1. Manino ty mpanomponi-Jehovah sisany ro mety hahatiaro hangiky?

FA NISY fotoa va iha nahatiaro nangiky? Tsy iha raiky avao ro tratsini-zay. Fe ty tsy mampitovy azy avao, ty ahin’olo sisany tsiela afaky, fa ty ahi-ty ilany maharitsy ela biby. Misy aza mangiky avao ndre maro olo aminy eo. Ao ty vo nifindra fiangona le sarotsy aminy ty mahita nama. Ty ilany fa zatsy niaraky tamy fianakaviany ka lasa mangiky ie lafa tsy eo longony rey. Many ty longony fa nimaty koa ty sisany le mahatiatiaro ty fotoa niarahan-drozy. Mahatiaro mangiky koa ty Kristiana sisany, sirtò azy vo tsiela tamy fahamarina ao rey, satria tsy manompo ani-Jehovah ty fianakaviany noho ty namany le lasa manary azy na manenjiky azy.

2. Ino iaby ty fanontanea hovaleantsika?

² Haini-Jehovah ty raha iaby mikasikasiky antsika. Hainy soa ty raha tsapantsika lafa tsika mangiky, le ta hanampy antsika hahavita hiatriky ani-raha zay ie. Ino ty ataoni-Jehovah mba hanampea antsika? Ino ty azontsika atao lafa tsika mangiky? Le ino ty azontsika atao laha misy olo mahatiaro mangiky amy fiangona eo? Ndao hodinihintsika ty valini-fanontanea reo.

3. Akory ty nampisehoani-Jehovah hoe nahita ty raha nahazo ani-Elia ie?

³ Teani-Jehovah laha samby falifaly iaby ty mpanompony. Anilantsika kiraidraiky eo Jehovah sady ambiny lafa malahelo tsika na kivy. (Sal. 145:18, 19) Ho zay ty nataony tamy Elia mpaminany. Eritsereto moa hoe nanao akory ie lafa nisy raha tsapani-Elia, le ino ty nataony mba hanampea ani-mpaminaniny io. Niay tamy fotoa sarotsy tamy tantarani-Israely lahilahy  tsy nivaliky io. Nisy olo nanam-pahefà sady tsy tea ani-Jehovah nanenjiky ani-ze olo nivavaky taminy. Tsy vitani-zay fa mbo tean-drozy hovonoa koa Elia. (1 Mpanj. 19:1, 2) Nieritseritsy koa Elia hoe ie raiky avao ty mpaminany sisa tavela nanompo ani-Jehovah ka vomaiky nikivy ie. (1 Mpanj. 19:10) Akory ty natao-Ndranahary? Avy le nanampy ani-Elia ie. Naniraky anjely ie mba hanomeza toky azy hoe tsy raiky ie fa mbo nisy Israelita maro natahotsy a Ndranahary!​—1 Mpanj. 19:5, 18.

4. Ino ty raha resahini-​Marka 10:29, 30 ka mampiseho hoe mikarakara ani-ze olo tsy dareani-fianakaviany noho ty namany Jehovah?

⁴ Haini-Jehovah fa tsy maintsy hamoy raha maro ty sisany amintsika lafa mifily hanompo azy. Mety tsy hanampy antsika sasy, ohatsy, ty longontsika na ty namantsika. Mety niasa loha ho zay vasa apostoly Petera, le nanontany ani-Jesosy ho zao ie ndraiky andro: “Fa nahafoy ty raha iaby zahay le nanoriky anao, ka ino ty raha ho azonay?” (Mat. 19:27) Nivolanini-Jesosy moramora avao mpianatsiny rey hoe hahazo fianakavia maro biby rozy. (Vakio Marka 10:29, 30.) Sady Jehovah, azy Babantsika an-danitsy any iny fa nampitamà hoe hampeany ze olo maniry hanompo azy. (Sal. 9:10) Retoa misy raha vitsivitsy azonao atao mba hahazoa ty fanampeani-Jehovah laha mangiky iha.

5. Manino ro mahasoa ty mieritseritsy ty raha fa ataoni-Jehovah mba hanampea anao?

⁵ Eritsereto hoe ino ty raha fa ataoni-Jehovah mba hanampea anao. (Sal. 55:22) Hanampy anao raha zay hahita hoe tsy mandeha raiky mihintsy iha. Eritsereto, ohatsy, ranabavy Carol. * Tsy manambaly ie sady tsy nisy nanompo ani-Jehovah koa ty longony. Zao ty nivolaniny: “Nanampy ahy avao Jehovah lafa niatriky raha sarotsy aho. Lasa tsy mahatiaro mangiky amy zay aho lafa mieritseritsy ani-raha nataony rey. Manome toky ahy raha zay hoe ho eo avao Jehovah hanampy ahy.”

