1. Mahavy anao hahatsapa ino ty fitiava-Ndranahary?

“FITIAVA Ndranahary” hoasani-apostoly Jaona. (1 Jaona 4:8) Tsotra raha nivolaniny io fe mampitiaro antsika ani-fahamarina bevata toy: Baka amy Ndranahary ty ay, le mbo baka aminy avao koa ty fitiava. Tea antsika Jehovah! Fitiavany io amy zay mahavy antsika ho voaaro, ho sambatsy, noho ho afa-po.

2. Laha hentea ty Matio 22:37-40, ino ty didy roe farani-bevata, le manino ro sarotsy amintsika ty manoriky azy faharoe iny?

² Vakio Matio 22:37-40. Raha tsy maintsy ataoni-Kristiana ty hoe mampiseho fitiava. Tsy safidy io fa didy. Laha mahay soa ani-Jehovah tsika, le mety tsy ho sarotsy amintsika ty manoriky ani-didy voalohany iny. Jehovah koa moa lavorary, le mikarakara antsika ie sady soa fanahy amintsika. Fe mety ho sarotsy amintsika ty manoriky ani-didy faharoe iny. Ino ty mahavy ani-zay? Tsy lavorary namantsika volanini-Baiboly eo io, anatini-zay ty rahalahy noho anabavintsika. Kindraiky aza rozy mety hahavola na hanao raha mampalahelo antsika. Haini-Jehovah hoe tsy ho mora amintsika ty hanoriky didy io. Farany nampanoratsy torohevitsy voafaritsy soa amy Baiboly ao ie, mba hampianara antsika hoe manino tsika ro tokony hampiseho fitiava le amy fomba akory ty hanaova ani-raha zay. Raiky amy mpanoratsy zay zao Jaona.—1 Jaona 3:11, 12.

3. Ino ty nivolanini-Jaona mikasiky fitiava?

³ Nampolimpolini-Jaona matetiky hoe mila mifankatea ty Kristiana. Ndre tamy ie nanoratsy ty tantarani-Jesosy aza nampiasa  ty safà hoe “fitiava” na “tea”, imaro mandilatsy ty ahini-mpanoratsy Filazantsara telo rey mitambatsy. Mety ho zato tao teo ho eo ie tamy ie nanoratsy ty Filazantsarani-Jaona miaraky amy taratasiny telo hafa. Atoroni-taratasy baka amy fanahy masy nisoratiny reo hoe tokony ho fitiava ro hanosiky antsika hanao ze kila raha ataontsika. (1 Jaona 4:10, 11) Fe ndre Jaona aza elaela tafara atoy vo nahay ani-zay.

4. Nahay nampiseho fitiava avao va Jaona tamy androm-piainany?

⁴ Tsy de nahay nampiseho fitiava Jaona tamin’ie mbo nimpamaraky. Ndraiky andro, ohatsy, Jesosy noho mpianatsiny rey ho a Jerosalema any le nandalo mba Samaria. Tsy nandramby soa an-drozy ty olo nipetraky tamy tanà sisany ta Samaria tao. Ino ty nataoni-Jaona? Niera tamy Jesosy ie fa ta hampilatsaky afo baka an-danitsy any handripaha ty olo tamy tanà io! (Lioka 9:52-56) Nisy fotoa koa Jaona tsy nampiseho fitiava tamy apostoly namany rey. Naniraky ani-renin-drozy rozy amy Jakoba mba hangataky amy Jesosy soa hanome pilasy anabo an-drozy lafa amy Fanjakàny ao. Neloky biby apostoly sisany rey lafa nahay ty raha nataoni-Jakoba noho Jaona! (Mat. 20:20, 21, 24) Fe ndre teo hadisoani-Jaona rezay, le mbo nitea azy avao Jesosy.​—Jaona 21:7.

5. Ino ty hodinihintsika amy lahatsoratsy toy ato?

⁵ Amy lahatsoratsy toy ato tsika handiniky ty modelini-Jaona noho ty raha sisany nisoratiny mikasiky fitiava. Ho haintsika amy zay hoe ino ty raha azontsika atao mba hampisehoa fitiava amy rahalahy noho anabavintsika reo. Ho hitantsika koa hoe ino ty azoni-loham-pianakavia atao mba hampisehoany hoe teany ty fianakaviany.

