LAHATSORATSY FIANARA 4
Manino Tsika ro Manatriky Fahatiarova?
“Anovo avao zao ho fahatiarova ahy.”—LIOKA 22:19.
HIRA 20 Nomenao Anay Ilay Zanaka Malalanao
HO HITANAO ATO *
1-2. a) Lafa amy fotoa manao akory tsika ro mahatiaro ty longontsika nimaty? b) Ino ty raha nataoni-Jesosy tamy haliky talohani-nahafatesany?
NDRE fa ela aza ty nahafaty ty olo teantsika, le tsy miala an-tsaintsika ao avao ie. Mieritseritsy azy avao tsika, sirtò moa lafa avy daty mifanandrify amy nahafatesany iny santao.
2 Miaraky mivory amin’olo an-tapitrisany amy tany toy iaby tsika santao mba hankalaza ty nahafatesan’olo raiky tena teantsika, tsy ia zay fa Jesosy Kristy. (1 Pet. 1:8) Manao ani-zay tsika mba hahatiarova azy, satria nanao soro ty ainy ie mba hanafaha antsika amy ota noho fahafatesa. (Mat. 20:28) Sady teani-Jesosy koa moa laha mahatiaro ty nahafatesany ty mpanori-dia azy. Tamy haliky talohani-nahafatesany iny, le nanao sakafo manoka niaraky tamy mpianatsiny rey ie sady nandidy hoe: “Anovo avao zao ho fahatiarova ahy.” *—Lioka 22:19.
3. Ino ty hodinihintsika amy lahatsoratsy toy ato?
3 Mitamà hiay an-danitsy any ty vitsivitsy amin’olo manatriky ty Fahatiarova ty nahafatesani-Kristy. Fe an-tapitrisany amin-drozy ro mitamà hiay an-tany etoy. Hodinihintsika amy lahatsoratsy toy ato hoe manino tsika ro samby manatriky Fahatiarova santao. Ho hitantsika koa hoe ino ty soa ho azontsika laha manatriky ani-raha io. Fe ndao tse hohenteantsika ty antony sisany mahavy ty voahosotsy hanatriky Fahatiarova.
MANINO TY VOAHOSOTSY RO MANATRIKY FAHATIAROVA?
4. Manino ty voahosotsy ro mihina amy mofo noho divaini-Fahatiarova?
4 Mihina mofo noho divay ty Kristiana voahosotsy santao lafa manatriky Fahatiarova. Ino ty antony? Mba hamalea ani-zay, le eritsereto ty raha niseho tamy haliky farany niainani-Jesosy tan-tany etoy. Lafa nivita ty Paska, le nanao fankalazà hafa kaihy hoe Sakafo Harivani-Tompo Jesosy. Nameany mofo noho divay apostoliny 11 tsy nivaliky rey, le bakeo nivolaniny rozy mba hihina noho hino tamy raha rey. Niresaky tamin-drozy mikasiky fifanekea na fifanaraha roe Jesosy, tsy ino zay fa ty fifanekea vaovao noho ty fifanekea amy Fanjakà iny. * (Lioka 22:19, 20, 28-30) Vokatsini-fifanekea reo, le ho lasa mpanjaka noho mpisoro an-danitsy any apostoly rey noho ty olo hafa vitsivitsy. (Apok. 5:10; 14:1) Ze tafilitsy anatini-fifanekea iny avao ro mahazo mihina amy mofo noho divaini-Fahatiarova, zany hoe ty sisa tavela amy voahosotsy. *
