1. Ino ty raha sisany mampatahotsy antsika?

 ERITSERETO raha niainani-Vavolombeloni-Jehovah sisany retoa. Ta hifindra amy faritany mila mpitory maro Nestor noho María valiny. * Ka mba hahavitan-drozy ani-zay, le mila manatsotra fiaina rozy. Fe natahotsy rozy hoe tsy ho sambatsy mihintsy laha tsy ampy ty drala militsy amin-drozy. Lafa nilasa Vavolombeloni-Jehovah Biniam, le nirarà ty asantsika tamy tany misy azy any. Hainy hoe tsy maintsy henjehy ie satria anisani-vahoaki-Ndranahary. Nampatahotsy azy raha zay. Fe nisy raha hafa tena nampatahotsy azy. Natahotsy ie hoe mety hanao akory ty fihetsikini-fianakaviany lafa mahita azy manaraky ani-fivavahany vaovao io. Nivoani-kansera tena nampatahotsy Valérie. Tsy nety nahita dokotera mahay noho manaja ty raha inoany mikasiky ty lio ie. Natahotsy ho maty amy zay ie.

2. Manino tsika ro mila miezaky mba tsy hatahotsy marè?

² Fa nisy fotoa koa va iha natahotsy raha manahaky ani-reo? Samby fa niazoni-zay ty ankamaroantsika. Laha matahotsy marè tsika, le mety handramby fanapahan-kevitsy hanimba ty fifandrambesantsika amy Jehovah. Zay mihintsy ty teani-Satana. Ampiasany koa tahotsintsika zay mba hahavy antsika tsy hanoriky ty didini-Jehovah, anatini-zay ty didy hitory ty vaovao soa. (Apok. 12:17) Tena raty fanahy Satana, tsy miferinay, sady mahery. Fe azonao atao ty miaro ty vatanao mba tsy ho azony. Amy fomba akory?

3. Ino ty hanampy antsika tsy hatahotsy?

 ³ Tsy hatahotsy ani-Satana tsika laha matoky hoe tea antsika Jehovah ka hanampy antsika avao. (Sal. 118:6) Niatriky raha sarotsy, ohatsy, ty mpanoratsy ty Salamo faha-​118. Nimaro ty fahavalony, anatini-zay ty olo ambony sisany (andininy 9, 10). Nisy fotoa ie niasa loha marè (andininy 13). Nahazo anatsy marerè baka amy Jehovah koa ie (andininy 18). Fe ndre zay, nivola mpanao salamo io hoe: “Tsy hatahotsy aho.” Ino ty nahavy azy tsy hatahotsy? Hainy fa ndre nananatsy azy marerè aza Jehovah, le tena tea azy. Niresy lahatsy mpanao salamo io hoe ndre ino ino ty raha hatrehiny, le parè hanampy azy avao Ndranahariny be fitiava iny.​—Sal. 118:29.

4. Ino ty raha tsy hatahorantsika laha tsika matoky hoe tea antsika Ndranahary?

⁴ Mila matoky tsika hoe tea antsika kiraidraiky Jehovah. Hanampy antsika raha zay mba handresy ani-raha telo mampatahotsy retoa: 1) Tahotsy hoe tsy hahavita hamelo fianakavia, 2) tahotsy olo, le 3) tahotsy fahafatesa. Nahavita nandresy ani-raha nampatahotsy an-drozy rey rahalahy noho anabavy niresahintsika taloha teroy rey, satria natoky rozy hoe tea an-drozy Ndranahary.