6. Ino ty nataoni-Jehovah mba hampisehoany hoe teany tsika?

⁶ Matetiky tsika mieritseritsy hoe tea olo lafa mivola raha soa mikasiky an-drozy. Kanefa tsy ampy zay, fa laha tena tea an-drozy tsika le mila manao raha soa ho an-drozy koa. (Ampitovizo amy Jakoba 2:17, 26.) Tea antsika, ohatsy, Jehovah. (1 Jaona 4:19) Nampiasa safà soasoa ie mba hivolanany ani-zay amintsika amy Baiboly ao. (Sal. 25:10; Rom. 8:38, 39) Fe tsy tamy raha nivolaniny rey avao ro ahaizantsika ani-zay, fa amy ty raha ataony koa. Zao ty nisoratini-Jaona: “Ho zao ty nampisehoa ty fitiava-Ndranahary antsika: Nirahiny ho amy zao tontolo zao ty Anakilahiny toka mba ho baka aminy ro hahazoantsika fiaina.” (1 Jaona 4:9) Nengani-Jehovah hijaly  noho ho maty ho antsika Anakilahiny teany iny. (Jaona 3:16) Le mbo hisalasala va tsika hoe tea antsika vatany Jehovah?

7. Ino ty nataoni-Jesosy mba hampisehoany hoe teany tsika?

⁷ Nivola tamy mpianatsiny rey Jesosy hoe teany rozy. (Jaona 13:1; 15:15) Natorony hoe samby teany biby ndre mpianatsiny taloha rey ndre tsika. Tsy nivolanini-Jesosy am-bava avao raha zay fa nasehony tamy ty raha nataony koa. Hoy ty asany: “Tsy misy mana fitiava bevata mandilatsy ani-zao, le ty mahafoy ty ainy ho ahi-ty namany.” (Jaona 15:13) Ka voatosiky hanao ino zany tsika lafa mandiniky ty raha nataoni-Jehovah noho Jesosy ho antsika?

8. Ino ty tokony hataontsika laha hentea ty 1 Jaona 3:18?

⁸ Tea ani-Jehovah noho Jesosy tsika laha manoriky ty raha volanin-drozy. (Jaona 14:15; 1 Jaona 5:3) Nandidy antsika hifankatea, ohatsy, Jesosy. (Jaona 13:34, 35) Tokony ho teantsika zany rahalahy noho anabavintsika reo, fe tsy amy safà avao ty anaovantsika ani-zay fa atorontsika amy ty raha ataontsika koa. (Vakio 1 Jaona 3:18.) Ino ty raha sisany azontsika atao mba hampisehoa hoe teantsika rozy?

9. Nandrisiky ani-Jaona hanao ino ty fitiava?

⁹ Azoni-Jaona natao ty niaraky tamy babany avao, le namono fo nihaza amy zay mahazo drala be. Fe naleony nampiasa ty fiainany mba hanampea olo hahay ani-Jehovah noho Jesosy. Tsy nanamora ty fiainani-Jaona aloha fanapahan-kevitsiny io. Niaritsy fanenjeha avao ie, le natao sesitany koa ie tamy faramparani-taonjato voalohany, kanefa fa antitsy. Ty fitoriany mikasiky ani-Jesosy ro nahavy ani-zay. (Asa. 3:1; 4:1-3; 5:18; Apok. 1:9) Fe ndre nigadra aza Jaona, le mbo natorony avao hoe tea olo ie. Nanoratsy ty bokini-Apokalypsy, ohatsy, ie tamin’ie nigadrà tamy nosy Patmo tany, le bakeo nandefa ani-raha iny tamy fiangona mba hahaizan-drozy hoe ino “ty raha hiseho tsy ho ela.” (Apok. 1:1) Mety ho tafara kelikelini-namotora azy vasa Jaona vo nanoratsy ty Filazantsarany mitantara ty fiainani-Jesosy noho ty fanompoany. Nanoratsy taratasy telo koa ie mba hampahereza ty mpiara-manompo taminy. Akory ty hanahafanao ty raha nataoni-Jaona?

10. Akory ty hampisehoanao hoe tea olo iha?

¹⁰ Afaky atoronao amy ty fanapahan-kevitsy ataonao koa hoe tea olo iha. Teani-tontoloni-Satana toy laha ty vatanao avao ro eritseretinao. Teany iha hampiasa ty fotoanao noho ty herinao ho anao am-batanao avao, hamory drala, na ho lasa olo malaza. Tsy ho zay ty Kristiana. Mahafoy ty vatan-drozy rozy ka manoka fotoa maro mba hitoria ty vaovao soa noho hanampea olo hifandramby amy Jehovah. Ty sisany aza mitory noho mampianatsy amy fotoa iaby mihintsy.

