1. Ino ty vokatsini-lahateny natao tamy fivoriambe tamy 1935 io tamy pamaraky raiky?

NATAO batisa pamaraky 18 tao zay tamy 1926. Mpianatsy Baiboly babany amy reniny. Zay moa ty fikaiha ty Vavolombeloni-Jehovah tamy zay. Nanan’anakilahy telo noho anakampela roe rozy. Nitezan-drozy mba hanompo ani-Jehovah Ndranahary noho hanahaky ani-Jesosy Kristy anakin-drozy reo. Nanahaky ty Mpianatsy Baiboly iaby tamy zay, le nihina amy mofo noho divay rey pamaraky io santao saky natao ty Sakafo Harivani-Tompo. Fe nanjary niova ty raha tamaniny lafa ie naharè ty lahateny miavaky manday ty lohateny hoe “Ty Olo Maro.” Joseph Rutherford ro nanao ani-lahateny io tamy fivoriambe natao ta Washington, a Etazinỳ any, tamy 1935. Ino ty nambara tamy fivoriambe io?

2. Ino ty fahamarina nihazavanini-Rahalahy Rutherford tamy lahateny nataony iny?

² Nihazavanini-Rahalahy Rutherford tamy lahateniny io hoe ia “olo maro” (Baiboly Protestanta), na “vahoaky be” resahy amy Apokalypsy 7:9 ao reo. Nieritseritsy ty Mpianatsy Baiboly bakany zay hoe antokon’olo faharoe ho an-danitsy any ty vahoaky be, fe tsy de matanjaky ty finoan-drozy laha ampitovizy amy voahosotsy rey. Nampiasa ty Soratsy Masy Rahalahy  Rutherford mba hanazavà hoe tsy voafily hiay an-danitsy any ty vahoaky be. Fe rozy azy aondry hafani-Kristy * ho tafaboaky velo amy “fijalea bevata” io, le hiay zisiky farany an-tany etoy rozy. (Apok. 7:14) Nampitamà Jesosy hoe: “Mana aondry hafa tsy amy vala toy aho. Rozy koa tsy maintsy handesiko sady hijanjy ty feoko, ka ho lasa hiaraky raiky rozy sady ho raiky avao ty mpiaraky.” (Jaona 10:16) Tsy ia “aondry hafa” reo fa ty Vavolombeloni-Jehovah tsy mivaliky, mitamà hiay zisiky farany amy Paradisa an-tany etoy. (Mat. 25:31-33, 46) Ndao hohenteantsika hoe nanino fanazavà vaovao io ro nanova ty fiainani-mpanomponi-Jehovah maro, anatini-zay rahalahy 18 tao iny.​—Sal. 97:11; Ohab. 4:18.

3-4. Lasa nitamà ino ty ankamaroan’olo tamy fivoriambe tamy 1935, le ino ty antony?

³ Fotoa niavaky vatany tamy fivoriambe iny lafa nanontany ani-mpanatriky rey mpandahateny iny hoe: “Asà hitsanga ze olo iaby mitamà hiay zisiky farany an-tany etoy.” Nisy 20 000 eo ho eo ty mpanatriky tamy zay. Nivola rahalahy raiky nanatriky ani-fivoriambe io hoe antsasany mahery amy ty olo nanatriky teo ro nitsanga. Bakeo hoy Rahalahy Rutherford: “Reo vahoaky be rey!” Nitehatehaky marè ty mpanatriky tafarani-zay. Nanjary nazava soa tamy azy nitsanga rey hoe tsy nifily an-drozy hiay an-danitsy any Jehovah. Nihain-drozy hoe tsy nihosora tamy fanahy masi-Ndranahary rozy. Vavolombeloni-Jehovah 840 ro natao batisa hamaraini-fivoriambe iny, le anatini-aondry hafa ty ankamaroan-drozy.

