1. Manahaky ani-Davida Mpanjaka, ino ty fanontanea mety hoeritseretini-sisany amintsika?

SAMBY ta hiada noho hana fiaina milamy iaby tsika. Tsy misy ta hiasa loha zao. Fe mety hiasa loha marè avao tsika kindraiky, ka mety ho lasa say manahaky ani-Davida Mpanjaka. Nanontany ani-Jehovah ie hoe: “Zisiky ombia aho ro hiasa loha, ka halahelo avao ty foko sanandro?”​—Sal. 13:2.

2. Ino ty hodinihintsika amy lahatsoratsy toy ato?

² Mety hiasa loha iaby tsika kindraiky, fe misy raha azontsika atao mba hampihenà ani-raha zay. Amy lahatsoratsy toy ato tsika, handiniky raha sisany mety hahavy antsika hiasa loha. Bakeo tsika hanenty raha eny azontsika atao mba hanampy antsika ho kalma avao lafa misy raha manahira.

3. Ino iaby ty raha mety hampiasa loha antsika, le ho vitantsika va ty manaka ani-raha reo?

³ Maro ty raha mety hampiasa loha antsika. Tsy azontsika sakana tsy hiseho ty sisany amy raha rey. Ohatsy zao ty vilin-draha, manahaky hany, siky, na hofan-trano. Mihamisondrotsy avao raha reo, fe tsy afaky manaka ani-zay tsika. Ho zay koa ty fakam-panahy. Mitao antsika tsy hanao ty marina noho haloto fandaisam-bata avao ty mpiaraky miasa na ty mpiaraky mianatsy amintsika. Tsy maintsy hisy avao zay. Tsy afaky mampieny ty hasatà ataon’olo amy faritsy misy antsika eny koa tsika. Manino tsika ro miatriky ani-raha manahira reo? Satria tsy mifanaraky amy torolalani-Baiboly ty raha ataon’ ankamaroan’olo amy tontolo toy. Ankoatsini-zay, Satana ro ndranaharini-tontolo toy, le teany tsika laha miasa loha marè amy raha “amy tontolo toy eto” soa tsy hanompo ani-Jehovah. (Mat. 13:22; 1 Jaona 5:19) Tsy mahatseriky laha atsiky raha mampiasa loha ty amy tontolo toy eto!

4. Mety hanao akory tsika lafa tratsini-raha manahira?

⁴ Mety hiasa loha marè tsika lafa tsy hitantsika hoe ino ty hatao amy raha reo. Mety hieritseritsy, ohatsy, tsika hoe: Manao akory laha tsy ampy hivilia ze raha tena ilàko ty dralako? Ka laha marary aho ka tsy ho afaky hiasa na ho very asa mihintsy? Tena tsy hivaliky va aho laha tojiky fakam-panahy? Tsy ho ela le hampirisihini-Satana hanafiky antsika ty olo ambany fahefàny, ka mety hiasa loha tsika hoe hanao akory amy fotoa zay. Mety hanao ho zao amy zay tsika hoe: ‘Ka tsy mety va zany laha miasa loha mikasiky ani-raha reo tena?’

5. Ino ty teani-Jesosy hovolany amy hoe “ka miasa loha sasy”?

⁵ Haintsika fa nivola tamy mpanori-dia azy Jesosy hoe: “Ka miasa loha sasy.” (Mat. 6:25) Ta hivola va zany ie hoe tsy tokony hiasa loha mihintsy tsika? Tsy zay! Tiarovo hoe niasa loha koa ty mpanomponi-Jehovah sisany tsy nivaliky taloha. Fe mbo nahazo hatò tamy Jehovah avao rozy. * (1 Mpanj. 19:4; Sal. 6:3) Nampahery antsika Jesosy. Tsy teany hiasa loha marè amy ty raha ilàntsika amy fiaina tsika, satria hisy vokany raty amy fanompoantsika a Ndranahary raha zay. Ka ino zany ty azontsika atao lafa tsika miasa loha?​—Henteo ty efajoro hoe “ Akory ty Hanaova Azy?”

6. Laha hentea ty Filipianina 4:6, 7, ino ty afaky manampy antsika hilamin-tsay?

⁶ 1) Mivavaha matetiky. Afaky hahatiaro maivaiva ty Kristiana raiky ndre miasa loha aza, lafa miantehitsy amy Jehovah amy vavaky. (1 Pet. 5:7) Hamaly ty vavaky ataonao Jehovah, ka hanome anao “ty fiadana-Ndranahary, azy bevata marè mandilatsy ty eritseritsy iaby iny.” (Vakio Filipianina 4:6, 7.) Hampiasa ty herini-fanahiny masy Jehovah mba hanampea anao hilamin-tsay.​—Gal. 5:22.

