1. Ino ty raha sarotsy nahazo ani-Davida?

 NILAY Davida satria ta hamono azy Saoly, mpanjaka nahery tamy Israely teo. Nisy fotoa Davida nila raha hohany, le nijano tamy tanà atao hoe Noba zay ie ka nangataky mofo limy tamy Ahimeleka. (1 Sam. 21:1, 3) Tafarani-zay ie noho lahilahy niaraky taminy rey nivony tanaty lakato. (1 Sam. 22:1) Manino Davida ro niazon-draha manahaky ani-zay?

2. Ino ty raha tena raty nataoni-Saoly? (1 Samoela 23:16, 17)

² Nialona ani-Davida Saoly satria maro ty olo nitea ani-Davida noho nanome voninahitsy azy. Davida moa lahy nandresy avao saky nisy aly ka! Haini-Saoly koa fa nandà azy Jehovah satria tsy nanoriky ty safàny ie, le Davida ro nifilini-Jehovah ho mpanjaka. (Vakio 1 Samoela 23:16, 17.) Fe Saoly moa mbo nimpanjakan’Israely tamy zay, le nana maramila maro ie sady nimaro koa ty olo nanoha azy. Farany Davida nilỳ mbao avao mba hitavanany ty ainy. Tena nieritseritsy va Saoly hoe ho vitany ty hisaka a Ndranahary tsy hanendry ani-Davida ho mpanjaka? (Isaia 55:11) Tsy mivola ani-zay aloha ty Baiboly. Fe zao ty raha raiky azontsika antoky: Nanao raha hahavy azy hiliran-doza Saoly satria ze olo manohitsy a Ndranahary tozoro azon-draha avao!

3. Nanao akory Davida ndre niatriky raha sarotsy?

³ Olo niambany Davida. Tsy ie ro nifily ty vatany mba ho lasa mpanjakan’Israely fa Jehovah. (1 Sam. 16:1, 12, 13) Tena nihejini-Saoly Davida. Fe tsy nanome tsiny ani-Jehovah mihintsy Davida amy loza nahazo azy rey. Tsy mba nitaray koa ie hoe kelikely avao ty haniny le tsy misy pilasy ivonia ie fa anaty lakato any avao. Mifanohitsy amy zay aza ty nataony. Mety ho tamy ie nivony  tanaty lakato io ao mihintsy nanoratany ani-hira nangalantsika andinin-teny fototsy toy hoe: “Ze mila ani-Jehovah tsy hijaly raha soa.”​—Sal. 34:10.

4. Ino iaby ty fanontanea hodinihintsika, le manino ro vatan-draha fanontanea reo?

⁴ Mpanomponi-Jehovah maro henanizao ro tsy mahita sakafo ampy na tsy mana ze raha tena ilàn-drozy andavanandro. * Maro ty voakasikini-raha zay sirtò liani-nampisy ani-arety miparitaky toy. Vomaiky hihasarotsy ty raha iainani-mpanomponi-Jehovah arakaraky ty mampariny ty “fijalea bevata.” (Mat. 24:21) Ka soa zany laha haintsika ty valini-fanontanea efatsy retoa: Manino Davida ro azo volany hoe ‘tsy nijaly raha soa’? Manino tsika ro tokony hiezaky ho afa-po amy ze raha ananantsika? Manino tsika ro afaky matoky fa hikarakara antsika Jehovah? Le ino ty azontsika atao henanizao mba ho parè hiatriky ty raha hiseho amy hoavy?

5-6. Manino ty Salamo 23:1-6 ro manampy antsika hahay ty raha teani-Davida hovolany, lafa ie nivola hoe “tsy hijaly raha soa” ty mpanompo-Ndranahary?

⁵ Ino ty teani-Davida hovolany lafa ie nivola hoe “tsy hijaly raha soa” ty mpanomponi-Jehovah? Lafa Davida nanoratsy ty Salamo faha-23, le nivola raha mitovitovy amin’io ie. Afaky manampy antsika hahay ty raha teany hovolany zany salamo io. (Vakio Salamo 23:1-6.) Ho zao ty nanombohani-Davida ani-salamo io: “Jehovah ro Mpiarakandro ahy. Tsy hisy raha hijaleako.” Amy tohini-salamo io Davida nivola raha tena lafovily, anatini-zay ty raha soa maro nameani-Jehovah azy satria naneky ani-Jehovah ho Mpiarakandro azy ie. Nitariky azy amy “lalani-fahamarina” Jehovah, sady nanoha azy avao ndre tamy mora ndre tamy sarotsy. Haini-Davida fa hana problemo avao ie ndre apetrakini-Jehovah “amy pilasy feno akata maitso.” Mety hisy fotoa, ohatsy, ie ho kivy ka sahala hoe mandeha amy “sakasaka maìky biby” io. Mbo hana fahavalo koa ie. Fe Jehovah moa ro  Mpiarakandro ani-Davida ka ‘tsy misy loza hatahorany.’

