LAHATSORATSY FIANARA 23
“Hohamasìny Lahy ty Anaranao!”
“Maharitsy zisiky farany lahy ty anaranao Jehovah.”—SAL. 135:13.
HIRA 10 Derao i Jehovah Andriamanitsika!
HO HITANAO ATO *
1-2. Ino ty raha tena teani-Vavolombeloni-Jehovah resahy?
MISY raha tena bevata mila ifantohantsika henanizao, tsy ino zay fa ty zoni-Jehovah handay noho ty fanamasina ty anarany. Vavolombeloni-Jehovah tsika ka teantsika ty miresaky foto-kevitsy mahakinto ho reo. Fe raha roe samby hafa va ty zoni-Jehovah handay noho ty fanamasina ty anarany? Aha.
2 Haintsika iaby fa tsy maintsy hamasìny ty anara-Ndranahary. Nianarantsika koa hoe farani-ze mahay manday Jehovah sady mana zo handay. Samby vatan-draha zany raha roe reo.
3. Ino ty tafilitsy amy anara hoe Jehovah?
3 Laha ty marina, tafilitsy amy anara hoe Jehovah io ty raha iaby mikasiky ani-Ndranaharintsika iny, anatini-zay ty zony handay. Ka laha mivola tsika hoe vatan-draha ty fanamasina ty anarani-Jehovah, le midika koa zay fa tsy maintsy manaporofo tsika fa ty fandaisani-Jehovah ro farani-ze soa. Mpanjaka Farani-ze Mahery Jehovah, le mifandramby marìny amy fandaisany zay anarany io.—Henteo ty efajoro hoe “ Ino Iaby ty Tafilitsy amy Alihevitsy Bevata Iny?”
4. Ino ty raha volanini-Salamo 135:13 mikasiky ty anara-Ndranahary, le ino iaby ty fanontanea hovaleantsika amy lahatsoratsy toy ato?
4 Tena miavaky ty anara hoe Jehovah. (Vakio Salamo 135:13.) Manino anara-Ndranahary io ro vatan-draha? Nanao akory ty nandratiratia ani-anara io tamy voalohany marè? Akory ty anamasina-Ndranahary azy? Le ino ty azontsika atao mba hiarova ani-anarany io? Hamaly ani-fanontanea reo tsika henanizao.
VATAN-DRAHA ANARA IO
5. Ino ty fanontanea mety hoeritseretin’olo sisany lafa maharè hoe tsy maintsy hamasìny ty anara-Ndranahary?
5 “Hohamasìny lahy ty anaranao.” (Mat. 6:9) Nivola Jesosy hoe zay ro tokony horesahy voalohany lafa mivavaky. Fe ino ty teani-Jesosy hovolany? Ty hoe manamasy raha raiky, le midika hoe manao azy ho masy na malio. Mety hisy hieritseritsy hoe: ‘Ka tsy fa masy noho malio va ty anarani-Jehovah?’ Mba hamalea ani-zay, le mila dinihintsika hoe ino iaby ty tafilitsy amy anara io.
6. Manino ro vatan-draha ty anara?
6 Raha bevata mandilatsy ty soratsy atao amy taratasy na tonony ty anara. Henteo moa raha volanini-Baiboly toy: “Aleo anara soa, tozay hananam-be.” (Ohab. 22:1, f.a.p; Mpito. 7:1) Manino ty anara ro vatan-draha? Satria tafilitsy anatiny ao ty laza, zany hoe ty fahitan’olo hafa ani-tomponi-anara iny. Tsy vatan-draha zany ty fomba isehoani-anara iny amy pejy raiky na ty fomba fanonona azy, fa ty vatan-draha marè le hoe ino ty eritseretin’olo hafa lafa mahita na maharè ani-anara zay.
7. Nanao akory ty nandratiratian’olo ty anara-Ndranahary?
7 Lafa miresaky vandy mikasiky ani-Jehovah ty olo, le mandraty ty lazany. Miezaky hanimba ty anarany rozy lafa manao ani-zay. Tamy zaridaini-Edena ao ty nisehoani-zay voalohany. Nisy nandratiraty ty anara-Ndranahary noho ty lazany. Ndao tsika handiniky ty raha azontsika ianara baka amy fanafiha io.
NANOMBOKY NISY NANDRATIRATY ANARA INY
8. Ino ty raha nihaini-Adama noho Eva, le ino ty fanontanea mipetraky?
8 Haini-Adama noho Eva hoe Jehovah ty anara-Ndranahary, sady mbo nahay raha bevata maro mikasiky azy koa rozy. Hain-drozy hoe ie ro Mpamoro, nanome fiaina noho pilasy soasoa mba hipetrahan-drozy, sady nanome an-drozy valy lavorary. (Gen. 1:26-28; 2:18) Fe, hampiasa ty sain-drozy lavorary va rozy mba handiniha ty raha iaby nataoni-Jehovah ho an-drozy? Hampitomboen-drozy va ty fitiavan-drozy noho fankasitrahan-drozy ani-Tomponi-anara iny? Nihanazava valini-fanontanea reo lafa nitsapa an-drozy ty fahavalo-Ndranahary.
