilemaina na mana aretin-tsay. Miaritsy tsy rariny ty ankamaroani-vahoakini-Jehovah satria mino ty raha volanini-Baiboly. Laha zay ty raha mahazo anao, le tokony hotiarovinao safàni-Jesosy iny. Nivola ie hoe: “Ze miaritsy zisiky farany ro havota.” (Mat. 24:13) Fe ino ty tokony hataonao laha olo amy fiangona eo ro manao raha tsy mety aminao? Laha, ohatsy, ka fa haini-anti-panahy reo raha iny, hahaliny va iha ka hatòky hoe hokarakaran-drozy mifanaraky amy ty itiavani-Jehovah azy raha iny? Ino ty tokony hataoni-anti-panahy laha fahotà bevata ro nataon’olo iny?

13. Ino ty teani-Jehovah hataoni-anti-panahy lafa misy olo nanao fahotà bevata?

¹³ Lafa haini-anti-panahy hoe nanao fahotà bevata ty olo raiky amy fiangona eo, le hivavaky rozy sady hangataky amy Jehovah mba hanome an-drozy ty “fahendrea baka anabo any.” (Jak. 3:17) Hanampy an-drozy raha zay mba hahay hoe manao akory ty fahitani-Jehovah ani-raha iny. Ty raha kendren-drozy, le mba hanampy ani-azy nanota iny “hiala amy lalani-hadisoany.” (Jak. 5:19, 20) Ta hanao ze azon-drozy atao koa rozy mba hiarova ty fiangona noho hampahereza ani-ze nijaly vokatsini-raha iny. (2 Kor. 1:3, 4) Lafa mikarakara raha mifandramby amy fahotà bevata ty anti-panahy, le mila hain-drozy tse hoe ino marina ty raha tena niseho. Mety hitaky fotoa raha zay. Bakeo rozy mivavaky le manome torohevitsy baka amy Soratsy Masy ho ani-azy nanota iny, sady mananatsy azy “araky ty antonony.” (Jer. 30:11) Marina fa tsy mandiny ela ty anti-panahy, fe tsy malisalisa hanapa-kevitsy koa rozy. Laha manaraky soa ty tari-dalani-Jehovah ty anti-panahy, le hahazo fitahia ty olo iaby amy fiangona eo. Fe ndre fa niezaky nanao ani-reo ty anti-panahy, le mety mbo haharary avao ty fon’olo tsy manan-tsiny sisany tratsini-raha nataon’olo nanota iny. Laha zay ty mahazo anao, ino ty azonao atao mba hampihenà ty fijalea mahazo anao?

14. Ino ty tantara amy Baiboly ao afaky manampy anao hiaritsy laha nisy mpiara-manompo nanao raha raty taminao?

 ¹⁴ Fa nisy olo na mpiara-manompo nanao raha raty taminao va? Misy ohatsy maro mikasiky ani-zay amy Safà-Ndranahary ao. Ho hitanao baka amy raha rey hoe manao akory mandiny ani-Jehovah handamy tsy rariny zao. Eritsereto, ohatsy, Josefa. Nampijalijalini-rahalahiny rey ie fe tsy nengany hanova azy raha nataon-drozy zay. Tsy neloky ie, fa vomaiky aza ie nanao ze fara heriny tamy fanompoa ani-Jehovah. Namaly soa azy Jehovah satria niaritsy avao ie sady nahaliny raha. (Gen. 39:21) Lafa nandeha ty fotoa, le nanenga ty hadisoani-azy nampijaly azy rey Josefa ka tena nitahini-Jehovah. (Gen. 45:5) Manahaky ani-Josefa, le hahazo fampahereza koa tsika laha mifandramby marìny amy Jehovah noho mandiny azy handamy ty tsy rariny mahazo antsika.​—Sal. 7:17; 73:28.

