1-2. a) Laha hentea ty Ohabolana 16:31, manao akory ty tokony ho fahitantsika ty rahalahy noho anabavintsika be tao? b) Ino iaby ty fanontanea hovaleantsika amy lahatsoratsy toy ato?

MISY karaza vato lafovily raiky zay, diamondra ty anarany. Mbo tsy mamiratsy tse ie laha mbo tsy vita tefy sady tsy de maninto maso. Ka laha misy olo mahita azy zany amy ie mbo tsy vita tefy iny, le mety tsy ho ambiny hoe vato lafovily raha iny ka mety handrionany avao.

² Lafovily manahaky diamondra rey koa rahalahy noho anabavintsika be tao reo. Mivola mihintsy aza ty Safà-Ndranahary hoe manahaky satroboninahitsy io volo fotin-drozy rey. (Vakio Ohabolana 16:31; 20:29) Mety tsy ho ambintsika hoe lafovily vatany rozy. Laha ekeni-tanora reo hoe lafovily ty be tao, le hahazo raha tena soa mandilatsy hanana rozy. Retoa misy fanontanea telo hovaleantsika amy lahatsoratsy toy: Manino ro lafovily amy Jehovah ty rahalahy noho anabavy be tao? Manino ro lafovily amy fandaminani-Jehovah rozy? Ino ty azontsika atao laha teantsika ty hiana-draha baka amin-drozy?

3. Laha hentea ty Salamo 92:12-15, manino ro lafovily amy Jehovah ty rahalahy noho anabavy be tao?

³ Tena lafovily amy Jehovah Ndranahary ty rahalahy noho anabavy be tao. Hainy hoe olo manao akory rozy sady teany ty toetsy soan-drozy. Fa maro ty traikefa niazon-drozy tamy fanompoa ani-Jehovah tanatini-tao maro, le falifaly Jehovah lafa zaràn-drozy amy tanora reo raha rey. (Joba 12:12; Ohab. 1:1-4) Lafovily amy Jehovah koa ty fiaretan-drozy. (Mal. 3:16) Niatriky raha sarotsy rozy tamy fiainan-drozy, fe tsy nivaliky tamy Jehovah mihintsy. Fa nihain-drozy tamy rozy vo nianatsy fahamarina hoe ho tanteraky ty raha tamanin-drozy amy hoavy fe vomaiky inoan-drozy ie henanizao. Teani-Jehovah ty  rahalahy noho anabavy be tao satria mbo manohy manambara ty anarany avao rozy “ndre fa foty volo aza.”​—Vakio Salamo 92:12-15.

4. Ino ty raha mety hampahery ani-rahalahy noho anabavintsika be tao reo?

⁴ Laha fa mihaantitsy iha, le matokisa fa tsy halinoni-Jehovah ty raha soa nataonao taloha tany. (Heb. 6:10) Nazoto nanoha ty asa fitoria, ohatsy, iha ka tena falifaly Babantsika an-danitsy any iny. Tsy vitani-zay fa niaritsy raha sarotsy iha. Mety ho tena nampalahelo anao mihintsy ty sisany amy raha rey. Fe ndre zay, le norihinao soa avao ty fitsipiky amy Baiboly ao sady nataonao soa ze asa nampanaovy anao tamy fandaminani-Jehovah eo. Mbo nahavita nampiofana olo hafa koa iha. Maro raha niovaova ty tamy fandaminani-Jehovah eo, fe nanao ze fara herinao iha mba haharaky ani-raha rey. Niezaky iha nanoha noho nampahery ani-ze manao fanompoa amy fotoa iaby. Fa nivola Jehovah hoe “tsy hanenga ani-ze tsy mivaliky aminy.” (Sal. 37:28) Tena teany zany iha satria tsy mivaliky aminy. Mampitamà aza ie hoe: “Ndre zisiky mahafoty volo anareo aza le mbo hanoha anareo avao aho.” (Isaia 46:4) Ka mieritseritsy mihintsy hoe tsy misy dikany amy fandaminani-Jehovah sasy iha satria fa antitsy. Tena lafovily iha!

