1. Ino ty raha nataoni-Jehovah ho anao?

AKORY ty nahavy anao ho lasa Vavolombeloni-Jehovah? Tsy maintsy hoe nisy olo niresaky “vaovao soa” taminao tse. Vasa babanao noho reninao zay, na mpiaraky miasa aminao, na mpiaraky mianatsy aminao, na nisy Vavolombeloni-Jehovah mihintsy nitory tan-tranonareo any. (Mar. 13:10) Ankoatsini-zay, nisy olo nandany fotoa noho hery mba hampianara Baiboly anao koa. Lafa nianatsy amy zay iha, le nihatea ani-Jehovah sady nihainao koa hoe tea anao ie. Nitaomini-Jehovah ho amy fahamarina ao iha. Mpianatsini-Jesosy Kristy iha henanizao ka mitamà ho velo zisiky farany. (Jaona 6:44) Azo antoky fa tena mankasitraky ani-Jehovah iha satria nisy olo nampiasany mba hampianatsy anao ty marina. Tsy vitani-zay fa nekeny ho lasa mpanompony koa iha.

2. Ino ty hodinihintsika amy lahatsoratsy toy ato?

² Fa mahay ty marina tsika henanizao, le afaky manampy olo hafa handeha amy lala mana amy fiaina iny miaraky amintsika koa. Amin’olo sisany aloha mety ho mora ty mitory santrano. Fe mety ho sahira avao ie lafa hanasa olo hianatsy Baiboly na hampianatsy Baiboly mihintsy. Manao ho zay koa va iha? Laha ho zay ty tsapanao, le henteo soa fa misy soso-kevitsy vitsivitsy mety hanampy anao amy lahatsoratsy toy ato. Hodinihintsika hoe ino ty tena mandrisiky antsika hanao mpianatsy. Ho hitantsika koa hoe ino ty hanampy antsika laha misalasala hitariky fampianara Baiboly tsika. Fe ndao tse hohenteantsika hoe manino tsika ro tsy mitory avao fa mampianatsy koa.

3. Manino tsika ro mitory?

³ Misy asa roe nampanaovini-Jesosy ty mpanori-dia azy, tamin’ie mbo tan-tany etoy. Voalohany, nirahiny hitory ty vaovao soani-Fanjakà iny rozy, le natorony an-drozy hoe akory ty hanaova azy. (Mat. 10:7; Lioka 8:1) Niresahini-Jesosy tamy mpianatsiny reo, ohatsy, hoe akory ty atao lafa mijanjy ani-hafatsy mikasiky Fanjakà iny ty olo, le ino ty atao laha tsy mijanjy rozy. (Lioka 9:2-5) Nivola koa ie fa “ho vavolombelo amy firenena iaby” mpianatsiny reo, zany hoe hitory amin’olo maro noho amy pilasy maro. (Mat. 24:14; Asa. 1:8) Fe nivolaniny avao koa rozy hoe ndre mandramby ani-hafatsy iny ty olo ndre tsy mandramby, le mila ambaran-drozy olo avao ty mikasiky ty Fanjakà-Ndranahary noho ty raha hataony.

4. Laha hentea ty Matio 28:18-20, ino koa ty raha hafa mila ataontsika ankoatsini-hoe mitory mikasiky Fanjakà iny?

⁴ Ino ty asa faharoe nampanaovini-Jesosy ty mpianatsiny? Nivolaniny rozy mba hampianatsy olo hanaraky ze raha iaby nandidiany. Mety hisy hanao ho zao hoe natao ho ani-Kristiana tamy taonjato voalohany rey avao iraky nampanaovini-Jesosy io. Fe marina va zay? Aha. Nivola Jesosy hoe hitohy avao asa bevata io “zisiky hiaviani-fitamperani-rafitsini-tontolo toy.” (Vakio Matio 28:18-20.) Azo antoky hoe niresaky mikasiky ani-asa io Jesosy lafa niseho tamy mpianatsiny 500 mahery rey. (1 Kor. 15:6) Bakeo natoroni-Jesosy fahità Jaona, le nivolaniny mazava soa hoe teany hanampy olo hahay mikasiky ani-Jehovah ty mpianatsiny iaby.​—Apok. 22:17.