⁶ Nametraky fanontanea tsika taloha teroy iny hoe: Manino Davida ro azo volany hoe ‘tsy nijaly raha soa’? Zao ty valiny: Nana ze raha iaby nilàny ie mba hahavy azy hihariny ani-Jehovah avao. Tsy hoe nila nana raha maro ie vo ho sambatsy. Niafa-po tamy ze raha nameani-Jehovah azy Davida. Ty raha tena nivatan-draha taminy le hoe nitahy azy Jehovah sady niaro azy.

7. Laha hentea ty Lioka 21:20-24, ino ty raha sarotsy natrehini-Kristiana nipetraky ta Jodia tany?

⁷ Hitantsika baka amy raha nivolanini-Davida reo hoe tena mila miamby soa tsika mba tsy ty hanana ro ho lasa vatan-draha marè amintsika. Marina fa manampy antsika ho falifaly ty raha ananantsika, fe tsy tokony ho raha rey ro ataontsika vatan-draha. Tena nila nahay soa ani-fahamarina bevata io ty Kristiana nipetraky ta Jodia any. (Vakio Lioka 21:20-24.) Nampitandrina an-drozy Jesosy hoe ho avy ty fotoa, le hisy ‘maramila hitoby manodidy ani-Jerosalema.’ Lafa miseho raha zay, le mila “milay am-bohitsy any” rozy. Ho avotsy rozy laha miala ani-tanà io, fe midika zay hoe ho maro ty raha hafoin-drozy. Hoy ty Tilikambo Fiambena tao maromaro lasa zay: “Nengan-drozy ty tondan-drozy noho ty tranon-drozy. Tsy nahoron-drozy ndre ty enta tan-tranon-drozy ao. Natoky ty fiarovani-Jehovah noho ty fanohanany rozy, ka ty fanompoa azy ro nataon-drozy voalohany, alohani-ze raha nety ho nivatan-draha tamin-drozy.”

8. Ino ty raha bevata azontsika ianara baka amy raha niseho tamy Kristiana ta Jodia any rey?

⁸ Ino ty raha bevata azontsika ianara baka amy raha niseho tamy Kristiana ta Jodia any rey? Mbo nivola Tilikambo Fiambena azy niresahintsika teo iny hoe: “Mety hisy fitsapà amy hoavy ka ho hita hoe manao akory ty fahitantsika ty raha ananantsika. Raha rey va ro tena vatan-draha amintsika, sa mbo vatan-draha mandilatsy ani-zay ty fanavota ho azoni-ze tsy mivaliky amy Ndranahary? Lafa avy ty farany, le mety hiatriky raha sarotsy noho hamoy raha tsika. Tsy maintsy mioma sandrany ho amy zay tsika, manahaky ty nataoni-Kristiana nilay baka a Jodia any rey.” *

9. Manino torohevitsini-Paoly ho ani-Kristiana hebreo iny ro mampahery anao?

⁹ Mba eritsereto tse hoe nanao akory Kristiana reo lafa nanenga ty raha iaby nananan-drozy, bakeo nanomboky fiaina vaovao tan-tany hafa any. Azo antoky fa tsy nimora tamin-drozy raha zay. Nila finoa rozy mba hahavy an-drozy hatòky hoe hanampy an-drozy hahazo ze raha ilàn-drozy Jehovah. Fe nisy raha afaky nanampy an-drozy. Limy tao talohani-nanaovani-Romanina rey arosaro ani-Jerosalema, le fa nanome torohevitsy tena soa ani-Kristiana hebreo reo apostoly Paoly. Hoy ty asany: “Atorò amy fomba fiainanareo hoe tsy tea drala nareo, le miezaha ho afa-po amy ze fa misy eo. Fa hoy ty asany: ‘Tsy hanenga anao mihintsy aho sady tsy hahafoy anao mihintsy.’ Le ho be herim-po tsika amy zay, ka hivola hoe: ‘Jehovah ro mpanampy ahy, ka tsy hatahotsy aho. Ino ty azon’olo atao amiko?’ ” (Heb. 13:5, 6) Azo antoky fa tsy nisarotsy tamy ze nandramby am-po ani-torohevitsini-Paoly io ty ho afa-po tamy ze kely nananan-drozy lafa tamy tanàn-drozy vaovao io any. Natoky rozy fa hanome ze raha tena ilàn-drozy Jehovah. Manome toky antsika koa raha nivolanini-Paoly reo hoe hanome ze raha ilàntsika avao Jehovah.

