1. Ino hoasani-mpianatsini-Jesosy reo ty raha tokony hataon’olo maro biby rey?

NDRAIK’ANDRO, nisy lahilahy noho ampela maro biby nana a Jerosalema any. Olo baka amy tany samby hafa rozy le tsy nitovy ty fivolanan-drozy. Nisy raha niavaky niseho tamy andro io. Tampotampoky teo, nisy Jiosy vitsivitsy lasa nahay ty fivolanani-vahiny maro biby rey! Tena nitseriky olo rey. Fe vomaiky nitseriky rozy lafa naharè ty raha nivolanini-Jiosy reo noho ty raha niresahini-apostoly Petera tamy ze olo iaby nanatriky teo. Nambara an-drozy hoe afaky ho avotsy rozy laha mampiseho finoa ani-Jesosy Kristy. Tena nidosiky ty fon-drozy raha zay. Farany rozy nanontany hoe: “Ino zany ty tokony hataonay?” Le namaly Petera hoe: “Ao samby hatao batisa ... nareo kiraidraiky.”​—Asa. 2:37, 38.

2. Ino ty hodinihintsika amy lahatsoratsy toy ato? (Henteo sary amy fononi-gazety toy.)

² Tena tsy nampino ty raha niseho tafarani-zay. Nisy olo 3 000 eo ho eo natao batisa tamy andro io, ka lasa mpianatsini-Kristy. Iny ty nanombohani-asa bevata nanirahani-Jesosy ty mpanori-dia azy. Ino asa io? Ty fanaova mpianatsy. Mbo manao ani-asa io avao ty mpanori-dia azy zisiky henanizao. Fe tsy hoe hiresaky amin’olo iny eo tsika le avy le ho parè hatao batisa ie. Mety ho am-bolany maromaro na an-taony mihintsy aza ty mpianatsy raiky vo ho avy amy batisa. Asa mafy ty manampy olo ho lasa mpianatsini-Kristy. Mety hainao soa zay laha mana mpianatsy iha henanizao. Hodinihintsika amy lahatsoratsy toy ato  hoe ino ty azonao atao mba hanampea ty olo ampianarinao hatao batisa.

3. Laha hentea ty Matio 28:19, 20, tsy maintsy manao ino ty mpianatsy raiky vo azo atao batisa?

³ Tsy maintsy manoriky ze raha ampianarini-Baiboly mpianatsy iny vo azo atao batisa. (Vakio Matio 28:19, 20.) Lafa manoriky ty raha ianarany ie, le hanahaky ani-“lahilahy mahihitsy” tamy fanoharani-Jesosy iny, zany hoe manory ty tranony anabo vatolampy. (Mat. 7:24, 25; Lioka 6:47, 48) Ino ty azontsika atao mba hanampea ani-mpianatsy iny hanoriky ty raha ianarany? Misy soso-kevitsy telo retoa.

4. Ino ty azontsika atao mba hahavy ty olo ampianarintsika hiezaky avao ka ho avy amy batisa? (Henteo koa ty efajoro hoe “ Ampeo ty Mpianatsinao mba Hana Raha Kendrè Noho Hahatratsy ani-Raha Kendreny Zay.”)

⁴ Ampeo hana raha kendrè ty mpianatsinao. Ino ty antony? Mba eritsereto moa hoe handeha hanao voiazy lavitsy iha. Mety fa hainao hoe aia iaby ty pilasy soasoa an-dala eny le mety mba ta hijano kelikely iha lafa mbeo. Atao raha tsy lavitsy lala iny lafa manao ani-zay iha. Manahaky ani-zay koa fa laha miezaky manatratsy raha mora vitany tse mpianatsy iny, le hatòky ie hoe ho tratsiny raha tena kendreny iny, zany hoe hatao batisa. Fa misy efajoro hoe “Raha kendrè” amy boky hoe Ho Azonao Tavy ty Fiaina Zisiky Farany! Ampiasao raha io mba hanampea ty mpianatsinao hana raha kendrè. Saky tampitsy ty ‘Fianara’ kiraidraiky, le iaraho midiniky aminy hoe manino raha kendrè io ro hanampy azy hanoriky ani-raha vo baka nianarany iny. Laha misy raha hafa teanao ho tratsirini-mpianatsy iny le azonareo soraty amy hoe “Raha hafa” eo. Fa nasia malalaky azo anorata ty eo. Ampiasao avao raha reo lafa nareo mampimpoly miresaky ty raha azony tratsiry ato ho ato, na ty raha mety mbo ho ela vo ho tratsiny.

