1. Ino ty mety ho tsapan’olo raiky lafa voaroaky ty olo marìny azy?

FA NISY nivoaroaky va ty olo marìny anao? Azo antoky fa tena nampalahelo anao raha zay! Hoy ranabavy Hilda: “Tena nalahelo aho lafa nimaty valiko, 41 tao tafarani-nifanambaleanay. Nieritsetitsy aho tamy zay hoe iny ty raha farani-ze sarotsy natrehiko. * Fe tafara atoy niala tamy fiangona anakilahiko iny, le nengany valy amin’anany rey. Iny ty tena tsy nizakako.”

2-3. Laha hentea ty Salamo 78:40, 41, ino ty tsapani-Jehovah lafa miala aminy ty mpanompony?

² Anatini-fianakaviani-Jehovah ty anjely. Mba eritsereto amy zay hoe nanao akory ty alahelony lafa nanohitsy azy ty anjely sisany! (Joda 6) Teani-Jehovah koa Israelita rey satria mpanompony. Ka mba eritsereto hoe nanao akory ty alahelony lafa nanohitsy azy matetiky rozy. (Vakio Salamo 78:40, 41.) Matokisa fa tena malahelo Babantsika an-danitsy any iny lafa misy olo marìny anao miala aminy. Hainy soa ty alahelonao. Ferinesany iha ka hampahery anao ie sady hanome ze fanampea ilànao.

³ Hodinihintsika amy lahatsoratsy toy ato hoe ino ty azontsika atao mba hahazoa ty fanampeani-Jehovah, lafa misy miala aminy ty olo marìny antsika. Hianarantsika ato koa hoe ino ty azontsika atao mba hanampea ani-ze mana longo voaroaky. Fe ndao tse tsika handiniky raha vitsivitsy mila halavirintsika.

4. Ino ty raha tsapan’olo manan’anaky lafa misy miala amy Jehovah ty anany?

⁴ Lafa misy miala amy Jehovah ty ajà an-trano ao, le matetiky ty babany noho reniny manao ho zao hoe tsy no mbo nisy raha tokony ho nataonay lahy mba ho nanampea azy. Ho zay  mihintsy ty nitsapani-rahalahy Luke lafa nivoaroaky ty anakilahiny. Hoy ty asany: “Nameako tsiny ty vatako. Nanonofy raty mikasiky ani-raha iny mihintsy aho. Nitany aho kindraiky sady narary ty foko.” Nivoaroaky koa ty anakilahini-ranabavy Elizabeth, le zao ty raha nivolaniny: “Ino lahy ty raha tsy nety nataoko? Sa vasa aho tsy de nanampy azy ho tea ani-Jehovah.”

5. Ia ro tompon’andraikitsy lafa miala amy Jehovah ty olo raiky?

⁵ Tokony hotiarovintsika hoe malalaky tsika hoasani-Jehovah, le afaky mifily ze teantsika hatao amy fiainantsika. Midika zay fa afaky mifily tsika na hanoriky ty safàny na tsy hanoriky. Tsy manompo ani-Jehovah, ohatsy, ty baba amy renini-tanora sisany, fe nanapa-kevitsy hanompo ani-Jehovah avao rozy le tsy mivaliky aminy. Fe tsy ho zay ty sasany. Manompo ani-Jehovah ty babany amy reniny, le niezaky mafy nampianatsy azy ho tea ani-Jehovah, fe niala tamy Jehovah rozy lafa nandeha ty fotoa. Tsika kiraidraiky mihintsy zany ro tsy maintsy manapa-kevitsy laha hanompo ani-Jehovah. (Jos. 24:15) Ka laha malahelo mafy iha satria niala amy Jehovah ty ananao, le ka mieritseritsy mihintsy iha hoe misy hadisoanao zay!

6. Ino ty raha mety ho tsapani-tanora laha miala amy Ndranahary ty babany na ty reniny?

⁶ Misy loham-pianakavia na renim-pianakavia miala amy Jehovah kindraiky sady manenga ty valy amin’anany. (Sal. 27:10) Tena tsy mora amy ty anaky nanaja noho tea ty ray aman-dreniny raha zay. Zao, ohatsy, ty raha nivolanini-ranabavy Esther, lafa nivoaroaky babany: “Nitany avao aho satria tsy hoe niala tamy fahamarina avao babako, fa nanapa-kevitsy tsy hanompo ani-Jehovah sasy. Teako babako, ka lafa nivoaroaky ie le niasa avao ty lohako hoe mba nanao akory ie zay. Narary mihintsy aza aho.”