10. Ino ty nanampy ani-Paoly tsy hivaliky mihintsy?

¹⁰ Mitovy amy zay ty torohevitsy nameani-Paoly ani-Timoty, sady mbo mahasoa antsika  koa raha zay. Hoy ty asany: “Ka lafa manan-kany noho siky tsika, le ho afa-po amy rezay.” (1 Tim. 6:8) Midika va zay hoe tsy tokony hihina sakafo matsiro tsika, na hipetraky amy trano soasoa, na hivily siky vaovao matetitetiky? Tsy zay aloha ty teani-Paoly hovolany. Ta hivola ie hoe: Tokony ho afa-po amy ze raha ananantsika tsika. (Fil. 4:12) Zay ro nanampy ani-Paoly tsy hivaliky mihintsy. Ty fifandrambesantsika amy Ndranahary ro raha farani-ze lafovily ananantsika, fa tsy ty raha ananantsika.​—Hab. 3:17, 18.

11. Manino ty raha nivolanini-Mosesy tamy Israelita rey ro manampy antsika ho afa-po amy ze raha ananantsika?

¹¹ Mety tsy hitovy amy ty fahitani-Jehovah azy ty fahitantsika ty raha ilàntsika. Eritsereto, ohatsy, ty raha nivolanini-Mosesy tamy Israelita rey lafa rozy baka nikarikarioky 40 tao tan-diomonto any. Hoy ty asany: “Nitahy anareo Jehovah Ndranaharinareo tamy ze raha iaby nataonareo. Hainy soa fa nandeha nanivakivaky ani-liomonto bevata toy nareo. Nanampy anareo avao Jehovah Ndranaharinareo tanatini-40 tao zay, ka tsy nisy raha nijaleanareo.” (Deot. 2:7) Nameani-Jehovah Mana Israelita rey tanatini-40 tao mba hohanin-drozy. Tsy nidriatsy mihintsy ty sikin-drozy. Mbo azon-drozy nampiasà avao zany siky nandesin-drozy baka a Ejipta any rey. (Deot. 8:3, 4) Mety nisy tamy Israelita rey nieritseritsy hoe tsy niampy an-drozy raha rey, fe nampitiaro an-drozy Mosesy fa nana ze raha iaby nilan-drozy rozy. Tena ho falifaly Jehovah laha miezaky ho afa-po amy ze raha ananantsika tsika. Teany hahazo tavy ze raha ameany antsika tsika, ndre amy raha  tsotsotra aza. Teany ho haintsika koa hoe ie ro nanome antsika ani-raha rey.

12. Akory ty nampisehoani-Davida hoe natoky ani-Jehovah ie fa tsy niantehitsy tamy ty vatany?

¹² Nihaini-Davida fa tsy mivaliky Jehovah sady tena mikarakara ani-ze olo tea azy. Niatriky loza mahafaty Davida tamy ie nanoratsy ty Salamo faha-​34. Fe tena nanam-pinoa ie ka nivola hoe “mipetraky manodidy” azy “ty anjelini-Jehovah.” (Sal. 34:7) Mety nampitovizini-Davida tamy maramila mitoby amy pilasy raiky manara-maso fahavalo ty anjelini-Jehovah. Mpialy mahery Davida le fa nampitamà azy koa Jehovah hoe ho mpanjaka ie, fe tsy niantehitsy tamy fahaizany mampiasa pilatsy na sabatsy ie mba handresea fahavalo. (1 Sam. 16:13; 24:12) Niantehitsy tamy Ndranahary Davida. Natoky ie hoe ‘manavotsy ani-ze matahotsy Azy’ ty anjelini-Jehovah. Tsy afaky mitamà hahazo fiarova amy fomba mahagaga aloha tsika henanizao. Fe haintsika fa tsy hoe hijaly avao zisiky farany ty olo matoky ani-Jehovah.

13. Lafa hanafiky Goga baka a Magoga, manino tsika ro atao ho raha tsy misy mpiaro io, fe manino tsika ro tsy tokony hatahotsy? (Henteo sary amy fononi-gazety toy.)

¹³ Hiatriky fitsapà tsika afarafara ao. Ho hita amy zay laha tena matoky tsika hoe afaky miaro antsika vatany va Jehovah. Lafa hanafiky ty vahoaki-Ndranahary Goga baka Magoga, zany hoe ty firenena maromaro mitambatsy, le mety hieritseritsy tsika fa hahavita hamono antsika rozy. Amy zay mihintsy tsika ro mila matoky hoe mahavita manafaky antsika Jehovah. Ho sahala amy aondry tsy misy mpiaro io ty ho fahitani-firenena reo antsika. (Ezek. 38:10-12) Tsy mana fitaovam-pialia tsika sady tsy nianatsy aly. Hieritseritsy amy zay rozy hoe tsy ampy an-drozy tsika. Tsy hain-drozy hoe kay anjelini-Jehovah rey fa parè hiaro antsika. Fe tsika mahay satria manam-pinoa. Akory moa ty hahitan-drozy ani-anjely reo? Rozy tsy mino a Ndranahary. Tena ho tampoky an-drozy lafa hialy ho antsika ty tafikini-lanitsy!​—Apok. 19:11, 14, 15.