5. Ino ty raha mety hampiasa loha ty loham-pianakavia? (Henteo sary amy fononi-gazety toy.)

⁵ Vatan-draha amy loham-pianakavia kristiana ty andraikitsiny hoe mikarakara ty fianakaviany. (1 Tim. 5:8) Laha loham-pianakavia iha, le mety natahotsy ho very asa iha lafa nanjeky arety miparitaky iny. Mety natahotsy iha hoe tsy ho vitanao ty hanome hany ho ani-fianakavianao na hahita drala handoava ty hofan-tranonareo. Mety natahotsy koa iha hoe laha very asa iha, le tsy hahita asa hafa. Na manahaky ani-Nestor noho María, azy niresahintsika taloha teroy rey, le mety hieritseritsy iha hoe tsy ho vitanareo ty hana fiaina tsotra. Nivitani-Satana ty nampijano olo maro tsy hanompo ani-Jehovah satria natahotsy manahaky ani-zay rozy.

6. Miezaky manao ino Satana?

⁶ Ataoni-Satana ze hahavy antsika hino hoe tsy tea antsika kiraidraiky Jehovah sady tsy hanampy antsika hanome ze raha ilàni-fianakaviantsika. Mety hieritseritsy amy zay tsika hoe tokony hanao ze azontsika atao tsika mba tsy ho voaroaky amy ty asantsika. Mety hanao raha hanimba ty fifandrambesantsika amy Ndranahary mihintsy aza tsika.

7. Ino ty raha azontsika atokisa hoasani-Jesosy?

⁷ Tsy misy olo mahay soa a Ndranahary mandilatsy ani-Jesosy Anany. Nivola Jesosy hoe: “Haini-Babanareo ze raha ilànareo, ndre mbo tsy mangataky aminy aza nareo.” (Mat. 6:8) Haini-Jesosy hoe parè hanome ze raha ilàntsika Jehovah. Anisani-fianakavia-Ndranahary tsika satria Kristiana. Jehovah ro Lohani-fianakaviantsika. Afaky matoky zany tsika hoe hanaraky soa ani-torolala niresahiny amy 1 Timoty 5:8 ao io ie.

8. a) Ino ty hanampy antsika laha matahotsy tsika hoe tsy hahavita hamelo ty fianakaviantsika? (Matio 6:31-33) b) Misy mpivaly manatitsy hany ho ani-anabavy raiky io amy sary io. Akory ty azontsika anahafa ani-mpivaly reo?

⁸ Laha tsika resy lahatsy hoe tea antsika noho ty fianakaviantsika Jehovah, le hatòky tsika hoe hahazo ze raha ilàntsika tsika. (Vakio Matio 6:31-33.) Ta hanome ze raha ilàntsika Jehovah. Be fitiava noho matariky ie! Lafa ie namoro ani-tany toy, le tsy hoe nataony mba ho azontsika ipetraha avao fa mbo nanome raha maro hafa mandilatsini-zay ie. Nifenoany raha sankarazany ty an-tany etoy mba hahavy antsika ho falifaly. (Gen. 2:9) Misy fotoa tsika tsy mana raha hafa  ankoatsini-ze raha tena ilàntsika. Fe soa ty mitiaro hoe tsy ho nana ani-zay tsika laha tsy nanome antsika Jehovah. (Mat. 6:11) Tokony hotiarovintsika avao hoe tsy misy dikany ty raha afointsika laha ampitovizy amy ty raha lafovily ameani-Jehovah antsika amy henanizao, noho ty raha hameany antsika amy hoavy. Zay mihintsy ty raha nitsapani-Nestor noho María.​—Isaia 65:21, 22.

9. Ino ty azonao ianara baka amy tantarani-Nestor noho María?

⁹ Nana trano soasoa noho asa soa Nestor noho María ta Kolombỳ any. Nivola rozy hoe: “Nieritseritsy hanatsotra fiaina noho hampitombo ty fanompoanay zahay, fe natahotsy zahay hoe tsy ho sambatsy laha drala kelikely avao ty iainanay.” Ino ty nanampy an-drozy tsy hatahotsy? Nivetsevetsen-drozy ty fomba maro nampisehoani-Jehovah ty fitiavany an-drozy. Lasa natoky amy zay rozy hoe mikarakara an-drozy avao Jehovah. Farany nialan-drozy asan-drozy iny, navilin-drozy ty tranon-drozy, bakeo rozy nandeha nifindra amy tany mila mpitory fanampiny. Nanao akory ty fahitan-drozy ani-fanapahan-kevitsy nataon-drozy iny? Hoy Nestor: “Tena nihitanay hoe marina ty raha volanini-​Matio 6:33. Tsy nisy raha nijaleanay. Vomaiky sambatsy zahay henanizao.”