5. Laha hentea ty 1 Korintianina 3:6-9, ino ty fanohara nampiasani-Paoly mifandramby amy fitoria noho fampianara?

⁵ Tsy avy le mitiry ty raha raiky laha vo ambolè fa mbo misy raha hafa mila ataoni-mpamboly iny. Nampitiarovini-apostoly Paoly ani-Korintianina reo hoe manahaky ani-zay koa ty asa fanaova mpianatsy. Hoy ty asany: “Zaho namboly, Apolosy nanondraky ... Nareo ro tonda ambolea-Ndranahary.” (Vakio 1 Korintianina 3:6-9.) “Tonda ambolea-Ndranahary” hoasany mpianatsy rey. Tsika ro mpiasa ampiasà-Ndranahary ani-tonda io ka mamboly eo, zany hoe mitory. Fe tsy zay avao fa manondraky koa tsika, zany hoe mampianatsy. (Jaona 4:35) Fe ndre zay, haintsika fa Ndranahary ro mampitombo ani-raha ambolentsika rey, zany hoe ie ro mitao ty olo hamonjy azy.

6. Mila ampeantsika hanao ino ty olo ampianarintsika?

⁶ Ze olo mana ‘fo soa ro hahazo fiaina zisiky farany.’ (Asa. 13:48) Olo ho zay ro tena ilàntsika. Fe laha tena teantsika ho lasa mpianatsini-Jesosy rozy, le tsy maintsy ampeantsika mba 1) hahay, 2) hino, noho 3) hanoriky ty raha ianarany baka amy Baiboly ao. (Jaona 17:3; Kol. 2:6, 7; 1 Tes. 2:13) Samby afaky manampy ani-mpianatsy rey iaby ty olo amy fiangona eo. Lafa manatriky fivoria, ohatsy, rozy le rambesintsika soa sady asehontsika hoe tena teantsika. (Jaona 13:35) Mety “fa latsaky vahatsy” amy mpianatsy iny ao koa ty fahazarany na ty raha ninoany sisany, ka mety handany fotoa noho hery mpampianatsy azy iny lafa manampy azy. (2 Kor. 10:4, 5) Mety ho am-bolany maromaro mihintsy mpianatsy iny vo hahavita ani-fiovà bevata reo noho hahafeno fepetra amy batisa. Fe tsy hisera ezaky nataontsika rey.

7. Ino ty antony mahavy antsika hitory noho hampianatsy?

⁷ Ino ty antony mahavy antsika hitory noho hampianatsy? Voalohany, satria tea ani-Jehovah tsika. Anatini-didy tsy maintsy arahintsika ty hoe mitory noho mampianatsy. Ka  laha manao ze fara herinao iha amy fitoria noho fampianara, le hita hoe teanao vatany Ndranahary. (1 Jaona 5:3) Mba eritsereto tse moa: Ty fitiavanao ani-Jehovah ro nahavy anao hitory santrano. Fe nimora taminao va ty nanao ani-zay? Aia koa. Tsy maintsy natahotsy iha tamy iha vo nitory voalohany. Fe hainao hoe zay ty asa nanirahani-Jesosy anao, le norihinao safàny zay. Nizatsy avao iha lafa nandeha ty fotoa. Ka ino ty tsapanao lafa mieritseritsy hoe hitariky fampianara Baiboly? Matahotsy va iha? Mety hampatahotsy aloha io. Fe laha mivavaky amy Jehovah iha, le hanampy anao ie ka hahasaky hampianatsy Baiboly iha. Hataony mihintsy aza ze hahavy anao haniry hanao mpianatsy.

8. Laha hentea ty Marka 6:34, ino koa ty antony mahavy antsika hampianatsy olo?

⁸ Faharoe, tea olo tsika le ampianarintsika an-drozy ty marina. Nisy fotoa, ohatsy, Jesosy noho mpianatsiny rey nivozaky satria fa nitory elaela. Nila pilasy hitofatofà amy zay rozy, fe mbo norihini-vahoaky rey avao. Niferinesani-Jesosy olo rey, farany nampianariny “raha maro.” (Vakio Marka 6:34.) Niasa mafy ie ndre nivozaky aza. Ino ty antony? Satria nihaini-Jesosy ty raha nahazo an-drozy. Ta hanampy an-drozy ie satria hitany fa nijaly rozy ka nila raha tamany. Mitovy amy zay koa ty olo henanizao. Atao raha sambatsy noho afa-po amy fiaina ty fahità an-drozy. Fe laha ty marina, manahaky aondry trobo io rozy, tsy misy mpiaraky mba hitariky an-drozy. Nivola apostoly Paoly fa tsy mahay a Ndranahary ty olo manahaky ani-rey sady tsy manan-draha tamany. (Efes. 2:12) Mandeha amy ‘lala malalaky mandeha amy fandripaha’ iny rozy! (Mat. 7:13) Laha tsapantsika hoe tena mila mahay a Ndranahary vatany ty olo amy faritanintsika eny, le ho ferinesantsika rozy. Tena tea an-drozy tsika ka ampianarintsika Baiboly rozy. Zay ty fomba farani-soa azontsika anampea an-drozy.