6. Manino ty 1 Petera 5:9, 10 ro afaky mampahery ani-ze mahatiaro mangiky?

⁶ Diniho hoe ino ty raha ataoni-Jehovah mba hanampea ty mpiara-manompo lafa misy raha manahira an-drozy. (Vakio 1 Petera 5:9, 10.) Henteo moa ty raha nivolanini-rahalahy  Hiroshi. Fa ela ty nanompoany ani-Jehovah, fe ie raiky avao fa tsy nisy niaraky aminy ty fianakaviany. Hoy ty asany: “Haintsika soa hoe samby mana ty raha manahira azy ty olo kiraidraiky amy fiangona eo. Fe hita koa hoe samby miezaky tsika manao ze fara herintsika amy fanompoa ani-Jehovah. Afaky mampahery ani-azy tsy mana fianakavia amy fahamarina ao rey raha zay.”

7. Manino ro manampy anao ty vavaky?

⁷ Anovo tsy tampaky ty vavaky, famakia Baiboly, noho fanatreha fivoria. Resaho amy Jehovah iaby ze raha tsapanao. (1 Pet. 5:7) Hoy Massiel, anabavy tanora zay: “Niresahiko tamy Jehovah iaby ze raha tsapako lafa zaho nangiky. Zay ro anisani-tena nanampy ahy hiatriky ani-raha iny.” Lafa nanapa-kevitsy hanompo ani-Jehovah Massiel, le nahatiaro mangiky satria tsy nanompo ani-Jehovah ty fianakaviany. Hoy ty asany: “Tena Babako Jehovah, le nivavaky taminy matetitetiky avao aho sanandro sady nambarako azy ze raha tsapako.”

8. Manino ro manampy anao ty mamaky noho mametsivetsy ty Safà-Ndranahary?

⁸ Vakio tsy tampaky ty Safà-Ndranahary, le vetsevetseo soa ze tantara mampiseho hoe tea anao Jehovah. Zay ty nataoni-ranabavy Bianca. Niaritsy safà maharary baka amy fianakaviany ie. Zao ty raha nivolaniny: “Tena nanampy ahy ty famakia Baiboly satria nahitako tantaran’olo mitovy raha iaina amiko. Ndre henanizao koa aza mbo misy mpanomponi-Jehovah tratsini-raha manahaky zay. Nidinihiko soa iaby tantara rey ka nanampy ahy.” Misy Kristiana sisany miezaky mitiaro andinin-teny tena mampahery. Ohatsy hoe Salamo 27:10 noho Isaia 41:10. Misy koa mijanjy raha nalà feo baka amy tranonkalantsika ao. Mba tsy mahatiaro mangiky rozy amy zay.

9. Ino ty soa ho azonao lafa mivory?

⁹ Miezaha hanatriky fivoria tsy tampaky. Hampahery anao ty fandahara atao amy fivoria rey, sady ho afaky hahay ani-rahalahy noho anabavinao reo koa iha lafa any. (Heb. 10:24, 25) Hoy Massiel, azy niresahintsika taloha eroy iny: “Tena saro-kenatsy aho. Fe nitapa-kevitsy aho hoe tsy hanampaky fivoria mihintsy sady hanome valin-teny avao. Lasa nifandramby soa amy ranadahy noho rahavavy reo aho lafa nanao ani-zay.”

10. Manino ro tena ilà ty minama amy rahalahy noho anabavy amy fiangona eo reo?

¹⁰ Miezaha hinama amy rahalahy noho anabavy reo. Maro olo soa ho tahafy ty amy fiangona eo. Mety tsy hitovy ty taonareo na ty karazanareo, fe rey ro inamao. Mivola ty Baiboly hoe “mana fahendrea” ty olo be tao. (Joba 12:12) Fe ndre ty olo be koa afaky miana-draha amy ty tanora. Eritsereto, ohatsy, Davida noho Jonatana. Mbo zaini-Jonatana lavitsy Davida,  fe tsy nisaka an-drozy tsy ho mpinama raha zay. Vomaiky aza rozy lasa mpinama biby. (1 Sam. 18:1) Nifanampy rozy mba hahavita hanompo ani-Jehovah avao ndre maro ty raha sarotsy natrehin-drozy. (1 Sam. 23:16-18) Niezaky ninama amy mpiara-manompo ho zay mihintsy ranabavy Irina. Mbo ie raiky avao aloha henanizao ty Vavolombeloni-Jehovah amy fianakaviany, fe hoy ty asany: “Tena afaky ho lasa baba, reny, na tam-po raiky aminao ranadahy noho rahavavintsika reo. Afaky mampiasa an-drozy Jehovah mba hanome ze fanampea ilàntsika.”

