1-3. Ino iaby ty raha sarotsy mety hampitany ty mpanomponi-Jehovah?

 NOMBIA iha ro nitany farany? Latsa-dranomaso tsika kindraiky lafa misy raha mahafalifaly antsika. Fe amy ankapobeny, raha mampalahelo ro tena mampitany antsika. Mety hitany, ohatsy, tsika lafa maty ty longontsika. Hoy Lorilei, ranabavy mipetraky an’Etazinỳ any: “Nalahelo biby aho lafa nimaty anakampelako iny. Atao raha hoe tsy nisy afaky nampionona ahy. Tsy nieritseritsy mihintsy aho hoe ho vitako ty hiaritsy ani-raha iny.” *

² Misy antony hafa koa mety hahavy antsika ho latsa-dranomaso. Hoy Hiromi, ranabavy mpisava lala mipetraky a Japon any: “Kivikivy aho kindraiky satria tsy ta hijanjy ty olo itoriako. Misy fotoa aho tomany le mangataky amy Jehovah mba hampeany hahita olo mila fahamarina.”

³ Mahatsapa manahaky ani-ranabavy niresahintsika reo koa va iha kindraiky? Maro amintsika ro mahatsapa ani-zay. (1 Pet. 5:9) Teantsika laha falifaly tsika lafa manompo ani-Jehovah, fe mety hitany tsika kindraiky satria maty longo, kivy, na miatriky raha sarotsy mety hahavy antsika hivaliky amy Ndranahary. (Sal. 6:6; 100:2) Ino ty azontsika atao lafa tsika mahatsapa raha manahaky ani-zay?

4. Ino ty hodinihintsika amy lahatsoratsy toy ato?

⁴ Afaky manampy antsika ty mandiniky ty tantarani-Jesosy. Ndre ie koa nisy fotoa niatriky raha tena sarotsy ka ‘nilatsaky ty ranomasony.’ (Jaona 11:35; Lioka 19:41; 22:44; Heb. 5:7) Ndao  hodinihintsika raha nahalatsa-dranomaso azy reo. Ho hitantsika amy zay hoe ino ty raha azontsika ianara, le ino ty azontsika atao lafa misy raha sarotsy mampitany antsika.

5. Ino ty ianarantsika mikasiky ani-Jesosy laha hentea ty tantara amy Jaona 11:32-36 ao?

⁵ Nisy raha nampalahelo niseho tamy tao 32. Asotry ty andro tamy zay. Narary Lazarosy namani-Jesosy le bakeo nimaty. (Jaona 11:3, 14) Nana anabavy roe Lazarosy. Tsy ia zay fa Maria noho Marta. Nalahelo biby rozy satria nimaty anadahin-drozy iny. Tena tea an-drozy Jesosy. Ka lafa nimaty Lazarosy, le nandeha ta Betania any ie satria tany ty nipetrahani-Maria noho Marta. Lafa nireni-Marta hoe niavy Jesosy, le nilay nana aminy any ie. Mba eritsereto moa ty alahelony lafa ie nivola hoe: “Laha teto lahy iha Tompo, le tsy ho nimaty ty anadahiko.” (Jaona 11:21) Tsiela tafarani-zay, nahita ani-Maria noho ty olo hafa nitany Jesosy, farany ‘nilatsaky koa ty ranomasony.’​—Vakio Jaona 11:32-36.

6. Nanino Jesosy ro nitany tamy fotoa toy?

⁶ Nanino Jesosy ro nitany tamy fotoa io? Hoy ty boky Fandalinana ny Soratra Masina: “ ‘Nalahelo biby’ ie lafa naharè hoe nimaty Lazarosy. Nalahelo koa ie lafa nahita ty alaheloni-anabavini-Lazarosy rey, ka ‘nilatsaky ty ranomasony.’ ” * Mety nieritseritsy ty fijaleani-namany tsy foiny io Jesosy satria tsy maintsy nijalijaly tse Lazarosy tamy ie narary iny. Mety niazony sary an’eritseritsy koa hoe nanao akory Lazarosy lafa nahay hoe tsy ho ela ie le ho maty. Azo antoky fa nampitany ani-Jesosy koa ty nahita ani-Maria noho Marta nalahelo marè ani-anadahin-drozy iny. Tsy maintsy nalahelo manahaky ani-zay iha lafa nimaty ty namanao na ty raiky amy longonao. Ndao tsika handiniky raha telo azonao ianara baka amy tantara io.