9. Laha hentea ty Filipianina 2:13, akory ty anampeani-Jehovah anao?

⁹ Tsy mahasaky mampianatsy Baiboly va iha? Mety misalasala iha satria hainao hoe mitaky fotoa ty manoma noho mitariky fampianara. Laha zay ty tsapanao, le resaho amy Jehovah. Angataho ie mba hanampy anao haniry hahita olo azonao ampianary. (Vakio Filipianina 2:13.) Nanome toky antsika apostoly Jaona fa valea-Ndranahary iaby ze vavaky mifanaraky amy ty sitrapony. (1 Jaona 5:14, 15) Afaky matoky zany iha hoe hanampy anao haniry hampianatsy Baiboly Jehovah.

10-11. Ino ty mety hahavy antsika hisalasala hitariky fampianara Baiboly?

¹⁰ Haintsika fa tena vatan-draha ty asa fanaova mpianatsy, fe mety ho sarotsy amintsika ty manao azy. Ndao moa hodinihintsika hoe ino ty raha sisany mety hahasarotsy azy, le ino ty hatao lafa tojiky ani-raha reo.

¹¹ Mety hahatsapa tsika hoe voafetra avao ty azontsika atao. Mety hahatsapa ani-zay, ohatsy, ty mpitory sisany satria fa be na tsy salama. Laha zay ty raha mahazo anao, le eritsereto tse ty raha nianarantsika lafa nisy arety miparitaky COVID-19 toy. Lasa haintsika soa hoe afaky mampianatsy Baiboly amy telefony na amy fitaova elektroniky hafa tsika! Afaky mampianatsy Baiboly baka an-tranonao any avao zany iha. Ty mahasoa ani-zay, mba tsy sahira loatsy iha. Ankoatsini-zay, mety misy olo ta hianatsy Baiboly avao mbany fe tsy afaky ie amy fotoa fitoriani-fiangona rey. Mety maraindray be rey ty mampalalaky azy na lafa haly. Tsy no afaky mampianatsy olo amy fotoa ho zay iha? Haly ho zay mihintsy ty nifampianarani-Jesosy ani-Nikodemosy satria zay ty nety tamy Nikodemosy.​—Jaona 3:1, 2.

12. Ino ty hanampy antsika hatòky hoe afaky hahay hampianatsy tsika?

 ¹² Mety hieritseritsy tsika hoe tsy mahay mampianatsy Baiboly. Mety hanao ho zao tsika hoe tsy no tokony hahay Baiboly soa tse aho na tokony ho mahay mampianatsy soa zay vo mampianatsy olo. Laha ho zay ty tsapanao, le diniho raha telo reto fa hanampy anao hatòky hoe afaky mampianatsy olo iha. Voalohany, amy Jehovah, fa ampy fahaiza iha ka fa afaky mampianatsy olo hafa. (2 Kor. 3:5) Faharoe, Jesosy, azy tomponi-“fahefà iaby an-danitsy any noho an-tany etoy” iny ro naniraky anao hampianatsy. Atokisany zany iha. (Mat. 28:18) Le fahatelo, afaky manampy anao Jehovah noho ty rahalahinao. Nahita raha hovolany Jesosy satria nampeani-Jehovah. Afaky mangataky fanampea amy Jehovah ho zay koa iha. (Jaona 8:28; 12:49) Ankoatsini-zay, afaky miresaky amy mpiandraikitsy andia-mpitorinareo iha, na amy mpisava lala mahay rey, na amy mpitory fa zatsy rey. Tena afaky manampy anao hana mpianatsy noho hahay hampianatsy rozy. Hihamahay mampianatsy koa iha laha miaraky amin-drozy lafa mampianatsy Baiboly rozy.

13. Manino tsika ro tokony parè hanova ty fomba fampianarantsika?

¹³ Mety ho sarotsy amintsika ty mampiasa fomba fampianara noho fitaova fampianara vaovao. Fa miova henanizao ty fomba fitarihantsika fampianara Baiboly. Fa boky noho bokikely Ho Azonao Tavy ty Fiaina Zisiky Farany! henanizao ty tena ampiasantsika. Fa tsy manahaky taloha rey sasy ty fitariha fampianara aminy sady mitaky fanomana. Fehintsoratsy vitsivitsy avao ro vakỳ, le resadresaky miaraky amy mpianatsy iny ty ankamaroany. Lafa tsika mampianatsy, le matetiky mampiasa video, raha baka amy tranonkalantsika ao, noho baka amy JW Library^®. Laha somary manahira anao ty mampiasa ani-fitaova reo, le miresaha amin’olo mahay rey, soa iha hampeany. Hahay koa iha amy zay. Marina fa sarotsy ty miala amy mahazatsy. Mety fa nahazatsy antsika, ohatsy, ty fomba fampianara sisany le mety ho sahira tsika satria miova raha iny. Fe ho vitanao ty hanao ani-zay sady hanjary ho teanao mihintsy aza ty mampianatsy, satria manampy anao Jehovah noho ty rahalahinao. Nivola rahalahy mpisava lala zay hoe lafa nanaraky ani-fomba fampianara vaovao io ie, le “samby nahazo tavy ani-fianara iny rozy amy mpianatsy iny.”