5. Ino ty tokony hotiarovini-rahalahy noho anabavy be tao?

⁵ Tena ilà amy fandaminani-Jehovah eo ty rahalahy noho anabavy be tao. Marina fa mety nihena ty herin-drozy, fe fa ela niaina rozy ka mana traikefa maro. Mbo afaky mampiasa an-drozy amy raha maro samby hafa Jehovah. Fa nanao ani-zay ie taloha, le mbo manao ani-zay avao koa henanizao. Mampiseho ani-zay ohatsy manaraky retoa.

6-7. Manomeza ohatsy baka amy Baiboly ao mampiseho hoe namaly soa ani-ze be tao tsy nivaliky taminy Jehovah.

⁶ Misy modelin’olo maro tsy nivaliky amy Baiboly ao. Mbo nanompo ani-Jehovah avao rozy ndre fa niha antitsy aza. Fa 80 tao eo ho eo, ohatsy, Mosesy tamy ie nanomboky nanao ty asani-mpaminany noho nivoatingy hitariky ty firenenan’Israely. Le Daniela fa 90 tao mahery lafa nampanaovini-Jehovah ty asani-mpaminany. Ho zay koa apostoly Jaona. Fa  90 tao eo ho eo ie tamy ie nampanoratini-Jehovah ty bokini-Apokalypsy.

⁷ Tsy nanan-kanana ty mpanomponi-Jehovah sisany sady tsy nimaro mpahay ka mety tsy niambin’olo mihintsy. Fe haini-Jehovah rozy ka nameany raha soa satria tsy nivaliky taminy. Ohatsy zao Simeona. Lahilahy “marina noho matahotsy a Ndranahary” ie. Tsy voaresaky loatsy amy Baiboly ao ty mikasiky azy, fe haini-Jehovah soa ie ka nameany tombontsoa hahita ani-Jesosy mbo nikely. Niresaky faminania mikasiky ani-Jesosy noho reniny koa ie. (Lioka 2:22, 25-35) Eritsereto koa Ana mpaminanivavy. Fa maty valy ie sady fa 84 tao, fe “niavy amy tempoly ao tsy tampaky ie.” Nitahy azy Jehovah satria nandeha tsy tampaky tamy tempoly tao ie. Nahazo tombontsoa hahita ty naha kelikely ani-Jesosy. Samby lafovily tamy Jehovah Simeona noho Ana.​—Lioka 2:36-38.

8-9. Ino ty nataoni-ranabavy raiky toy ho ani-fandaminani-Jehovah lafa nimaty valiny?

⁸ Maro rahalahy noho anabavy be tao koa henanizao. Tena modely soa ho ani-tanora rozy satria tsy mivaliky. Eritsereto, ohatsy, ranabavy Loïs Didur. Vo ni-21 tao ie tamy ie nanomboky nanao ty asani-mpisava lala manoka ta Kanadà any. Tafarani-zay, nanao ty asani-faritsy tanatini-tao maro rozy amy John valiny. Bakeo rozy nanompo tamy Betelani-Kanadà any tanatini-20 tao mahery. Lafa ni-58 tao Loïs le nivoatendry ta Ukraine any rozy amy John. Ino ty nataon-drozy? Nieritseritsy va rozy hoe fa antitsy marè ka tsy afaky hifindra an-tany hafa any? Tsy zay. Neken-drozy avao fanendrea an-drozy iny, le nivoatendry Komitini-Sampana John lafa tany. Nimaty John fito tao tafarani-zay, fe nanapa-kevitsy Loïs hoe tsy hiala amy fanendrea azy iny. Fa 81 tao Loïs henanizao. Mbo manohy manompo ani-Jehovah miaraky amy fianakaviani-Betela a Ukraine any avao ie sady tsy mivaliky. Tena tea azy koa moa ty fianakaviani-Betela.

⁹ Mety tsy de voamarikin’olo loatsy ty olo lafa maty valy manahaky ani-Loïs, tsy manahaky tamy valin-drozy mbo nivelo iny. Fe tsy midika zay hoe lasa tsy misy dikany rozy. Vomaiky aza rozy lafovily amy Jehovah, satria nanoha ty valin-drozy rozy tanatini-tao maro. Tsy vitani-zay fa mbo tsy mivaliky rozy henanizao fa mbo manohy manompo azy avao. (1 Tim. 5:3) Ankoatsini-zay, tena mampahery ani-tanora rey koa rozy.