11. Akory ty ampisehoani-mpitory reo hoe tea ani-Jehovah noho ty mpiara-manompo amin-drozy rozy?

¹¹ Maro ty Kristiana tsy maintsy miasa marain-tsy hariva mba hahafahan-drozy mahazo ze raha ilàn-drozy noho ty fianakavian-drozy. Fe tsy mivaliky mpitory reo ka manao ze azon-drozy atao mba hanohana ty fandamina-Ndranahary. Manome drala, ohatsy, rozy mba hanohana ty asani-fandamina amy tany toy iaby. Ao koa ty manampy tra-boina na mandramby anjara amy fanorena. Fa manino rozy ro manao ani-raha reo? Satria tea a Ndranahary noho ty olo hafa rozy. Atorontsika avao sankerinandro hoe teantsika ty rahalahy noho anabavintsika, ka mivory tsika sady mandramby anjara lafa any. Mandeha mivory  avao tsika ndre vozaky aza. Mamaly teny avao koa tsika ndre matahotsy. Ndre mana ty raha manahira antsika aza tsika, le mbo mampahery olo avao ndre aloha ndre afarani-fivoria. (Heb. 10:24, 25) Tsy falifaly va tsika amy raha ataoni-rahalahy noho anabavintsika reo zay?

12. Ino koa ty nataoni-Jaona mba hampisehoany hoe teany ty rahalahy noho anabaviny?

¹² Natoroni-Jaona hoe teany ty rahalahy noho anabaviny, le tsy hoe nidera an-drozy avao ie fa nanome torohevitsy an-drozy koa. Nidera ty mpiara-manompo taminy, ohatsy, ie amy taratasiny rey ao satria nanam-pinoa noho nanao asa soa rozy. Fe nanome an-drozy torohevitsy mivanta mikasiky fahotà koa ie. (1 Jaona 1:8–2:1, 13, 14) Mila midera ty rahalahy noho anabavintsika koa tsika amy ty raha soa ataon-drozy. Fe laha manaly ta hana toe-tsay raty na fahazara raty olo iny, le atorontsika hoe teantsika ie laha volanintsika moramora aminy ty raha mila ataony. Tsy mora aloha ty manome torohevitsy nama, fe mivola ty Baiboly hoe mifanoro hevitsy ty olo tena mpinama.​—Ohab. 27:17.

13. Ino ty raha tsy tokony hataontsika?

¹³ Mbo afaky mampiseho fitiava amy ty rahalahy noho anabavintsika avao tsika ndre amy ty raha tsy ataontsika. Tsy mora meloky amy ty raha volanin-drozy, ohatsy, tsika. Eritsereto moa raha niseho taloha kelikelini-hahafaty ani-Jesosy toy. Nivola tamy mpianatsiny rey ie hoe tsy maintsy mihina ty nofotsiny noho mino ty liony rozy laha tean-drozy ty hiay zisiky farany. (Jaona 6:53-57) Maro tamy mpianatsini-Jesosy rey ro neloky lafa naharè ani-raha nivolaniny io ka niala azy. Fe tsy nanao ho zay azy tena namany rey, anatini-zay Jaona. Niaraky taminy avao rozy. Ndre rozy koa tsy nahazo ani-raha nivolanini-Jesosy iny. Mety nitseriky rozy fe tsy niakenjy. Tsy nieritseritsy rozy hoe raty raha nivolaniny io. Natoky ani-Jesosy rozy satria hain-drozy hoe mivola ty marina ie. (Jaona 6:60, 66-69) Tena fianara bevata ho antsika zay! Tsy tokony ho mora meloky tsika lafa misy raha volanini-mpiara-manompo. Tokony hengantsika rozy hanazava ty tean-drozy hovolany.​—Ohab. 18:13; Mpito. 7:9.

14. Manino tsika ro tsy tokony halay ty rahalahy noho anabavintsika mihintsy?

¹⁴ Nanoro hevitsy antsika koa Jaona mba tsy halay ty rahalahy noho anabavintsika. Laha tsy orihintsika zay, le sahala manenga ani-Satana hikomandy antsika tsika. (1 Jaona 2: 11; 3:15) Fa niseho raha zay tamy faramparani-taonjato voalohany. Nataoni-Satana ze hahavy ty mpanompo-Ndranahary hifankalay noho hisaratsaraky. Nisy lahilahy nanao raha ho zay koa nilitsy tamy fiangona eo tamy fotoa nanoratani-Jaona ani-taratasiny rey. Raiky amy zay, ohatsy, Diotrefa. Nataony ze hampisaratsaraky ani-fiangona raiky zay. (3 Jaona 9, 10) Tsy nihajàny ty mpiandraikitsy mpitety faritany nalefani-filan-kevi-pitantana. Niroasiny tsy ho amy fiangona ao mihintsy aza ze olo mifandramby amin’olo halany rey. Avonavo zao! Mbo ataoni-Satana avao ze hahavy ty mpanompo-Ndranahary hisaratsaraky noho tsy hifanampy henanizao. Loniky lahy tsika hifanampy avao fa tsy hifankalay.