7. Ino ty raha haintsika mikasiky ani-Jehovah lafa Jesosy nitany ani-namany iny?

⁷ Haini-Jehovah ty raha tsapanao. “Tena mitovy toetsy” amy Babany Jesosy. (Heb. 1:3, f.a.p) Lafa Jesosy nitany le  nasehony baka amy raha zay hoe manao akory ty fihetseham-poni-Jehovah lafa misy longontsika maty. (Jaona 14:9) Laha nimaty, ohatsy, ty olo teanao le matokisa fa tsy hoe mahita ty alahelonao avao Jehovah. Tsapany koa ty raha mahazo anao ka tena malahelo anao ie. Teany ty hitaha ani-fonao torotoro iny.​—Sal. 34:18; 147:3.

8. Manino tsika ro afaky matoky fa hovelomini-Jesosy longontsika nimaty rey?

⁸ Ta hamelo ani-longonao nimaty iny Jesosy. Taloha kelikelini-nampitany ani-Jesosy iny, le nanome toky ani-Marta ie hoe: “Ho velo ty anadahinao.” Nino ani-Jesosy Marta. (Jaona 11:23-27) Mpanomponi-Jehovah Marta ka nihainy hoe fa nisy olo nimaty taloha tany fe nivelomin-dry Elia noho Elisa mpaminany. (1 Mpanj. 17:17-24; 2 Mpanj. 4:32-37) Mety nireny koa hoe fa namelo olo nimaty Jesosy. (Lioka 7:11-15; 8:41, 42, 49-56) Afaky matoky koa zany iha fa mbo ho hitanao longonao nimaty rey. Haintsika hoe nitany Jesosy lafa nampionona ani-namany nalahelo rey. Ka ino ty ianarantsika baka amy zay? Hitantsika baka amin’iny hoe tena ta hamelo ty maty ie!

9. Laha ta hanahaky ani-Jesosy iha, ino ty azonao atao mba hanampea ty olo maty longo? Manomeza ohatsy.

⁹ Afaky manampy ty olo maty longo iha. Tsy hoe nitany niaraky tamy Marta noho Maria avao Jesosy fa nijanjy noho nampionona an-drozy koa. Afaky manao ho zay amy ze olo maty longo koa tsika. Hoy Dan, anti-panahy mipetraky an’Ostralỳ any: “Tena nila fanampea aho lafa nimaty valiko. Maro ty mpivaly avy amiko eo sanandro sady parè hijanjy ahy avao. Nengan-drozy aho hampiboraky ty alaheloko, le tsy nampanino an-drozy aho ndre nitany. Nanampy ahy tamy asako koa rozy, ohatsy hoe nanasa tomabily, nanao bazary, noho niketriky. Nanao ani-zay avao rozy lafa zaho manaly tsy afaky nanao ani-raha reo. Niaraky nivavaky tamiko matetiky iaby rozy. Natoron-drozy hoe tena nama rozy sady manahaky rahalahy ‘natao hanampy amy fotoa sarotsy.’ ”​—Ohab. 17:17.

10. Ino ty raha niseho voaresaky amy Lioka 19:36-40?

¹⁰ Niavy ta Jerosalema ao Jesosy tamy 9 Nisana tao 33. Lafa narìny ani-tanà iny ie, le nivoritsy ty vahoaky sady namelatsy lamba talohany teo. Nasehon-drozy tamy zay hoe naneky azy ho Mpanjaka rozy. Nifalifaly biby ty olo tamy fotoa io. (Vakio Lioka 19:36-40.) Fe toy ty raha niseho tafarani-zay: “Nahajilo ani-tanà iny [Jesosy], ka nitany azy.” Mety nitampoky ani-mpianatsiny rey raha zay. Fa nanino ie ro nitany? Satria nivola ty raha hahazo ty olo mipetraky a Jerosalema ao tsy ho ela ie.​—Lioka 19:41-44.