5. Ino ty raha haini-voahosotsy reo mikasiky ty raha tamanin-drozy?
5 Misy antony hafa koa toy mahavy ty Kristiana voahosotsy ho tea manatriky Fahatiarova: Afaky mieritseritsy soa mikasiky ty raha tamanin-drozy rozy amy fotoa io. Tena miavaky ty raha nampitamanini-Jehovah an-drozy. Ho lasa tsy mety maty noho tsy mety lo rozy lafa an-danitsy any, sady hiaraky manjaka amy Jesosy Kristy noho ty voahosotsy hafa anisani-144 000. Fa ty tena bevata marè le hoe hahita ani-Jehovah Ndranahary rozy! (1 Kor. 15:51-53; 1 Jaona 3:2) Haini-voahosotsy reo hoe nahazo ani-tombontsoa miavaky an-danitsy any io rozy. Fe tokony tsy hivaliky mihintsy rozy zisiky mahafaty an-drozy laha tean-drozy ty hilitsy an-danitsy any. (2 Tim. 4:7, 8) Falifaly biby voahosotsy reo lafa mieritseritsy ty raha tamanin-drozy. (Tit. 2:13) Ka manao akory ty “aondry hafa”? (Jaona 10:16) Ino koa ty antony mahavy an-drozy manatriky Fahatiarova?
MANINO TY AONDRY HAFA RO MANATRIKY FAHATIAROVA?
6. Manino ty aondry hafa ro manatriky Fahatiarova santao?
6 Manatriky Fahatiarova ty aondry hafa, fe tsy mihina amy mofo noho divay rey rozy fa manatriky avao. Tamy 1938 ty olo mitamà hiay an-tany etoy ro nasà voalohany hanatriky Fahatiarova. Hoy ty Tilikambo Fiambena 1 Marsa 1938: “Tena mety soa laha manatriky noho mandiniky soa ty raha atao amy fivoria io ty [aondry hafa]. ... Tokony ho falifaly koa rozy amy fotoa io.” Eritsereto, ohatsy, lafa amy aniversera mariazy rey. Miaraky falifaly amy mpivaly rey ty naman-drozy nasan-drozy. Manahaky ani-zay koa ty aondry hafa. Tena tean-drozy ty manatriky Fahatiarova santao.
7. Manino ty aondry hafa ro tea mijanjy lahateny Fahatiarova?
7 Mieritseritsy soa ty raha tamanin-drozy koa ty aondry hafa. Fa tsy linin-drozy, ohatsy, ty lahateny Fahatiarova. Ty tapany bevata amy lahateny io miresaky ty raha hataoni-Kristy noho mpiaraky manjaka aminy 144 000 rey ho ani-ze olombelo tsy mivaliky, amy Fanjakà Arivo Tao. Hiaraky amy Jesosy Mpanjaka azy 144 000 rey ka hanova ani-tany toy ho paradisa noho hanampy ty olombelo ho lasa lavorary. Falifaly biby olo an-tapitrisany manatriky Fahatiarova rey lafa mandiniky ty hahatanteraky ty faminania mikasiky ty hoavy amy Baiboly ao, anatini-zay ohatsy ty Isaia 35:5, 6; 65:21-23; noho Apokalypsy 21:3, 4. Lafa mangalaky sary an’eritseritsy ty vatany miaraky amy ty longony amy tontolo vaovao ao rozy, le vomaiky matoky ty raha tamanin-drozy sady tapa-kevitsy tsy hieny fa hanompo ani-Jehovah avao.—Mat. 24:13; Gal. 6:9.
8. Ino koa ty antony mahavy ty aondry hafa manatriky Fahatiarova?
8 Mbo misy antony hafa koa mahavy ty aondry hafa manatriky Fahatiarova. Tean-drozy haseho hoe tea noho manoha ty voahosotsy rozy. Fa nivola ty Safà-Ndranahary fa tena hiaraky miasa ty voahosotsy noho azy mitamà hiay an-tany etoy rey. Amy fomba akory? Ndao tsika handiniky ohatsy vitsivitsy.