7. Ino ty tokony hotiarovintsika lafa mivavaky amy Ndranahary?

⁷ Lafa iha mivavaky amy Jehovah, le aboraho aminy iaby ze am-ponao ao. Mivolana raha voafaritsy soa. Resaho aminy hoe ino raha manahira anao io, le ambarao azy ty raha tsapanao. Laha hitanao hoe mety hisy vahaolana avao raha iny fe tsy hainao hoe ino ty hatao, le mangataha fahendrea baka amy Jehovah mba hahaizanao ze tokony hatao. Mangataha hery koa mba hahafahanao manatanteraky ani-zay. Laha tsy misy azo atao, le angataho Jehovah mba hanampy anao tsy hiasa loha marè mikasiky ani-raha iny. Laha voafaritsy soa ty vavaky ataonao, le ho hitanao hoe akory ty namaleani-Jehovah ani-raha iny. Ka kivy laha tsy avy le mivaly ty vavakinao. Tsy hoe mila manao vavaky voafaritsy soa avao iha fa teani-Jehovah koa laha misisiky.​—Lioka 11:8-10.

8. Ino koa ty tokony hampilirintsika amy vavaky ataontsika?

⁸ Lafa iha mametraky ty raha manahira anao amy Jehovah, le miezaha koa hisaotsy azy. Soa tsika laha mitiaro ty raha soa iaby ananantsika, ndre sarotsy marè aza ty raha mahazo antsika. Ka manao akory  laha tsy hitanao ty fomba hivolananao ty fihetseham-ponao amy Jehovah? Tiarovo hoe hamaly ty vavaky ataonao Jehovah, ndre zao avao aza ty raha volaninao: ‘Mba ampeo lahy aho!’​—2 Tan. 18:31; Rom. 8:26.

9. Ino ty tokony hataontsika lafa tsika matahotsy?

⁹ 2) Miantehera amy fahendreani-Jehovah fa ka miantehitsy amy ty vatanao. Tamy taonjato fahavalo T.K., le natahotsy hotafihini-Asyrianina reo ty vahoakini-Joda. Tsy ta ho resini-Asyrianina reo rozy, farany nangataky fanampea tamy Ejipsianina mpanompo sampy. (Isa. 30:1, 2) Nampitandrina an-drozy Jehovah hoe ho azon-doza rozy amy raha raty nataon-drozy zay. (Isa. 30:7, 12, 13) Naniraky ani-Isaia amy zay Jehovah mba hiresaky amy vahoaky rey hoe ino ty tokony hataon-drozy mba hahavy an-drozy tsy hatahotsy. Hoy ty asany: “Hatanjaky nareo laha tsy taitaitsy noho matoky” ani-Jehovah avao.​—Isa. 30:15b.

10. Amy raha manao akory iaby tsika ro afaky mampiseho hoe matoky ani-Jehovah?

¹⁰ Akory ty azontsika ampisehoa hoe matoky ani-Jehovah tsika? Retoa misy ohatsy vitsivitsy: Manao akory zao laha nahita asa be karama iha, fe miasa anatini-lera maro raha io sady tsy ahavitanao manompo? Na ino ty hataonao laha misy olo am-piasànareo any mivola hoe tea anao, kanefa ie tsy mpanomponi-Jehovah? Na hanao akory iha laha mivola anao ty olo an-trano ao hoe horoasin-drozy iha laha mbo manohy manompo ani-Jehovah? Sarotsy aloha ty manapa-kevitsy amy raha manahaky ani-reo, fe hanome ty tari-dala ilànao Jehovah mba hanampy anao hahay hanapa-kevitsy. (Mat. 6:33; 10:37; 1 Kor. 7:39) Fe toy misy fanontanea: Hatòky ani-Jehovah va iha ka hanaraky ty tari-dala ameany?

