HOY Lisa: “Nisoa fanahy tamiko ranadahy noho rahavavy reo ka tena nisy vokany tamiko raha zay.” * Nivola ie fa io ty raha nahavy azy ho kinto amy fahamarina. Mitovy amy zay koa Anne. Hoy ty asany: “Tsy ty raha nampianarini-Vavolombeloni-Jehovah ro nahavy ahy ho kinto amy fahamarina tamy voalohany, fa rozy nisoa fanahy tamiko.” Samby mazoto mamaky noho mametsivetsy ty Baiboly ranabavy roe reo henanizao, fe hasoa fanahy naseho tamin-drozy rey ro tena nisy vokany tamin-drozy.

Afaky mampiseho hasoa fanahy amy ty olo manodidy antsika tsika mba hahasoa an-drozy. Akory ty hanaovantsika ani-zay? Misy fomba roe retoa hodinihintsika: Voalohany, amy ty raha volanintsika, le faharoe amy ty raha ataontsika. Bakeo hodinihintsika hoe ia iaby ty olo tokony hampisehoantsika hasoa fanahy.

Nana ty “lalànani-hasoa fanahy” ampela hendry resahy amy Ohabolana toko faha-​31 ao io lafa nivola. (Ohab. 31:26) Nengani-ampela io hisy vokany tamy ty raha nivolaniny noho ty fomba nivolanany raha “lalàna” io. Ho zay koa ty tokony hataoni-lahilahy manan’anaky. Tokony ho hita amy ty raha volanin-drozy hoe mana ani-“lalàna” io rozy. Maro ty ray aman-dreny mahay hoe misy vokany raty amy ty anan-drozy ty safà mahery, ka mety tsy hijanjy an-drozy ty anan-drozy. Laha soa fanahy ty ray aman-dreny lafa mivola, le ho mora amy ty anan-drozy ty hijanjy noho hanoriky ty raha volanin-drozy.

Ndre manan’anaky iha ndre tsy mana, ino ty azonao atao mba ho soa fanahy lafa mivola? Hitantsika amy tampany voalohany amy Ohabolana 31:26 ty valiny. Ho zao ty volaniny ao: “Hita hoe hendry ie lafa mivola.” Mila mahay mifily soa ty raha hovolanintsika noho ty fomba hivolanantsika azy tsika. Hanampy antsika hahavita ani-zay matetiky ty mieritseritsy hoe: ‘Hampeloky olo va raha hovolaniko toy sa hahavy anay hifanaraky soa avao?’ (Ohab. 15:1) Mieritsereta soa tse zany alohani-hivola.

Hoy koa ty Ohabolana 12:18: “Mitsiboky manahaky sabatsy ty safà tsy voadiniky.” Eritsereto sandrany hoe ino ty ho vokatsini-raha volanintsika noho ty fomba ivolanantsika ani-raha iny amin’olo. Hanampy antsika handiniky soa ty raha hovolanintsika raha zay. Laha manaraky ty “lalànani-hasoa fanahy” tsika lafa mivola, le tsy hasiaky na hanao safà mampalahelo olo. (Efes. 4:31, 32) Laha misy raha tsy mampahery, ohatsy, mandalo an-tsaintsika ao na teantsika hovolany le hovantsika safà soasoa noho mampahery raha zay. Azontsika tahafy soa Jehovah laha tsika ta hanao safà mampahery. Tena soa fanahy ie lafa mivola. Ahità ani-zay ty raha nivolaniny lafa ie nanome toky ani-Elia mpanompony. Navaka Elia tamy fotoa zay. Nanambitamby azy tamy feo moramora amy zay anjely nisolo tena ani-Jehovah iny lafa niresaky taminy. (1 Mpanj. 19:12) Fe tsy tokony ho amy raha volanintsika avao ro ahità hoe soa fanahy tsika. Tokony hasehontsika amy ty raha ataontsika koa raha zay. Akory ty fomba hanaovantsika ani-zay?

Manahaky ani-Jehovah tsika laha hita amy ty raha volanintsika noho ataontsika hoe soa fanahy tsika. (Efes. 4:32; 5:1, 2) Niresaky ty hasoa fanahy nasehoni-Vavolombeloni-Jehovah  Lisa, azy niresahintsika taloha eroy iny. Hoy ty asany: “Tsy maintsy nifindra tampoky ty fianakavianay ndraiky zay. Nangalaky fotoa tsy iasà mpivaly Vavolombeloni-Jehovah nipetraky tanilanay eo rezay mba hanampea anay. Mbo tsy nianatsy Baiboly aho tamy zay!” Nandrisiky ani-Lisa hianatsy fahamarina ty hasoa fanahy nasehoni-mpivaly reo.

Nifalifaly koa Anne, azy niresahintsika tamy voalohany eroy iny lafa nisoa fanahy taminy ty Vavolombeloni-Jehovah. Hoy ty asany: “Tsy nisoa fanahy tamiko ty olo, ka lasa nisarotsy tamiko ty natoky olo.” Mbo nivola koa ie hoe: “Tsy natoky Vavolombeloni-Jehovah aho tamy zaho vo nifankahita tamin-drozy. Lasa amy zay ty saiko hoe: ‘Ka manino olo reto midary ahy io?’ Fe nisoa fanahy biby olo nampianatsy Baiboly ahy iny ka lasa natoky azy aho.” Ino ty vokany? Hoy Anne: “Nanomboky nifantoky amy raha nianarako iny amy zay aho.”