9. Manao akory ty fandrambesani-aondry hafa ty voahosotsy laha hentea ty faminania amy Zakaria 8:23?
9 Vakio Zakaria 8:23. Miresaky ty raha tsapani-aondry hafa amy rahalahy noho anabavin-drozy voahosotsy rey faminania soasoa io. Ty safà hoe “Jiosy raiky” noho “aminareo” le samby manondro ty sisa voahosotsy. (Rom. 2:28, 29) Ty “folo lahy baka amy fivolana iabini-firenena reo” amy zay manondro ty aondry hafa. ‘Mitanjaky’ ty akanjoni-voahosotsy rozy, zany hoe tsy mivaliky fa miaraky amin-drozy amy fivavaha marina ao avao. Asehoni-aondry hafa zany fa mivahatsy marè amy voahosotsy reo rozy lafa manatriky eo amy halikini-Fahatiarova iny.
10. Ino ty nataoni-Jehovah mba hahatanteraky ty faminania amy Ezekiela 37:15-19, 24, 25 ao?
10 Vakio Ezekiela 37:15-19, 24, 25. Mba hahatanteraky ani-faminania io, le nataoni-Jehovah ze hahavy ty voahosotsy noho ty aondry hafa hiaraky miasa marìny. Miresaky tapa-kazo roe faminania io. Sahala amy tapa-kazoni-“Joda” (zany hoe foko nivoafily hiaviani-mpanjakan’Israely) azy mitamà hiay an-danitsy any rey, le sahala amy tapa-kazoni-“Efraima” azy mitamà hiay an-tany etoy rey. * Haharoni-Jehovah amy zay antokon’olo roe reo mba ho lasa “tapa-kazo raiky.” Midika raha zay fa hiaraky manompo ambany fahefàni-Jesosy Kristy Mpanjakan-drozy eo rozy. Manatriky Fahatiarova ty voahosotsy noho ty aondry hafa santao, fe tsy misaraky rozy ka hoe lasa antokony roe, fa “andiany raiky” ambany fahefàni-‘mpiarakandro raiky.’—Jaona 10:16.
11. Akory ty ampisehoani-“aondry” resahy amy Matio 25:31-36, 40 ao reo fa tena manoha ty rahalahini-Kristy rozy?
11 Vakio Matio 25:31-36, 40. Tsy ia “aondry” resahy amy fanohara io fa ze olo hita fa marina amy fotoani-farany. Mitamà hiay an-tany etoy rozy. Mbo rozy avao zany aondry hafa io. Tsy mivaliky rozy fa manoha ty sisa tavela amy rahalahini-Kristy avao ka manampy an-drozy hanatanteraky andraikitsy bevata, tsy ino zay fa ty asa fitoria noho fampianara atao amy tany toy iaby.—Mat. 24:14; 28:19, 20.
12-13. Ino koa ty raha sisany ataoni-aondry hafa mba hampisehoa hoe tena manoha ty rahalahini-Kristy rozy?
12 Misy ezaky manoka atao santao mba hanasà olo ho amy Fahatiarova. Atao herinandro vitsivitsy alohani-Fahatiarova raha io. Saky atao ezaky manoka io le manao ze fara herin-drozy ty aondry hafa mba handrambesa anjara amy raha io. Asehon-drozy baka amy zay hoe manoha ty rahalahini-Kristy rozy. (Henteo ty efajoro hoe “ Ino ty Raha Eritseretinao Hatao amy Vanim-potoani-Fahatiarova?”) Ataon-drozy azo antoky koa hoe fa parè iaby ty raha ilà amy Fahatiarova, ndre tsy misy voahosotsy mihina amy mofo noho divay iny aza ty amy fiangona misy an-drozy. Tena falifaly ty aondry hafa manampy ty rahalahini-Kristy amy raha manahaky ani-reo. Haini-aondry reo fa amy Jesosy, le rambesiny sahala hoe natao taminy mihintsy ty raha ataon-drozy ho ani-rahalahiny voahosotsy reo.—Mat. 25:37-40.
