1. Azontsika kaihy hoe inontsika Jehovah?

FIANAKAVIANI-JEHOVAH iaby ze manompo azy, anatini-zay Jesosy, azy “talanolo amy zavaboary iaby” iny, noho ty anjely maro biby an-danitsy any. (Kol. 1:15; Sal. 103:20.) Nampianarini-Jesosy koa tamy ie tan-tany etoy hoe afaky mikaiky ani-Jehovah hoe Baba iaby ze olombelo tsy mivaliky. Lafa niresaky tamy mpanori-dia azy, ohatsy, Jesosy, le nikaiky ani-Jehovah hoe “Babako noho Babanareo.” (Jaona 20:17) Lafa manokam-bata ho ani-Jehovah noho atao batisa koa tsika, le lasa anatini-fianakaviani-rahalahy noho anabavy tea antsika reo.​—Mar. 10:29, 30.

2. Ino ty hodinihintsika amy lahatsoratsy toy ato?

² Sarotsy amin’olo sisany ty hino hoe Babany Jehovah. Ty ilany koa mety tsy mahay mampiseho fitiava amy rahalahy noho anabaviny reo. Fe amy lahatsoratsy toy, hodinihintsika hoe ino ty nataoni-Jesosy mba hanampea antsika hahita hoe Babantsika vatany Jehovah sady afaky mamonjy azy tsika. Ho hitantsika koa hoe akory ty hanahafantsika ani-Jehovah lafa tsika mifandramby amy rahalahy noho anabavintsika reo.

3. Manino vavaky nampianarini-Jesosy iny ro manampy antsika hamonjy ani-Jehovah?

³ Tena tea antsika Jehovah. Baba soa fanahy noho tea anaky ie, hoasani-Jesosy, le afaky miresaky aminy avao tsika ndre ombia ndre ombia. Tsy manahaky olo masiatsiaky noho mibaikobaiko avao rey ie. Teani-Jesosy laha ho zay koa ty fahitantsika ani-Jehovah. Manaporofo ani-zay vavaky nampianariny iny. Zao ty nanombohany azy: “Babanay.” (Mat. 6:9) Afaky nampirisiky antsika hampiasa anaram-boninahitsy hafa Jesosy, ohatsy hoe: “Farany Ze Mahery”, na “Mpamoro”, na “Mpanjakani-zisiky farany.” (Gen. 49:25; Isaia 40:28; 1 Tim. 1:17) Samby amy Soratsy  Masy ao iaby reo, fe “Baba” ro nampirisihini-Jesosy hikaihantsika ani-Jehovah.

4. Akory ty ahaizantsika hoe teani-Jehovah hamonjy azy tsika?

⁴ Sarotsy aminao va ty mino hoe Babanao tena tea anao Jehovah? Laha tsy nisoa fanahy tamintsika ty babantsika niteraky antsika, le mety ho sarotsy amintsika ty hino hoe misy baba raiky tena tea antsika ty any. Fe mampahery fa haini-Jehovah soa hoe ino ty raha tsapantsika le ino ty antony mahavy antsika manao ho zay. Ta hamonjy antsika ie ka mampirisiky antsika amy Safàny ao hoe: “Mamonjea a Ndranahary, le hamonjy anareo ie.” (Jak. 4:8) Tena tea antsika Jehovah. Mivola mihintsy aza ie hoe tsy hahita Baba manahaky azy mihintsy tsika.

5. Laha hentea ty Lioka 10:22, manino Jesosy ro afaky manampy antsika hihariniky ani-Jehovah?

⁵ Afaky manampy antsika hihariniky ani-Jehovah Jesosy. Nahay soa ani-Jehovah ie sady tena nanahaky ty toetsiny ka nivola hoe: “Ze nahita ahy, le nahita ani-Baba koa.” (Jaona 14:9) Mananatsy noho manorotoro ty zainy avao ty zoky. Manahaky ani-zay mihintsy ty ataoni-Jesosy. Ampianariny antsika hoe manao akory ty hanajàntsika ani-Babantsika an-danitsy any iny noho hanorihantsika ty safàny. Atorony antsika koa hoe ino ty hataontsika mba hahafalifaly azy, noho hahazoa hatò aminy. Fe ty tena nataoni-Jesosy, nanampy antsika hahay hoe tena soa fanahy noho tea antsika vatany Jehovah. (Vakio Lioka 10:22.) Ndao tse tsika handiniky ohatsy vitsivitsy mikasiky ani-zay.

