MARO ty olo mahay hoe nifantsihy tamy hazo fijalea Jesosy, le nahanto tanivoni-malaso roe. (Mat. 27:35-38) Fe mieritseritsy ty olo sisany fa tsy marina ty raha volanini-Baiboly hoe nikarakarà ty fatini-Jesosy, le bakeo nalevy ie.​—Mar. 15:42-46.

Tsy mino ty olo sisany mikinokino ty Filazantsara hoe nengà halevy amy fasana ty olo raiky nifantsihy. Mino rozy hoe hafa mihintsy ty raha natao tamy mpanao raty rey. Nihazavanini-mpanao gazety mana anara Ariel Sabar zay hoe manino ty olo sisany ro mieritseritsy ani-zay. Ho zao ty nisoratiny amy gazety Smithsonian: “Nifantsihy tamy hazo fijalea ze olo mpanao raty. Zay ty sazy namea an-drozy. Ka somary hafahafa hoasani-manam-pahaiza sisany laha nengani-Romanina reo halevy amy fasana ty olo manahaky ani-reo.” Teani-Romanina reo halà baraka olo nanao raty rey, ka nengan-drozy tamy hazo fijalea teny matetiky fatin’olo rey mba ho hany ty biby. Naria tamy fanaria faty any amy zay afarani-zay ze sisa tavela amy faty rey.

Fe hafa ty raha nihitani-mpikaroky, lafa nahita ty fatini-Jiosy sisany. Tamy 1968 rozy nahita taolan’olo raiky nivonoa, tamy Jesosy mbo tan-tany etoy. Nihita tamy fasam-pianakavia jiosy narìny ani-Jerosalema any taola reo. Tanaty fanajaria taolam-paty taola rey na vata vato. Nisy taolan-tomitsy raiky, ohatsy, tamy taola reo. Nifantsihy tamy hazo taola io, le fantsiky vy 11,5 sm ty nifantsihany teo. Nivola Sabar hoe: “Taolani-lahilahy mana anara Yehochanan zay raha io. Hita baka amy taola io fa marina ty raha volanini-Filazantsara mikasiky ani-Jesosy hoe nalevy tamy fasana ty fatiny.” Zao zany ie: “Nifantsihy tamy hazo fijalea Yehochanan io. Hita baka amin’io fa nengani-Romanina halevy ty Jiosy nifantsihy tamy hazo fijalea tamy androni-Jesosy.”

Lafa manenty ani-taolani-Yehochanan io ty olo, le mety samby hana ty hevitsiny mikasiky ty fomba nanantòna ani-Jesosy tamy hazo fijalea teny. Fe ty raha azo antoky hoe nalevy tamy fasana ty fatin’olo nanao raty, fa tsy hoe natoraky amy fanaria faty any. Tena marina ty raha volanini-Baiboly hoe nalevy tamy fasana ty fatini-Jesosy. Mifanaraky amy ty raha volanini-Baiboly porofo io hoe hokarakarà ty fatini-Jesosy le halevy amy fasana.

Fa nivola Jehovah hoe halevy amy loloni-lahilahy raiky mpanarivo Jesosy. Tsy misy olo afaky misaka a Ndranahary tsy hanatanteraky ty raha volaniny.​—Isaia 53:9; 55:11.