10. Ino ty modely soa nameani-Tony?

¹⁰ Misy rahalahy noho anabavy sisany fa be le fa tsy afaky miboaky baka an-tranony ao na lasa mipetraky amy trano fitezà olo antitsy rey na mipetraky raiky. Tsy mivaliky rozy sady mbo lafovily avao. Raiky amy zay, ohatsy, rahalahy Tony. Natao batisa ta Pennsylvania, a Etazinỳ any ie tamy Oòh 1942. Roampolo tao ie tamy zay. Tafara kelikelini-batisany iny, niforoseva hanao maramila ie. Fe tsy naneky ie farany nigadrà tanatini-roe tao noho tampany.  Manan’anaky roe rozy amy Hilda valiny, le nitezàn-drozy tamy fahamarina ao ajà reo. Lafa nandeha ty fotoa, le nanao ty asani-mpiandraikitsy mpitantan-draharaha * tamy fiangona telo Tony sady niandraikitsy ty fivoriambeni-faritsy. Nitariky fivoria noho fianara Baiboly natao tam-prizon tany koa ie. Fa 98 tao Tony henanizao, fe tsy mieny ie fa mbo manompo ani-Jehovah avao. Manao ze fara heriny ie ka manompo ani-Jehovah miaraky amy rahalahy noho anabavy amy fiangona misy azy eo.

11. Akory ty ampisehoantsika hoe lafovily amintsika be tao mipetraky raiky rey, na azy fa tsy afaky miboaky an-tanony ao rey?

¹¹ Akory ty ampisehoantsika hoe lafovily amintsika be tao mipetraky raiky rey, na azy fa tsy afaky miboaky an-tanony ao rey? Azoni-anti-panahy atao, ohatsy, ty manampy an-drozy mba hahafahan-drozy mandramby anjara amy fandahara ataoni-fiangona, ohatsy hoe manatriky na mijanjy fivoria noho mitory. Atorontsika hoe midary an-drozy tsika laha mamangy an-drozy na mikaiky an-drozy an-telefony. Mila miamby soa tsika tsy no hanalino ani-rahalahy noho anabavintsika be tao rey. Misy be tao avy le miresaky mikasiky azy lafa iresahanao, fa tsy ho zay ty ilany. Fe tena handramby soa tsika laha manoka fotoa hiresaha amin-drozy noho hijanjina an-drozy lafa rozy mitantara ty raha nahafalifaly nihitan-drozy tamy fandaminani-Jehovah eo.

12. Ino ty raha mety ho hitantsika amy fiangonantsika eo?

¹² Mety tsy hampoizintsika hoe misy be tao tena modely soa ty amy fiangonantsika eo. Manahaky ani-zay ohatsy ranabavy Harriette. Nipetraky ta New Jersey, a Etazinỳ any ie. Nanompo ani-Jehovah fa ela ie le tsy nivaliky taminy. Tafara atoy, nifindra tamy anakampelany zay tany ie. Niezaky hahay azy soa ty mpiara-manompo tamy fiangona vaovao iny tany, ka hitan-drozy fa tena lafovily vatany ie. Tena nampahery an-drozy ie lafa nitantaraniny tamin-drozy ty fandehani-fanompoa tan-tonda eny tamin’ie vo nianatsy fahamarina tamy 1925 tany ho any. Saky nitory ie tamy fotoa zay, le tsy maintsy nanday borosinifiny avao satria mety hosambory ie le hogadrà anatini-fotoa vitsivitsy. Fa indroe nigadra ie tamy 1933, le nijano tany tanatini-herinandro. Tsy ni-Vavolombeloni-Jehovah valiny tamy zay, fe nanoha azy avao ka nikarakara soa ani-anan-drozy telo rey. Tena maeva hohajà vatany ty be tao tsy mivaliky manahaky ani-Harriette!

13. Mieritseritsy ani-rahalahy noho anabavy be tao reo ho lafovily ty fandaminani-Jehovah. Ino ty ianarantsika baka amy zay?