11. Nanino Jesosy ro nitany ty olo nipetraky ta Jerosalema tao?

¹¹ Nalahelo Jesosy satria hainy fa tsy haneky ty hafatsy mikasiky Fanjakà iny ty ankamaroani-Jiosy. Hanao akory ty hiafaran-drozy? Ho ravà Jerosalema, le ze Jiosy tsy maty amy fandravà io hatao sesitany ka ho lasa andevo. (Lioka 21:20-24) Mampalahelo fa nifanaraky tamy raha nivolanini-Jesosy iny mihintsy ty raha niseho. Nimaro vatany ty olo nandà azy. Manao akory ty fandrambesan’olo ty hafatsy mikasiky Fanjakà iny mbaminareo mbeny? Vitsivitsy avao va ty maneky hianatsy fahamarina? Laha zay ie, ino ty azonao ianara baka amy Jesosy tamy ie nitany ani-tanà raiky aminy rey? Misy raha telo retoa ianarantsika baka aminy.

12. Ino ty raha haintsika mikasiky ani-Jehovah lafa Jesosy nitany ani-tanà raiky aminy rey?

¹² Midary olo Jehovah. Hitantsika baka amy Jesosy nitany iny hoe tena tea olo Jehovah. Mivola ty Baiboly hoe: “Tsy misy teany ho ripaky  ty olo, fa teany hibebaky iaby.” (2 Pet. 3: 9) Asehontsika henanizao hoe tea ty olo itoriantsika koa tsika laha miezaky manampy an-drozy hianatsy mikasiky ty vaovao soani-Fanjakà iny avao.​—Mat. 22:39. *

13-14. Akory ty nampisehoani-Jesosy hoe niferinay olo ie, le ino ty azontsika atao laha teantsika ty hana ani-toetsy io?

¹³ Niasa mafy Jesosy lafa nanompo. Nasehony hoe tea olo ie ka tsy nieny ie fa niezaky nampianatsy an-drozy avao. (Lioka 19:47, 48) Nanino Jesosy ro nanao ani-zay? Satria niferinesany rozy. Nisy fotoa, ohatsy, nimaro biby ty olo ta hijanjy ani-Jesosy, ka “tsy afaky nihina iaby” rozy amy mpianatsiny rey. (Mar. 3:20) Ndre haly aza ty andro, le niparè avao ie hiresaky tamy lahilahy raiky ta hijanjy azy zay. (Jaona 3:1, 2) Tsy nilasa mpianatsini-Jesosy ty ankamaroan’olo nijanjy azy rey. Fe nahazo fampianara mazava soa ze nijanjy azy. Teantsika koa henanizao laha maharè ty vaovao soa ty olo iaby. (Asa. 10:42) Fe mba hahavitantsika ani-zay, le mila manovaova ty fomba fitoriantsika tsika.

¹⁴ Miezaha hanao fanovà lafa ilà raha zay. Laha mitory amy fotoa noho lera mahazatsy antsika avao tsika, le mety tsy hifankahita amin’olo sisany maniry hianatsy fahamarina. Hoy Matilda, ranabavy mpisava lala zay: “Miezaky manovaova ty fotoa itorianay zahay morovaly. Amy maraindray rey zahay mitory amy pilasy fiasàn’olo. Lafa midỳ, mampiasa tablò fitoria zahay satria maro olo ty an-dala eny. Mitory santrano amy zay zahay lafa hariva, satria tratsy an-tranony iaby ty olo amy fotoa rey.” Tsy hoe lafa metimety amintsika avao fotoa iny zay vo parè hitory tsika. Tokony ho parè hanovaova ty fandaharam-potoa itoriantsika tsika laha zay ro hahitantsika olo maro. Laha manao ani-zay tsika, le afaky matoky hoe ho falifaly Jehovah.

15. Laha hentea ty Lioka 22:39-44, ino ty raha niseho tamy haliky farany niainani-Jesosy tan-tany etoy?

¹⁵ Tamy halikini-14 Nisana tao 33, le nandeha tamy zaridaini-Getsemane any Jesosy. Nampiboraky ty am-pony ao tamy Jehovah ie lafa tany. (Vakio Lioka 22:39-44.) ‘Nisolosoloho’  mihintsy Jesosy tamy fotoa zay, sady “nitaraintaray marè noho nirohaky ty tany.” (Heb. 5:7) Ino ty raha nangatahini-Jesosy tamy haliky farany talohani-hahafatesany io? Nangataky hery ie mba hahafahany tsy hivaliky amy Jehovah avao noho hanatanteraky ty sitrapony. Naharè ty fisolohoa nataoni-Anakilahiny io Jehovah ka naniraky anjely mba hampahery azy.

