LAHATSORATSY FIANARA 5
‘Ampiasao Soa ty Fotoanao’
“Mitandrema soa avao amy ze ataonareo, mba ho hita hoe hendry nareo fa tsy adala, ka ampiasao soa ty fotoanareo.”—EFES. 5:15, 16.
HIRA 8 Jehovah no Fialofantsika
HO HITANAO ATO *
1. Ino ty tokony hataontsika laha tsika ta hiaraky amy Jehovah?
TEANTSIKA ty miaraky amin’olo marìny ty fontsika. Falifaly biby zao, ohatsy, ty mpivaly lafa tafaraky. Teani-tanora koa ty miaraky amy namany. Manahaky ani-zay koa tsika iaby, teantsika ty miaraky amy rahalahy noho anabavintsika reo. Fe ty tena vatan-draha, teantsika ty fotoa iarahantsika amy Ndranaharintsika iny. Manao ani-zay tsika lafa mivavaky aminy, mamaky ty Safàny, mametsivetsy ty raha teany hatao noho ty toetsy soa ananany. Tena lafovily ty fotoa iarahantsika amy Jehovah!—Sal. 139:17.
2. Ino ty raha sarotsy atrehintsika?
2 Tena teantsika ty miaraky amy Jehovah fe tsy mora avao ty manao ani-zay. Sahira tsika ka sarotsy amintsika ty mahita fotoa hanaova raha ara-panahy. Lany amy asa, fianakavia, noho ze raha hafa tsy maintsy ataontsika ty fotoantsika, ka lasa tsy de manam-potoa hivavaha, hianara, na hametsevetsea tsika.
3. Ino koa ty raha mety handany ty fotoantsika?
3 Misy raha hafa koa mety handany ty fotoantsika. Laha tsy miamby soa tsika, le mety ho tandrena. Tsy voatery ho raty aloha raha rey, fe lasa ho lany eo ty fotoa tokony hanaovantsika raha miaraky amy Jehovah. Mahasoa antsika, ohatsy, ty manao fialam-boly. Mety ho soasoa fialam-boly ataontsika iny ka ho tandrena eo tsika. Fe laha mandany fotoa marè eo tsika, le ho kelikely avao ty fotoa hanaovantsika raha ara-panahy. Tokony hotiarovintsika fa tsy ty fialam-boly ro tena vatan-draha marè.—Ohab. 25:27; 1 Tim. 4:8.
4. Ino ty hodinihintsika henanizao?
4 Hodinihintsika amy lahatsoratsy toy ato hoe manino tsika ro mila mamaritsy ze vatan-draha marè amintsika. Horesahintsika koa hoe akory ty hampiasantsika soa ty fotoa anaovantsika raha miaraky amy Jehovah, le manino ro mahasoa antsika ty manao ani-zay.
MAHAIZA MIFILY LE FILIO ZE TENA VATAN-DRAHA
5. Manino ty fametsevetsea ty raha volanini-Efesianina 5:15-17 ro manampy ty tanora hifily ty fomba fiaina farani-ze soa?
5 Filio ty fiaina farani-ze soa. Matetiky ty tanora ro mieritseritsy hoe ino ty hataony amy fiainany. Mety hampirisiky an-drozy hianatsy amy iniversitè ty mpampianatsy an-drozy noho ty fianakavian-drozy tsy Vavolombeloni-Jehovah, soa hahazo asa soa noho be karama rozy. Handany ty fotoan-drozy fianara io. Fe ty ray aman-dreny noho nama amy fiangona eo, mety hampirisiky ty tanora hanoka ty fiainan-drozy amy fanompoa ani-Jehovah. Ino ty hanampy ty tanora tea ani-Jehovah hahay hanapa-kevitsy? Soa ie laha mamaky noho mametsivetsy ty Efesianina 5:15-17. (Vakio.) Mety hieritseritsy ho zao ty tanora lafa baka namaky ani-andininy reo: ‘Ino ty “sitraponi-Jehovah”? Fanapahan-kevitsy manao akory ro mahafalifaly azy? Ino ty fanapahan-kevitsy hanampy ahy hampiasa soa ty fotoako?’ Tiarovo fa “raty andro zao”, sady kely sisa le horavà tontolo ambany fahefàni-Satana toy. Hendry zany tsika laha mampiasa ty fiainantsika mba hanaova raha mahafalifaly ani-Jehovah.