5. Laha hentea ty Marka 10:17-22, ino ty raha nampanaovini-Jesosy ani-lahilahy mpanarivo iny, le ino ty antony?

 ⁵ Ampeo hanova ty fomba fiainany ty mpianatsinao. (Vakio Marka 10:17-22.) Fa nihaini-Jesosy fa ho sarotsy amin’olo mpanarivo ty hoe hamarotsy ty hananany iaby. (Mar. 10:23) Fe zay ty nampanaovini-Jesosy ani-lahilahy mpanarivo niresaky taminy iny. Ino ty antony? Satria niteani-Jesosy ie. Misy fotoa tsika mety misalasala hampirisiky ani-mpianatsy iny hanoriky ani-raha ianarany iny. Haintsika vasa hoe mbo tsy tena parè hiova ie. Mety ho elaela koa ty olo raiky vo tena ho afaky amy ty raha nahazatsy azy ka hana toetsy vaovao. (Kol. 3:9, 10) Fe laha tsy misalasala iha fa miresaky aminy alohaloha mikasiky raha tokony hareniny iny, le hanomboky alohaloha koa ty ezaky hataony. Laha mifampiresaky soa aminy ho zay iha le atoronao hoe mikarakara azy vatany iha.​—Sal. 141:5; Ohab. 27:17.

6. Manino tsika ro tokony hametraky fanontanea mampirisiky ani-mpianatsy iny hivola ty hevitsiny?

⁶ Tena soa tsika laha mampirisiky ani-mpianatsy iny hiresaky ty hevitsiny. Afaky mametraky fanontanea, ohatsy, tsika. Ho haintsika amy zay hoe ino ty raha fa hainy noho ty raha inoany. Laha manao ani-zay matetiky iha, le ho moramora aminao ty hifampiresaky aminy mikasiky raha tsy ekeni-sainy lafa afara any. Maro fanontanea mampirisiky ani-mpianatsy iny hiresaky ty hevitsiny ty boky Ho Azonao Tavy ty Fiaina Zisiky Farany! Misy fanontanea ho zao, ohatsy, amy fianara 04 ao: “Akory ty hevitsinao, ino ty tsapani-Jehovah lafa mampiasa ty anarany iha?” Toy koa amy fianara 09 ao: “Ino zao ty raha mba teanao horesahy amy vavaky?” Amy voalohany tse, mety ho sarotsy amy mpianatsy iny ty hamaly fanontanea ho reo. Fe afaky manampy azy iha. Ampiofano ie mba hieritseritsy mikasiky ty andinin-teny noho ty sary amy boky iny ao.

