SAMBY matoky tsika iaby hoe mitariky noho manampy ty vahoakiny amy lafiny ara-panahy Jehovah amy “andro farany” zao. (2 Tim. 3:1) Fe anjarantsika kiraidraiky ty hanaraky ani-ze atorony. Manahaky ani-Israelita tan-diomonto any rey ty raha iainantsika. Tsy maintsy nanao raha rozy lafa naharè trompetra maneno.

Nampanamboarini-Jehovah trompetra volafoty roe natao tamy martò Mosesy, mba ho ‘famoria ty vahoaky noho hanambarà hoe tokony fa hiala amy toby ao rozy.’ (Nom. 10:2) Tokony hotsofini-mpisoro reo amy fomba samby hafa trompetra reo arakaraky ze raha ampanaovy an’olo rey. (Nom. 10:3-8) Mahazo tari-dala amy fomba sankarazany koa ty vahoaki-Ndranahary henanizao. Hodinihintsika ty telo amy fomba reo, le hohenteantsika ty itovizany amy feoni-trompetra taloha rey. Hiresaky mikasiky fivoriambe tsika, ty fampiofana ani-mpiandraikitsy voatendry reo, noho ty fomba anomeza tari-dala ty fiangona iaby.

Lafa teani-Jehovah havory amy filira antinanani-tranolay masy eo “ty vahoaky iaby”, le nitsofini-mpisoro rey miaraky trompetra roe rey. (Nom. 10:3) Nizara efatsy ty toby misy ani-foko iaby rey, le tanivo teo ty tranolay masy. Fe niren-drozy soa koiky iny. Azo antoky fa niavy malaky ze nipetraky marìny ani-filira iny teo. Fa mety ho tafarafara azy nipetraky lavidavitsy rey vo niavy, sady nila nanao ezaky fanampiny. Ndre zay ndre tsy zay, le teani-Jehovah hivory eo iaby rozy mba hijanjy toromariky.

Tsy mivory amy tranolay masy tsika henanizao, fe misy fivoriambe noho fivoria manoka koa ikoiha antsika. Miaraky amy ty vahoaki-Ndranahary tsika lafa any, le mahazo toromariky noho fanazavà tena ilà. Afaky manaraky fandahara mitovy ty vahoakini-Jehovah amy tany toy iaby amy fotoa manahaky ani-rey. Tsapani-ze maneky ani-fanasà iny hoe mivory miaraky amin’olo anatini-vahoaky raiky falifaly rozy. Tena tean-drozy raha zay. Nila nanao lia lavitsy ty sisany amin-drozy. Fe ndre zay, le resy lahatsy ze maneky ani-fanasà io hoe tsy ho matiantoky ie laha avy any.

Ka manao akory ty olo mipetraky amy pilasy mitoka, lavitsy ani-fivoriambe rey? Soa avao fa mivoatsy ty teknolozỳ ka maro amin-drozy ro afaky nanaraky fandahara mitovy sady nahatsapa hoe sahala tafaraky teo rozy. Tamy fitsidihani-solontenani-foibe raiky, ohatsy, le nalefani-sampani-Bénin mivanta ho amy tanà mitoka kaihy hoe Arlit, a Niger any fandahara iny. Nisy 21 ty rahalahy noho anabavy, noho ty olo kinto nanatriky. Marina fa lavitsy ty misy an-drozy, fe nahatsapa  rozy hoe niharo raiky amy mpanatriky 44 131 tamy fivoria bevata iny. Nanoratsy ho zao ty rahalahy raiky: “Misaotsy anareo bevata lahy nandefa mivanta ani-fandahara manoka iny ho anay. Hitanay tamin’iny hoe tena tea anay vatany nareo.”

Lafa trompetra raiky avao ro tsofini-mpisoro rey, le ‘ty mpiadidy, zany hoe ze olo mpihefy ty arivo amy Israely eo’ ro ho avy amy tranolay fivoria iny eo. (Nom. 10:4) Teo rozy ro nandramby toromariky noho fampiofana baka amy Mosesy. Hanampy an-drozy hamita soa ty andraikitsin-drozy amy fokon-drozy any raha zay. Laha nimpiadidy koa iha tamy zay, tsy ho niezaky marè va iha mba ho niavy teo?

