Nateraky ta Amioûn, a Liban any aho tamy 19 Mey 1940. Tao vitsivitsy tafarani-zay, nifindra ta Tripoli any zahay. Tany ty nahabe ahy. Tena tea ani-Jehovah Ndranahary ty fianakaviako ka nifankatea noho falifaly avao. Nisy limy mianadahy zahay: Telo ampela, lahilahy roe, le zaho ty farany. Niasa avao babako noho reniko fe tsy zay ro tena nivatan-draha tamin-drozy. Ty fianara Baiboly, ty fivoria kristiana, noho ty fampianara olo hahay a Ndranahary ro tena nifantohani-fianakavianay.

Nisy Kristiana voahosotsy maromaro tamy fiangonanay tao. Tao, ohatsy, Michel Aboud, le ie ty nitariky fianara boky fataoni-fiangona. Ta New York any ty nahaizany fahamarina, le nanomboky nitory ta Liban any ie tamy 1921. Tiaroko soa fa tena nanaja an-dry Anne noho Gwen Beavor ie sady nanampy an-drozy. Mbo tanora rozy roe vavy sady vo nahazo diplomy tamy Sekolini-Gileada. Lasa nimpinama biby zahay fe bakeo tsy nifankahita sasy. Fa ela biby tafara atoy, nifankahita ta Etazinỳ any ndraiky zahay amy Anne. Nifalifaly biby aho tamy zay. Nahita ani-Gwen koa aho tsiela tafarani-zay. Fa nanambaly ani-Wilfred Gooch ie sady nanompo tamy Betelani-Londres an’Angletera any.

Vitsivitsy avao ty mpitory ta Liban any tamy zaho mbo nimpamaraky. Fe nafana fo zahay, le nizarànay tamin’olo hafa ze raha nihainay tamy Baiboly ao. Mbo nanao ani-zay avao zahay ndre nanohitsy anay aza ty mpitariky fivavaha sisany. Le mbo tiaroko soa zisiky henanizao ty sisany amy raha niainanay rey.

Ndraiky andro, nitory tamy trano etazy raiky zay zahay amy anabaviko mana anara Sana zay. Nisy mompera zay amy zay niavy bakany. Mety nisy olo nikaiky azy vasa. Nasiaky ie bakany le nivolambolaniny anabaviko iny. Natosiny Sana le nilavo tambany any. Naratsy Sana tamy zay. Nikaihan’olo polisy mompera iny. Lafa niavy amy zay polisy rey le nataon-drozy azo antoky hoe misy mikarakara Sana. Nandesin-drozy amy biròn-drozy any mompera iny. Lafa tany ie vo hitan-drozy hoe kay manday basy ie io. Nanontaneani-polisy rey amy zay ie hoe: “Ino marina zany tena asanao toy? Mpitariky fivavaha sa mpitariky olo hirotaky?”

Toy koa misy tantara raiky, le atao raha vo nomaly io ty fitiarovako azy. Nanofa tomabily ty fiangonanay, le nandeha nitory tamy tanà lavitsy biby zay any. Nisoasoa tamy zay, fe lafa nireni-mpitariky fivavaha tamy tanà iny hoe nitory zahay le namory olo ie mba hanafiky anay. Nihorohoroen-drozy zahay. Ty sisany aza nitora-bato anay, le naratsy babako. Tiaroko tamy zay nifeno lio tarehiny iny. Nilitsy tanaty tomabily any rozy amy mamako, le nanaraky koa zahay iaby sady natahotsy avao. Fe tsy ho halinoko mihintsy raha nivolanini-mamako zay. Lafa ie nanasa ani-tarehini-babako iny, le nivola hoe: “Jehovah, mba engao lahy ty hadisoan-drozy fa tsy hain-drozy ty raha ataon-drozy.”

Namangy longonay rezay koa zahay ndraiky andro. Nisy mpitariky fivavaha manan-kanana zay tan-tranoni-dadabeko ao. Hainy soa amin’io hoe Vavolombeloni-Jehovah babako noho reniko. Vo 6 tao aho tamy zay. Nisy olo maro tao, fe zaho ro nanontaneany hoe: “Nanino iha mbo tsy vita batisa io?” Mbo kelikely aho, hoasako, sady laha zaho ta hatao batisa le mila mahay soa ty raha volanini-Baiboly noho mana finoa matanjaky tse. Tsy niteany raha nivolaniko iny, farany nivolaniny dadabeko fa nao zaho zao tsy nanaja azy.

Soa avao fa tsy de maro raha raty ho reo ty niainanay ta Liban any. Amy ankapobeny ty olo any, tea olo sady tea mandramby vahiny ka afaky nitory noho nampianatsy Baiboly olo maro zahay.

Nisy rahalahy tanora baka a Venezielà zay nandalo ta Liban any tamy zaho mbo nianatsy. Niaraky nivory taminay ie, le nifankatea rozy amy anabaviko raiky mana anara Wafa zay. Nifanambaly rozy lafa tafara atoy, le nipetraky a Venezielà atoy. Nanoratsy taratasy ho anay Wafa. Nimaninany marè zahay ka nitambetambeziny babako soa zahay trano raiky hifindra a Venezielà atoy. Farany zahay nifindra!