15. Ino ty raha tokony hotiarovini-loham-pianakavia?

¹⁵ Tsy maintsy manome ze raha ilàni-fianakaviany ty loham-pianakavia laha tea an-drozy. (1 Tim. 5:8) Fe tokony hotiaroviny hoe mbo misy raha bevata mandilatsy ani-zay. Tsy maintsy ampeany hifandramby soa amy Jehovah ty fianakaviany. (Mat. 5:3) Nanome modely ho ahi-ty loham-pianakavia Jesosy. Mivola, ohatsy, ty Filazantsarani-Jaona fa ndre nihanto tamy hazo fijalea teo Jesosy, le mbo nieritseritsy ty fianakaviany avao. Tamy pilasy namonoa ani-Jesosy teo Maria reniny tamy zay, le nitsanga tanilany teo Jaona. Ndre fa nijalijaly aza Jesosy, le mbo niangavy ani-Jaona mba hikarakara ani-Maria reniny. (Jaona 19:26, 27) Azo antoky hoe afaky nanome ze raha ilàni-Maria troky raiky amy Jesosy rey. Fe atao raha mbo tsy nisy nanori-dia azy rozy tamy fotoa zay. Teani-Jesosy ho azo antoky zany hoe hisy olo hanome ze raha tena ilàni-Maria noho hanampy azy tsy hiala amy Jehovah mihintsy.

16. Ino iaby ty andraikitsini-Jaona?

¹⁶ Nana andraikitsy bevata maro Jaona. Apostoly ie ka tsy maintsy nitariky ty asa fitoria. Mety nanambaly koa ie ka tsy maintsy nandanjalanja, amy zay ie afaky mikarakara ze raha ilàni-fianakaviany sady manampy an-drozy hifandramby soa amy Jehovah avao. (1 Kor. 9:5) Ino ty azoni-loham-pianakavia ianara baka aminy?

17. Akory ty ampisehoani-loham-pianakavia hoe teany ty fianakaviany?

¹⁷ Mety hana andraikitsy maro ty loham-pianakavia kristiana. Tsy maintsy manao soa ty  asany zao ie lafa am-piasàny any, amy zay mahazo voninahitsy Jehovah. (Efes. 6:5, 6; Tit. 2:9, 10) Mety ho anti-panahy na mpanampy amy fanompoa koa ie, ka mila mampahery noho mikarakara ty rahalahy noho anabavy sady mitariky andia-mpitory. Kanefa tsy maintsy mbo mianatsy Baiboly tsy tampaky miaraky amy valy amin’anany ie. Tena hankasitraky azy rozy satria miezaky ie mikarakara an-drozy sady manampy an-drozy hanompo ani-Jehovah avao.​—Efes. 5:28, 29; 6:4.

18. Ino ty raha natokisani-Jaona?

¹⁸ Niela velo Jaona sady maro ty raha niainany. Niatriky raha sarotsy sankarazany mety ho nampalemy ty finoany ie. Fe nanao ze azony natao avao ie mba hanoriha ty didini-Jesosy, anatini-zay ty fitiava ani-rahalahy noho anabaviny rey. Ino ty vokany? Natoky Jaona hoe tea azy Jehovah noho Jesosy, ka hanome hery azy mba hahafahany miaritsy ze raha sarotsy mety hahazo azy. (Jaona 14:15-17; 15:9, 10; 1 Jaona 4:16) Tsy nivitani-Satana noho tontolony toy ty nanaka ani-Jaona tsy ho tea ty rahalahy noho anabaviny, ndre tamy raha nivolaniny ndre tamy raha nataony.

19. Mampirisiky antsika hanao ino ty 1 Jaona 4:7, le ino ty antony?

¹⁹ Mbo manahaky tamy androni-Jaona avao koa tontolo misy antsika toy, zany hoe ambany fahefàni-Satana azy malay olo iny. (1 Jaona 3:1, 10) Teany halay ani-rahalahy noho anabavintsika reo tsika. Fe tsy ho vitany zay laha tsy engantsika hanao ani-zay ie. Loniky tsika ho tapa-kevitsy ho tea ani-rahalahy noho anabavintsika reo avao, sady hampiseho ani-raha zay amy ty raha volanintsika noho ataontsika. Laha manao ani-zay tsika, le hahatiaro sambatsy noho ho falifaly satria anatini-fianakaviani-Jehovah.​—Vakio 1 Jaona 4:7.