15. Ino ty nanampy ani-ranabavy raiky toy tsy hiasa say amy tsy rariny nahazo azy iny?

¹⁵ Mazava ho azy fa tsy voatery ho bevata manahaky ty ani-Josefa iny iaby ty tsy rariny mahazo antsika. Fe ndre zay, malahelo avao tsika lafa tratsini-tsy rariny. Handramby soa tsika amy fotoa rey laha manoriky ty torolalani-Baiboly, sirtò moa laha olo tsy manompo ani-Jehovah ro tsy mifanaraky amintsika. (Fil. 2:3, 4) Henteo moa tantara raiky toy: Niresaky raha tsy marina mikasiky ani-ranabavy raiky toy ty mpiaraky miasa aminy. Tena nalahelo ranabavy io lafa naharè ani-raha iny. Fe ndre zay, tsy avy le nanao raha ie. Nangalaky fotoa ie mba handiniha ty modelini-Jesosy. Tsy nandratiraty olo Jesosy ndre nisy nandratiraty aza. (1 Pet. 2:21, 23) Nitiaro ani-zay avao ranabavy io ka nanapa-kevitsy hoe hitsỳ avao amy raha nataon’olo azy iny. Nireny tafara atoy fa kay hondy nana aretim-be ampela miaraky miasa aminy iny, ka tena niasa loha. Farany ranabavy io nanao ho zao hoe mety tsy tena nieritseritsy ani-raha nivolaniny iny zany ampela iny. Tena nifalifaly ranabavy io satria nahaliny raha ka niaritsy avao. Lasa nilamy ty sainy.

16. Laha misy tsy rariny mahazo anao, ino ty afaky mampahery anao? (1 Petera 3:12)

¹⁶ Laha misy tsy rariny mahazo anao na misy raha hafa mampalahelo anao, le tiarovo fa  anilani-ze “torotoro fo” Jehovah. (Sal. 34:18) Teany iha satria mahaliny raha, le teany koa laha apetrakinao aminy iaby ze raha manavesatsy anao. (Sal. 55:22) Ie ro Mpitsara ani-tany toy iaby. Tsy misy raha mivony aminy ndre raiky. (Vakio 1 Petera 3:12.) Ka laha misy raha manahira tsy voavahanao, le tiarovo fa tena vatan-draha ty mandiny ani-Jehovah hanao raha.

17. Mampitamà hanao ino Jehovah amy Isaia 30:18 ao?

¹⁷ Tsy ho ela Babantsika an-danitsy any iny le hanome raha soa maro ho antsika amy alalani-Fanjakàny. Hoy ty Isaia 30:18: “Mbo mitamà hiferinay anareo avao Jehovah, ka hitsanga ie mba hamindra fo aminareo. Fa Ndranaharini-rariny Jehovah, ka sambatsy ze olo iaby mandiny azy.” Hahazo fitahia maro ze mandiny ani-Jehovah, tsy henanizao avao fa lafa amy tontolo vaovao ho avy iny koa.

18. Ino iaby ty fitahia mandiny antsika?

¹⁸ Tsy hiaritsy raha manahira manahaky ty atrehin-drozy amy henanizao io sasy ty vahoaki-Ndranahary lafa amy tontolo vaovao any. Tsy hisy sasy amy zay ty tsy rariny noho ty raha mampijaly. (Apok. 21:4) Tsy hiasa loha mikasiky ty raha ho hanintsika sasy, ohatsy, tsika satria ho be ty vokatsy. (Sal. 72:16; Isaia 54:13) Hasoan-draha lahy zay!

19. Manoma antsika ho amin’ino Jehovah henanizao?

¹⁹ Fa manoma antsika hiay ambany Fanjakàny ao sandrany Jehovah henanizao, ka ampeany tsika handresy ty fahazaran-draty ananantsika noho hana ty toetsy teany. Ka kivy mihintsy sady ka mieny manompo ani-Jehovah. Kely sisa le ho avy fiaina farani-ze soa iny! Ka zisiky hiaviani-fotoa zay, loniky lahy tsika ho parè handiny avao sady hahaliny ani-Jehovah hanao ani-raha nampitamaniny rey!