1. Ino ty raha azontsika atao raha kendrè lafa mihabe tsika?

LAFA mihabe tsika, le mety hatahotsy hoe tsy no fa tsy ilàni-Jehovah sasy, tsy manahaky ty taloha. Mety hihena vatany ty herintsika, fe azontsika anampea ani-tanora reo ty fahendrea noho fahaiza ananantsika. Ho azoni-Jehovah ampiasà soa rozy amy zay sady hahavita hiandraikitsy raha maro. Ho zao ty nivolanini-anti-panahy raiky fa ela zay: “Nifalifaly avao aho ndre fa nanomboky nahazohazo tao, satria fa nimaro rahalahy tanora nahafeno fepetra teo afaky hanao ani-asa iny.”

2. Ino ty hodinihintsika amy lahatsoratsy toy ato?

² Niresahini-lahatsoratsy taloha teo iny hoe mandramby soa ty tanora laha miaraky matetiky amy be tao reo. Ho hitantsika amy lahatsoratsy toy ato hoe laha miambany, mahay mankasitraky, noho tea manome ty be tao, le ho moramora amin-drozy ty hiaraky miasa amy ty tanora. Hahasoa ty olo iaby amy fiangona eo raha zay.

3. Laha hentea ty Filipianina 2:3, 4, manao akory miambany zao, le manino raha zay ro manampy?

³ Tokony hiambany ty be tao laha tean-drozy ty hanampy ani-tanora reo. Olo miambany zao mieritseritsy ty olo hafa ho ambony mandilatsy ty vatany. (Vakio Filipianina 2:3, 4.) Laha miambany ty be tao, le ho hainy hoe maro ty fomba fiasa  mifanaraky amy Baiboly azo amità ani-asa nanendrea anao iny. Tsy mitamà zany rozy hoe hitovy iaby ty fomba fiasa ka hanahaky azy nataony taloha iny avao. (Mpito. 7:10) Afaky manampy ty tanora, ohatsy, rozy laha mizara ty raha hain-drozy. Fe hain-drozy koa hoe “miovaova ty sehatsini-tontolo toy” ka mila mianatsy fomba fiasa vaovao rozy​—1 Kor. 7:31.

4. Akory ty ampisehoani-mpiandraikitsini-faritsy hoe mana toe-tsay manahaky ani-Levita rey rozy?

⁴ Mieky ty olo miambany hoe tsy hahavita be manahaky ty taloha sasy ie lafa mihabe. Eritsereto, ohatsy, mpiandraikitsini-faritsy rey. Lafa feno 70 tao rozy, le ampanaovy asa hafa. Mety ho sarotsy amin-drozy raha zay satria tena nitean-drozy ty nanampy ty mpiara-manompo amin-drozy. Tean-drozy ty asani-faritsy ka tena mbo maniry hanao ani-asa io avao rozy. Fe hain-drozy hoe soa marè laha tanora ro manao ani-asa io. Manahaky ani-Levita tamy Israely teo rey rozy. Tsy maintsy nijano tamy fanompoa nataony tamy tranolay masy tao ty Levita lafa nifeno 50 tao. Fe nifalifaly avao rozy ndre ino ino ty asa nanendrea an-drozy. Nihararaotin-drozy ze tombontsoa nananan-drozy, le nanao ze azon-drozy natao rozy mba hanampea ty tanora. (Nom. 8:25, 26) Manahaky ani-zay koa mpiandraikitsini-faritsy rey lafa feno 70 tao. Tsy mitsidiky fiangona maro sasy rozy, fe miezaky rozy manampy noho mampahery ani-ze fiangona anendrea an-drozy.