11. Tantaran’ia amy Baiboly ao ro afaky manampy antsika ho kalma avao lafa misy fanenjeha?

¹¹ 3) Mandrambesa fianara baka amin’olo amy Baiboly ao rey. Maro ty tantara amy Baiboly ao mampiseho hoe tena ilà ty hoe tsy taitaitsy noho matoky ani-Jehovah avao. Lafa mianatsy ani-tantara rey iha, le eritsereto hoe ino ty nanampy ani-mpanompo-Ndranahary rey ho kalma avao lafa niatriky fanenjeha mafy rozy. Tsy natahotsy, ohatsy, apostoly rey lafa nandrara an-drozy tsy hitory sasy ty Fitsarà Anabo Jiosy. Nahasaky nivola mihintsy aza rozy hoe: “Ndranahary ro mpanday anay ka ie ro tsy maintsy orihinay safà, fa tsy olo.” (Asa. 5:29) Ndre fa nivangoa aza rozy, le mbo tsy natahotsy. Ino ty antony? Satria nihain-drozy hoe nanoha an-drozy Jehovah sady falifaly amy ty raha nataon-drozy. Afaky nanohy nitory ty vaovao soa amy zay rozy. (Asa. 5:40-42) Ho zay koa Stefana. Ndre fa hovonoa aza ie, le tsy natahotsy fa nikalma avao ka nanahaky “tarehin’anjely ty tarehiny.” (Asa. 6:12-15) Nanao ho zay Stefana satria natoky ie hoe nahazo hatò tamy Jehovah.

12. Laha hentea ty 1 Petera 3:14 noho 4:14, manino tsika ro afaky ho falifaly avao ndre miatriky fanenjeha?

¹² Nihitani-apostoly rey mazava soa hoe nanoha an-drozy Jehovah. Fa nameany hery rozy ka nahavita fahagagà maro. (Asa. 5:12-16; 6:8) Tsy nameani-Jehovah hery hanaova fahagagà ho zay tsika henanizao. Fe ndre zay, mampiasa ty Safàny Jehovah mba hahavy antsika hatòky hoe laha enjehy tsika satria manompo azy, le ho falifaly amintsika ie sady hanome fanahy masy antsika. (Vakio 1 Petera 3:14; 4:14.) Ka tsy tokony hampiasa loha antsika zany hoe ino ty hatao lafa hisy fanenjeha afarafara ao. Tokony hiezaky sandrany tsika hanao ze fara  herintsika, amy zay hatòky tanteraky hoe afaky miaro noho manafaky antsika Jehovah. Fa nampitamà Jesosy hoe: “Hameako safà noho fahendrea nareo, ka ndre ty fahavalonareo iaby mitambatsy aza tsy haharesy na hahavita hanohitsy anareo. ... Laha miaritsy nareo, le hanavotsy ty ainareo.” (Lioka 21:12-19) Natoky ani-fampitamana io ty mpianatsini-Jesosy taloha tany, le tokony hanahaky an-drozy koa tsika. Tiarovo avao fa tsy halinoni-Jehovah mihintsy ty mikasikasiky ani-mpanompony tsy nivaliky rey, ndre ty tsipiriany malinidiniky aza. Ka ndre maty rozy le mbo hovelominy ndraiky.

13. Manino ro mahasoa antsika ty mandiniky ty tantaran’olo tsy natoky ani-Jehovah rey?

¹³ Mbo ianaran-draha avao koa ndre azy tsy natoky ani-Jehovah rey. Laha mandiniky ty tantaran-drozy tsika, le ho haintsika hoe ino ty hadisoa nataon-drozy ka tsy tokony hataontsika. Raiky amy zay, ohatsy, Asa Mpanjakani-Joda. Laha vo nanomboky nanjaka ie le nisy maramila maro biby nanafiky an-drozy, fe niantehitsy tamy Jehovah tse ie ka nandresy. (2 Tan. 14:9-12) Lafa nanafiky azy amy zay Basa Mpanjakani-Israely tafara atoy, le tsy nitoliky tamy Jehovah nanahaky taloha iny ie satria hitany hoe kelikely maramila reo. Naleony nikarama maramila syrianina mba hanampy azy. (2 Tan. 16:1-3) Lafa narìny ho maty koa ie, niazon’arety raty, fe mbo tsy niantehitsy tamy Jehovah avao.​—2 Tan. 16:12.