14. Ino iaby ty azontsika atao henanizao mba hahavy antsika ho parè hiatriky ty hoavy?

¹⁴ Ino ty azontsika atao sandrany henanizao mba hahavy antsika ho parè hiatriky ty hoavy? Voalohany, tsy tokony hataontsika vatan-draha marè amintsika ty raha ananantsika satria tsy maintsy hengantsika rey ndraiky andro any. Tokony ho afa-po amy ze raha ananantsika koa tsika sady tokony ho falifaly satria mifandramby amy Jehovah. Arakaraky ty ahaizantsika ani-Ndranaharintsika iny le vomaiky tsika ho resy lahatsy hoe afaky hiaro antsika ie lafa hanafiky Goga baka a Magoga.

15. Ino tamy ty raha nahazo ani-Davida tamy ie mbo nitanora ro nanampy azy hatòky hoe hanampy azy avao Jehovah?

¹⁵ Eritsereto koa hoe ino ty raha nanampy ani-Davida ka afaky manampy antsika ho parè hiatriky fitsapà. Nivola ie hoe: “Andramano le ho hitanao fa soa Jehovah. Sambatsy ty olo mialoky aminy.” (Sal. 34:8) Hitantsika baka amy safà reo ty antony nahaizani-Davida hoe afaky miantehitsy amy fanampeani-Jehovah ie. Matetiky Davida ro niantehitsy tamy Jehovah, le mbo tsy nandiso fanantenà azy mihintsy Ndranahariny io. Mbo nitanora, ohatsy, Davida tamy ie nialy tamy Filistina raiky be noho abo kaihy hoe Goliata zay, le zao ty nivolaniny tamy mpialy mahery io: ‘Hataoni-Jehovah resiko iha androany.’ (1 Sam. 17:46) Lafa nanompo ani-Saoly mpanjaka koa Davida tafara atoy, le niezaky nanao raha mba hamonoa azy Saoly, tsy indraiky avao fa imaro mihintsy. Fe ‘nanampy ani-Davida Jehovah.’ (1 Sam. 18:12) Natoky Davida hoe tsy maintsy hanampy azy hiatriky  ty raha manahira azy Jehovah, satria fa nanao ani-zay ie taloha.

16. Akory ty fomba ‘hanandramantsika’ ty hasoani-Jehovah?

¹⁶ Laha zatsy mila ty tari-dalani-Jehovah tsika henanizao, le vomaiky hatòky tsika hoe hanampy antsika ie amy hoavy. Mila manam-pinoa noho parè hiantehitsy amy Jehovah, ohatsy, tsika lafa mangataky andro tsy iasà amin’olo iasantsika soa ho afaky hanatriky fivoriambe, na mangataky mba hovà ty fandaharam-potoa iasantsika amy zay tsika ho afaky hanatriky ty fivoria iaby sady hanam-potoa maro hanaova fanompoa. Eritsereto amy zay hoe tsy maneky ty fangatahantsika mpampiasa iny le roasiny tsika. Hatòky va tsika hoe tsy hanenga na hahafoy antsika mihintsy Jehovah ka hanome ze raha tena ilàntsika avao? (Heb. 13:5) Maro ty Kristiana manompo amy fotoa iaby afaky mitantara amintsika ty raha niainany. Ho hitantsika hoe nanao akory ty fomba nanampeani-Jehovah an-drozy lafa tena nila ani-zay rozy. Tsy mivaliky vatany Jehovah.

17. Ino ty andinin-teny ho ani-tao 2022, le manino raha io ro mety soa?

¹⁷ Anilantsika eo avao Jehovah ka tsy misy antony hatahorantsika ty raha hiseho amy hoavy. Tsy hahafoy antsika mihintsy Ndranaharintsika iny, laha ty sitrapony ro ataontsika voaloha lista amy ty fiainantsika. Tena mila mioma sandrany tsika amy zay ho afaky hiatriky ty raha sarotsy hiseho amy hoavy noho hatòky hoe tsy hanenga antsika mihintsy Jehovah. Mba hampitiarova antsika ani-zay, le nifilìni-Filan-kevi-pitantana ty Salamo 34:10 mba ho andinin-teny ho ani-tao 2022. Zao ty volanini-andininy io: “Ze mila ani-Jehovah tsy hijaly raha soa.”