5. Ino ty ianaranao baka amy Dan noho Katie?

 ⁵ Eritsereto, ohatsy, Dan, mpiandraikitsini-faritsy tanatini-23 tao. Lafa ni-70 tao ie le nitendrè ho mpisava lala manoka rozy amy Katie valiny. Nanao akory rozy lafa nahazo ani-fanendrea vaovao iny? Zao aho, hoasani-Dan vo be atao! Manao ty andraikitsiny amy fiangona misy azy eo ie, manampy rahalahy hahafeno fepetra ho mpanampy amy fanompoa, noho mampiofana mpitory handramby anjara amy fitoria amy pilasy maro olo noho am-prizon any. Ka nareo be tao zany, ndre mpanompo amy fotoa iaby nareo ndre tsy zay, le maro ty raha azonareo atao mba hanampea olo hafa. Amy fomba akory? Anovo ze hahavy anao ho zatsy ani-fiovà iny, mametraha raha kendrè vaovao, le mifantoha amy ze raha azonao atao fa tsy amy raha tsy ho vitanao.

6. Manino ro tena ilà ty fiambanea? Manomeza ohatsy.

⁶ Laha miambany ty olo raiky, le tsy hitaky raha maro amy ty vatany ie fa hifantoky amy ze raha ho vitany. Ino ty vokany? Mbo falifaly avao ie sady mazoto miasa. Azo ampitovizy amin’olo miondra bisiklety amy teteza kelikely io ty olo miambany. Mila mizotso ie mba ho afaky hitsàky ani-vavarano iny. Tsy maintsy mandeha moramora koa ie, fe ndre zay tsy hiala amy lala iny ie fa hanaraky mbeo avao. Mitovy amy zay koa ty olo miambany. Hainy hoe fa mila manao fanovà ie sady tsy hanao vozaky marè, amy zay afaky manompo ani-Jehovah avao noho manampy olo hafa.​—Fil. 4:5.

7. Ino ty mampiseho fa niambany Barzilay?

⁷ Diniho ty tantarani-Barzilay. Fa 80 tao ie tamy Davida Mpanjaka nanendry azy ho anatini-olo mpanoro hevitsy azy. Fe niambany Barzilay ka nandà ani-fanasàni-mpanjaka iny. Hainy hoe fa tsy de hahavita raha sasy ie satria fa mihabè. Nanome soso-kevitsy amy zay ie hoe aleo Kimama ro handeha hisolo azy satria ie mbo tanora. (2 Sam. 19:35-37) Manahaky ani-Barzilay, le falifaly koa ty rahalahy be tao manenga ty tanora hahazo tombontsoa.

8. Akory ty nampisehoani-Davida Mpanjaka hoe niambany ie lafa ta ho namboatsy tempoly ho ani-Jehovah?

⁸ Modely soa koa Davida Mpanjaka satria tena niambany. Naniry mafy hamboatsy trano ho ani-Jehovah ie. Fe lafa nivola taminy Jehovah hoe tsy ie ro hanao ani-asa zay fa Solomona, le naneky ty fanapahan-kevitsini-Jehovah ie. Nanao ze azony natao koa ie mba hanomana ty fitaova hanamboara ani-tempoly iny. (1 Tan. 17:4; 22:5) Tsy nieritseritsy Davida hoe ho soa laha ie ro mamboatsy ani-tempoly iny satria “mbo kelikely noho tanora fanahy” Solomona. (1 Tan. 29:1) Haini-Davida koa hoe tsy mianky amy tao na amy ty fahaizani-ze mitariky ro hahavita soa ani-asa iny, fa mianky amy ty fitahiani-Jehovah. Miasa mafy manahaky ani-Davida koa ty rahalahy noho anabavy be tao henanizao, ndre miova ty fanendrea an-drozy. Hain-drozy koa hoe hitahy ani-tanora manao ani-asa nataon-drozy rey Jehovah.

9. Akory ty nampisehoani-rahalahy raiky anatini-Komitini-Sampana hoe miambany ie?

⁹ Misy olo miambany koa henanizao, le anatini-zay rahalahy Shigeo. Tamy 1976, le nivoatendry Komitini-Sampana ie tamy ie ni-30 tao. Le tamy 2004 ie lasa mpandrindra ty Komitini-Sampana. Fe hitani-Shigeo hoe fa tsy matanjaky manahaky ty taloha ie ka mety tsy hahavita ty andraikitsiny. Nivavaky mikasiky ani-raha iny amy zay ie, sady nieritseritsy hoe ho soa laha rahalahy tanora ro atao mpandrindra  ty Komitini-Sampana. Tsy mpandrindra ty Komitini-Sampana sasy Shigeo henanizao, fe miezaky ie manao ty andraikitsiny amy maha Komitini-Sampana azy. Nihitantsika tamy ohatsini-Barzilay, Davida Mpanjaka, noho Shigeo, hoe laha miambany ty olo raiky, le tsy hifantoky amy ty fahaizani-tanora ie fa hifantoky amy ty tanjaky ananany. Tsy rambesiny ho fahavalony tanora rey fa mpiaraky miasa.​—Ohab. 20:29.