¹³ Tena ilà amy fandaminani-Jehovah eo ty rahalahy noho anabavy be tao. Fa nahita raha maro rozy. Nihitan-drozy, ohatsy, ty fomba sankarazany nitahiani-Jehovah an-drozy noho ty fandaminany. Niana-draha baka amy ty raha tsy nety nataon-drozy koa rozy. Rambeso sahala amy “loharanom-pahendrea” rozy ka miezaha hiana-draha baka amin-drozy. (Ohab. 18:4) Laha miezaky hahay soa an-drozy iha, le hihamatanjaky ty finoanao sady ho maro ty raha ho hainao!

14. Mampirisiky ty tanora hanao ino ty Deoteronomia 32:7?

¹⁴ Tsika mihintsy ro mila manao raha voalohany mba hifampiresaha amy rahalahy noho anabavy be tao reo. (Vakio Deoteronomia 32:7.) Marina fa mety fa tsy mahita soa rozy, mandeha moramora, noho miresaky miada, fe mbo ta hanao ze azon-drozy atao avao rozy sady ‘soa laza’ anatrehani-Jehovah eo.  (Mpito. 7:1) Tiarovo hoe manino rozy ro lafovily amy Jehovah. Miezaha hanaja an-drozy avao. Tahafo Elisa. Tsy nety niala ani-Elia mihintsy ie tamy fotoa farany niarahan-drozy. Intelo ie ro nivola tamy Elia hoe: “Tsy hanenga anao aho.”​—2 Mpanj. 2:2, 4, 6.

15. Ino iaby ty raha azontsika anontanea ani-rahalahy noho anabavy be tao reo?

¹⁵ Atorò hoe mahakinto anao ty raha niainani-rahalahy noho anabavy be tao reo, le mametraha fanontanea amin-drozy. Fe miezaha ho soa fanahy lafa manao ani-zay. (Ohab. 1:5; 20:5; 1 Tim. 5:1, 2) Anontaneo, ohatsy, rozy hoe: “Ino ty nahavy anao ho resy lahatsy hoe nahita ty marina iha?” “Ino amy ty raha niainanao ro nanampy anao hifandramby marìny amy Jehovah?” “Ino ty nanampy anao ho falifaly avao amy fanompoa ani-Jehovah?” (1 Tim. 6:6-8) Janjino soa amy zay rozy lafa mitantara ty raha niainan-drozy.

16. Manino ro mahasoa ty be tao noho ty tanora ty mifampiresaky?

¹⁶ Samby mahazo fampahereza ty be tao noho ty tanora lafa mifampiresaky. (Rom. 1:12) Nareo tanora, ohatsy, hahatsapa hoe tena mikarakara ty mpanompony tsy mivaliky Jehovah. Ndre azy be tao iny koa hahatsapa hoe misy mpidary. Ho teany amy zay ty hitantara aminao ty fomba nitahiani-Jehovah azy.

17. Manino tsika ro mivola fa vomaiky soasoa rahalahy noho anabavy be tao reo arakaraky ty fandehani-tao?

¹⁷ Miharaty matetiky ty vatan’olombelo lafa mandeha ty tao, fe tsy ho zay ty fahitani-Jehovah ty olo tsy mivaliky aminy. Vomaiky soasoa aza ty fahitany an-drozy arakaraky ty andehanani-tao. (1 Tes. 1:2, 3) Ino ty antony? Satria tanatini-fotoa rezay, le nengan-drozy hampiofana an-drozy noho hanampy an-drozy hana toetsy soa ty fanahi-Ndranahary. Laha mahay soa ani-rahalahy noho anabavy be tao reo tsika sady miana-draha baka amin-drozy, le vomaiky tsika hanaja an-drozy noho hieritseritsy an-drozy ho lafovily!

18. Ino ty hodinihintsika amy lahatsoratsy manaraky?

¹⁸ Vomaiky hihamatanjaky ty fiangona laha mieritseritsy tsika hoe samby lafovily ty olo ao, ndre be tao zay ndre tanora. Hodinihintsika amy lahatsoratsy manaraky ao hoe ino ty azoni-be tao atao mba hampisehoa hoe lafovily amin-drozy ty tanora anivoni-fiangona eo.