13 Mbo misy antony hafa koa mahavy ty voahosotsy noho ty aondry hafa manatriky Fahatiarova. Ino iaby zay?
MANINO TSIKA IABY RO MANATRIKY FAHATIAROVA?
14. Akory ty nampisehoani-Jehovah noho Jesosy hoe tena tean-drozy tsika?
14 Ankasitrahantsika ty fitiava nasehoni-Jehovah noho Jesosy antsika. Maro ty fomba nampisehoani-Jehovah ty fitiavany antsika, fe raiky toy ty tena miavaky amin-drozy iaby. Nalefany an-tany etoy Anakilahiny toka iny mba hijalijaly noho ho maty ho antsika. (Jaona 3:16) Nasehoni-Jesosy koa hoe tena teany tsika ka niparè hanome ty ainy ho antsika ie. (Jaona 15:13) Tsy ho voavalintsika mihintsy ty fitiava nasehoni-Jehovah noho Jesosy ho antsika. Fe afaky asehontsika amy ty fomba fiainantsika sanandro hoe mankasitraky an-drozy tsika. (Kol. 3:15) Manatriky Fahatiarova koa tsika satria teantsika ty hieritseritsy ty fitiavan-drozy antsika sady teantsika haseho fa teantsika rozy.
15. Manino ro tena lafovily amy voahosotsy noho ty aondry hafa ty vilim-panavota?
15 Tena ankasitrahantsika ty vilim-panavota. (Mat. 20:28) Lafovily amy voahosotsy reo ty vilim-panavota satria io ro mahavy an-drozy hahazo ani-raha soasoa tamanin-drozy iny. Nampiseho finoa ty sorom-panavota nataoni-Kristy rozy ka nambarani-Jehovah ho marina sady natsangany ho anany. (Rom. 5:1; 8:15-17, 23) Tena ankasitrahani-aondry hafa koa ty vilim-panavota. Mino ty sorom-panavota nataoni-Kristy rozy ka manjary malio ty fahità-Ndranahary an-drozy. Lasa afaky manao fanompoa masy ho azy rozy sady mitamà ho tafaboaky velo “amy fijalea bevata.” (Apok. 7:13-15) Ty fanatreha Fahatiarova santao zany ro fomba raiky ampisehoani-voahosotsy noho ty aondry hafa hoe ankasitrahan-drozy ty vilim-panavota.
16. Ino koa ty antony hafa mahavy antsika manatriky Fahatiarova?
16 Manatriky Fahatiarova koa tsika satria ta hanoriky ty raha nivolanini-Jesosy. Ndre mitamà hiay an-danitsy any tsika ndre ho an-tany etoy, le teantsika kiraidraiky ty hanoriky ani-didy nivolanini-Jesosy iny. Hoy ty asany tamy haliky nanaovany Fahatiarova iny: “Anovo avao zao ho fahatiarova ahy.”—1 Kor. 11:23, 24.
INO TY SOA HO AZONTSIKA LAFA MANATRIKY FAHATIAROVA?
17. Manino ty Fahatiarova ro manampy antsika hifandramby marìny amy Jehovah?
17 Lasa mifandramby marìny amy Jehovah tsika. (Jak. 4:8) Nianarantsika teo hoe manampy antsika hieritseritsy ty raha nampitamanini-Jehovah antsika ty Fahatiarova sady mahavy antsika hametsivetsy ty fitiava bevata nasehony antsika. (Jer. 29:11; 1 Jaona 4:8-10) Laha mifantoky avao amy ty raha tamanintsika amy hoavy noho ty fitiava tsy miovaova aseho-Ndranahary amintsika tsika, le vomaiky hitombo ty fitiavantsika ani-Jehovah sady ho lasa namany marìny azy tsika.—Rom. 8:38, 39.