10. Manino ro tsy mahatseriky laha matahotsy olo ty olo sisany?

¹⁰ Liani-nizizoani-Adama noho Eva tamy Jehovah, le nampijaly ty namany avao ty olo. (Mpito. 8:9) Manararaotsy ty fahefàny, ohatsy, ty olo sisany. Ty ilany satà, ao ty mampijaly noho manerisery ty mpiaraky mianatsy aminy. Misy aza mampijaly ty fianakaviany mihintsy. Tsy mahatseriky laha matahotsy olo ty olo sisany! Hararaotini-Satana amy zay tahotsy zay. Ino ty ataony?

11-12. Akory ty ampiasani-Satana ty tahotsy olo?

¹¹ Ataoni-Satana ze hahavy antsika hatahotsy olo amy zay tsika tsy hitory sasy, na tsy hanao ze raha sisany ampanaovini-Jehovah antsika. Mandrara ty asantsika noho manenjiky antsika ty fanjakà sisany, satria ambany fahefàni-Satana. (Lioka 21:12; Apok. 2:10) Maro ty olo mampiparitaky vandy mikasiky ty Vavolombeloni-Jehovah amy tontoloni-Satana toy eto. Mety hikinokino antsika na hampijaly antsika mihintsy aza ty olo mino ani-vandy rey. (Mat. 10:36) Tokony hahatseriky  antsika va tetikini-Satana zay? Aha. Fa nampiasa ani-zay ie tamy taonjato voalohany!​—Asa. 5:27, 28, 40.

¹² Matahotsy tsika lafa enjehini-fanjakà. Fe tsy io avao ty raha ampiasani-Satana mba hangorohoroa antsika. Matahotsy koa ty olo sisany hoe hanao akory ty fihetsikini-fianakaviany laha lasa Vavombeloni-Jehovah ie. Zay matetiky ro tena mampatahotsy an-drozy, tany ty hoe ampijalỳ. Tena tean-drozy ty longon-drozy ka tean-drozy hahay ani-Jehovah noho ho tea azy. Malahelo amy zay rozy lafa maharè ani-longon-drozy reo miresaky raha raty mikasiky ani-Ndranahary marina iny noho ty mpanompony. Fe lafa mandeha ty fotoa, le lasa Vavolombeloni-Jehovah ty sisany amy longon-drozy nanohitsy rey. Fe eritsereto hoe ariani-fianakaviantsika mihintsy tsika lafa lasa Vavolombeloni-Jehovah. Hanao akory tsika lafa miseho raha zay?

13. Laha manary antsika ty fianakaviantsika, manino ro hanampy antsika hiaritsy ty fatokisantsika hoe tea antsika Ndranahary? (Salamo 27:10)

¹³ Tena mampahery antsika safà soasoa amy Salamo 27:10 ao io. (Vakio.) Laha tiarovintsika avao hoe tena tea antsika Jehovah, le tsy hatahotsy mihintsy tsika hoe ino ty raha hahazo antsika, ndre manary antsika aza ty fianakaviantsika. Matoky tsika hoe hamaly soa antsika Jehovah satria miaritsy tsika. Hameani-Jehovah antsika ze raha iaby ilàntsika sady hampeany tsika mba hilamin-tsay noho ho falifaly. Hampeany koa tsika mba hifandramby marìny aminy avao. Tsy misy olo afaky hanao ani-zay ho antsika! Zay mihintsy ty raha niainani-Biniam, azy niresahintsika taloha eroy iny.