7. Manao akory ty fahitani-Jehovah ty tanora mana ray aman-dreny voaroaky?

⁷ Ho anareo tanora, laha niala amy Jehovah ty baba na ty reninao, le tena malahelo biby zahay! Matokisa fa tena haini-Jehovah soa ty alahelonao. Tea anao ie sady falifaly aminao satria tsy mivaliky aminy iha. Falifaly manahaky ani-zay koa rahalahy noho anabavinao amy fiangona eo reo. Tiarovo fa tsy tompon’andraikitsy amy fanapahan-kevitsini-babanao na reninao iha. Nihitantsika taloha teroy hoe nameani-Jehovah fahafaha hifily ty olo kiraidraiky na hanompo azy na tsy hanompo azy. ‘Samby handay ty entany’ iaby koa moa ze Kristiana fa nanokam-bata noho natao batisa.​—Gal. 6:5.

8. Laha nisy longonao voaroaky, ino ty azonao atao zisiky himpoliany amy Jehovah? (Henteo koa ty efajoro hoe “ Mimpolia amy Jehovah.”)

⁸ Laha miala amy Jehovah ty olo marìny anao, le ara-dalàna laha mitamà iha hoe mbo himpoly avao ie ndraiky andro any. Fe ino ty azonao atao zisiky himpoliany amy Jehovah? Anovo ze azonao atao mba hahavy anao hana finoa matanjaky. Laha manao ani-zay iha, le ho modely soa ho an’olo sisany anatini-fianakavianareo ao, na ho ani-azy voaroaky iny mihintsy aza. Hahazo hery koa iha ka ho afaky hiatriky ty alahelonao. Ka ino zany ty azonao atao mba tsy hihena mihintsy ty finoanao?

9. Ino ty azonao atao mba hampatanjaky ty finoanao? (Henteo koa ty efajoro hoe “ Andinin-teny Afaky Mampahery Anao Laha Nisy Olo Marìny Anao Niala Tamy Jehovah.”)

⁹ Anovo ze azonao atao mba hampatanjaky ty finoanao avao. Tena soa laha miezaky avao iha manampy ty vatanao noho ty olo hafa amy fianakavianao ao. Akory ty hanaovanao ani-zay? Milà hery amy Jehovah ka vakio tsy tampaky ty Safàny, le vetsevetseo ze raha volaniny. Miezaha koa hanatriky fivoria tsy tampaky. Zay mihintsy ty nanampy ani-Joanna lafa niala tamy fahamarina babany noho ty rahavaviny. Zao ty nivolaniny: “Azoazoko ty aiko lafa baka namaky tantaran’olo amy Baiboly ao aho. Ohatsy hoe ry Abigaila, Estera, Joba, Josefa, noho Jesosy. Nampahery ahy noho nanampy ahy hifantoky amy raha soa avao ty tantaran-drozy. Nampahery ahy koa hirahirantsika rey.”

10. Manino ty Salamo 32:6-8 ro manampy antsika hiaritsy ze raha mamparary ty fontsika?

¹⁰ Resaho amy Jehovah iaby ze raha mampiasa loha anao. Laha malahelo iha le ka mieny fa mivavaha aminy avao. Angataho Ndranaharintsika be fitiava iny mba hanampy anao hanahaky ty fomba fanenteany raha. Angataho koa ie mba hanome anao ‘fahihira noho hanoro anao ty lala tokony hombanao.’ (Vakio Salamo 32:6-8.) Mety ho sarotsy aminao aloha ty hiresaky amy Jehovah ze raha tsapanao. Fe hainy soa ty raha mamparary ty fonao. Tena tea anao ie ka mampirisiky anao mba hampiboraky aminy ze raha am-ponao ao.​—Eks. 34:6; Sal. 62:7, 8.

11. Laha hentea ty Hebreo 12:11, manino tsika ro tokony hatòky ty fananara feno fitiava ameani-Jehovah? (Henteo koa ty efajoro hoe “ Porofo ty Fitiavani-Jehovah ty Fandroaha.”)