18. Voatosiky hanao ino tsika lafa mametsivetsy ty modelini-Jesosy?
18 Lasa ta hanahaky ty modelini-Jesosy tsika. (1 Pet. 2:21) Andro vitsivitsy alohani-Fahatiarova, le mifantoky amy tantarani-Jesosy amy Baiboly ao tsika, anatini-zay ty herinandro farany niainany tan-tany etoy, ty nahafatesany, noho ty nameloma azy. Amy hariva anaova ani-Fahatiarova iny amy zay tsika, maharè lahateny mampitiaro antsika ty fitiava nasehoni-Jesosy antsika. (Efes. 5:2; 1 Jaona 3:16) Tena nahafoy ty vatany Jesosy. Ka lafa tsika mamaky noho mametsivetsy ani-raha zay, le voatosiky ‘hanahaky ty fomba fiainani-Jesosy koa.’—1 Jaona 2:6.
19. Akory ty hijanonantsika amy fitiava-Ndranahary?
19 Vomaiky tsika ho tapa-kevitsy hijano amy fitiava-Ndranahary avao. (Joda 20, 21) Mijano amy fitiava-Ndranahary ao tsika laha manao ze fara herintsika mba hanoriha ty safàny, hanamasina ty anarany, noho hampifalifalea ty fony. (Ohab. 27:11; Mat. 6:9; 1 Jaona 5:3) Lafa manatriky Fahatiarova tsika le vomaiky ho tapa-kevitsy hana fomba fiaina soa avao sanandro. Sahala manao ho zao amy Jehovah tsika amy zay hoe: ‘Ta hijano amy fitiavanao ao avao aho Jehovah!’
20. Ino iaby ty antony soa mahavy antsika manatriky Fahatiarova?
20 Ndre mitamà hiay zisiky farany an-danitsy any tsika ndre ho an-tany etoy, le misy antony soa mahavy antsika manatriky Fahatiarova. Lafa miaraky mivory tsika santao amy fotoa io, le mahatiaro ty nahafatesan’olo teantsika iny, tsy ia zay fa Jesosy Kristy. Fa ty tena bevata marè, tiarontsika hoe tena tea antsika Jehovah kanao nanome ani-Anakilahiny iny ho vilim-panavota. Hatao amy harivani-Zoma 15 Avrily 2022 ty Fahatiarova amy tao toy. Tena teantsika Jehovah noho Anakilahiny iny. Ka lafa avy ty Fahatiarova ty nahafatesani-Jesosy, le tsy tokony hisy raha bevata amintsika mandilatsini-hoe manatriky ani-fotoa io.
HIRA 16 Derao i Jehovah fa Lasa Mpanjaka Ilay Zanany
^ Fa tsy linintsika iaby ty hanatriky Fahatiarova santao ndre mitamà hiay an-danitsy any tsika ndre ho amy paradisa an-tany etoy. Fa manino tsika ro manatriky fahatiarova? Ino ty soa azontsika baka amy raha zay? Handiniky antony baka amy Soratsy Masy ao tsika amy lahatsoratsy toy ato.
^ Ho zao koa ty nandikà ani-safà reo amy Baiboly Protestanta: “Zao ro anovonareo ho fahatiarova ahy”, le amy Baiboly Malagasy: “Zao ro anovo ho fahatiarova ahy.”
^ Laha teanao ty hahita fanazavà fanampiny mikasiky fifanekea vaovao noho fifanekea amy Fanjakà iny, le henteo ty lahatsoratsy hoe “ ‘Ho Fanjaka-mpisorona’ Ianareo” amy Tilikambo Fiambena 15 Oktobra 2014, p. 15-17.
^ FANAZAVÀ: Sisa voahosotsy ro ikaiha ty Kristiana voahosotsy mbo velo an-tany etoy.
^ Laha teanao ty hahita fanazavà fanampiny amy faminania mikasiky tapa-kazo roe resahini-Ezekiela toko faha-37, le henteo ty “Fanontaneani-Mpamaky” amy Tilikambo Fiambena Ziè 2016, p. 31-32.