6. Nifily hanao ino Maria, le manino ro mety soa raha nataony zay?
6 Filio ze tena vatan-draha. Mba hahafahantsika mampiasa soa ty fotoantsika, le mila mifily ty raha hataontsika tsika. Mety hisy raha roe samby soa, ohatsy, fe tsy maintsy mifily raiky avao tsika. Mampiseho ani-zay ty raha niseho lafa Jesosy niavy tan-tranoni-Maria noho Marta any. Nifalifaly biby Marta ka nikarakara sakafo maro ho ani-Jesosy. Fe Maria nipetraky tanilani-Jesosy teo le nijanjy ty raha nampianariny. Tsy raty aloha ty raha nataoni-Marta, fe nivola Jesosy fa mbo “soa” mandilatsy ani-zay ty raha nataoni-Maria. (Lioka 10:38-42) Lafa tafara atoy, le mety ho nihalinoni-Maria hoe ino ty raha nihanin-drozy tamy fotoa io, fe azo antoky fa tsy nihalinony mihintsy ty raha nampianarini-Jesosy. Nilafovily tamy Maria fotoa niarahany tamy Jesosy io, le manahaky ani-zay koa fa lafovily amintsika ty fotoa iarahantsika amy Jehovah. Akory ty hampiasantsika soa ani-fotoa io?
AMPIASAO SOA TY FOTOA IARAHANAO AMY JEHOVAH
7. Manino ro tena ilà ty mivavaky, mianatsy, noho mametsivetsy?
7 Tiarovo fa tafilitsy amy fanompoantsika ani-Jehovah ty vavaky, fianara Baiboly, noho fametsevetsea. Lafa tsika mivavaky, le miresaky amy Baba tena teantsika an-danitsy any iny. (Sal. 5:7) Lafa tsika mianatsy Baiboly, le mandramby “fahaiza” baka amy Ndranahary, azy farany hendry iny. (Ohab. 2:1-5) Lafa tsika koa mametsivetsy ty raha ianarantsika mikasiky ani-Jehovah, le mandiniky ty toetsy soa ananany tsika sady mahatiaro ty raha miavaky teany hatao ho antsika noho ho ahin’olombelo iaby. Zay ro fomba tena soa azontsika ampiasà ty fotoantsika. Fe ino ty hanampy antsika hanao ani-zay?
Afaky mila pilasy mitoka va iha lafa manao fianara am-bata? (Fehintsoratsy 8-9)
8. Ino ty azontsika ianara baka amy Jesosy laha hentea ty fomba nampiasany ty fotoany tan-diomonto any?
8 Mifiliana pilasy mety soa. Diniho ty ohatsini-Jesosy. Talohani-nanombohany ty fanompoany tan-tany etoy, le nijano 40 andro tan-diomonto any tse ie. (Lioka 4:1, 2) Afaky nivavaky tamy Jehovah Babany noho nametsivetsy ty sitrapony ie lafa tamy pilasy kalma io tany. Lasa niparè hiatriky ty fitsapà hahazo azy ie vokatsini-raha zay. Akory ty hanahafanao ani-Jesosy? Laha maromaro, ohatsy, nareo an-trano ao le mety ho sarotsy aminao ty hahita pilasy kalikalma. Laha zay ie, le vasa afaky miboaky iha le mila pilasy amonto any. Zay mihintsy ty ataoni-Julie, ranabavy mipetraky a Fransy any zay, lafa ie ta hanoka fotoa hivavaha amy Jehovah. Mipetraky amy efitsy kelikely rozy morovaly, ka sarotsy ty hitoka noho tsy ho voatabataba. Hoy Julie: “Mandeha amy zariday zay any aho sanandro. Zaho raiky avao ty any ka afaky mifantoky aho sady afaky miresaky soa amy Jehovah.”