11. Ino ty tokony hataonao laha teanao ty hahita nama?

¹¹ Tsy mora aloha ty hahita nama vaovao, sirtò laha saro-kenatsy iha. Eritsereto, ohatsy, ranabavy Ratna. Saro-kenatsy ie, fe nianatsy fahamarina avao koa ie ndre nisy nanohitsy. Zao ty nivolaniny: “Tsy maintsy nieky aho hoe mila ty fanampeani-ranadahy noho rahavavy amy fiangona eo.” Mety ho sarotsy aminao ty hiresaky ty fihetseham-ponao amin’olo, fe laha miezaky hiresaky iha le hanjary mpinama biby nareo amin’olo iny. Ta hanampy noho hampahery anao ty namanao, fe mila resahinao amin-drozy koa hoe ino ty azon-drozy anampea anao.

12. Manino ty fanompoa ro afaky manampy anao hahita nama soa?

¹² Ino ty fomba farani-ze soa hahazoa nama? Ty fiaraha manompo amy Kristiana hafa. Hoy Carol, azy niresahintsika taloha eroy iny: “Nahazo nama soa maro aho lafa niaraky amy rahavavy rey nitory noho nanao asa mifandramby amy fanompoa ani-Jehovah. Nampiasani-Jehovah rozy tanatini-tao maro mba hanampea ahy.” Tena hahasoa antsika ty miezaky minama amy rahalahy noho anabavy tsy mivaliky rey. Ampiasani-Jehovah rozy mba hanampy anao lafa misy raha mahakivy, ohatsy hoe lafa mahatiaro mangiky iha.​—Ohab. 17:17.

13. Ino ty andraikitsin’olo iaby amy fiangona eo?

¹³ Samby tokony hanao ze hampisy filongoa noho fifankatiava ty olo iaby amy fiangona eo, amy zay tsy hisy hahatiaro mangiky. (Jaona 13:35) Tena afaky mampahery olo ty raha ataontsika noho volanintsika! Henteo moa raha nivolanini-ranabavy toy: “Lafa nahay fahamarina aho, le nanjary fianakaviako ty olo amy fiangona eo. Tsy ho ni-lasa Vavolombeloni-Jehovah manahaky ani-zao aho laha tsy nanampy ahy rozy.” Tena tea manompo ani-Jehovah ty olo sisany fe mahatiaro mangiky satria tsy miaraky aminy amy fahamarina ao ty longony. Ka ino ty azonao atao mba hanampea an-drozy hahatsapa hoe tea an-drozy ty fiangona?

14. Ino ty azonao atao mba hahafahanao minama amy azy vaovao rey?

¹⁴ Miezaha hinama amy azy vaovao rey. Tsika ro tokony hanao raha voalohany. Azontsika atao tse, ohatsy, ty mandramby soa an-drozy. (Rom. 15:7) Fe tsy hoe miarahaba avao tsika fa manao raha hafa koa, satria teantsika ty hinama amin-drozy. Miezaha ho soa fanahy zany, le asehò hoe tena midary an-drozy iha. Anovo hay hoe ino ty raha sarotsy atrehin-drozy, fe ka militsilitsy marè amy fiainany sady ka mametraky fanontanea mety hahamenatsy azy. Ka foroseva hiresaky ie satria mety ho sarotsy amin’olo sisany ty miresaky ty fihetseham-pony. Mahaiza mametraky fanontanea zany le mahalinisa. Azonao atao, ohatsy, ty manontany hoe akory ty nahaizany ty fahamarina. Janjino soa amy zay ie lafa mamaly.

15. Ino ty azoni-Kristiana matotsy atao mba hanampea ty olo amy fiangona eo?

¹⁵ Hihamatanjaky ty finoan’olo iaby amy fiangona eo laha asehontsika hoe midary  an-drozy tsika. Sirtò moa laha olo matotsy ro manao ani-zay, ohatsy hoe anti-panahy. Zao ty nivolanini-Melissa, ranabavy nitezàni-reniny tamy fahamarina: “Manao mahavelo bevata ani-ranadahy reo aho satria teo avao rozy nanampy ahy tanatini-tao maro. Nanoka fotoa ho ahy rozy sady nila ze hahasoa ahy. Sahala babako mihintsy rozy. Saky ta hiresaky aho, le misy olo avao eo mijanjy ahy.” Misy rahalahy tanora raiky zay koa, Mauricio ty anarany. Nalahelo biby ie sady nahatiaro nangiky lafa niala tamy fahamarina olo nampianatsy Baiboly azy iny. Nivola ie hoe: “Tena nikarakara noho nanampy ahy ty anti-panahy. Niresaky tamiko matetiky rozy sady niaraky nanompo tamiko. Nitantaranin-drozy tamiko koa ze safira ara-panahy nihitan-drozy tamy fianara manoka nataon-drozy. Niaraky nanao fialam-boly tamiko mihintsy aza rozy.” Samby nanao fanompoa amy fotoa iaby Melissa noho Mauricio.