⁴ Tafarani-lahateny iny, le maro ty olo tsy nihina amy mofo noho divay rey sasy lafa natao ty Sakafo Harivani-Tompo, anatini-zay pamaraky niresahy taloha teny iny noho ty olo hafa an’arivony. Maro ty nahatsapa manahaky ani-rahalahy raiky toy. Nivola ie hoe: “Ty Fahatiarova tamy 1935 ro farany nihinanako amy mofo noho divay rey. Lasa nihaiko hoe tsy nampiasa ty fanahiny masy Jehovah mba hahavy ahy hitamà hiay an-danitsy any. Fe ndre zay, le mitamà hiay an-tany etoy aho sady handramby anjara amy asa atao mba hahavy ani-tany toy ho paradisa.” (Rom. 8:16, 17; 2 Kor. 1:21, 22) Liany tamy fotoa zay, le nihanitombo avao ty isakini-vahoaky be. Miaraky miasa amy voahosotsy sisa tavela * an-tany etoy reo rozy.

5. Manao akory ty fahitani-Jehovah ani-azy tsy nihina sasy amy mofo noho divaini-Fahatiarova rey?

⁵ Tsy nihina tamy mofo noho divay rey sasy ty olo sisany tafarani-1935. Manao akory ty fahitani-Jehovah an’olo rey? Ka henanizao, manao akory laha misy Vavolombeloni-Jehovah vita batisa mihina amy mofo noho divay lafa amy Sakafo Harivani-Tompo, fe tsapany lafa afara any hoe tsy voahosotsy ie? (1 Kor. 11:28) Misy olo nihina tamy mofo noho divay rey satria tsy nazava soa taminy ty raha tamaniny. Fe lafa nandeha ty fotoa le nieky ie hoe tsy nety ty raha nataony ka tsy nihina sasy ie. Manohy manompo ani-Jehovah avao ie satria matoky hoe anatini-aondry hafa. Ndre fa tsy mihina amy mofo noho divay rey aza rozy, le mbo manatriky  Fahatiarova satria tena mankasitraky ty raha nataoni-Jehovah noho Jesosy ho an-drozy.

6. Ino ty nivolanini-Jesosy tamy anjely rey?

⁶ Kely sisa le ho avy ty fijalea bevata. Hampahery antsika ty mandiniky ty raha resahini-​Apokalypsy toko faha-​7 mikasiky ty Kristiana voahosotsy noho ty vahoaky be anatini-aondry hafa. Nivolanini-Jesosy anjely rey mba hitanjaky marè ty tsioky efatsini-fandripaha avao. Tsy tokony haboton-drozy hitsioky an-tany etoy raha reo laha tsy fa nasia tombo-kasè iaby Kristiana voahosotsy reo, zany hoe fa nekè-Ndranahary hoe tsy mivaliky vatany. (Apok. 7:1-4) Tsy nivaliky rozy ka hahazo valisoa, zany hoe hotendreni-Kristy ho mpanjaka noho mpisoro miaraky aminy an-danitsy any. (Apok. 20:6) Ho falifaly biby fianakavia-Ndranahary an-danitsy any reo lafa hahita ani-voahosotsy 144 000 reo mahazo ty valisoan-drozy.

7. Laha hentea ty Apokalypsy 7:9, 10, ia ty nihitani-Jaona tamy fahità, le ino ty raha ataon-drozy? (Henteo sary amy fononi-gazety toy.)

⁷ Lafa baka niresaky mikasiky mpanjaka noho mpisoro 144 000 reo Jaona le nahita raha miavaky. Niresaky “vahoaky be” tafaboaky velo baka amy Hara-magedona ie. Tsy manahaky olo taloha teo rey io fa maro biby sady tsy voaisaky. (Vakio Apokalypsy 7:9, 10.) “Nisiky akanjo foty lava rozy.” Mampiseho raha zay hoe niezaky ‘tsy ho voatasitasini-tontoloni-Satana’ rozy sady tsy nivaliky tamy Ndranahary noho Kristy. (Jak. 1:27) Nikoikoiky rozy hoe ty raha nataoni-Jehovah noho Jesosy, azy Anak’aondri-Ndranahary iny, ro nanavotsy an-drozy. Nitanjaky sampa-palmie rozy amin’io, zany hoe neken-drozy hoe Jesosy ro Mpanjaka nitingini-Ndranahary, le falifaly rozy.​—Ampitovizo amy Jaona 12:12, 13.

