“Lafa nialy tamiko kely anakini-mamako zay, le tonga de nisamboriko amy tendany eo, le nifeoziko. Ta ho namono azy aho.”—Paul.

“Saky nisy raha kelikely nihetsiky an-trano ao, le zaho nisondrotsy zay. Aravodravoko iaby ze raha azoni-tanako, ndre fanaky, ndre fisà.”—Marco.

Mety tsy hasiaky marè manahaky ani-reo aloha tsika. Fe sarotsy amintsika ty mifehy ty vatantsika kindraiky. Nandova ota baka amy Adama, azy lahilahy voalohany iny tsika, ka zay ty antony voalohany marè mahavy ani-zay. (Rom. 5:12) Manahaky ani-Paul noho Marco ty olo sisany, ka tsy mora amin-drozy ty mitanjaky ty helokiny. Ty ilany tsy mahavita mifehy ty eritseritsiny. Mieritseritsy raha mampatahotsy na raha mahakivy avao rozy. Misy koa tsy mahavita mifehy ty faniriany haloto fandaisam-bata, na hinon-toaky tafahoatsy, na hampiasa raha maha ango.

Mety hanimba ty fiainany ze tsy maneky hifehy ty eritseritsiny, noho ty faniriany, voho ty fihetsikiny. Fe azontsika atao ty miala amy raha zay. Amy fomba akory? Laha miezaky hana fifehezam-bata tsika. Aleo hodinihintsika fanontanea telo retoa satria manampy antsika hanao ani-zay: 1) Ino ty atao hoe fifehezam-bata? 2) Manino raha io ro tena ilà? 3) Akory ty hananantsika ani-toetsy anatini-“vokatsini-fanahy” io? (Gal. 5:22, 23) Ho hitantsika amy zay lafa bakeo hoe ino ty azontsika kiraidraiky atao laha sendra tsy mana fifehezam-bata tsika.

Tsy malisa hanatanteraky ze raha teany hatao ty olo mana fifehezam-bata. Tsy avy le mivola ie na manao raha, fa tanjahany ty ainy mba tsy hanao raha mampalahelo a Ndranahary.

Natoroni-Jesosy antsika hoe ino iaby ty ataon’olo mahafehy ty vatany. Mivola ty Baiboly hoe: “Tsy nandratiraty olo ie lafa nisy nandratiraty, tsy nikinia ie lafa nijaly, fa napetrakiny tamy Mpitsara tea raha mahity iny avao ty fiainany.” (1 Pet. 2:23) Nahafehy ty vatany Jesosy lafa nikizahini-mpanohitsy reo, tamin’ie nihanto amy hazo fijalea teo. (Mat. 27:39-44) Nahay nitanjaky ty ainy koa ie talohani-zay, lafa nisy mpitariky fivavaha ta ho namandriky azy amy ty raha volaniny. (Mat. 22:15-22) Lafa nisy Jiosy romotsy koa nandramby vato hitoraha azy, le tena hita hoe modely soa vatany ie! Tsy namaly faty ie. “Nivony Jesosy, le niala tamy tempoly tao.”—Jaona 8:57-59.

Afaky manahaky ani-Jesosy va tsika? Eka, amy lafiny maro. Nanoratsy apostoly Petera hoe: “Ndre Kristy aza nijaly ho anareo, ka nanome modely mba hanorihanareo marìny ty liany.” (1 Pet. 2:21) Tsy lavorary tsika, fe azontsika atao ty manoriky marìny ty modelini-Jesosy amy resaky fifehezam-bata. Manino raha zay ro tena ilà?

Mila mana fifehezam-bata tsika mba hahazo hatò amy Jehovah. Ndre fa nanompo ani-Jehovah tanatini-tao maro aza tsika, le mety tsy hinama aminy sasy laha tsy mahafehy ty raha ataontsika noho volanintsika.

Mba eritsereto moa Mosesy. “Tamin’olo tambony tany tetoy, le Mosesy ro lahilahy be fandefera marè” tamy fotoa niainany. (Nom. 12:3) Niaritsy toreotoreoni-Israelita reo tanatini-tao maro Mosesy. Fe tsy nahafehy ty vatany avao ie lafa ela ty ela. Neloky ie lafa nimenimeny ndraiky rozy hoe tsy misy rano. Nitrivotiny vahoaky reo hoe: “Janjinareo mpizizo reo zao! Tsy maintsy mampiboaky rano ho anareo baka amy vatolampy tia zany zahay?”—Nom. 20:2-11.

Tsy nahafehy ty vatany Mosesy, ka tsy nameany voninahitsy Jehovah, Azy nanome rano tamy alalani-fahagagà iny. (Sal. 106:32, 33) Vokatsini-zay, le tsy nengani-Jehovah hilitsy amy Tany Nampitamany tao ie. (Nom. 20:12) Le nimaty avao Mosesy, fa atao raha tsy niafaky mihintsy ty fanenenany tamin’ie tsy nahatanjaky ty helokiny iny.—Deot. 3:23-27.