16-17. Ino koa ty raha azontsika atao mba hanampea ty hafa?

¹⁶ Manaova raha. (Gal. 6:10) Misionera Leo, le manompo amy tany lavitsy ty fianakaviany. Hoy ty asany: “Raha tsotra avao matetiky ro ilànao. Lafa soa fanahy ty olo, sirtò laha amy fotoa ilànao azy, le fa ie zay. Tiaroko ndraiky zay, niaksidan tamy tomabily aho. Lafa niavy tan-trano any amy zay aho, le niasa loha biby. Fe nisy mpivaly rezay nanasa ahy hisakafo tamin-drozy any. Tsy tiaroko aloha hoe ino ty raha nihaninay tamy zay, fa ty tiaroko avao, tena nisoa fanahy rozy. Nijanjy ahy soa rozy. Niazoazoko soa ty aiko!”

¹⁷ Tena teantsika ty miaraky amy Vavolombeloni-Jehovah namantsika rey, le miresadresaky mikasiky ani-fandahara iny lafa fivoriambe rey. Fe zao ty nivolanini-Carol, azy niresahintsika taloha eroy iny: “Tena tsy mora amiko ty manatriky fivoriambe.” Fa nanino? Hoy ty asany: “Marina fa misy ranadahy noho rahavavy an-jatony ty any, mety ho an’arivony mihintsy aza, fe matetiky rozy samby miaraky amy ty fianakavian-drozy iaby. Mahatiaro mangiky amy zay aho lafa mahita an-drozy.” Ty sisany koa nimaty valy, le lasa sarotsy amin-drozy ty manatriky fivoriambe voalohany afarani-nisehoani-raha zay. Mahay olo miatriky raha manahaky ani-reo va iha? Asao ie mba hiaraky aminareo trano raiky lafa amy fivoriambe manaraky.

18. Akory ty hanorihantsika ty 2 Korintianina 6:11-13 lafa tsika mandramby vahiny?

 ¹⁸ Manokana fotoa hiaraha amy mpiara-manompo. Miezaha hanasa rahalahy noho anabavy sankarazany lafa mandamy fiaraha mikorana, le asao koa ze hitanao hoe mety hahatiaro mangiky. Teantsika ty hanokatsy ty fontsika, sirtò amin’olo ho rey. (Vakio 2 Korintianina 6:11-13.) Hoy Melissa, azy niresahintsika taloha eroy iny lafa nahatiaro ty taloha: “Falifaly biby zahay lafa misy ranadahy noho rahavavy manasa anay, mba hiaraky amin-drozy noho ty fianakavian-drozy an-tranon-drozy any na hiaraky amin-drozy hanao vakansy.” Eritsereto hoe ia koa ty olo azonao atao vahiny amy fiangonanareo ao?

19. Amy fotoa manao akory ro mety ho tena ilà ty hoe manoka fotoa hiaraha amy rahalahy noho anabavy reo?

¹⁹ Ho falifaly manahaky ani-zay koa rahalahy noho anabavy reo lafa manoka fotoa hiaraha amin-drozy tsika. Mety ho sarotsy amin’olo sisany ty hiaraky amy fianakaviany tsy Vavolombelo lafa mankalaza fety tsy mifanaraky amy Baiboly rozy. Misy koa malahelo biby lafa avy ty daty sisany, ohatsy hoe ty daty nahafatesani-longony. Lafa tsika manoka fotoa hiaraha amy rahalahy noho anabavy miatriky raha sarotsy ho reo, le atorontsika fa “mikarakara soa” an-drozy tsika.​—Fil. 2:20.

20. Manino ty raha nivolanini-Jesosy amy Matio 12:48-50 ao ro manampy antsika lafa mahatiaro mangiky tsika?

²⁰ Maro ty antony mety hahavy ty Kristiana hahatiaro mangiky. Fe mila tiarovintsika fa haini-Jehovah soa ty raha mahazo antsika amy fotoa rey. Matetiky ie mampiasa ani-rahalahy noho anabavintsika reo mba hanomeza ze raha ilàntsika. (Vakio Matio 12:48-50.) Atorontsika ani-Jehovah koa fa mankasitraky ty fandahara feno fitiava nataony tsika laha manao ze fara herintsika mba hanampea mpiara-manompo. Ka ndre ino ino raha mety ho tsapantsika, le tsy mandeha raiky tsika fa anilantsika eo avao Jehovah!