8. Ino ty raha volanini-​Apokalypsy 7:11, 12 mikasiky ty fianakaviani-Jehovah an-danitsy any?

⁸ Vakio Apokalypsy 7:11, 12. Nanao akory ty tan-danitsy any lafa nahita ani-vahoaky be rey? Nihitani-Jaona rozy iaby falifaly sady nidera a Ndranahary laha vo nahita ani-vahoaky be rey. Ho falifaly biby zany fianakaviani-Jehovah an-danitsy any reo lafa hahita ty fahatanterahani-raha nihitani-Jaona iny, hoe ho tafaboaky velo baka amy fijalea bevata ty vahoaky be.

9. Laha hentea ty Apokalypsy 7:13-15, ino ty raha ataoni-vahoaky be henanizao?

⁹ Vakio Apokalypsy 7:13-15. Ty sikin-drozy hoasani-Jaona “sinasan-drozy noho nifotin-drozy tamy lioni-Anak’aondry iny.” Ty dikani-zay, malio ty eritserin-drozy sady mahazo hatò amy Jehovah rozy. (Isa. 1:18) Kristiana nanokam-bata noho natao batisa koa rozy, le tena mino ty soro nataoni-Jesosy sady mifandramby soa amy Jehovah. (Jaona 3:36; 1 Pet. 3:21) Lasa falifaly amin-drozy Ndranahary ka afaky manao fanompoa masy ho azy an-tany etoy rozy “ndre andro ndre haly.” Rozy ro manao ty ankabeazani-asa fitoria noho fanaova mpianatsy, sady mazoto rozy satria ty Fanjakà-Ndranahary ro tena vatan-draha amy fiainan-drozy.​—Mat. 6:33; 24:14; 28:19, 20.

10. Ino ty raha atokisani-vahoaky be, le ino amy fampitamana-Ndranahary rey ro ho hitan-drozy ty fahatanterahany?

¹⁰ Matoky vahoaky be ho tafaboaky velo baka amy fijalea bevata reo hoe hikarakara an-drozy avao Ndranahary, satria ‘hamelatsy ty tranolainy anabon-drozy eo Azy mipetraky amy sezi-mpanjakà eo iny.’ Ho tanteraky amy zay raha fa nitamanini-aondry hafa reo fa ela  rey. Anatini-zay ty hoe: “Hofafà-[Ndranahary] ty ranomaso iaby amy ty mason-drozy, ka tsy hisy fahafatesa sasy, sady tsy hisy sasy ty alahelo, na ty fitaraina, na ty raha mahararirary, fa fa lasa ty raha taloha.”​—Apok. 21:3, 4.

11-12. a) Ino ty fitahia resahini-​Apokalypsy 7:16, 17 hoe ho azoni-vahoaky be? b) Ino ty azoni-aondry hafa atao lafa Fahatiarova, le ino ty antony?

¹¹ Vakio Apokalypsy 7:16, 17. Kerè ty mpanomponi-Jehovah sisany henanizao satria tsy de manan-drala hiviliana hany, na mety nisy rotaky koa nanday mosary amy ty tanàn-drozy. Ty ilany aza gadra satria mampiseho ty finoany. Fe falifaly vahoaky be reo satria hain-drozy hoe lafa ripaky tontolo raty toy le tsy hijaly hany sasy rozy. Tsy hijalean-drozy koa ndre hany ara-panahy. Hanahaky “hafanà maha may” ty helokini-Jehovah lafa handrava ani-tontolo ratini-Satana toy. Fe hataony azo antoky hoe voaaro vahoaky be reo ka tsy ho azoni-zay. Lafa tampitsy fijalea bevata io, le hotarihini-Jesosy hamonjy “ranon’ay” ze tafaboaky velo bakao, zany hoe hampeany hahazo fiaina zisiky farany. Tsy hitanao va hoe tena miavaky ty raha tamanini-vahoaky be? Mety tsy ho maty sasy olo an-tapitrisany reo!​—Jaona 11:26.