14. Ino ty azonao ianara baka amy Biniam?

¹⁴ Lasa Vavolombeloni-Jehovah avao Biniam, ndre nihainy aza hoe nanenjiky mafy ty Vavolombeloni-Jehovah ty fanjakà amin-drozy eo. Nanino Biniam ro tsy natahotsy? Satria hainy hoe tea azy Jehovah. Hoy ty asany: “Tena raty ty hoe enjehy. Fe ty fanenjehani-fianakaviako ro tena natahorako mandilatsy ty fanenjeha ataoni-fanjakà. Lafa nanapa-kevitsy aho hoe ho lasa Vavolombeloni-Jehovah, le natahotsy aho tsy no handiso fanantenà ani-babako. Ie moa tsy Vavolombeloni-Jehovah. Natahotsy koa aho hoe tsy hanaja ahy sasy ty longoko.” Fe natoky Biniam hoe teani-Jehovah ie ka hokarakaràny avao. Nivola Biniam hoe: “Nivetsevetseko ty fomba nanampeani-Jehovah ty  olo hafa. Afaky niaritsy avao rozy ndre tsy nanan-drala, navakavahy, noho nampijalin’olo. Haiko fa laha tsy mivaliky amy Jehovah aho le hotahiny. Nisy fotoa aho nigadrà matetiky noho nampijalijalỳ. Tsapako tamy fotoa rey hoe manampy antsika avao Jehovah lafa tsy mivaliky aminy tsika.” Lasa Babani-Biniam Jehovah, le nasehoni-vahoakini-Jehovah koa hoe tena fianakavian-drozy ie.

15. Manino ro ara-dalàna ty hoe matahotsy ho maty?

¹⁵ Mivola ty Baiboly hoe fahavalo ty fahafatesa. (1 Kor. 15:25, 26) Mety hiasa loha tsika lafa mieritseritsy hoe ho maty, sirtò laha marary mafy tsika na ty olo teantsika. Manino tsika ro matahotsy ho maty? Satria lafa namoro antsika Jehovah, le nataony am-pontsika ao ty faniria hiay mandrakizay. (Mpito. 3:11) Fe afaky miaro ty aintsika ty tahotsy fahafatesa. Fa manino? Mety ho voatosiky hihina sakafo mahasalama noho hanao sporo, ohatsy, tsika, hila fanampea amy dokotera lafa tena ilà, le hiamby soa tsy no ho azon-doza.

16. Haini-Satana hoe matahotsy ho maty tsika, ka ino ty ataony mba hanararaota ani-zay?

¹⁶ Haini-Satana hoe lafovily amintsika ty aintsika. Mivola amy zay ie hoe ho fointsika ty fifandrambesantsika amy Jehovah laha zay ty hahavelo antsika. (Joba 2:4, 5) Fe diso hevitsy Satana! Fe ndre zay, ‘mana hery hahavy fahafatesa’ Satana, le miezaky ie mampiasa ty tahotsy fahafatesa mba hahavy antsika hiala amy Jehovah. (Heb. 2:14, 15) Mety hampihorohoro hamono antsika kindraiky ty olo ambany fahefàni-Satana laha tsy miala amy finoantsika tsika. Na mety ho hitani-Satana kindraiky hoe marary tsika ka mila fitsaboa malaky, le mety hohararaotiny raha zay mba hahavy antsika hampandefitsy ty raha inoantsika. Mety hiforosè antsika amy zay ty dokotera na ty fianakaviantsika tsy Vavolombelo mba haneky hampilira lio, kanefa mifanohitsy amy lalàna-Ndranahary raha zay. Na mety hisy olo hiezaky handresy lahatsy antsika mba haneky fitsaboa tsy mifanaraky amy Soratsy Masy.

