1. Ino ty mety ho vokany lafa misy olo miezaky ho anabo mandilatsy ty olo hafa?

ZE HAHASOA ty vatany avao ro hentean’olo henanizao. Tsy ahoany ino ndre hisy vokany raty amin’olo hafa raha iny. Ta hahazo drala marè, ohatsy, ty mpanao bizinesy sisany ka mety hahavita raha manapa-bozo olo mihintsy. Ndre amy sporo tsy misy aly rey koa, ataoni-mpanao sporo sisany ze hamparatsy ty olo amy ekipy ilany rey lafa tena ta handresy ie. Lafa manao fanadina koa ty mpianatsy sisany le mangala tahaky soa ho tafilitsy amy iniversitè malaza rey. Tsika moa Kristiana, le haintsika fa raty ty raha ho reo sady “asani-nofotsy.” (Gal. 5:19-21) Fe mety hisy va hoe tsy ambini-mpanomponi-Jehovah raiky hoe fa miezaky ho anabo mandilatsy ty olo hafa ie sady mampirisiky olo hanao manahaky ani-zay koa? Soa ty mieritseritsy ani-zay satria laha misy olo manao ho zay ty amy fiangona eo, le tsy hiharo raiky sasy ty fiangona.

2. Ino ty hodinihintsika amy lahatsoratsy toy ato?

² Misy toetsy sisany mety hahavy antsika ta ho anabo mandilatsy ani-rahalahintsika reo. Fe misy mpanomponi-Jehovah tsy nivaliky sisany koa resahini-Baiboly hoe tsy nitea kirebaky mihintsy. Hodinihintsika amy lahatsoratsy toy ato ty mikasiky ani-reo. Fe ndao tse hodinihintsika fanontanea toy:  Akory ty hahaizantsika hoe ino ty antony mahavy antsika hanompo ani-Jehovah?

3. Ino iaby ty fanontanea soa hoeritseretintsika?

³ Soa laha dinihintsika avao kindraiky ty antony mahavy antsika hanompo ani-Jehovah. Azontsika eritserety, ohatsy, hoe: ‘Tsy falifaly va aho laha tsy somary anabo mandilatsy ty olo hafa? Miasa mafy va aho amy fiangona eo satria ta ho hita hoe mahay noho mahavita raha mandilatsy ani-rahalahy reo? Sa zaho miasa mafy mba hahafalifaly ani-Jehovah?’ Manino tsika ro tokony hieritseritsy ani-fanontanea reo? Henteo tse moa ty raha volanini-Baiboly.

4. Manino ro tsy tokony hampitovizintsika amin’olo hafa ty vatantsika laha hentea ty Galatianina 6:3, 4?

⁴ Mivola ty Baiboly hoe tsy tokony hampitovizintsika amin’olo hafa ty vatantsika. (Vakio Galatianina 6:3, 4.) Ino ty antony? Satria laha mieritseritsy tsika hoe mahay na mahavita raha mandilatsy ani-rahalahintsika reo, le mety hirengirengy. Laha mieritseritsy koa tsika hoe rahalahy reo ro mahay na mahavita raha mandilatsy antsika, le mety ho kivy tsika. Samby tsy soa iaby reo. (Rom. 12:3) Misy anabavy mana anara Katerina, * mipetraky a Gresy any zay nivola ho zao: “Naniry ani-rahavavy reo avao aho taloha. Rozy amin’io mahay mitory noho mampianatsy, ampelasoa, sady mora mahazo nama. Atao raha tsy misy ilà ahy mihintsy.” Soa ho tiarontsika fa nitaomini-Jehovah hamonjy azy tsika. Tsy ty hatovolahy na ty hampelasoantsika ro nitaomany antsika, sady tsy ty fahaizantsika mivola noho ty hatean’olo antsika koa. Nitaominy hamonjy azy tsika satria hitany hoe tea azy noho parè hijanjy ani-Anakilahiny iny.​—Jaona 6:44; 1 Kor. 1:26-31.