9. Laha hentea ty Genesisy 2:16, 17 noho 3:1-5, ino ty nivolanini-Jehovah tamy mpivaly voalohany rey, le akory ty namalihani-Satana ty marina?
9 Vakio Genesisy 2:16, 17 noho 3:1-5. Nampiasa bibilava Satana mba hiresaky amy Eva noho hanontany azy hoe: “Marina va fa nivola taminareo Ndranahary hoe tsy mahazo mihina amy voani-hazo iaby amy zariday toy ato nareo?” Misy vandy anatini-fanontanea io ao, fe mivony manahaky poizy io. Ty raha nivolani-Ndranahary le hoe afaky mihina amy voani-hazo iaby rozy, laha tsy raiky zay avao. Nahazo nihina voankazo maro sankarazany Adama noho Eva. (Gen. 2:9) Tena matariky vatany Jehovah. Fe, nisy hazo raiky tsy nengà-Ndranahary hohanini-Adama noho Eva. Lafa nametraky ani-fanontanea iny Satana, le navalibalikiny ty marina. Sahala ta hivola Satana hoe matity Ndranahary. Mety nieritseritsy amy zay vasa Eva hoe: ‘Misy raha soa tsy engà-Ndranahary hananako va?’
10. Akory ty nandratiratiani-Satana mivanta ty anara-Ndranahary, le ino ty vokany?
10 Lafa nametraky ani-fanontanea io Satana, le mbo natoroni-Eva tse hoe Jehovah ro Mpanday azy. Nambarany amy Satana ze raha tena nivolani-Ndranahary. Nivola koa ie hoe tsy tokony hikasiky ani-hazo io rozy. Hainy ty fampitandrema-Ndranahary hoe ho maty rozy laha tsy manoriky safà. Fe hoy Satana: “Tsy ho maty zao mihintsy nareo.” (Gen. 3:2-4) Tsy hoe navandy mikasiky ani-Jehovah avao Satana. Avy le hita hoe nandratiraty mivanta ty anara-Ndranahary ie lafa nivola tamy Eva hoe mpavandy Jehovah. Nanomboky teo Satana le nanjary devoly, na mpandratiraty. Voafitaky tanteraky Eva satria Satana ro tena ninoany. (1 Tim. 2:14) Satana ro natokisany marè fa tsy Jehovah. Zay ro nahavy ani-Eva nandramby fanapahan-kevitsy farani-ze raty. Nanapa-kevitsy tsy hanoriky ty safàni-Jehovah ie. Nihina tamy voankazo nandrarani-Jehovah iny ie, bakeo nameany koa Adama.—Gen. 3:6.
11. Ino ty tokony ho nataoni-Adama noho Eva, fe tsy nataon-drozy?
11 Mba diniho moa ty raha tokony ho nivolanini-Eva tamy Satana. Eritsereto, ohatsy, hoe nivola manahaky ani-zao ie: “Tsy misy fahaizako anao, fa Jehovah Babako ro haiko. Teako ie sady atokisako. Baka aminy iaby ze kila raha anananay amy Adama. Le sakinao ty miresaky raha raty mikasiky azy? Mandehana any iha!” Azo antoky fa ho nifalifaly biby Jehovah laha nanao safà manahaky ani-zay anakampelany teany iny, ka nampiseho hoe tsy nivaliky! (Ohab. 27:11) Fe tsy naharitsy ty fitiavani-Eva ani-Jehovah. Nivaliky manahaky azy koa Adama. Tsy nana fitiava tsy miovaova Adama noho Eva, ka tsy nivitan-drozy ty niaro ty anarani-Baban-drozy lafa nisy nanaraty.
12. Akory ty namafazani-Satana vandy tan-tsaini-Eva tao, le ino ty tokony ho nataoni-Adama noho Eva?
12 Fa nihitantsika teo hoe teani-Satana hisy fisalasalà ty an-tsaini-Eva ao, ka nataony ze tsy ahazoani-Eva antoky hoe olo soa vatany Azy manday anara hoe Jehovah iny. Farany, tsy nahavita niaro ty anarani-Jehovah noho ty lazany Adama noho Eva. Nijanjy ani-Satana rozy, ka nanjary nizizo tamy Baban-drozy. Mbo manahaky ani-zay koa ty tetiky ampiasani-Satana henanizao. Manaraty ty anarani-Jehovah ie, ka mivola vandy mikasiky Azy. Lafa mino ani-vandini-Satana rey ty olo, le mora voatariky tsy hanoriky ty fitsipikini-Jehovah.