Niavy a Venezielà atoy zahay tamy 1953, le narìny ani-lapa-mpanjakà ta Caracas any ty nisy anay. Mbo nikely moa tena tamy zay ka le  nifalifaly saky nahita ani-prezidà iny nandalo mbeo niaraky amy tomabiliny soasoa iny. Tsy nimora tamin-dry babako ty nizatsy ty fiaina tatoy, ty fivolana, ty fomban-tany, ty hany, noho ty toetsandro. Ie rozy nanomboky nihazatsy, nisy raha raty niseho.

Nanomboky narary babako. Somary nahatseritseriky anay avao raha iny, satria ie olo natanjaky sady salama soa. Atao raha mbo tsy nisy fotoa namparary azy mihintsy. Fe lafa nandesy tamy dokotera ie, le nihita hoe voani-kansera. Tsy maintsy nirasà ie. Nampalahelo moa fa nimaty ie herinandro tafarani-zay.

Tsy haiko ty hivola azy fa tena nalahelo biby zahay. Vo ni-13 tao aho tamy zay. Tsy nampoizinay hoe ho maty babako. Fa tsy nitamà zahay hoe mbo ho falifaly zao. Nisarotsy tamy mamako iaby ty naneky hoe nimaty valiny iny. Elaela ie nanao ho zay avao, fe nieky zahay tafara atoy hoe mbo mitohy anè ty fiaina. Nivitanay avao ty niatriky ani-raha iny satria nanampy Jehovah. Nivita ty fianarako tamy lisè ta Caracas eny lafa zaho ni-16 tao. Tena ta hanampy ty fianakaviako amy zay aho.

Tamy zay koa Sana, azy anabaviko iny, nanambaly ani-Rubén Araujo. Fa nahavita Sekolini-Gileada Rubén, le nimpoly a Venezielà atoy ndraiky. Bakeo rozy nifindra a New York any. Nieritseritsy ty longoko hoe tokony hanohy fianara amy iniversitè aho. Farany aho nandeha a New York any, le niaraky nipetraky tamy anabaviko noho valilahiko iny. Lafa tamin-drozy any aho, le nampean-drozy mba hifandramby marìny amy Jehovah. Ankoatsini-zay, nifalifaly aho fa lasa nana nama matotsy maro tamy fiangona espagnioly nisy anay ta Brooklyn any. Tao, ohatsy, Milton Henschel noho Frederick Franz. Samby nanompo tamy Betelani-Brooklyn rozy mirahalahy.

Lafa narìny ho tampitsy ty tao voalohany nianarako tamy iniversitèni-New York, le nanomboky nieritseritsy aho hoe ino moa ty raha hataoko amy fiainako. Maro ty Kristiana miezaky hana raha kendrè amy fanompoa ani-Jehovah. Saky niresaky ani-rey ty lahatsoratsy amy Tilikambo ao le nivakiko noho nidinihiko soa. Hitako koa fa tena falifaly mpisava lala noho Betelita tamy fiangonanay ao rezay ka mba naniry hanahaky an-drozy aho. Fe mbo tsy nivita batisa aho. Haiko hoe mila manoka ty fiainako ho ani-Jehovah aho, le zay vatany ty nataoko. Natao batisa aho tamy 30 Marsa 1957.

Lafa zaho nivita batisa iny, le nieritseritsy hanao mpisava ala. Tena ta hanao mpisava lala mihintsy aho fe hitako hoe ho sarotsy amiko raha zay. Akory, hoasako, ty hahatratsirako ani-zao iaby laha sady manao mpisava lala aho ro mianatsy amy iniversitè? Nitapa-kevitsy aho hoe hiala amy iniversitè le himpoly a Venezielà, hanao mpisava lala. Nihazavaniko tamy mamako noho troky raiky amiko reo tamy taratasy raha iny, le namaly koa rozy. Hamaroan-draha taratasinay rezay!

Nimpoly ta Caracas any aho tamy Ziein 1957. Fe nihitako hoe somary sahirankira ry mamako. Tena nila olo hamelo an-drozy rozy. Ino  zany ty azoko atao? Nahita asa tamy banky aho kanefa zaho amin’io ta ho mpisava lala. Sady zay koa moa ty antony noliako. Nanapa-kevitsy aho hoe aleo samby hataoko rozy roe. Sady niasa tontolon’andro tamy banky any aho no nanao mpisava lala. Nanao ho zay aho tanatini-tao vitsivitsy. Tsy nana fotoa malalaky sasy aho fe tena nifalifaly!

Vomaiky nifalifaly aho lafa nifanambaly zahay amy Sylvia, anabavy baka an’Alemaigny any zay. Ampelasoa ie sady tena tea ani-Jehovah. Ta Venezielà atoy ty nifankahitanay satria nifindra tatoy ie niaraky tamin-dry babany. Nanan’anaky roe zahay: Michel (Mike) azy lahilahy iny, le Samira ampela iny. Nila nikarakara ani-mamako koa aho. Niaraky nipetraky taminay ie. Tsy maintsy nijano tsy ho mpisava lala aho mba hahafahako mikarakara ty fianakaviako, fe mbo nazoto nitory avao aho. Miezaky manao mpisava lala mpanampy avao zahay amy Sylvia saky vakansy.