6. Akory ty ahaizantsika hoe nijanjy ani-Jesosy avao Jehovah? Manomeza ohatsy.

⁶ Janjinini-Jehovah ty anany lafa mivola. Mba diniho tse moa ty fijanjinany ani-talanolony iny. Tsy maintsy naharè vavaky maro baka amy anakilahiny io ie tamy anakilahiny io tan-tany etoy. (Lioka 5:16) Nireny, ohatsy, ty vavakini-Jesosy lafa Jesosy handramby fanapahan-kevitsy bevata, manahaky tamy ie nifily ani-apostoly 12 rey. (Lioka 6:12, 13) Nireny koa ty vavakini-Jesosy lafa ie niasa loha biby. Talohani-namadihani-Jodasy azy koa Jesosy mbo nivavaky tamy Babany mikasiky ty  raha hahazo azy tsy ho ela. Tsy hoe naharè ani-vavaky iny avao Jehovah fa nandefa anjely mba hampahery ani-anakilahiny teany io.​—Lioka 22:41-44.

7. Ino ty tsapanao lafa mahay hoe mijanjy ty vavakintsika Jehovah?

⁷ Mijanjy ty vavaky ataontsika koa Jehovah henanizao, le amy fotoa tena mety soa ty amaleany azy sady mety tsy hampoizintsika. (Sal. 116:1, 2) Nahita ani-zay mihintsy ranabavy an’Inde any toy. Nisy raha tena nampiasa loha azy marè, le nivavaky tamy Jehovah mikasiky ani-raha iny ie. Hoy ty asany tafara atoy: “Tele JW Mey 2019 iny nanazava hoe ino ty azo atao lafa misy raha mampiasa loha. Tena nanampy ahy raha iny. Valim-bavaky vatany iny.”

8. Ino iaby ty nataoni-Jehovah mba hampisehoa hoe teany Jesosy?

⁸ Tena tea antsika Jehovah sady mikarakara antsika avao. Ho zay mihintsy ty nataony tamy Jesosy tamy ie tan-tany etoy. (Jaona 5:20) Nampeany hana finoa matanjaky avao Jesosy. Nampahereziny ie lafa nikivy. Nataony azo antoky koa hoe nahazo ze raha tena nilàny tamy fiainany ie. Nivolaniny tamy Anakilahiny io koa hoe teany ie sady mahazo hatò aminy. (Mat. 3:16, 17) Tsy nahatiaro nangiky mihintsy Jesosy satria hainy hoe eo avao Babany tena tea azy iny.​—Jaona 8:16.

9. Ino ty manaporofo hoe tea antsika vatany Jehovah?

⁹ Nitsapani-Jesosy hoe tea azy vatany Jehovah. Ndre tsika koa samby mahatsapa ani-zay. Mba diniho tse moa: Nitaomini-Jehovah hamonjy azy tsika. (Jaona 6:44) Nameany rahalahy noho anabavy maro koa tsika. Tena tea antsika rozy sady mampahery antsika lafa tsika kivy. Ameani-Jehovah hany ara-panahy mampatanjaky ty finoantsika koa tsika. Ampeany iaby aza tsika mba hahazo ze raha tena ilàntsika amy fiaina. (Mat. 6:31, 32) Lafa tsika mieritseritsy ty fitiavani-Jehovah antsika le hitombo ty fitiavantsika azy.

10. Manao akory ty fahitani-Jehovah ani-rahalahy noho anabavintsika reo, le ino ty azontsika ianara?

¹⁰ Teani-Jehovah rahalahy noho anabavintsika reo. Fe mety tsy ho mora amintsika ty manao manahaky ani-zay kindraiky. Atao raha tsy vitantsika ty hampiseho hoe teantsika longontsika ara-panahy reo. Tsika koa moa samby nana ty tanà nahabe antsika sady samby mana ty fomba nahazatsy azy. Amin’io tsika samby manao hadisoa iaby le mety hahakamo na hahakivy an-drozy. Fe ndre zay, samby afaky miezaky iaby tsika mba hampitombo ty fifankatiavani-fianakaviantsika ara-panahy io. Akory ty hanaova ani-zay? Afaky manahaky ani-Babantsika iny tsika. Teany rahalahy noho anabavintsika reo, le azontsika tahafy koa raha zay. (Efes. 5:1, 2; 1 Jaona 4:19) Ndao hohenteantsika hoe akory ty azontsika anahafa ani-Jehovah.