9. Nimaro biby ty raha nataoni-Jesosy, fe akory ty nampisehoany hoe lafovily taminy ty fifandrambesany tamy Jehovah?
9 Nimaro biby ty raha nataoni-Jesosy tamy ie tan-tany etoy. Nisy olo maro biby avao nanaraky azy tamy ze pilasy nandehanany. Ta hijanjy azy iaby olo reo. Ndraiky zay, ohatsy, “nivoritsy tam-baravara teo iaby ty olo tan-tanà tao” mba hahita azy. Fe ndre zay, le mbo nanoka fotoa hivavaha tamy Jehovah avao Jesosy. Mbo tsy nitsiriky ty andro, le nandeha nila “pilasy mitoka” ie mba tsy hisy hanelingely azy amy fotoa iarahany amy Babany io.—Mar. 1:32-35.
10-11. Laha hentea ty Matio 26:40, 41, nampirisiky ani-mpianatsiny rey hanao ino Jesosy, fe ino ty raha niseho?
10 Tamy haliky farany niainani-Jesosy tan-tany etoy, lafa ho vita ty fanompoany, le nandeha nila pilasy mitoka ndraiky ie mba hahafahany mametsivetsy noho mivavaky. Farany ie nandeha tamy zaridaini-Getsemane tao. (Mat. 26:36) Niresaky raha bevata mikasiky vavaky tamy mpianatsiny rey Jesosy tamy fotoa io.
11 Eritsereto ty raha niseho tamy zay. Fa haly biby rozy vo niavy tamy zaridaini-Getsemane tao, mety fa ho vaky mirahaly mihintsy aza. Bakeo nivola tamy apostoly rey Jesosy mba tsy hiroro fa ie handeha hivavaky. (Mat. 26:37-39) Fe lafa nandeha nivavaky ie, le niazon-droro rozy. Lafa nahita an-drozy niroro Jesosy, le nampirisiky an-drozy ndraiky ie hoe: “Miambena noho mivavaha avao.” (Vakio Matio 26:40, 41.) Haini-Jesosy hoe niasa loha marè rozy sady nivozaky. Niferinesani-Jesosy rozy satria hainy fa ‘malemy ty nofotsy.’ Mbo nandeha nivavaky indroe Jesosy tafarani-zay, fe saky nimpoly baka any ie le mbo nahita ani-mpianatsiny rey niroro fa tsy nivavaky.—Mat. 26:42-45.
Afaky mivavaky va iha amy iha mbo tsy vozaky rey? (Fehintsoratsy 12)
12. Ino ty azontsika atao laha miasa loha marè tsika kindraiky na vozaky marè ka tsy mahavita mivavaky?
12 Filio soa ty fotoa. Mety hiasa loha marè tsika kindraiky na ho vozaky marè ka tsy hahavita hivavaky. Laha fa nahazo anao raha zay, le tiarovo fa tsy iha raiky avao ty tratsini-zay. Ino ty azonao atao? Misy olo sisany fa zatsy mivavaky amy Jehovah saky hariva. Fe hitan-drozy hoe tena soa laha atao alohaloha raha zay satria mbo tsy de tena vozaky rozy amy rey. Ty ilany koa mahita hoe lasa mifantoky soa rozy laha mipetraky na mandohaliky lafa mivavaky. Ka manao akory laha miasa loha marè iha na kamokamo hivavaky? Resaho amy Jehovah ze raha tsapanao. Matokisa fa haini-Babantsika soa fanahy iny ty raha mahazo anao.—Sal. 139:4.