¹² Manao mahavelo bevata ani-Jehovah noho Jesosy ty aondry hafa satria mana raha tamany miavaky! Tsy nivoatingy hiay an-danitsy any rozy, fe mitovy amy fitiavani-Jehovah ani-voahosotsy reo avao ty fitiavany an-drozy. Samby afaky midera ani-Jehovah noho Jesosy iaby ndre ty voahosotsy ndre ty aondry hafa. Samby manao ani-zay rozy lafa manatriky ty Sakafo Harivani-Tompo.

13-14. Manino ty olo iaby ro tokony hanatriky ty Fahatiarova ty nahafatesani-Kristy?

¹³ Tato ho ato zay, laha misy olo 1 000 manatriky Fahatiarova le raiky amy reo avao ro mihina mofo noho mino divay. Tsy misy mihina mofo noho mino divay zany ty ankamaroani-fiangona amy tany toy iaby saky Fahatiarova. Mitamà hiay an-tany etoy iaby ty ankabeazani-azy manatriky Fahatiarova reo. Ka ino avao zany ty antony anatrehan-drozy ty Sakafo Harivani-Tompo? Manahaky olo mamonjy mariazy io avao. Mamonjy ani-mariazy iny rozy mba hampisehoa hoe tean-drozy noho tohanan-drozy azy atao mariazy rey. Ho zay koa ty aondry hafa. Mamonjy  Fahatiarova rozy satria ta hampiseho hoe tean-drozy noho tohanan-drozy Kristy noho ty voahosotsy. Tsy zay avao aza. Manatriky Fahatiarova koa rozy satria mankasitraky ani-soro ankalazà amy Fahatiarova iny. Soro io ro mahavy an-drozy ho afaky ho velo zisiky farany an-tany etoy.

¹⁴ Mbo misy antony hafa mahavy ty aondry hafa manatriky Fahatiarova. Nandidy an-drozy hanatriky ani-raha io Jesosy. Nivola tamy apostoliny tsy nivaliky rey Jesosy tamin-drozy nihina ty Sakafo Harivani-Tompo voalohany hoe: “Anovo avao zao ho fahatiarova ahy.” (1 Kor. 11:23-26) Manatriky ani-Sakafo Harivani-Tompo io avao zany ty aondry hafa laha mbo misy voahosotsy velo an-tany etoy. Mitao olo hafa koa rozy mba hiaraky amin-drozy hanatriky ani-fankalazà io.

15. Ino ty azontsika atao mba hiderà a Ndranahary noho Kristy saky Fahatiarova?

¹⁵ Saky Fahatiarova, le afaky midera a Ndranahary noho Kristy tsika lafa miaraky mihira noho mivavaky. Vomaiky hanampy antsika hisaotsy ani-Jehovah noho Kristy ty lahateny Fahatiarova amy tao toy. Zao ty lohateniny: “Isaoro ty Raha Natao-Ndranahary Noho Kristy ho Anao!” Lafa mandalo mofo noho divay rey, le afaky mieritseritsy ty dikani-raha reo tsika. Mampiseho ty vatani-Jesosy noho ty liony raha reo. Azontsika tiarovy soa fa tena tea antsika Jehovah kanao nengany ho maty ho antsika ty Anakiny. (Mat. 20:28) Ka laha tea ani-Babantsika an-danitsy any iny noho Anakilahiny iny zany ty olo raiky, le hazoto hanatriky Fahatiarova.