10. Manao akory ty tokony ho fahitani-be tao reo ty tanora amy fiangona eo?

¹⁰ Fanomeza baka amy Jehovah ty fahitani-be tao reo ty tanora ka ankasitrahan-drozy ze raha ataon-drozy. Mihamihena ty hery ananani-be tao, ka lafa misy tanora mbo vory ozatsy parè hamita ty asa amy fiangona eo, le falifaly rozy.

11. Laha hentea ty Rota 4:13-16, ino ty soa ho azoni-be tao laha maneky hampeani-tanora rozy?

¹¹ Miresaky ty tantarani-Naomy ty Baiboly. Fa be tao ie fe tena nahay nankasitraky ka tsy nandà lafa nisy tanora raiky nanampy azy. Lafa nimaty anakilahini-Naomy iny, le nivolaniny Rota vinantovaviny mba himpoly amy fianakaviany any. Fe tsy naneky hanenga azy Rota le niaraky taminy nimpoly a Betlehema any. Nifalifaly Naomy satria niaraky taminy Rota. Naneky koa ie lafa nanampy azy Rota. (Rota 1:7, 8, 18) Tena samby nahazo fitahia rozy roe vavy! (Vakio Rota 4:13-16.) Miezaky manahaky ty modelini-Naomy ty be tao miambany.

12. Akory ty nampisehoani-apostoly Paoly hoe nahay nankasitraky ie?

¹² Nahay nankasitraky apostoly Paoly lafa nisy mpiara-manompo nanampy azy. Nisaotsy ty Kristiana ta Filipia any, ohatsy, ie satria nandefa fanampea ho azy rozy. (Fil. 4:16)  Nankasitrahany Timoty satria nanampy azy. (Fil. 2:19-22) Nisaotsy a Ndranahary koa ie satria nimaro ty Kristiana niavy mba hampahery azy lafa ie nigadrà ta Roma tany. (Asa. 28:15) Olo natanjaky Paoly satria nahavita nandeha kilometatsy maromaro ie mba hitory noho hanatanjaky fiangona maro. Fe niambany ie ka naneky hampeani-rahalahy noho anabaviny rey.

13. Akory ty ampisehoani-rahalahy noho anabavy be tao hoe mankasitraky ty tanora rozy?

¹³ Maro ty fomba azonareo be tao ampisehoa hoe mankasitraky ani-tanora amy fiangona eo reo nareo. Rambeso ze fanampea amean-drozy. Mety misy, ohatsy, manome forè posy, manao bazary, na mikarakara ze raha ilànao. Tiarovo fa fomba raiky ampisehoani-Jehovah ty fitiavany anao ty fanampean-drozy. Tsy ampoizinao fa mety ho lasa tena namanao azy olo manampy anao rey. Ampeo avao namanao rey mba hifandramby soa amy Jehovah, le resaho amin-drozy hoe tena falifaly iha mahita tanora miezaky mafy amy fiangona eo. Manokana fotoa mba hiresahanao amin-drozy ty raha niainanao. Laha manao ani-zay iha, le ‘atoronao fa mahay mankasitraky’ ani-Jehovah iha, satria nitao tanora amy fiangona eo ie.​—Kol. 3:15; Jaona 6:44; 1 Tes. 5:18.