7. Ino ty azontsika atao mba tena hisy vokany ty fampiasantsika tantaran’olo?

⁷ Lafa haini-mpianatsy iny ty raha tokony hataony le mampiasà tantara tena nisy mba hampirisiha azy hanoriky ani-raha iny. Laha manahira azy, ohatsy, ty resaky famonjea fivoria, le afaky atoronao azy ty video hoe Nikarakara Ahy Jehovah, amy hoe “Diniho koa Retoa” amy fianara 14 ao. Misy tantara ho reo iaby ty ankamaroani-fianara amy boky Ho Azonao Tavy ty Fiaina Zisiky Farany! Henteo amy fizarà hoe “Diniho Laliky” na amy hoe “Diniho koa Retoa.” * Miambena soa tsy no hampitovizinao amin’olo hafa mpianatsy iny. Ka mivola mihintsy hoe: “Ie aza nahavita ani-zay, ka iha va le tsy hahavita.” Engao mpianatsy iny avao ro hampiboaky ani-zay. Henteo avao hoe ino ty raha nanampy an’olo tantaranini-video iny ka nahavy azy hanaraky ty fampianarani-Baiboly, le zay ro resaho aminy. Afaky miresaky andinin-teny tena ilà koa vasa iha, na miresaky ty raha tena nanampy azy. Resaho avao, laha mbo azo atao, hoe akory ty nanampeani-Jehovah an’olo iny.

8. Ino ty azontsika atao mba hanampea ty mpianatsintsika ho tea ani-Jehovah?

⁸ Ampeo ho tea ani-Jehovah ty mpianatsinao. Akory ty hanaova ani-zay? Milà hevitsy hanampea azy hahay soa mikasiky ty toetsini-Jehovah. Ampeo mpianatsinao iny hahita hoe Ndranahary falifaly Jehovah sady teany ty manampy ani-ze olo tea azy. (1 Tim. 1:11; Heb. 11:6) Asehò ani-mpianatsy iny fa mahasoa azy ty manoriky ani-fianara rey, le hazavano hoe tea azy Jehovah kanao nanome ani-raha rey. (Isaia 48:17, 18) Hihamitombo amy zay ty fitiavany  ani-Jehovah ka vomaiky ie ta hiova.​—1 Jaona 5:3.

9. Laha dinihy ty Marka 10:29, 30, ino ty mety hanampy olo raiky laha misy raha tsy maintsy afoiny mba hahavy azy ho vita batisa?

⁹ Misy raha tsy maintsy afoini-mpianatsy iny laha teany ty ho vita batisa. Mety ho hanana zay, manahaky nivolanini-Jesosy tamy lahilahy mpanarivo niresahintsika taloha eroy iny. Mety hila asa hafa mihintsy, ohatsy, ie laha tsy mifanaraky amy torolalani-Baiboly ty asa ataony. Ty sisany koa mety tsy hiaraky amin’olo tsy tea ani-Jehovah rey sasy, ndre ninamany biby aza rozy taloha. Ty ilany aza mety hariani-fianakaviany satria malay Vavolombeloni-Jehovah longony reo. Nivola Jesosy fa mety ho sarotsy amin’olo sisany ty raha ho reo. Fe nampitamà ie hoe tsy ho diso fanantenà ze olo manori-dia azy fa hotahini-Jehovah ka hameany fianakavia tena tea an-drozy. (Vakio Marka 10:29, 30.) Ino ty azonao atao mba hahasoa ty mpianatsinao fanomeza soasoa io?

10. Ino ty ianaranao baka amy raha nivolanini-Manuel?

¹⁰ Inamao mpianatsinao iny. Atorò ani-mpianatsy iny hoe midary azy iha. Tena ilà raha zay. Ino ty antony? Henteo moa ty raha nivolanini-Manuel, mipetraky a Meksiky any. Nahatiaro ty raha nataoni-mpampianatsy azy ie, le nivola hoe: “Saky hianatsy Baiboly zahay, le anontaneany avao aho hoe manao akory aho zay. Nataony ze hampahazo ay ahy, le tsy nisakanany aho ndre niresaky raha hafa. Tsapako hoe nidary ahy vatany ie.”