16. Ino ty mampitovy ty voahosotsy noho ty aondry hafa?

¹⁶ Misy itovizany ty voahosotsy noho ty aondry hafa. Samby lafovily amy Jehovah rozy. Mitovy ty fitiavany an-drozy fa tsy misy ty hoe teany marè. Samby niviliny tamy aini-Anakilahiny iny iaby ndre ty voahosotsy ndre ty aondry hafa. Ty raha tamanin-drozy avao ro samby hafa, fe samby tokony tsy hivaliky amy Ndranahary noho Kristy iaby rozy. (Sal. 31:23) Tiarovo koa fa ameani-Jehovah fanahy masy mifanaraky amy ze ilàntsika iaby tsika, ndre voahosotsy ndre aondry hafa.

17. Ino ty raha tamanini-voahosotsy mbo an-tany etoy reo?

¹⁷ Tsy hoe vo teraky ty Kristiana voahosotsy le fa mitamà hiay an-danitsy any. Ndranahary ro nahavy an-drozy hitamà ani-zay. Mieritseritsy mikasiky ani-raha io avao rozy, mivavaky mikasiky ani-raha io, le fa tsy linin-drozy ty hahazoan-drozy azy. Mbo tsy hain-drozy hoe hanao akory ty vatan-drozy lafa any. (Fil. 3:20, 21; 1 Jaona 3:2) Fe mitamà rozy hoe hahita  ani-Jehovah, Jesosy, ty anjely, noho ty voahosotsy hafa, le ho tafiaraky amin-drozy amy Fanjakà an-danitsy any iny.

18. Ino iaby ty raha fa tsy linini-aondry hafa?

¹⁸ Mitamà hiay an-tany etoy zisiky farany ty aondry hafa. Fa natao-Ndranahary ho zay mihintsy tsika olombelo. (Mpito. 3:11) Fa tsy linin-drozy fotoa io satria hanampy amy fanovà ani-tany toy ho paradisa rozy. Ho afaky hanamboatsy trano ho an-drozy am-batan-drozy rozy amy zay, sady ho soasoa ty tanàn-drozy. Hanan’anaky lavorary noho salama soa koa rozy. (Isa. 65:21-23) Fa tsy linin-drozy koa ty hitsangatsanga hitety tany, le hahita vohitsy, riaky, noho ala soasoa. Hianatsy raha maro mikasiky ty raha namboarini-Jehovah rozy amy zay. Fe ty tena hahafalifaly an-drozy, le ty mahay hoe vomaiky hihamarìny ani-Jehovah rozy.

19. Ino iaby ty raha azontsika atao amy fotoani-Fahatiarova, le ombia ty Fahatiarova amy tao toy?

¹⁹ Samby nameani-Jehovah raha soa ho tamaniny iaby ze olo manompo azy. (Jer. 29:11) Fotoa miavaky ho antsika iaby ty Fahatiarova ty nahafatesani-Kristy. Afaky midera a Ndranahary noho Kristy iaby tsika amin’io, sady afaky misaotsy an-drozy amy ze raha iaby nataon-drozy mba hahazoantsika fiaina tsy misy farany. Ty Fahatiarova ro fivoria farani-bevata amy fivoria fataoni-tena Kristiana santao. Hankalaza ani-raha io tsika amy tsofotsandroni-Sabotsy 27 Marsa 2021. Maro ty olo hanatriky ani-fotoa io malalaky. Eo koa ty hanatriky avao ndre misy manohitsy. Misy sisany hanatriky Fahatiarova am-prizon any. Mahita antsika avao Jehovah, Jesosy, noho ty fianakavia-Ndranahary iaby an-danitsy any lafa tsika manatriky ani-fotoa io. Mazotoa iaby lahy manatriky Fahatiarova ndre miaraky amy fiangona zay, ndre antoko-mpitory, ndre mandeha raiky!