¹¹ Tohano ze fanapahan-kevitsy nirambesini-anti-panahy. Anisani-fomba raiky ananarani-Jehovah  am-pitiava ty olo ty fandroaha. Tena mahasoa antsika iaby raha zay, le anatini-zay olo nanao raha raty iny. (Vakio Hebreo 12:11.) Mety hivola ty olo sisany amy fiangona eo hoe tsy nety ty fanapahan-kevitsy nirambesini-anti-panahy. Lafa maharè ani-zay iha, le tiarovo fa mety manoha ani-azy nanao raty iny ze mivola ani-zay. Sady tsy de tena haintsika koa hoe ino marina ty raha niseho. Ka matokisa zany fa tena nanoriky soa ty raha volanini-Baiboly anti-panahy nitsara ani-olo iny rey sady nitsara “ho ani-Jehovah.”​—2 Tan. 19:6.

12. Nanao akory ty vokany lafa nanoha ty fandahara nataoni-Jehovah ty olo sisany ka tsy nifandramby tamy olo voaroaky iny?

¹² Laha manoha ty fanapahan-kevitsy nirambesini-anti-panahy mikasiky fandroaha ani-longonao iny iha, le mety hanampy azy himpoly amy Jehovah. Hoy Elizabeth azy niresahintsika taloha teroy iny: “Tena tsy nimora taminay ty tsy nifandramby sasy tamy anakilahinay voalohany iny. Fe lafa nimpoly tamy Jehovah ie, le nieky hoe tena nila niroasy vatany ie. Bakeo nivola ie hoe tena nahasoa azy raha zay satria nandrambesany fianara maro. Nihitako tamin’iny hoe tozoro mahasoa avao ty fananara ameani-Jehovah.” Hoy koa Mark valini-Elizabeth: “Tafara atoy, nivola tamiko anakilahinay iny hoe lafa tsy nifandramby taminy mihintsy zahay le lasa naniry himpoly tamy Jehovah ie. Tena misaotsy ani-Jehovah aho satria nampeany zahay mba hanoriky ty safàny avao.”

13. Ino ty afaky manampy anao hahazaka ty alahelonao?

¹³ Miresaha amy nama mahatakatsy ty fihetseham-ponao. Miaraha matetiky amy rahalahy noho anabavy matotsy afaky hanampy anao tsy ho kivy. (Ohab. 12:25; 17:17) Hoy Joanna azy niresahintsika taloha teroy iny: “Mahatiaro mangiky aho kindraiky. Fe tena nanampy ahy ty niresaky tamy nama azo atokisa.” Fe ino ty azonao atao laha mivola raha mahakivy anao ty olo sisany amy fiangona eo?

14. Manino tsika ro mila ‘mahay mifampizaka noho mifanenga hadisoa vatany’?

¹⁴ Mahareta amy rahalahy noho anabavinao reo. Tsy afaky hitamà tsika hoe ho mety avao ty raha volanin-drozy. (Jak. 3:2) Samby tsy lavorary tsika iaby, ka tsy tokony ho tseriky laha tsy mahay ty raha hovolaniny ty olo sisany na mivola raha mamparary ty fonao ndre tsy asany azy aza. Tiarovo torohevitsini-apostoly Paoly toy: “Mahaiza avao mifampizaka noho mifanenga hadisoa vatany, laha misy mana antony hitaraina mikasiky ty ilany.” (Kol. 3:13) Hoy ranabavy nana longo voaroaky zay: “Nisy mpiara-manompo niezaky nampahery ahy kanefa vomaiky nampalahelo ahy rozy. Fe nanampy ahy hanenga ty hadisoan-drozy Jehovah.” Ino ty azon’olo amy fiangona eo atao mba hanampea ze olo mana longo voaroaky?

15. Ino ty azontsika atao mba hanampea ani-ze olo mana longo voaroaky vo tsiela?

¹⁵ Miezaha ho soa fanahy noho hifandramby amin’olo mana longo voaroaky. Nisalasala  handeha hivory, ohatsy, ranabavy Miriam lafa nivoaroaky ty anadahiny. Hoy ty asany: “Natahotsy aho hoe ino zao ty raha hovolanin’olo. Fe samby nalahelo niaraky tamiko iaby ty ranadahy noho rahavavy tam-pivoria any. Tsy nisy nivola raha raty mikasiky ani-anadahiko iny koa rozy. Misaotsy an-drozy aho satria tsy nanenga ahy hialy raiky rozy.” Hoy koa ranabavy raiky zay: “Lafa nivoaroaky anakilahinay iny, le niavy mba hampahery anay ty mpiara-manompo. Nivola taminay ty sisany hoe tsy hitan-drozy ty hovolany. Nitany niaraky tamiko ty sisany, le nisy koa nandefa taratasy mampahery. Tena nanampy ahy raha nataon-drozy rey!”