Azonao atao va ty tsy mamaly mesazy na mail lafa mivory? (Fehintsoratsy 13-14)
13. Manino ty fitaova elektroniky ro mety hanelingely antsika lafa tsika mivavaky, mianatsy, noho mametsivetsy?
13 Ka engà hisy raha hanelingely anao lafa iha mianatsy. Tsy ty vavaky avao ro afaky manampy antsika hifandramby soa amy Jehovah. Afaky manampy antsika hihariny a Ndranahary koa ty fianara ty Safàny noho fanatreha fivoria. Misy raha azonao atao va mba hiasa soa ty fotoanao lafa iha mianatsy noho mivory? Eritsereto zao: ‘Ino ty raha manelingely ahy lafa zaho mivory na mianatsy Baiboly?’ Kaiky an-telefony va zay, sa misy mandefa mail na mesazy amy telefony na amy fitaova elektroniky hafa? Maro biby henanizao ty olo mampiasa ani-fitaova reo. Misy mpikaroky mivola hoe ndre miezaky mifantoky tsika fe misy telefony anilantsika eo, le ho voatabataba avao tsika. Mivola koa manam-pahaiza raiky zay hoe: “Tsy hifantoky amy raha ataonao iny iha fa hiriorio ty sainao.” Ampitiarovy avao tsika matetiky lafa amy fivoriambe rey mba hamono na tsy hanisy feo ty telefonintsika na fitaova elektroniky hafa, amy zay mba tsy hanelingely olo. Afaky manao manahaky ani-zay koa va tsika lafa tsika raiky avao rey, amy zay mba tsy hanelingely antsika noho ty fotoa anaovantsika raha ho ani-Jehovah ty telefonintsika na fitaova hafa?
14. Laha hentea ty Filipianina 4:6, 7, akory ty hanampeani-Jehovah antsika hifantoky?
14 Angataho Jehovah mba hanampy anao hifantoky. Lafa hitanao hoe manomboky mieritseritsy raha hafa ty sainao amy fotoa ianaranao na anatrehanao fivoria, le angataho Jehovah hanampy anao. Lafa iha miasa loha le mety ho sarotsy aminao ty tsy hieritseritsy ani-raha rey ka hifantoky amy ty Safà-Ndranahary. Fe tena mila mifantoky iha. Mivavaha, soa hiamby ty fonao noho ty ‘sainao’ ty fiadana-Ndranahary.—Vakio Filipianina 4:6, 7.
TSY MISERA TY FOTOA LANINTSIKA HO ANI-JEHOVAH
15. Ino ty soa ho azonao laha miaraky amy Jehovah iha?
15 Tena handramby soa iha laha manoka fotoa hiresaha, hijanjina, noho hieritsereta mikasiky ani-Jehovah. Fa manino? Voalohany, hahay hanapa-kevitsy iha. Manome toky antsika ty Baiboly hoe: “Ho hendry ze miaraky amy hendry.” (Ohab. 13:20) Ka laha iha miaraky amy Jehovah azy Niaviani-fahendrea iny, le vomaiky ho hendry. Ho hainao soa amy zay hoe akory ty hampifalefalea azy, le ino ty azonao atao mba tsy hampalahelo azy ty fanapahan-kevitsy ataonao.
16. Manino tsika ro hahay hampianatsy laha miaraky amy Jehovah?
16 Faharoe, hahay hampianatsy iha. Lafa mampianatsy Baiboly tsika, le ty hanampy ani-mpianatsy iny hifandramby marìny amy Jehovah ro raha kendrentsika voalohany. Laha mivavaky tsy tampaky noho mianatsy mikasiky ani-Jehovah tsika, le vomaiky hitombo ty fitiavantsika azy. Ho afaky hampianatsy ani-mpianatsintsika iny ho tea azy koa tsika amy zay. Eritsereto, ohatsy, Jesosy. Lafa niresaky mikasiky ani-Jehovah ie, le nampiasa safà feno fitiava ka nanampy ani-mpianatsiny rey ho tea ani-Jehovah koa raha zay.—Jaona 17:25, 26.
