Tena teani-Jehovah ho sambatsy ty olo mifanambaly, sady teany hifandramby soa zisiky farany. (Mat. 19:4-6) Azo antoky hoe teanao hanahaky ani-zay koa ty fanambaleanao laha maniry hanambaly iha. Ka aia zany ty hahitanao olo hahavita ani-zay? Jehovah ro Mpamoro antsika ka hainy hoe ino ty tokony hataontsika mba hahasambatsy ty tokantranontsika. Ho sambatsy vatany zany iha laha manoriky ty tari-dala ameany. Ndao tsika handiniky ty sisany amy torolala rezay.

Tokony ho haintsika tse hoe: “Mamitaky mandilatsy ty raha iaby ty fo, sady sarotsy fehezy.” (Jer. 17:9) Lafa mifampiresaky noho miaraky matetiky ty olo roe ta hifanambaly, le vomaiky mifankatea. Tsiela avao le hihamarè fitiava zay. Lafa miseho raha zay le ho sarotsy amin-drozy ndre ty hanapa-kevitsy. Fe laha ty raha tsapany amin’olo iny avao ro mahavy azy hanambaly an’olo iny, le mety ho diso fanantenà ie lafa afarafara ao. (Ohab. 28:26) Tsy soa zany laha ohatsy ka mbo tsy mifankahay soa rozy roe, le fa samby miresaky ty am-pon-drozy laliky any na mifampitamà hoe hifanambaly.

Hoy ty Ohabolana 22:3: “Mahihitsy ty olo raiky laha mahajilo loza ka mivony, fa ty tanora fanahy mbo mamonjy avao ka voa.” Mety hahitan-doza va ty filà valy amy internet? Mampalahelo fa lasa niaraky tamin’olo tsy hainy tamy internet ao ty olo sisany fe bakeo naneny satria nandiso fanantenà azy olo iny. Misy olo raty koa amy internet ao manao kisary olo soa le ovàny ty mikasikasiky azy lafa ao, bakeo ie mamitaky noho mangalatsy drala amy ze olo mora verevereny. Manao kisary Vavolombeloni-Jehovah mihintsy aza ty sisany amin’olo raty rey.

Mbo misy loza hafa koa. Misy tranonkala noho application sisany natao filà valy mihintsy. Manao kalkily maromaro tranonkala iny le atorony eo hoe ia iaby ty olo mifankaeva. Fe mbo tsy misy porofo zisiky henanizao hoe tena azo antoky ty valiny ameany eo. Tena fanapahan-kevitsy bevata fifiliana valy zao. Ka programy amy ordinatera namboarin’olombelo ho zay va ty hanankinanao azy? Aia ty tena atokisanao, programy amy ordinatera rey sa ty torolalani-Baiboly?​—Ohab. 1:7; 3:5-7.

Ho zao ty torolala amy Ohabolana 14:15 ao: “Mino ty safà iaby reny ty olo tsy de nandalo fiaina, fa ty olo mahihitsy mandiniky ty liany.” Laha misy olo raiky teanao ho valỳ zany, le mila hainao soa tse ie, zay iha vo tokony hanapa-kevitsy hanambaly  azy. Fe tsy mora ty manao ani-zay laha tamy internet ao ty nahitanao ani-olo iny. Marina fa ho hitanao amy internet ao ty mikasikasiky azy, le mety miresaky matetiky ao koa nareo, fe afaky mivola va iha hoe tena hainao soa ie? Maro ty olo tena nino hoe nahita olo tena maeva azy tamy internet ao. Fe nidiso fanantenà rozy lafa tena nihitan-drozy maso olo iny.

Nivola mpanao salamo raiky zay hoe: “Tsy miaraky mipetraky amin’olo tsy marina aho, sady tsy mifandramby amy ze mamonivony ty maha ie azy.” (Sal. 26:4) Maro ty olo mieritseritsy hoe tsy manahy ie ndre mavandy lafa miresaky ty mikasikasiky azy amy tranonkala filà valy rey ao. Ovàny soasoa iaby amy zay ty mikasikasiky azy. Mety havoniny ty toetsy ratiny sady mety tsy de hita raha rey lafa mandefa mesazy amin’olo ie. Eritsereto soa zany fanontanea retoa: Laha misy olo mivola amy internet ao hoe Vavolombeloni-Jehovah ie, Kristiana vita batisa vatany va ie? Olo matotsy ara-panahy va ie? Mifandramby soa amy Jehovah va ie? Olo manao akory ty fahitan’olo azy amy fiangona misy azy any? Tsy no modely raty ie na “naman-draty” mihintsy? (1 Kor. 15:33; 2 Tim. 2:20, 21) Afaky manambaly va ie laha hentea ty torolalani-Baiboly? Mila hainao soa ty valini-fanontanea reo. Mety ho sarotsy aloha raha zay laha tsy mifampiresaky amy Vavolombeloni-Jehovah hafa mahay soa an’olo iny iha. (Ohab. 15:22) Fe hainao koa fa ty mpanomponi-Jehovah tsy mivaliky, tsy hieritseritsy hanambaly olo tsy manompo ani-Jehovah mihintsy ka “hiharo bao” amin’olo iny.​—2 Kor. 6:14; 1 Kor. 7:39.

Hitantsika teo hoe mikai-doza ty filà valy amy intenet. Fe soa avao fa misy hevitsy hafa afaky manampy anao laha mila valy iha na ta hifankahay soa amin’olo raiky teanao hovalỳ. Laha mbo afaky mifampiresaky mivanta amin’olo tsika le afaky mifankahay soa lafa am-pivoria any, na amy fivoriambe, na lafa misy fivoria hafa.

Fe laha tsika tsy afaky mivorivory miaraky amin’olo maro, ohatsy hoe manahaky amy fotoani-arety miparitaky COVID-19 toy, le mampiasa fitaova elektroniky tsika lafa manao ty fivoriani-fiangona. Afaky manararaotsy mandiniky ani-Vavolombelo tsy manambaly rey iha amy fotoa ho rey. Afaky henteanao soa, ohatsy, hoe manao akory ie lafa manao anjara na mamaly teny, satria mampiseho ty finoany ie amy fotoa rey. (1 Tim. 6:11, 12) Mety ho afaky hiresaky mihintsy aza nareo lafa rava fivoria iny, laha misy ani-zay ty programy fanatrehanareo fivoria. Lafa miresadresaky amy telefony na amy internet eo miaraky amy Vavolombeloni-Jehovah maromaro rey nareo, le henteo soa hoe manao akory ty fifandrambesany amin’olo. Ho hitanao amy zay hoe olo manao akory marina ie. (1 Pet. 3:4) Vomaiky ho hainao soa ie lafa mandeha ty fotoa. Lasa ho hitanao iaby hoe mitovy va ty raha kendrenareo, le ho soa va laha ie ro ho valinao.

Laha manaraky ty torolalani-Baiboly avao ty olo raiky lafa mila valy, le tena ho sambatsy biby. Mifanaraky amy raha volanini-ohabola raiky toy raha zay: “Ze olo nahita valy soa, le nahazo raha soa sady mahazo hatò amy Jehovah.”​—Ohab. 18:22.