11. Akory ty nampisehoani-Jesosy hoe miferinay antsika Jehovah?

¹¹ Tena miferinay antsika Jehovah. (Lioka 1:78) Olo miferinay zao, malahelo lafa mahita olo mijaly bakeo mila hevitsy hanampea noho hampahereza an’olo iny. Laha hentea ty raha nataoni-Jesosy tamin’olo tan-tany etoy le hita hoe tena tea an-drozy vatany Jehovah. (Jaona 5:19) Lafa nahita vahoaky, ohatsy, Jesosy ndraiky andro zay, le “nahaferinay an-drozy satria nampangeny noho naparitaky manahaky aondry tsy misy mpiaraky rozy.” (Mat. 9:36) Tsy hoe nitea an-drozy avao Jesosy fa nanao raha mihintsy ie mba hanampea an-drozy. Nitahàny ze marary le nampeany ze “miasa mafy noho manday enta mavesatsy.”​—Mat. 11:28-30; 14:14.

12. Akory ty azontsika ampisehoa hoe ferinesantsika rahalahy noho anabavintsika reo?

¹² Laha eritseretintsika hoe ino ty raha mahazo ani-rahalahy noho anabavintsika reo, le  ho moramora amintsika ty hiferinay an-drozy. Mety misy anabavy marary mafy ohatsy. Tsy mitaray mihintsy ie fe mety ho tena teany laha mba misy manampy azy. Mbo afaky mikarakara ze raha tena ilàni-fianakaviany va ie? Mety hanampy azy va tsika laha miketriky ho azy na manadio ty tranony? Laha misy rahalahy very asa koa, le mety afaky manome drala kelikely azy tsika soa mba misy hampiasany zisiky hahitany asa. Fe mety tsy hataontsika hainy hoe baka amintsika raha iny.

13-14. Akory ty hampisehoantsika hoe matariky manahaky ani-Jehovah tsika?

¹³ Matariky Jehovah. (Mat. 5:45) Tsy tokony handinisantsika hitaray amintsika rahalahy noho anabavintsika reo vo ho ferinesantsika. Afaky manao raha ho an-drozy tsika ndre mbo tsy mangataky amintsika hanao ani-raha iny aza rozy. Afaky manahaky ani-Jehovah tsika. Tsy mila mangataky ranon’ora aminy, ohatsy, tsika fa ameany avao! Mahasoa ty olo iaby mihintsy ranon’ora rey, fa tsy ze olo mahay mankasitraky avao. Ameany antsika ze raha tena ilàntsika. Tsy hitanao va hoe tena tea antsika vatany Jehovah? Ndre tsika koa tena tea azy satria ie soa fanahy sady matariky.

¹⁴ Matariky manahaky ani-Jehovah koa rahalahy noho anabavintsika reo. Tamy 2013, ohatsy, nisy sikilony Haiyan zay, nandravarava raha maro ta Philippines tany. Tena nahery sikilony io ka nandrava tranoni-mpiara-manompo maro. Lasa any iaby ty hananan-drozy. Fe tsiela avao le nanampy an-drozy ty longon-drozy ara-panahy amy tany toy iaby. Ao ty nanome drala, ao koa ty nandramby anjara be tamy fanorena. Tsy ampy tao raiky rozy le nahavita nanamboatsy trano simba noho nananga trano fa ho 750! Niparitaky amy tany toy iaby koa ty arety COVID-19, fe niasa mafy ty Vavolombeloni-Jehovah nanampy ty rahalahy noho anabavin-drozy. Lafa tsika avy le manampy ani-rahalahy noho anabavintsika reo malaky, le mampitoro an-drozy tsika amy zay hoe teantsika rozy.

15-16. Ino hoasani-Lioka 6:36 ty tokony hataontsika laha teantsika ty hanahaky ani-Babantsika an-danitsy any iny?

¹⁵ Mamindra fo noho manenga hadisoa Jehovah. (Vakio Lioka 6:36.) Manenga ty  hadisoantsika avao Babantsika an-danitsy any iny sanandro. (Sal. 103:10-14) Tsy lavorary ty mpanori-dia ani-Jesosy fe namindrany fo avao sady nengany ty hadisoan-drozy. Nataony soro mihintsy aza ty ainy mba hanafaha ty fahotan-drozy noho ty ahintsika koa. (1 Jaona 2:1, 2) Mamindra fo noho manenga hadisoa vatany Jehovah noho Jesosy. Tsy maninto anao hamonjy an-drozy va raha zay?

¹⁶ Lafa mifanenga hadisoa tsika le vomaiky mifankatea. (Efes. 4:32) Tsy mora aloha ty manenga hadisoa kindraiky, fe mila miezaky tsika. Nisy anabavy raiky zay nivola hoe tena nanampy azy ty lahatsoratsy hoe “Aoka Isika Hifamela Heloka Tanteraka” tamy Tilikambo Fiambena. * Hoy ty asany: “Nihitako tamy lahatsoratsy iny hoe tena manampy ahy ty manenga hadisoa. Resahiny ao hoe manenga hadisoa zao, tsy midika hoe tsy naharary anao raha nataony iny na lasa ataonao hoe soa. Fa lafa manenga hadisoa iha, le tsy meloky amin’olo iny sasy bakeo lasa falifaly ndraiky.” Lafa tsika manenga ty hadisoani-rahalahy noho anabavintsika reo le hita hoe tea an-drozy sady manahaky ani-Jehovah, azy Babantsika iny.