17. Manino ty vavaky noho ty fianara ro manampy antsika hana finoa matanjaky?
17 Fahatelo, hihamatanjaky ty finoanao. Eritsereto ty raha hiseho lafa mangataky tari-dala, fampahereza, noho fanampea amy Ndranahary iha. Saky mamaly ani-raha nangatahinao reo Jehovah le hihamatanjaky ty finoanao. (1 Jaona 5:15) Ino koa ty raha afaky manampy anao hana finoa matanjaky? Ty fianara am-bata. Tiarovo fa ‘baka amy raha rè ty finoa.’ (Rom. 10:17) Fe laha teanao hatanjaky ty finoanao, le tsy ampy avao ty mianatsy. Mbo misy raha hafa koa mila ataonao. Ino zay?
18. Miresaha ohatsy mampiseho hoe manino tsika ro mila mametsivetsy.
18 Mila mametsivetsy ty raha ianarantsika tsika. Diniho ty raha niainani-mpanoratsy ty Salamo faha-77. Niasa loha ie satria nieritseritsy hoe tsy nahazo hatò tamy Jehovah ie noho ty Israelita namany. Tsy niazon-droro mihintsy ie satria niasa loha marè mikasiky ani-raha zay. (Andininy 2-8) Ino ty nataony? Hoy ty asany tamy Jehovah: “Hovetsevetseko ty asanao iaby, le hoeritseretiko soa ty raha nataonao.” (Andininy 12) Azo antoky fa haini-mpanoratsy salamo io ty raha soa maro nataoni-Jehovah ho ani-vahoakiny taloha tany. Fe mbo nieritseritsy avao ie hoe: “Halino-Ndranahary va ty niferinay anay, sa neloky ie le tsy namindra fo sasy?” (Andininy 9) Nivetsevetseni-mpanao salamo io ty raha nataoni-Jehovah. Nieritseretiny koa hoe namindra fo noho nampiseho hasoam-panahy Jehovah taloha. (Andininy 11) Ino ty vokany? Lasa natoky ie hoe tsy hahafoy ty vahoakiny mihintsy Jehovah. (Andininy 15) Manahaky ani-zay koa fa hatanjaky ty finoanao laha vetsevetsenao hoe ino ty raha fa nataoni-Jehovah ho ani-vahoakiny, le ino ty raha fa nataony ho anao.
19. Ino koa ty raha soa ho azontsika lafa tsika miaraky amy Jehovah?
19 Fahaefatsy, hitombo ty fitiavanao ani-Jehovah. Zay ty tena vatan-draha, satria ndre eo ty toetsy maro samby hafa, le ty fitiava ro hanosiky anao hanoriky ty safàni-Jehovah, hahafoy raha mba hampifalefalea azy, noho hiaritsy raha sarotsy. (Mat. 22:37-39; 1 Kor. 13:4, 7; 1 Jaona 5:3) Tsy misy raha soa mandilatsini-hoe minama noho mifandramby marìny amy Jehovah!—Sal. 63:1-8.
20. Ino ty raha eritseretinao hatao mba hiasa soa ty fotoa iarahanao amy Jehovah?
20 Tiarovo fa tafilitsy amy fanompoantsika ani-Jehovah ty vavaky, fianara ty Safàny, noho fametsivetsea. Tahafo Jesosy ka milà pilasy mitoka mba hahafahanao miaraky amy Jehovah. Ka engà hisy raha hanelingely anao. Angataho koa Jehovah hanampy anao, soa hifantoky iha lafa manao raha ara-panahy. Laha ampiasanao soa ty fotoanao henanizao, le hitahy anao Jehovah ka hiay tsy misy farany amy tontolo vaovao ao iha.—Mar. 4:24.
HIRA 28 Te ho Namanao Izahay, Jehovah
^ Jehovah ro Namantsika farani-ze soa. Tena teantsika ty hoe namany ka teantsika ty hahay azy soa. Fe mety ho ela tsika vo hahay olo raiky. Manahaky ani-zay koa lafa tsika miezaky ta hifandramby amy Jehovah. Fe maro biby ty raha ataontsika henanizao. Ka akory zany ty hahitantsika fotoa hamonjea ani-Babantsika an-danitsy any iny? Manino ro mahasoa antsika ty manao ani-zay?