Vasa ambinao fa tena nisy vokany tamy Lisa noho Anne ty hasoa fanahy nasehon’olo tamy fiangona eo, le zay ro nanampy an-drozy haniry hianatsy fahamarina. Nanampy an-drozy hatòky ani-Jehovah noho ty vahoakiny ty hasoa fanahy naseho tamin-drozy.

Zatsy mampiasa safà soa noho mitsikitsiky ty olo sisany satria fa zay ty nitezà an-drozy na ty fomban-drozy. Soa aloha hoe misy olo sisany lasa mahalala fomba satria zay ty fomban-drozy na ty toetsin-drozy. Fe laha ty fombantsika na ty toetsintsika avao ro mandrisiky antsika hanao ani-zay, le mety tsy ho soa fanahy manahaky a Ndranahary tsika.​—Ampitovizo amy Asan’ny Apostoly 28:2.

Anisani-vokatsini-fanahy masi-Ndranahary ty hasoa fanahy. (Gal. 5:22, 23) Mila ty fanampeani-fanahy masi-Ndranahary zany tsika laha ta hana ani-toetsy io. Hanahaky ani-Jehovah noho Jesosy tsika laha manao ani-zay. Kristiana tsika ka tokony hiezaky hila ze hahasoa ty olo hafa. Ty fitiava ani-Jehovah Ndranahary noho ty olo hafa zany ro mandrisiky antsika hanao ani-zay. Lasa baka am-pontsika ao mihintsy hasoa fanahy iny amy zay. Tena ankasitraha-Ndranahary raha zay.

Mety ho mora amintsika ty ho soa fanahy amin’olo soa fanahy amintsika na amin’olo haintsika. (2 Sam. 2:6) Tokony hasehontsika hoe “mahay mankasitraky” tsika. (Kol. 3:15) Fe manao akory laha hitantsika hoe tsy maeva hampisehoa hasoa fanahy ty olo raiky?

Eritsereto zao: Modely farani-ze soa Jehovah amy fampisehoa hasoa fanahy, le ampianarini-Safàny antsika ty fomba hampisehoa ani-toetsy io. Mimpolimpoly matetiky amy Soratsy Grika Kristiana ao ty safà hoe “hasoa fanahy miavaky.” Akory ty ampisehoa-Ndranahary hasoa fanahy amintsika?

Nampisehoani-Jehovah hasoa fanahy avao ty olo iaby bakany zay ka nameany ze raha ilàn-drozy rozy mba hahavy an-drozy ho velo avao. (Mat. 5:45) Ndre mbo tsy nahay ani-Jehovah tsika le fa nisoa fanahy tamintsika ie. (Efes. 2:4, 5, 8) Nameany ho an’olo iaby, ohatsy, Anakilahiny toka iny. Nivola apostoly Paoly hoe nanome ty vilim-panavota Jehovah satria ‘tena bevata ty hasoa fanahy miavaky asehony.’ (Efes. 1:7) Ndre manota noho mandiso fanantenà ani-Jehovah aza tsika, le mbo mitariky noho mampianatsy antsika avao ie. Manahaky ora miminiminiky tsy mety mijano rey ty fampianarany noho ty safàny. (Deot. 32:2) Tsy voavalintsika mihintsy ty hasoa fanahy iaby asehony amintsika. Haintsika fa tsy ho nanan-draha tamany tsika amy hoavy laha tsy nampiseho hasoa fanahy miavaky amintsika Jehovah.​—Ampitovizo amy 1 Petera 1:13.

Mahateatea ty hasoa fanahini-Jehovah sady manosiky antsika hanao raha. Lasa tsy mifilifily olo hampisehoantsika hasoa fanahy tsika vokatsini-zay fa miezaky manahaky ani-Jehovah, ka soa fanahy amin’olo avao sanandro. (1 Tes. 5:15) Laha soa fanahy avao tsika le hanahaky afo mampafana amy andro manintsy rey. Lasa mampahery ty fianakaviantsika, ty mpiara-manompo amintsika, ty mpiaraky miasa, ty mpiaraky mianatsy, noho ty olo tanà raiky amintsika tsika.

Eritsereto ty raha soa ho azon’olo anatini-fianakavianao na olo amy fiangona eo laha hita amy ty raha volaninao noho ataonao hoe soa fanahy iha. Mety misy olo amy fiangona eo, ohatsy, mila fanampea hanamboatsy ty tranony na ty zaridainy, na mila fanampea amy ty asa an-tranony ao, ohatsy hoe mila olo hanao bazary ho azy. Ka manao akory laha mahita olo mila fanampea iha amy fanompoa eny, misy raha azonao atao va mba hanampea azy?

Loniky lahy tsika hanahaky ani-Jehovah ka hataontsika mifanaraky amy “lalànani-hasoa fanahy” avao ty raha volanintsika noho ataontsika.