17. Laha hentea ty Matio 5:16, ino ty azontsika atao mba hanomeza voninahitsy ani-Babantsika an-danitsy any iny?

¹⁷ Tena falifaly tsika fa mana longo tena tea antsika amy tany toy iaby. Teantsika hitombo avao ty olo miaraky amintsika manompo ani-Jehovah. Ka ino zany ty tokony hataontsika? Mila miamby soa tsika tsy no ty raha ataontsika ro hahavy ty olo hieritseritsy raha raty mikasiky ani-Jehovah noho ty vahoakiny. Miezaky ho soa fandaisam-bata avao tsika mba ho voatariky hianatsy mikasiky ani-Jehovah noho hanompo azy ty olo.​—Vakio Matio 5:16.

18. Ino ty hanampy antsika hahasaky hitory?

¹⁸ Lafa tsika manoriky ty safàni-Babantsika an-danitsy any iny, le mety hikinokino antsika ty olo na hanenjiky antsika mihintsy. Ino amy zay ty tokony hataontsika laha matahotsy hiresaky mikasiky ty finoantsika tsika? Afaky matoky tsika hoe hanampy antsika avao Jehovah  noho Anakilahiny iny. Fa nivola tamy mpianatsiny rey Jesosy hoe ka atao mampiasa loha anareo hoe ino ty hovolaninay na akory ty ho fivolananay azy. Ino ty antony? Hoy Jesosy: “Hamea anareo amy fotoa zay ze raha hovolaninareo, satria tsy nareo avao ro mivola fa ty fanahini-Babanareo ro mivola amy alalanareo.”​—Mat. 10:19, 20.

19. Miresaha ohatsin’olo nahasaky nitory.

¹⁹ Diniho tse tantarani-Robert toy. Vo nianatsy Baiboly ie tamy zay, le mbo kelikely avao ty raha nihainy tamy Baiboly ao. Fe tsy maintsy niakatsy tribinaly ie le nanazava tamy mpitsara an’Afriky Antimo any zay hoe tsy hanao maramila. Tsy natahotsy mihintsy ie niresaky tamy tribinaly tao hoe tsy poro ty atia na ty aroa ie satria teany ty rahalahiny finoa raiky aminy. Teany vatany longony ara-panahy reo! “Ka ia rahalahinao rezao?” hoasani-mpitsara iny. Nitampoky ani-Robert fanontanea iny, fe nitiarony tampoky ty teny vakina tamy andro iny. Matio 12:50 ty andinin-teny ho ani-andro tamy zay hoe: “Ndre ia ndre ia manao ty sitraponi-Babako an-danitsy any iny, le ie ro rahalahiko noho anabaviko voho reniko.” Mbo nisy fanontanea maro hafa nitampoky azy koa fe nivoavaliny iaby. Vo nianatsy Baiboly vo tsiela Robert fe nanampy azy ty fanahini-Jehovah ka nivoavaliny fanontanea rey. Mana vatany Jehovah mana azy! Tena falifaly Jehovah lafa tsika miantehitsy aminy mba hanampy antsika hahasaky hitory ndre anatini-fotoa sarotsy.

20. Tokony ho tapa-kevitsy hanao ino tsika? (Jaona 17:11, 15)

²⁰ Manao mahavelo bevata tsika satria anatini-fianakavia raiky tena tea antsika. Tsy misy manahaky ani-Babantsika iny. Falifaly koa tsika fa mana rahalahy noho anabavy maro tena tea antsika. Tena tokony hahay hankasitraky tsika. Ataoni-Satana noho olo raty manaraky azy rey ze hahavy antsika hisalasala hoe tea antsika vatany va Babantsika an-danitsy any iny sa tsy tea antsika. Miezaky koa rozy mandrava ty filongoantsika. Fe nivavaky ho antsika Jesosy. Nangataky tamy Babantsika iny ie mba hiaro antsika amy zay hiharo raiky avao tsika. (Vakio Jaona 17:11, 15.) Namaly ani-vavaky zay Jehovah. Soa tsika laha manahaky ani-Jesosy ka tsy misalasala mihintsy hoe tea antsika Babantsika an-danitsy any iny sady hanampy antsika avao. Tokony ho tapa-kevitsy hihariniky ani-longontsika ara-panahy rey avao tsika.