11. Manino ro mety hahasoa ani-mpianatsy iny laha manoka fotoa ho azy tsika?

¹¹ Nanoka fotoa hiaraha amy mpianatsiny rey Jesosy. (Jaona 3:22) Manaova ho zay koa. Laha fa mandroso mpianatsinao iny, le azonao atao, ohatsy, ty manasa azy ho an-tranonareo any mba hino ditè na hisakafo na hanenty ty raiky amy fandahara Tele JW rey. Mety ho teani-mpianatsinao iny raha zay, sirtò lafa manao fety tsy mifanaraky amy Baiboly rey ty  namany na ty fianakaviany. Mba tsy mangiky ie amy zay. Zay ty nataoni-mpampianatsy ani-Kazibwe, rahalahy mipetraky an’Ouganda any. Hoy ty asany: “Laha ty fahitako azy, ty tena nahaizako raha maro mikasiky ani-Jehovah, tsy hoe zahay nianatsy iny avao fa tamy ie nanoka fotoa ho ahy rey koa. Nanjary hitako hoe tena mikarakara ty vahoakiny Jehovah ka tena falifaly rozy. Tena nila ani-zay mihintsy aho.”

12. Manino tsika ro tokony hanovaova nama lafa mampianatsy Baiboly?

¹² Ovaovao ty namanao lafa mampianatsy. Mety hanao ho zao tsika kindraiky hoe manahira ty mila nama, ka aleo mandeha raiky na tsy miovaova nama. Mety ho zay ty metimety amintsika. Fe tena hanampy ani-mpianatsy iny tsika laha miaraky amy mpitory samby hafa lafa mampianatsy azy. Hoy Dmitrii, mipetraky a Moldovỳ any: “Samby nana ty fomba fanazavany hevitsy mpitory niavy tamiko teo rey. Lasa nahita fomba sankarazany hanorihako ani-raha nianarako iny aho. Tsy de nimenatsy koa aho lafa nanatriky fivoria voalohany, satria fa nihitako iaby ty ankamaroani-rahalahy noho anabavy rey.”

13. Manino tsika ro tokony hanampy ty mpianatsintsika hanatriky fivoria?

¹³ Ampeo hanatriky fivoria ty mpianatsinao. Fa manino? Satria Jehovah mihintsy ro nandidy ty mpanompony hiaraky hivory sady anisani-fanompoa azy raha io. (Heb. 10:24, 25) Ankoatsini-zay, fianakaviantsika rahalahy noho anabavy amy fiangona eo reo. Ka lafa mivory miaraky amin-drozy tsika, le sahala hoe miaraky mihina hany matsiro. Laha iha manampy ty mpianatsinao hanatriky fivoria, le manampy azy hahavita raha tena bevata. Hitariky azy amy batisa raha zay. Fe mety ho sarotsy aminy ty hivory amy voalohany. Afaky manampy azy hahavita ani-zay ty boky Ho Azonao Tavy ty Fiaina Zisiky Farany! Amy fomba akory?

14. Akory ty azontsika anampea ty mpianatsintsika hivory?

¹⁴ Ampiasao ty fianara 10 amy boky Fiaina Zisiky Farany mba hanampea ani-mpianatsy iny. Tamy boky io mbo tsy nivita, le nisy mpitory vitsivitsy nivolany mba hanandra hampiasa ani-fianara io amy ty mpianatsin-drozy. Nivola rozy hoe tena nety soa raha io sady nanampy an’olo rey hivory. Tsy midika zay hoe amy fianara 10 any iha vo hanasa ty mpianatsinao hivory. Avy le asao ie laha vo afaky manao ani-zay iha sady anovo matetitetiky raha zay. Samby mana ty raha manahira azy mpianatsy Baiboly rey. Diniho zany hoe ino ty raha ilàni-mpianatsinao iny, le henteo vasa afaky manampy azy iha. Ka kivy laha mbo tsy mivory avao ie ndre fa elaela aza ty niezahanao nanasa azy. Mahalinisa le asao avao ie.