14. Ino ty ianarantsika baka amy ty raha tsy nety nataoni-Asa?

¹⁴ Niantehitsy tamy Jehovah tse Asa tamy voalohany lafa nana problemo. Fe tsy nila fanampea tamy Ndranahariny io sasy ie tafara atoy, fa naleony namaha ani-raha rey am-batany avao. Atao raha nisoa tse hevitsini-Asa nila fanampea tamy Syrianina reo iny satria nisy vokany soa. Fe tsy naharitsy raha zay. Naniraky mpaminany Jehovah mba hivola aminy hoe: “Satria iha niantehitsy tamy mpanjakani-Syria fa tsy tamy Jehovah Ndranaharinao, le ho bototsy an-tananao ty maramilani-mpanjakani-Syria.” (2 Tan. 16:7) Mila miamby soa tsika tsy no hatòky tena marè. Tsy tokony hieritseritsy tsika hoe mahavita mandamy ty raha mahazo antsika tsika, fa tsy mila ani-Jehovah hitariky antsika amy alalani-Safàny. Tokony hiantehitsy amy Jehovah avao tsika ndre tsy maintsy manapa-kevitsy malaky. Hampeany tsika amy zay ka hahay hanapa-kevitsy.

15. Ino ty azontsika atao lafa mamaky Baiboly?

¹⁵ 4) Miezaha hahatiaro andinin-teny. Lafa iha mahita andinin-teny mampiseho hoe tena ilà ty hoe tsy taitaitsy noho matoky ani-Jehovah, le iezaho tiarovy raha rey. Mety hanampy anao ty mamaky ani-raha rey marè, na mandramby an-tsoratsy azy, bakeo manenty azy matetitetiky. Nivolanini-Jehovah Josoa mba hamaky tsy tampaky ty boky misy ty Lalàna noho hametsivetsy ani-raha zay. Hanao raha amim-pahendrea ie amy zay. Hanampy azy koa raha zay mba tsy hatahotsy, fa hana herim-po hitariha ani-vahoaki-Ndranahary rey. (Jos. 1:8, 9) Maro ty andinin-teny amy Baiboly ao afaky manampy anao hilamin-tsay, lafa misy raha mampiasa loha na mampatahotsy anao.​—Sal. 27:1-3; Ohab. 3:25, 26.

16. Akory ty ampiasani-Jehovah ty fiangona mba hanampea antsika ho kalma noho hatòky azy avao?

¹⁶ 5) Miaraha amy vahoaki-Ndranahary. Mampiasa ani-rahalahy noho anabavintsika reo Jehovah mba hanampea antsika ho kalma noho hatòky azy avao. Lafa tsika, ohatsy, mivory le mampahery antsika ty maharè lahateny, valin-teny, noho mifampiresaky amy rahalahy  noho anabavintsika reo. (Heb. 10:24, 25) Velombelo koa tsika lafa baka nitantara ty raha mampiasa loha antsika amy namantsika amy fiangona eo. Sahala manday raha mavesatsy tsika lafa miasa loha, fe hanampy antsika haivaiva “ty safà soa” baka amy namantsika.​—Ohab. 12:25.

17. Laha hentea ty Hebreo 6:19, manino ty raha tamanintsika mikasiky Fanjakà iny ro manampy antsika ho kalma avao lafa misy raha sarotsy?

¹⁷ 6) Manana raha tamany avao. Sahala amy “nangani-aintsika” ty raha tamanintsika mikasiky ani-Fanjakà iny, satria manome hery antsika raha io ndre sarotsy aza ty raha iainantsika noho mampiasa loha antsika. (Vakio Hebreo 6:19.) Vetsevetseo ty raha ampitamanini-Jehovah amy hoavy. Tsy hisy raha mampiasa loha sasy amy fotoa zay. (Isa. 65:17) Alao sary an’eritseritsy ty vatanao amy tontolo vaovao ao. Hiada iha lafa ao satria tsy hisy sasy ty raha raty. (Mika 4:4) Vomaiky koa iha hanan-draha tamany avao lafa mizara ty raha tamaninao amin’olo hafa. Anovo ze azonao atao mba handrambesa anjara amy asa fitoria noho fampianara. Laha manao ani-zay iha, le ho azonao “antoky soa zisiky farany fampitamana iny.”​—Heb. 6:11.

18. Ino ty raha mety hiseho amy hoavy, le akory ty hahavitantsika hiatriky ani-zay?

¹⁸ Vomaiky hihamaro ty raha mampiasa loha antsika arakaraky ty mamparìny ty farani-tontolo toy. Fe afaky manampy antsika hiatriky ani-raha sarotsy reo noho ho kalma avao ty andinin-teny ho ani-tao 2021. Resahiny ao fa tsy ho vitantsika amy herintsika manoka zay, fa mila matoky ani-Jehovah tsika. Ndao hatorontsika amy tao toy hoe tena inoantsika ty fampitamanani-Jehovah hoe: “Hatanjaky nareo laha tsy taitaitsy noho matoky avao.”​—Isa. 30:15.