14. Ino ty tokony ho tiarovintsika laha maro tsy mijanjy ty olo amy faritanintsika eny, le manino ty 1 Korintianina 3:6, 7 ro mampahery antsika?

¹⁴ Mety ho sarotsy anomboha fampianara Baiboly ty faritany misy anao. Tsy kinto amy hafatsy torintsika ty olo sisany. Ty ilany aza manohitsy mihintsy. Ino ty hanampy antsika hino hoe mety mbo hijanjy ty hafatsy amy Baiboly ao avao olo rey? Tiarovo fa miovaova ty raha iainan’olo amy tontolo mikoronta toy eto, ka ndre azy tsy nikinto rey aza mety hanjary hieky hoe mila ty tari-dala-Ndranahary ie. (Mat. 5:3) Nisy olo, ohatsy, tsy nety nandramby ani-boky noho gazetintsika rey mihintsy taloha, fe naneky hianatsy Baiboly lafa tafara atoy. Haintsika koa fa Jehovah ro Tomponi-fambolea io. (Mat. 9:38) Teany tsika laha tsy mieny fa mamboly noho manondraky avao, bakeo mandiny azy satria ie ro mampitombo ani-raha iny. (1 Kor. 3:6, 7) Tiarovo fa ndre tsy mahay mampianatsy Baiboly aza tsika henanizao, le tsy ze vokatsy azontsika ro tena ifantohani-Jehovah fa ty ezaky nataontsika nanampy an’olo rey. * Tena mampahery raha zay!

15. Ino ty tsapani-Jehovah lafa misy olo maneky hianatsy Baiboly noho manoriky ze raha ianarany?

¹⁵ Falifaly Jehovah lafa misy olo maneky ty fahamarina amy Baiboly ao ka mizara ani-raha zay amin’olo hafa. (Ohab. 23:15, 16) Tsy maintsy falifaly biby zao Jehovah mahita hoe mazoto mitory noho mampianatsy ty vahoakiny henanizao! Ndre nisy arety niparitaky, ohatsy, tamy tany toy iaby tamy taom-panompoa 2020 iny, tsika nitariky fampianara Baiboly 7 705 765, le nisy 241 994 ty olo nanokam-bata ho ani-Jehovah noho natao batisa. Mpianatsy vaovao reo amy zay koa, tsy maintsy hampianatsy Baiboly noho hanampy olo maro ho lasa mpianatsini-Kristy. (Lioka 6:40) Azo antoky fa manao raha mahafalifaly ani-Jehovah tsika lafa mandramby anjara amy asa fanaova mpianatsy io.

16. Ino ty azontsika atao raha kendrè?

¹⁶ Sarotsy ty asa fanaova mpianatsy, fe manampy antsika Jehovah ka afaky mandramby anjara amy asa io tsika sady afaky manampy olo ho tea ani-Babantsika an-danitsy any iny. Azonao atao raha kendrè va ty hoe mba hampianatsy Baiboly olo raiky farafahakeliny? Anontaneo iaby ze olo hita hitanao hoe: ‘Tsy no ta hianatsy Baiboly iha?’ Mety tsy hampoizinao ty raha hiseho amy zay. Afaky matoky tsika fa hitahy ty ezaky ataontsika Jehovah.

17. Ino ty ho tsapantsika laha manao mpianatsy tsika?

¹⁷ Tena tombontsoa ty hoe mitory noho mampianatsy olo ty marina! Tena teantsika ty manao ani-asa io. Nanampy olo maro mba ho lasa mpianatsini-Kristy, ohatsy, apostoly Paoly ta Tesalonika any. Hoy ty asany lafa niresaky ty fihetseham-pony: “Ino moa ty raha tamaninay na fifaleanay na satroboninahitsy mahafalifaly anay alohani-Jesosy Tompontsika eo, amy fotoa anatrehany? Tsy nareo va? Nareo vatany ro voninahitsinay noho fifaleanay.” (1 Tes. 2:19, 20; Asa. 17:1-4) Maro koa ty mahatsapa manahaky ani-zay henanizao. Nanampy olo maro mba hatao batisa, ohatsy, ry Stéphanie morovaly. Zao ty nivolanini-Stéphanie: “Tsy misy raha mahafalifaly mandilatsy ty hoe manampy olo hanokam-bata ho ani-Jehovah.”