MANAMASY TY ANARANY JEHOVAH
13. Manino tsika ro mivola fa manamafy ani-hevitsy fototsy amy Baiboly ao iny ty Ezekiela 36:23?
13 Tsy miaro ty vatany va Jehovah fa ekeny avao fanasarà atao azy zay? Aha, tsy zay mihintsy! Ty Baiboly iaby iaby le manambara ty raha nataoni-Jehovah mba hanaporofoa hoe tsy marina fanasarà natao tamy zariday Edena tao iny. (Gen. 3:15) Azontsika fintiny manahaky ani-zao ty hevitsy fototsy amy Baiboly ao: Manamasy ty anarany Jehovah, ka mampiasa ty Fanjakà andesini-Anakilahiny iny mba hampimpoly ty rariny noho ty fiadana an-tany etoy. Manampy antsika hahay ty raha ataoni-Jehovah mba hanamasina ty anarany ty fanazavà amy Baiboly ao.—Vakio Ezekiela 36:23.
14. Manino ro manamasy ty anarani-Jehovah ty fomba namaleany ty fizizoa ta Edena tao?
14 Manao ze farani-vitany Satana mba tsy ho tanteraky ty raha teani-Jehovah hatao. Fe tozoro tsy mahavoa avao ty ezaky ataony. Tantaranini-Baiboly ty raha nataoni-Jehovah. Manaporofo raha rey hoe tsy misy Ndranahary manahaky azy. Marina fa nampalahelo ani-Jehovah ty fizizoani-Satana noho ty namany. (Sal. 78:40) Fe nasehoni-Jehovah hoe hendry noho mahaliny raha sady manao ty rariny ie lafa nandamy ani-raha zay. Natorony tamy fomba maro koa hoe farani-ze mahery ie. Fe ndre eo rezay, le ty fitiavany ro tena niboaky tamy ze kila raha nataony. (1 Jaona 4:8) Tsy nieny mihintsy Jehovah fa nanamasy ty anarany avao.
Navandy Satana lafa niresaky tamy Eva mikasiky ani-Jehovah. Fa ela biby zay, fe mbo manasara raha raty a Ndranahary avao ty Devoly zisiky henanizao (Fehintsoratsy 9-10, 15) *
15. Manao akory ty andratiratiani-Satana ty anarani-Jehovah henanizao, le ino ty vokany?
15 Mbo manaraty ty anara-Ndranahary avao Satana henanizao. Verevereny ty olo mba hisalasala, ka tsy hino hoe mahery noho manao ty rariny Ndranahary, sady hendry noho be fitiava. Miezaky, ohatsy, Satana mba handresy lahatsy olo hoe tsy namoro ani-raha iaby zao Jehovah. Laha mbo mino a Ndranahary avao olo iny, le ataony koa ze hinoany hoe maneritery ty fitsipiki-Ndranahary sady tsy rariny ty raha ampanaoviny. Ampianariny mihintsy aza ty olo hoe raty fanahy noho tsy midary olo Ndranahary ka manoro olo amy afobe. Lafa mino ani-fandratiratia zay rozy, le manjary tsy ta hanoriky ty fitsipiky marina napetrakini-Jehovah. Zisiky handripahani-Jehovah tanteraky ani-Satana, le mbo handratiraty ani-Jehovah avao ie sady hataony koa ze hahavy anao tsy hanompo ani-Jehovah. Ho vitany va raha zay?
INO TY AZONAO ATAO?
16. Ino ty raha tsy nataoni-Adama noho Eva fe azonao atao?
16 Engani-Jehovah handramby anjara amy fanamasina ty anarany ty olombelo tsy lavorary. Vokatsini-zay, le afaky manao ty raha tsy nataoni-Adama noho Eva iha. Manarasara vandy noho mandratiraty ty anarani-Jehovah ty olo amy tontolo toy eto, fe mana fahafaha hiaro azy iha ka hanambara ty marina hoe Jehovah zao masy, manao ty rariny, soa fanahy noho be fitiava. (Isa. 29:23) Afaky manoha ty fandaisany iha. Azonao atao ty manampy ty olo hafa hahatakatsy hoe ty fandaisani-Jehovah raiky avao ro manao ty marina, sady handay fiadana noho hasambara ho ahi-ty zavaboary iaby.—Sal. 37:9, 37; 146:5, 6, 10.