16. Nanino Jesosy ro nitany lafa ie nivavaky tamy zaridaini-Getsemane tao?

¹⁶ Nitany Jesosy lafa nivavaky tamy zaridaini-Getsemane tao satria nieritseritsy ty olo hoe nanivativa ty anara-Ndranahary ie. Hainy fa tena mila tsy mivaliky ie sady mila manamarina ty anarani-Babany. Laha miatriky raha sarotsy mety hahavy anao hivaliky amy Jehovah iha, ino ty azonao ianara baka tanini-Jesosy iny? Ndao ndraiky tsika handiniky fianara telo fanampiny.

17. Namaly ty fisolohoa nataoni-Jesosy Jehovah, ino ty ianarantsika mikasiky azy baka amy zay?

¹⁷ Mijanjy ty fisolohoa ataonao Jehovah. Nijanjy ty fisolohoa nataoni-Jesosy Jehovah. Ino ty antony? Satria tena tsy ta hivaliky amy Babany mihintsy ie sady ta hiaro ty anarany. Laha tena tsy ta hivaliky amy Jehovah koa tsika sady ta hiaro ty anarany, le hamaly ty vavaky ataontsika ie lafa mila fanampea aminy tsika.​—Sal. 145:18, 19.

18. Manino ro azo volany hoe nama soa fanahy Jesosy sady mahatsapa ty raha mahazo antsika?

¹⁸ Tsapani-Jesosy ty raha mahazo anao. Lafa tsika miasa loha, le teantsika laha misy namantsika mahatsapa ty raha mahazo antsika. Vomaiky teantsika laha olo fa niatriky raha mitovy amy mahazo antsika iny ro eo. Nama manahaky ani-zay mihintsy Jesosy. Hainy hoe manao akory mahatiaro malemy noho mila fanampea zao. Hainy koa ty raha mampalemy antsika, ka ataony azo antoky hoe mahazo fanampea “amy fotoa mety” tsika. (Heb. 4:15, 16) Tsy nandà Jesosy lafa nisy anjely nanampy azy tamy zaridaini-Getsemane ao. Tokony ho parè koa tsika handramby ze fanampea ameani-Jehovah antsika, ndre amy boky zay, na video, na lahateny, na fitsidiha ataoni-anti-panahy na Kristiana hafa matotsy.

19. Ino ty azonao atao mba hahazoa hery lafa iha miatriky raha sarotsy mety hahavy anao hivaliky amy Ndranahary? Manomeza ohatsy.

¹⁹ Hameani-Jehovah anao “ty fiadana-Ndranahary.” Manao akory ty anomezani-Jehovah  hery antsika? Lafa mivavaky tsika, le hahazo “ty fiadana-Ndranahary, azy bevata marè mandilatsy ze raha iaby takatsini-sain’olombelo iny.” (Fil. 4:6, 7) Hanampy antsika ho kalma noho hahay handiniky fiadana ameani-Jehovah io. Zay mihintsy ty raha niainani-ranabavy Luz. Hoy ty asany: “Nahatiaro mangiky aho matetiky. Lasa nieritseritsy amy zay aho kindraiky hoe tsy tea ahy Jehovah. Fe lafa nahazo ahy raha zay, le avy le niresaky tamy Jehovah aho. Nambarako azy ty raha tsapako. Niazoazoko amy zay ty aiko bakeon’iny. Hitako hoe tena nanampy ahy ty vavaky.” Hitantsika baka amy tantarani-ranabavy io fa afaky manampy antsika hilamin-tsay vatany ty vavaky.

20. Ino iaby ty raha nianarantsika baka amy tanini-Jesosy rey?

²⁰ Tena nampahery antsika noho nandrambesantsika fianara tanini-Jesosy rey! Nianarantsika fa mila manampy ty namantsika maty longo tsika sady mila matoky hoe hanampy antsika Jehovah noho Jesosy lafa maty ty olo teantsika. Tokony ho soa fanahy avao tsika lafa mitory noho mampianatsy satria mampiseho ani-toetsy soa io Jehovah Ndranahary noho Jesosy Kristy. Nampahery antsika koa ty nahay hoe mahatsapa ty raha mahazo antsika Jehovah noho Anakilahiny teany iny. Hain-drozy koa ty raha mampalemy antsika sady ta hanampy antsika hiaritsy rozy. Nampitamà Jehovah fa ‘hofafàny ty ranomaso iaby amy ty masontsika.’ (Apok. 21:4) Fe zisiky hahatanteraky ani-raha soasoa zay, loniky lahy tsika hanoriky ani-raha nianarantsika rey avao.