Tamy anako reo mbo nianatsy ty nisehoani-raha niresahiko tam-boalohany teroy iny. Ekeko aloha fa tena nisoa ty fiainako, sady nanaja ahy iaby ty olo niaraky niasa amiko tamy banky any. Fe niteako laha mba mpanomponi-Jehovah ro ahaizan’olo ahy. Tsy niafaky tan-tsaiko ao raha zay. Farany nipetraky zahay morovaly le nandiniky ty dralanay. Amy banky niasako io koa, laha fa elaela ty niasan-tena tao, le amean-drozy drala be tena lafa miala mba ho fankasitrahan-drozy ty niasan-tena tao. Tsy nananan’olo trosa zahay ka nieritseritsy zahay hoe laha ataonay tsotra ty fiainanay, le ho ampy anay anatini-tao maromaro ty dralanay.

Tsy nimora aloha ty nanao ani-zay, fe tena nanoha ahy valiko miaraky amy mamako. Afaky hanao mpisava lala ndraiky aho. Tena nifalifaly biby aho! Le ie aho hanomboky hanao mpisava lala, nisy raha tsy nampoizinay.

Ndraiky andro, nivola dokoteranay iny hoe bevoka Sylvia. Tsy nampoizinay raha iny! Nifalifaly biby zahay, fe nieritseritsy mikasiky mpisava lala iny koa aho. Mbo afaky hanao mpisava lala avao va zany aho? Lafa nandeha kelikely ty fotoa le nanjary fa tsy nilininay ty hiaviani-ajà iny, le hiampy raiky ndraiky ty olo an-tranonay ao. Fe tsy nety afaky tan-tsaiko ao mihintsy resaky mpisava lala iny.

Niresaky mikasiky ty raha kendrenay zahay, bakeo nanapa-kevitsy hoe hanao mpisava lala avao aho. Niteraky ani-Gabriel amy zay Sylvia tamy Avrily 1985. Niala tamy asako tamy banky iny koa  aho, le nanomboky nanao mpisava lala ndraiky tamy Ziein 1985. Lasa Komitini-Sampana aho tafara atoy. Fe 80 km eo ho eo miala ani-Caracas ty nisy ani-biròni-sampana kanefa aho nila nandeha any indroe na intelo sankerinandro.

Tena nilavitsy biròni-sampana iny satria ta La Victoria any, farany zahay nanapa-kevitsy hifindra any, amy zay mba marìny ani-Betela. Tena fiovà bevata ho anay iny. Teako biby ty fianakaviako ka falifaly aho mana an-drozy. Tena nanampy ahy rozy. Parè hikarakara ani-mamako koa Baha anabaviko. Fa nanambaly Mike, fa Samira noho Gabriel mbo niaraky nipetraky taminay. Fe tsy maintsy nengan-drozy ty naman-drozy ta Caracas any lafa nifindra ta La Victoria atoy zahay. Tsy maintsy niezaky hizatsy ty fiaina atoy koa Sylvia satria kelikely tanà toy, kanefa tanànay taloha iny bevata sady maresaky. Lasa nipetraky tamy trano kelikely koa zahay lafa tatoy, le tsy maintsy niezaky ho zatsy ani-zay iaby zahay. Maro vatany ty raha niova lafa niala ta Caracas any zahay le nifindra a La Victoria atoy.

Mbo nisy raha niova ndraiky. Nanambaly Gabriel, le Samira koa fa tsy niaraky nipetraky taminay sasy. Nivoakaiky hipetraky amy Betela zahay amy Sylvia tamy 2007, le mbo manompo eto zahay zisiky henanizao. Anti-panahy Mike anakilahinay voalohany iny, le samby mpisava lala rozy amy Monica valiny. Anti-panahy koa Gabriel, le mipetraky an’Italỳ any rozy amy Ambra valiny. Samira amy zay mpisava lala sady miaraky miasa amy Betela.

Maro ty fanapahan-kevitsy bevata tsy maintsy nataoko tamy fiainako. Tsy anenenako mihintsy raha rey. Falifaly aho fa nahay nanapa-kevitsy. Tena misaotsy ani-Jehovah aho fa afaky nanao raha maro ho azy. Nihitako avao bakany zay hoe tena ilà ty mifandramby marìny amy Jehovah avao. Ka ndre ino ino ty fanapahan-kevitsy mila ataontsika, ndre bevata ndre kelikely, le afaky hanome fiadana antsika Jehovah, zany hoe fiadana “bevata marè mandilatsy ty eritseritsy iaby.” (Fil. 4:6, 7) Tena teanay amy Sylvia ty manompo amy Betela eto, sady tsapanay hoe nitahini-Jehovah ty fanapahan-kevitsy nataonay satria nieritseritsy azy avao zahay saky hanapa-kevitsy.