Anti-panahy ro misy amy fiangona eo henanizao, fa tsy “mpiadidy”, sady tsy manjakazaka amy aondri-Ndranahary iandraiketan-drozy reo rozy. (1 Pet. 5:1-3) Fe miezaky marè hikarakara ani-aondry reo rozy, ka maneky lafa kaihy hanatriky fiofana fanampiny, ohatsy hoe Sekolini-Fanompoa Fanjakà Iny. Ianarani-anti-panahy reo amy fotoa rey hoe akory ty fomba handamina soa ty raha amy fiangona eo. Vokatsini-zay, le vomaiky matanjaky ara-panahy iaby ty olo amy fiangona eo. Ndre mbo tsy nanatriky ani-sekoly rey iha, le azo antoky fa nahasoa anao ty fiofana nirambesini-ze niavy tany.

Ataoni-mpisoro israelita reo miovaova kindraiky ty feoni-trompetra iny lafa tsofin-drozy. Nidika raha zay fa teani-Jehovah hifindra ty vahoaky iaby an-toby ao. (Nom. 10:5, 6) Lafa mifindra toby iny, le hita hoe tena miavaky ty fomba nandamina azy. Fe mitaky asa be raha zay. Mety tsy hazoto hifindra ty Israelita sisany amy fotoa zay. Fa manino?

Mety nieritseritsy ty sisany amin-drozy hoe matetiky loatsy kaiky iny na tampoky marè. “Kindraiky rahona iny nijano nanomboky tamy takariva zisiky maraindray.” Fa misy fotoa ie nijano “roe andro na vola raiky na andro maro”, zay vo mandeha ndraiky. (Nom. 9:21, 22) Impiry rozy ro nifindra toby laha atambatsy? Misy pilasy 40 eo ho eo resahini-Nomery toko faha-33 hoe nanaovani-Israelita reo toby.

Mety ho nahita pilasy misy alokaloky ty Israelita sisany kindraiky. Azo antoky fa niteatean-drozy ty nipetraky amy pilasy manahaky ani-zay satria “liomonto bevata sady mampatahotsy” ty nandehanan-drozy. (Deot. 1:19) Mety ho nimora tamin’olo sisany amy zay ty nieritseritsy hoe tsy hahasoa raha ty fifindran-drozy.

Lafa nanomboky nifindra ty foko sisany, le mety ho nisarotsy amy ty sisany ty handiny ty torony. Samby maharè ty feoni-trompetra miovaova iny iaby ty olo iaby, fe tsy tokony hitovy ty fotoa andehana. Laha vo tsofy mamoaky feo miovaova trompetra iny, le ty foko mitoby antinana ao zay ro tokony handeha, zany hoe Joda, Isakara noho Zebolona. (Nom. 2:3-7; 10:5, 6) Lafa lasa rozy, le nitsofini-mpisoro rey fanindroeny ndraiky trompetra iny mba hamoaky feo miovaova. Ty foko telo mitoby antimo ao ro handeha amy fotoa zay. Manao ho zay avao mpisoro rey zisiky andehanani-foko iaby.

Mety ho sarotsy aminao ty haneky ty fanovà sisany ataoni-fandamina. Ino ty antony? Nikoronta vasa ty sainao lafa nisy fiovà maro tsy ampoizy. Na mety ho niteateanao ty fomba nanaova ani-raha iny taloha, ka teanao laha mba tsy novà. Ndre ino ndre ino ty antony, le tsy maintsy nenganao handeha ty fotoa, sady nila nizatsy ani-fiovà iny iha. Fe ndre zay, laha miezaky maneky avao tsika, le ho hitantsika ty mahasoa ani-fanovà iny sady ho falifaly amintsika Jehovah.

Nitariky lahilahy, ampela noho ajà an-tapitrisany tan-diomonto any Jehovah tamy androni-Mosesy. Tsy ho nitafaboaky velo rozy laha tsy ie ro nikarakara noho nitari-dala an-drozy. Mitariky antsika koa Jehovah, ka mbo velo ara-panahy tsika henanizao, sady vomaiky aza mihamaro! Loniky lahy tsika iaby mba ho tapa-kevitsy manahaky ani-Israelita tsy nivaliky rey, ka hanao raha lafa maneno trompetra iny!