5. Ino ty raha ianaranao baka amy ty raha nataoni-rahalahy Hyun?

⁵ Azontsika eritserety koa toy: ‘Olo tea filongoa va ty fahitani-rahalahy reo ahy, sa olo tea aly?’ Henteo moa raha nahazo ani-rahalahy mipetraky a Korè Antimo any toy. Hyun ty anarany. Nisy fotoa, nirambesiny sahala fahavalony ty olo mana andraikitsy tamy fiangona teo, kanefa fa nianti-panahy ie tamy zay. Hoy ty asany: “Nikinokino an-drozy avao ty asako, le nizizoako iaby ze raha nivolanin-drozy.” Ino ty vokany? Nieky Hyun hoe: “Lasa tsy niharo raiky fiangona iny tratsini-raha nataoko rey.” Soa avao fa nanampy ani-Hyun ty namany sisany. Lasa nihainy hoe ino ty antony nahavy azy nanao ho zay, le niova ie. Anti-panahy mahavita soa ty andraikitsiny ie henanizao. Mila miova malaky zany tsika laha vo manaly ta hampisy kirebaky fa tsy mampisy filongoa.

6. Laha hentea ty Galatianina 5:26, ino ty toetsy mety hahavy antsika ta ho anabo mandilatsy ty olo hafa?

⁶ Vakio Galatianina 5:26. Ino iaby ty toetsy raty mety hahavy olo raiky ho tea kirebaky? Voalohany, fanambonia tena. Mirengirengy noho tea tena ty olo manambony tena. Faharoe, fialona. Lafa mialona ty olo raiky le tsy hoe iriny ho azo avao ty raha ananan’olo hafa, fa teany koa laha tsy mana ani-raha iny sasy olo iny. Falaina vatany zany fialona io. Tsy teantsika hahazo antsika manahaky arety raty io toetsy reo!

7. Ino ty fanohara mampiseho hoe raty ty fanambonia tena noho ty fialona?

⁷ Toetsy raty ty fanambonia tena noho ty fialona. Azo ampitovizy amy neno mihina hazon-trano rey raha reo. Ndre soasoa manao akory trano iny, lafa kikisani-neno rey  tsikelikely eo avao ie, le tsy maintsy ropaky amy farany. Ho zay koa fa mety hanompo ani-Jehovah eny tse ty olo raiky. Fe laha mirengirengy noho mialona olo ie, le tsy maintsy hiravoky avao koa amy farany. (Ohab. 16:18) Tsy hanompo ani-Jehovah sasy ie, le hisy vokany raty aminy noho amin’olo hafa koa raha zay. Ka ino zany ty tokony hatao laha tsika tsy ta hanambony tena noho hialona?

8. Ino ty azo atao mba handresea ty fanambonia tena?

⁸ Zao ty torohevitsy nameani-apostoly Paoly ho ani-Filipianina reo: “Ka manao ndre ino ndre ino amy ty hatea ankany na amy rengirengy, fa amy fiambanea le eritsereto hoe anabo mandilatsy anareo ty olo hafa.” (Fil. 2:3) Afaky mandresy ani-fanambonia tena io zany tsika laha eritseretintsika hoe anabo mandilatsy antsika ty olo hafa. Tsy hanao kirebaky amin’olo mana talenta noho mahay raha mandilatsy antsika koa tsika fa vomaiky hiaraky falifaly amin-drozy, sirtò moa laha ampiasan-drozy amy fanompoa ani-Jehovah fahaizan-drozy zay. Ka manao akory rahalahy noho anabavy mahay raha maro rey? Laha manoriky ani-torohevitsini-apostoly Paoly io koa rozy, le ho mora amin-drozy ty hahita hoe mana toetsy soa maro tsika. Hampisy filamina noho hampiharo raiky ty fiangona iaby tsika amy zay.

9. Ino ty hanampy antsika tsy hialona ani-rahalahy noho anabavintsika reo?

⁹ Tsy hialona mihintsy tsika laha miambany, zany hoe mitiaro fa tsy haintsika soa ty raha sisany. Laha miambany tsika le tsy hiezaky hampiseho hoe mahay mandilatsy ty olo hafa. Ty mifanohitsy amy zay aza ro hataontsika, zany hoe hiezaky tsika handramby fianara baka amy ze mahay ani-raha iny. Laha nisy rahalahy nanao lahateny soa biby, ohatsy, tamy fivoria farani-herinandro, le azontsika anontanea azy hoe akory ty fomba fanomanany lahateny. Laha mahay miketriky koa ty ranabavy raiky, le afaky mangataky soso-kevitsy aminy tsika soa hahay hiketriky koa. Na laha misy tanora tsy mety mahita nama, le afaky mila hevitsy amin’olo mora mahita nama rey ie. Tsy hialona mihintsy tsika laha manao ani-reo sady hihamahay koa.