14. Akory ty nampisehoani-Davida Mpanjaka hoe tea manome ie?

¹⁴ Hitantsika amy tantarani-Davida Mpanjaka ty toetsy tena mila ananani-be tao. Tsy ino zay fa tokony ho tea manome rozy. Nanome drala maro noho raha lafovily baka amy ty hananany Davida mba hanohana fanorena ani-tempoly iny. (1 Tan. 22:11-16; 29:3, 4) Nanao ani-zay ie ndre ho kaihy amy anarani-Solomona aza tempoly iny. Laha fa tsy mana hery handrambesa anjara amy fanorena ty tranoni-fandamina tsika, le mbo azontsika atao avao ty manoha ani-tetikasa rey. Afaky manao ani-zay, ohatsy, tsika laha manome ze drala kely ananantsika. Azontsika atao koa ty manampy ty tanora mba handramby soa baka amy traikefa ananantsika.

15. Ino ty fanomeza lafovily nameani-apostoly Paoly ani-Timoty?

¹⁵ Eritsereto koa ty modely soa nananani-apostoly Paoly. Tena nazoto nanome ie. Nitao ani-Timoty, ohatsy, ie mba hanao misionera miaraky aminy. Nasehoni-Paoly fa tea manome ie ka nampianariny ani-Timoty ty fomba fitoriany noho fampianarany. (Asa. 16:1-3) Nanampy ani-Timoty hahita vokatsy amy fanompoa fampiofana nameani-Paoly azy rey. (1 Kor. 4:17) Bakeo nampiasani-Timoty traikefa niazony baka amy Paoly rey mba hampiofana olo hafa.

16. Nanino shigeo ro nampiofana olo hafa?

¹⁶ Tsy matahotsy ty rahalahy noho anabavy be tao henanizao hoe tsy no tsy hana andraikitsy sasy rozy amy fiangona eo laha mampiofana tanora. Diniho ndraiky Shigeo, azy rahalahy niresahintsika taloha teroy iny. An-taony maro ie nampiofana tanora anatini-Komitini-Sampana. Nanao ani-zay ie mba ahafahany manoha ty asani-Fanjakà iny amy tany misy azy eo. Ino ty vokany? Lafa tsy afaky nanao ty asani-mpandrindra ty Komitini-Sampana ie, le fa nisy rahalahy voaofana teo hisolo azy. Fa 45 tao mahery zay ty naha Komitini-Sampana ani-Shigeo, le mbo miezaky avao ie mampiasa ty traikefa ananany mba hanampea olo hafa. Tena manampy ty vahoaki-Ndranahary ty olo manahaky ani-Shigeo!

17. Ino ty azoni-be tao amea ty olo hafa? (Lioka 6:38)

¹⁷ Nareo rahalahy noho anabavy be tao reo ro porofo hoe ty fanompoa ani-Jehovah noho  ty tsy fivaliha aminy ro fomba fiaina farani-ze soa. Hita amy ty modelinareo fa tena mahasoa antsika ty mianatsy ty torolalani-Baiboly noho manoriky ani-raha rey. Hainareo baka amy ty raha niainanareo hoe manao akory ty fomba fiasa taloha, fe hitanareo koa fa mila miezaky nareo mba ho zatsy fomba fiasa vaovao. Ndre vo tsiela ty nanaova batisa anareo, le mbo afaky manampy avao nareo. Azonareo atao, ohatsy, ty mitantara hoe ino iaby ty fifalea niazonareo lafa nahay ani-Jehovah nareo. Ho teani-tanora reo ty hijanjy ty raha niainanareo sady ho tean-drozy koa ty hiana-draha baka aminareo. Laha “zatsy manome” nareo ka mampiasa ty raha hainareo mba hampiofana ty hafa, le tena hitahy anareo Jehovah.​—Vakio Lioka 6:38.

18. Ino ty azoni-be tao noho ty tanora atao mba ahafahan-drozy mifanampy?

¹⁸ Laha mifandramby amy tanora ty be tao, le ho afaky hifanoha nareo. (Rom. 1:12) Samby mana ty raha mampiavaky azy ty kiraidraiky. Mana fahendrea noho traikefa, ohatsy, ty be tao satria fa ela niaina. Fa ty tanora mana hery sady matanjaky. Laha miaraky miasa manahaky mpinama io ty be tao noho ty tanora, le hanome voninahitsy ani-Babantsika be fitiava an-danitsy any iny raha zay. Hahazo fitahia maro koa ty fiangona.