17. Amy fomba akory ty nanambarani-Jesosy ty anarani-Babany?
17 Manaraky ty modelini-Jesosy Kristy tsika lafa miaro ty anarani-Jehovah. (Jaona 17:26) Tsy hoe nampiasa ty anarani-Babany avao Jesosy lafa nanambara amin’olo ty anarany fa niaro ty lazani-Jehovah koa. Nitoheriny, ohatsy, ty Fariseo satria atao raha nampiseho tamy fomba sankarazany hoe masiaky Jehovah zao, mitaky raha maro, lavitsy antsika sady tsy mahaferinay. Nampeani-Jesosy ty olo mba hahita hoe mahay mandanjalanja Babany, manam-pahareta, be fitiava sady manenga hadisoa. Tena nanahaky tanteraky ty toetsini-Jehovah Babany koa ie mba hanampea an-drozy hahay azy.—Jaona 14:9.
18. Akory ty azontsika anaporofoa hoe vandy fanasarà ani-Jehovah rey?
18 Manahaky ani-Jesosy, le azontsika atao ty miresaky ze raha haintsika mikasiky ani-Jehovah, sady mampianatsy ty olo hoe Ndranahary be fitiava noho soa fanahy ie. Lafa manao ani-zay tsika, le manaporofo hoe vandy fanasarà ani-Jehovah rey. Manamasy ty anarani-Jehovah tsika lafa ataontsika ze hahamasy ani-anara io am-po noho an-tsain’olo ao. Afaky manahaky ani-Jehovah koa tsika. Azontsika atao soa raha zay ndre tsy lavorary aza tsika. (Efes. 5:1, 2) Mandramby anjara amy fanamasina ty anarani-Jehovah tsika laha atorontsika amy ty raha volanintsika noho ataontsika ty tena toetsiny. Manamarina ani-anara io tsika lafa ampeantsika hiala amy ze fampianaran-diso mikasiky ani-anara io ty olo. * Porofoentsika koa hoe vitan’olombelo tsy lavorary ty tsy mivaliky amy Ndranahary.—Joba 27:5.
Teantsika hampea ty olo ampianarintsika Baiboly mba hahay hoe soa fanahy noho be fitiava Jehovah (Fehintsoratsy 18-19) *
19. Manino ty Isaia 63:7 ro manampy antsika hahita hoe ino ty raha kendrentsika voalohany marè lafa mampianatsy?
19 Mbo misy fianara bevata azontsika orihy koa. Lafa mampianatsy ty fahamarina amy Baiboly ao tsika, le matetiky hamafisintsika hoe mana zo handay ani-kila raha iaby zao Ndranahary. Tena marina raha zay. Fe ndre tena ilà aza ty mampianatsy ty didi-Ndranahary, le ampeantsika koa ty olo mba ho tea ani-Jehovah Babantsika noho tsy hivaliky aminy. Zay ty raha kendrentsika voalohany marè. Ka soa laha hamafisintsika ty toetsy soa ananani-Jehovah, mba hazava soa ty mikasiky ani-tomponi-anara io. (Vakio Isaia 63:7.) Lafa manahaky ani-zay ty fomba fampianarantsika, le hanampy ty hafa ho tea ani-Jehovah tsika, ka hanoriky ty safàny rozy satria maniry tsy hivaliky aminy.
20. Ino ty hodinihintsika amy lahatsoratsy manaraky?
20 Ka manao akory ty hahaizantsika hoe mifanaraky soa amy ty anarani-Jehovah noho manampy ty hafa hihamariny azy ty fandaisam-batantsika noho ty fomba fampianarantsika? Amy lahatsoratsy manaraky ao ty valini-zay.
HIRA 2 Jehovah no Anaranao
^ feh. 5 Ino ty tena vatan-draha amy ty olombelo noho ty anjely? Manino raha io ro vatan-draha, le manino ro mahakasiky antsika? Hanampy antsika ty fahaiza ani-valini-fanontanea reo noho ty fanontanea hafa mba hanatanjaky ty fifandrambesantsika amy Jehovah.
^ feh. 18 Nivola ty boky noho gazetintsika taloha, fa tsy mila hamarìny ty anarani-Jehovah satria tsy nisy nametraky fisalasalà hoe mana zo handay ani-anara io ie. Fe nihanazava ty fahatakarantsika. Nambarani-mpitari-draharaha tamy fivoria fatao santao tamy 2017 raha zay. Hoy ty asany: “Laha atao mivanta le zao, tsy diso tsika laha mivavaky mba hohamarìny ty anarani-Jehovah satria tena mila hamarìny ty lazani-Jehovah.”—Henteo ty fandahara Zanviè 2018 amy jw.org® ao. Henteo amy hoe RAHA FA MISY > TELE JW.
^ feh. 62 SARY: Nasarani-Devoly hoe mpavandy Ndranahary lafa niresaky tamy Eva ie. Fa ela biby zay Satana ro nivola raha diso maro, ohatsy hoe raty fanahy Ndranahary, na tsy namboari-Ndranahary ty olombelo.
^ feh. 64 SARY: Lafa mitariky fampianara Baiboly rahalahy io, le hamafisiny ty toetsi-Ndranahary.