10. Ino ty problemo nahazo ani-Gideona?

¹⁰ Diniho tse ty raha niseho tamy Gideona, baka amy fokoni-Manase, noho ty lahilahy baka amy fokoni-Efraima. Afaky nirengirengy Gideona noho lahilahy 300 niaraky taminy rey satria nampeani-Jehovah rozy le nandresy lafa nialy tamy Midianita. Namonjy ani-Gideona amy zay lahilahy efraimita rey fe tsy hoe mba hidera azy fa hifamaly aminy. Neloky rozy satria tsy nitaomini-Gideona hiaraky aminy hialy amy ty fahavalo-Ndranahary. Nieritseritsy rozy hoe tokony hohajà ty foko misy an-drozy. Nihalinon-drozy hoe mbo bevata mandilatsy ani-zay ty raha nataoni-Gideona, satria ie nanao raha manome voninahitsy ty anarani-Jehovah noho niaro ty vahoakini-Jehovah.​—Mpits. 8:1.

11. Ino ty raha nivolanini-Gideona tamy lahilahy efraimita rey?

¹¹ Niambany Gideona le nivola moramora tamy lahilahy efraimita rey hoe: “Ampahafirini-raha vitanareo va ty raha vitako?” Bakeo nampitiaroviny rozy hoe maro biby ty fitahia fa nameani-Jehovah an-drozy. “Nikalma” lahilahy rey lafa naharè ani-zay. (Mpits. 8:2, 3) Niambany Gideona soa hilamy avao ty vahoaki-Ndranahary.

12. Ino ty ianarantsika baka amy Efraimita rey noho baka amy Gideona?

¹² Ino ty azontsika ianara baka amy tantara iny? Hitantsika baka amy raha nataoni-lahilahy efraimita rey hoe ty fanomeza voninahitsy ani-Jehovah ro tokony ho vatan-draha marè amintsika fa tsy voninahitsy ho antsika am-batantsika. Afaky mandramby fianara baka amy Gideona koa ty loham-pianakavia noho ty anti-panahy. Laha misy olo meloky amintsika le tokony hiezaky tsika mba hahay hoe ino ty antony. Afaky midera azy amy ty raha soa nataony koa tsika. Tena mila miambany tsika vo hahavita ani-zay, sirtò laha olo iny ro diso. Fe aleo milamy soa tozay hifampiankany mba hanaporofoa hoe marina ty ahintsika.

13. Ino ty raha sarotsy natrehini-Hana, le ino ty nataony?

¹³ Mba eritsereto koa ty tantarani-Hana. Nanambaly Levita mana anara Elkana zay ie. Nana valy faharoeny Elkana fe Hana ty tena niteany. Penina anarani-valiny faharoe io. “Nanan’anaky Penina fa Hana tsy nana”, le nikizakizaky ani-Hana avao Penina mba hahamenatsy azy. Ka nanao akory Hana? Nalahelo biby ie ka nitany noho tsy nihinan-kany! (1 Sam. 1:2, 6, 7) Fe ndre zay, tsy mivola mihintsy ty Baiboly hoe niezaky namaly faty Hana. Niresahiny tamy Jehovah ty raha tam-pony ao le natoky ie hoe hanampy azy Jehovah. Niova va Penina tafara atoy? Tsy miresaky ani-zay ty Baiboly. Fe haintsika hoe lasa nilamy soa ty saini-Hana sady lasa nifalifaly avao ie. Hita tamy tarehiny mihintsy aza hoe “tsy niasa loha sasy ie.”​—1 Sam. 1:10, 18.

14. Ino ty ianarantsika baka amy tantarani-Hana?

 ¹⁴ Ino ty azontsika ianara baka amy Hana? Laha misy olo ta hanao kirebaky aminao, le tiarovo fa tsy voatery haneky iha. Tsy voatery hanao kapindry aminy koa iha. Ka mamaly faty fa miezaha hilongo aminy. (Rom. 12:17-21) Ndre tsy mety miova aza ie le ho kalma avao iha sady ho falifaly.