17. Laha hentea ty Romanina 8:37-39, manino tsika ro tsy tokony hatahotsy ho maty?

¹⁷ Marina fa tsy ta ho maty tsika, fe haintsika fa ndre maty aza tsika le mbo tea antsika avao Jehovah. (Vakio Romanina 8:37-39.) Laha maty ty namani-Jehovah, le mbo tiarony avao ka sahala hoe mbo velo ty fahitany an-drozy. (Lioka 20:37, 38) Fa tsy lininy ty hamelo an-drozy ndraiky. (Joba 14:15) Nahafoy raha lafovily Jehovah mba hahavy antsika “hahazo fiaina zisiky farany.” (Jaona 3:16) Haintsika hoe tena tea antsika Jehovah sady mikarakara antsika. Ka tsy aleo va tsika mangataky fanampea, fahendrea, noho hery aminy lafa marary na atahora ho maty, tozay hiala azy? Zay mihintsy ty nataoni-Valérie morovaly.​—Sal. 41:3.

18. Ino ty azonao ianara baka amy Valérie?

¹⁸ Lafa ni-35 tao Valérie, le nihita hoe voani-kansera tena nampatahotsy. Fe nanampy azy tsy hatahotsy sasy ty fatokisany hoe tea azy Jehovah. Hoy ty asany: “Nitaitsy biby zahay morovaly lafa nahay hoe voani-kansera aho. Nila operasion be aho mba ho velo. Fa maro ty dokotera nivonjeko, fe samby tsy maneky hanao operasion tsy hampilira lio iaby rozy. Tena natahotsy aho, fe nanaraky ty didi-Ndranahary aho ka tsy naneky hampilira lio mihintsy! Fa nasehoni-Jehovah avao bakany zay hoe tena tea ahy ie. Tokony hampiseho ty fitiavako azy koa zany aho henanizao. Saky naharè vaovao raty baka amy dokotera rey aho, le vomaiky tapa-kevitsy hanao  raha mampifalifaly ani-Jehovah fa tsy Satana. Nivita avao operasion-ko iny tamy farany, sady tsy nampilira lio aho. Mbo tsy tena salama soa aloha aho, fe manome ze raha ilànay avao Jehovah. Talohani-nahità ani-aretiko iny, ohatsy, le fa nianara tam-pivoria any ty lahatsoratsy hoe ‘Ahoana no Ahafahana Miatrika Olana?’ * Tena nampahery anay lahatsoratsy iny. Nampolimpolinay nivakỳ avao raha iny. Nanampy anay morovaly hahay hanapa-kevitsy noho ho kalma avao ty lahatsoratsy manahaky an’iny noho ty fahazara manao raha ara-panahy, ohatsy hoe mitory noho mivory.”

19. Ino ty raha hiseho tsy ho ela?

¹⁹ Afaky handresy raha sarotsy noho hanohitsy ty Devoly ty Kristiana iaby amy tany toy satria manampy an-drozy Jehovah. (1 Pet. 5:8, 9) Afaky mahavita ani-zay koa iha. Kely sisa, le hovolanini-Jehovah Jesosy noho mpiaraky manjaka aminy rey mba “handrava ty asani-Devoly.” (1 Jaona 3:8) ‘Tsy hisy raha hampatahotsy noho hampihorohoro’ ty vahoaki-Ndranahary an-tany etoy sasy afarani-zay. (Isaia 54:14; Mika 4:4) Fe zisiky iaviani-fotoa zay, le mila miezaky mafy tsika mba handresy ty tahotsintsika.

20. Ino ty hanampy antsika handresy ty tahotsintsika?

²⁰ Mila matoky avao tsika hoe tea noho miaro ty mpanompony Jehovah, le mila ampitomboa avao fatokisantsika zay. Hatòky ani-Jehovah tsika laha mametsivetsy noho miresaky ty fomba niarovani-Jehovah ty mpanompony taloha tany. Le tiarovo avao hoe fa nanampy anao hiatriky raha sarotsy ie. Afaky handresy ty tahotsintsika tsika, satria manampy antsika Jehovah!​—Sal. 34:4.