Ino ty fianara ho antsika? Ndre fa ela tanatini-fahamarina tsika, le tsy tokony hanao safà tsy manaja lafa misy olo mampeloky antsika, na mila anary. (Efes. 4:32; Kol. 3:2) Marina aloha fa lafa mihaantitsy tsika, le mety tsy hahaliny raha kindraiky. Fe tiarovo Mosesy. Tsy ho teantsika mihintsy hoe tsy nahafehy vata indraiky avao tsika, le ho simba ty lazantsika tamy fanompoa ani-Jehovah tanatini-tao maro. Ka ino ty azontsika atao mba hanana ani-toetsy tena ilà io?

Mangataha fanahy masy. Ino ty antony? Satria raiky amy toetsy anatini-vokatsini-fanahi-Ndranahary rey ty fifehezam-bata. Manome ty fanahiny masy ho ani-ze mangataky aminy koa Jehovah. (Lioka 11:13) Afaky manome ty hery ilàntsika Jehovah amy alalani-fanahiny. (Fil. 4:13) Afaky manampy antsika hana ani-toetsy hafa anatini-vokatsini-fanahy koa ie, ohatsy hoe ty fitiava. Tena ilà toetsy io satria hanampy antsika hahay hifehy ty vatantsika.—1 Kor. 13:5.

Ialao ze raha mety hahavy anao tsy hahafehy ty vatanao. Ihalaviro, ohatsy, ze fialam-boly na raha amy Internet misy fandaisam-bata raty. (Efes. 5:3, 4) Ze raha iaby mitariky antsika hanao raha raty mihintsy ro tokony hohalavirintsika. (Ohab. 22:3; 1 Kor. 6:12) Laha mora  voatariky haloto fandaisam-bata, ohatsy, ty olo raiky, le tsy tokony hamaky na hanenty boky noho filma misy tantaram-pitiava.

Mety ho sarotsy amintsika ty hanoriky ani-torohevitsy zay. Fe laha miezaky marè tsika, le hanome hery antsika Jehovah mba hahavitantsika hifehy ty vatantsika. (2 Pet. 1:5-8) Hanampy antsika ie mba hifehy ty eritserintsika, ty raha volanintsika noho ataontsika. Manaporofo ani-zay ty raha niainani-Paul noho Marco, azy voaresaky taloha teny rey. Nianatsy nifehy ty hasatàn-drozy rozy lafa meloky. Nimora meloky koa rahalahy raiky zay lafa manday tobily, farany nialialy amin’olo avao. Ino amy zay ty nataony? “Nivavaky mafy aho sanandro. Nandiniky lahatsoratsy mikasiky fifehezam-bata rey aho, le nitiaroviko ze andinin-teny afaky manampy ahy. Fa tanatini-tao maro aho ro niezaky hanao ani-zay. Fe saky maraindray, le mbo ataoko raha kendrè avao ty ho kalma anatini-andro iny. Miala alohaloha koa aho lafa misy fotoa hovonjeko, amy zay tsy malisa marè.”

Mety tsy ho vitantsika ty mifehy ty vatantsika kindraiky. Mety hahamenatsy antsika ty hamonjy ani-Jehovah amy vavaky lafa miseho raha zay. Kanefa amy fotoa zay tsika ro tena mila mivavaky. Avy le mivavaha amy Jehovah malaky. Misolohoa aminy mba hengany ty hadisoanao. Mangataha fanampea aminy, bakeo miezaha mba tsy hampimpoly ani-hadisoa iny sasy. (Sal. 51:9-11) Ka mieritseritsy hoe tsy hijanjy ty vavaky ataonao Jehovah. (Sal. 102:17) Nampitiaro antsika ty apostoly Jaona hoe “mampalio antsika ho afaky amy ota iaby” ty lioni-Jesosy Anakiny. (1 Jaona 1:7; 2:1; Sal. 86:5) Tiarovo fa mivola amy ty mpanompony Jehovah mba hanenga hadisoa matetiky. Matoky koa tsika fa zay ty hataony amintsika.—Mat. 18:21, 22; Kol. 3:13.

Nalahelo Jehovah lafa tsy nahafehy ty vatany Mosesy tan-diomonto any. Fe ndre zay, le nengani-Jehovah ty hadisoany. Mivola mihintsy aza ty Safà-Ndranahary fa tena modely soa ho antsika ty finoani-Mosesy. (Deot. 34:10; Heb. 11:24-28) Tsy nengani-Jehovah hilitsy amy Tany Nampitamany ao Mosesy, fe hovelominy ndraiky ie ka ho afaky ho velo zisiky farany lafa Paradisa tany toy. Afaky mitamà ani-zay koa tsika laha miezaky avao mba hana fifehezam-bata.—1 Kor. 9:25.