15. Ino iaby ty raha mety hatahorani-mpianatsintsika?

¹⁵ Tiaronao va hoe nanao akory iha tamin’iha mbo tsy ni-Vavolombeloni-Jehovah? Tsy mba natahotsy va iha? Mety nieritseritsy iha tamy zay hoe tsy ho vitanao mihintsy hitory zao. Na mety natahotsy iha hoe hanohitsy anao ty longonao na ty namanao. Laha zay ie, le azonao soa zany ty raha mahazo ani-mpianatsinao iny. Nivola Jesosy hoe mety hatahotsy ho zay ty olo sisany. Fe nampitandremany ty mpanori-dia azy mba tsy hatahotsy marè ka lasa tsy hanompo ani-Jehovah. (Mat. 10:16, 17, 27, 28) Ino ty nataoni-Jesosy mba hanampea ty mpianatsiny tsy hatahotsy? Le akory ty azonao anahafa azy?

16. Ino ty azontsika atao mba hampiofana ty mpianatsintsika hiresaky ty raha inoany?

¹⁶ Ampiofano tsikelikely mpianatsinao iny mba hiresaky ty raha inoany. Mety natahotsy mpianatsini-Jesosy rey lafa nirahiny hitory. Fe nanampy an-drozy Jesosy. Nambarany an-drozy  hoe aia ty pilasy hitoria le ino ty hafatsy horesahy. (Mat. 10:5-7) Akory ty azonao anahafa ani-Jesosy? Ampeo mpianatsinao iny hahay hoe lafa manao akory ie ro afaky mitory. Anontaneo, ohatsy, ie tsy no mahita olo mila iresaha fahamarina voafaritsy soa. Bakeo ampeo ie hanoma ty raha horesahy, le atorò azy ty fomba farani-ze tsotra hiresaha ani-fahamarina iny amin’olo. Laha mety, le manaova fanazaran-tena miaraky aminy. Afaky ampiasanareo ty hoe “Mieritseritsy ty Olo Sisany Hoe” na “Mety Hisy Hanontany Hoe”, amy boky Fiaina Zisiky Farany io. Lafa manao ani-fanazaran-tena io nareo, le anovo ze hahavy ani-mpianatsy iny hahay hampiasa Baiboly noho hahay hamaly amy fomba tsotra.

17. Akory ty azontsika ampiasà ty Matio 10:19, 20, 29-31 mba hanampea ani-mpianatsy iny hatòky ani-Jehovah?

¹⁷ Ampeo hatòky ani-Jehovah ty mpianatsinao. Nanome toky ty mpianatsiny Jesosy hoe hanampy an-drozy Jehovah satria tea an-drozy. (Vakio Matio 10:19, 20, 29-31.) Ampitiarovo ani-mpianatsinao iny fa hanampy azy koa Jehovah. Azonao atao ty manampy azy hiantehitsy amy Jehovah. Afaky mivavaky miaraky aminy, ohatsy, iha le resahinao ao ty raha kendreny. Zay mihintsy ty nataoni-mpampianatsy ani-Franciszek, rahalahy mipetraky a Pologne any. Hoy Franciszek: “Niresahini-mpampianatsy ahy iny tanatini-vavaky matetiky ty raha kendreko. Lafa nihitako hoe nivaleani-Jehovah vavaky nataony rey, le nanomboky nivavaky koa aho. Tsapako hoe nanampy ahy Jehovah lafa zaho nangataky andro tsy hiasà mba hanatreha fivoria noho fivoriambe.”

18. Manao akory ty fahitani-Jehovah ty asa fampianara ataoni-Kristiana?

¹⁸ Tena mila ze hahasoa ani-mpianatsy Baiboly rey Jehovah. Miezaky mafy amy zay ty Kristiana mampianatsy an’olo rey mba hahavy an-drozy hamonjy azy. Haini-Jehovah soa ezaky ataon-drozy zay ka teany biby rozy. (Isaia 52:7) Mbo afaky manampy mpianatsy handroso ho amy batisa avao iha ndre mbo tsy mana mpianatsy Baiboly aza henanizao. Amy fomba akory? Miaraha amy mpitory mana mpianatsy rey avao lafa mampianatsy rozy.