15. Ino ty nampitovy ani-Apolosy noho Paoly?

¹⁵ Ka ino koa ty azontsika ianara lafa mandiniky ty tantarani-Apolosy noho apostoly Paoly? Rozy roe lahy reo, samby nahay soa ty Soratsy Masy, nimaro mpahay, noho nahay nampianatsy. Samby nanampy olo maro ho lasa mpianatsini-Kristy koa rozy. Fe tsy nifampialona rozy.

16. Olo nanao akory Apolosy?

¹⁶ Baka a Aleksandria any Apolosy. Nalaza tanà nahabe azy io tamy zay, satria any ty fandehanani-ze olo tena ta hianatsy. Tena nahay nandaha-teny Apolosy sady nahay soa ty Soratsy Masy. (Asa. 18:24) Fe lafa nandeha ta Korinto any ie, le nizarazara ty olo tamy fiangona tao. Ie ty tena niteani-rahalahy sisany tao mandilatsy ani-Paoly noho ty rahalahy hafa. (1 Kor. 1:12, 13) Apolosy va ro nahavy ani-toe-tsay mampisaratsaraky io? Aha, tsy zay. Nisolohoani-Paoly himpoly aza ie lafa niala ta Korinto tao. (1 Kor. 16:12) Tsy ho nanao ani-zay mihintsy Paoly laha nampizarazara ani-fiangona iny Apolosy. Hita hoe nampiasa ty fahaizany tamy fomba soa Apolosy, zany hoe nampiasa ty raha hainy mba hitoria ty vaovao soa noho hampahereza ty rahalahiny. Afaky matoky koa tsika hoe olo niambany ie. Afaky mivola ani-zay tsika satria tsy miresaky mihintsy ty Baiboly hoe neloky ie lafa namonjy azy Akoila noho Prisila, nanazava “marina soa taminy ty lala-Ndranahary.”​—Asa. 18:24-28.

17. Ino ty nataoni-Paoly mba hampisy filongoa?

 ¹⁷ Nihaini-apostoly Paoly soa ty asa nivitani-Apolosy. Fe tsy nialona azy ie. Lafa tsika mamaky ty raha nisoratiny ho ani-Korintianina reo le hitantsika hoe niambany ie sady nahay nandanjalanja. Tsy nataony nampizesta azy lafa nisy olo nanao ho zao hoe: “Zaho ani-Paoly.” Naleony ty olo nieritseritsy ani-Jehovah Ndranahary noho Jesosy Kristy.​—1 Kor. 3:3-6.

18. Ino ty ianarantsika baka amy Apolosy noho Paoly mifanaraky amy raha volanini-​1 Korintianina 4: 6, 7?

¹⁸ Ino ty azontsika ianara baka amy tantarani-Apolosy noho Paoly iny? Mety hiasa mafy ho ani-Jehovah tsika, le mety hahavita hanampy olo maro handroso ho amy batisa koa. Fe haintsika fa tsy ho nivitantsika zay laha tsy nanampy antsika Jehovah. Hitantsika baka amy tantarani-Apolosy noho Paoly iny koa hoe vomaiky afaky mampisy filongoa amy fiangona eo tsika arakarakini-ananantsika andraikitsy. Manao mahavelo bevata tsika satria manampy antsika hilongo soa noho hiharo raiky avao ty anti-panahy noho ty mpanampy amy fanompoa. Manampy antsika hahavita ani-zay rozy lafa manome torohevitsy baka amy Baiboly. Tsy mirengirengy rozy fa manampy ty fiangona hanoriky ty safàni-Jesosy noho hanahaky azy.​—Vakio 1 Korintianina 4:6, 7.

19. Ino ty azontsika kiraidraiky atao? (Henteo koa ty efajoro hoe “ Ka Manao Raha Mampisy Kirebaky.”)

¹⁹ Samby mana ty raha haintsika iaby tsika, le azontsika ampiasà mba “hifanompoa” fahaizantsika zay. (1 Pet. 4:10) Mety hieritseritsy tsika hoe kelikely avao ty mba vitantsika. Fe tiarovo fa anaka briky maromaro vo mahavita tranobe raiky. Afaky manampy ty fiangona hiharo raiky koa zany raha kelikely vitantsika rey. Tokony hiezaky tsika mba tsy hisy ho hita hoe anabo. Tokony hanao ze fara herintsika tsika mba hilongo noho hiharo raiky ty fiangona.​—Efes. 4:3.