16. Ino ty azoni-fiangona atao mba hampahereza noho hanampea avao ani-ze mana longo voaroaky?

¹⁶ Ampeo avao ze mana longo voaroaky. Henanizao mihintsy rozy ro tena mila fitiava noho fampahereza baka aminao. (Heb. 10:24, 25) Misy amin’olo mana longo voaroaky rey mahatsapa kindraiky hoe lasa tsy miresaky amin-drozy sasy ty olo amy fiangona eo, sahala hoe rozy koa ro voaroaky. Ka engà hiseho mihintsy zay! Tokony hoderàntsika noho hampaherezintsika koa tanora mana baba na reny niala tamy Jehovah rey. Nivoaroaky, ohatsy, ty valini-ranabavy Maria le bakeo nanenga an-drozy. Hoy Maria: “Nisy mpiara-manompo niavy tan-tranonay atoy, le niketriky ho anay rozy sady nianatsy Baiboly niaraky taminay moroanaky. Hain-drozy soa ty raha nampalahelo ahy le nitany niaraky tamiko rozy. Niaro ahy koa rozy lafa nisy olo nivola raha tsy mety mikasiky ahy. Tena nampahery ahy rozy!”​—Rom. 12:13, 15.

17. Ino ty azoni-anti-panahy atao mba hampahereza ani-ze kivy?

¹⁷ Nareo anti-panahy, hararaoto ze fahafaha iaby hitanareo mba hampahereza ani-olo mana longo voaroaky rey. Mana andraikitsy bevata nareo mba hampahery ani-mpiara-manompo rey. (1 Tes. 5:14) Mba hahafahanao mampahery an-drozy, le miresaha amin-drozy aloha noho afarani-fivoria. Vangio an-tranon-drozy any rozy bakeo miaraha mivavaky amin-drozy. Asao hiaraky manompo aminao rozy, na hanao fotoam-pivavahani-fianakavia miaraky aminareo. Tena mila mikarakara ani-ze olo kivy ty anti-panahy sady tokony ho  soa fanahy noho mampiseho fitiava an-drozy.​—1 Tes. 2:7, 8.

18. Laha hentea ty 2 Petera 3:9, tea-Ndranahary hanao ino olo niala aminy rey?

¹⁸ Tsy ‘misy teani-Jehovah ho ripaky ty olo, fa teany mba hibebaky iaby.’ (Vakio 2 Petera 3:9.) Ka ndre mety nanao fahotà bevata aza ty olo raiky, le mbo lafovily amy Ndranahary avao ty ainy. Tiarovo fa nivilini-Jehovah tamy aini-Anakilahiny teany iny tsika kiraidraiky. Be fitiava Jehovah ka miezaky ie manampy ani-azy niala aminy rey. Mitamà ie fa mbo himpoly aminy rozy, manahaky anaky adala tamy fanoharani-Jesosy iny. (Lioka 15:11-32) Maro tamy azy niala rey ro fa nimpoly tamy Baban-drozy be fitiava an-danitsy any iny. Tena nifalifaly rahalahy noho anabavy reo nandramby an-drozy ndraiky. Zay mihintsy ty raha nitsapani-ranabavy Elizabeth azy niresahintsika taloha teroy iny, lafa nivoaramby ndraiky anakilahiny iny. Hoy ty asany: “Tena falifaly aho satria nimaro ty olo nampahery anay mba tsy ho kivy mihintsy.”

19. Manino tsika ro tokony hatòky ani-Jehovah avao?

¹⁹ Afaky matoky ani-Jehovah avao tsika. Hahasoa antsika avao ty torohevitsy ameany. Baba soa fanahy Jehovah sady parè hanampy ani-ze olo tea azy noho manompo azy. Matokisa fa tsy hanenga anao mihintsy Jehovah lafa tojiky raha sarotsy iha. (Heb. 13:5, 6) Hoy Mark azy niresahintsika taloha teroy iny: “Tsy hanenga antsika mihintsy Jehovah. Nanampy antsika avao ie lafa niatriky raha sarotsy tsika.” Hameani-Jehovah “hery fanampiny” avao iha. (2 Kor. 4:7) Afaky tsy hivaliky noho tsy ho kivy mihintsy zany iha ndre miala amy Jehovah ty olo marìny anao.