MIAMBENA AVAO!
2023: Tao Nampivalin-toa—Ino ty Volanin’ny Baiboly?
Hita tamy raha niseho tamy tao 2023 iny fa tena fa miay amy fotoa kaihin’ny Baiboly hoe “andro farany” vatany tsika. (2 Timoty 3:1) Henteo moa fa tena mifanaraky amy ty raha fa niresahin’ny Baiboly mialoha ty raha miseho henanizao.
Ty raha resahin’ny Baiboly noho ty raha miseho amy tany toy iaby
‘Aly noho tatitsy mikasiky aly.’—Matio 24:6.
“Mihamanjeky ty aly amy tany sambihafa amy tany toy.” a
Vakio ty lahatsoratsy hoe “Ia ty Hanavotsy ty Olo Tsotra?” noho ty hoe “Fandania Drala Tsifotofoto amy Resaky Aly.”
“Horohoron-tany amy pilasy sambihafa.”—Marka 13:8.
“Nanomboky tamy voalohandohany tao 2023 iny, le fa 13 ty horohoron-tany bevata mandilatsin’ny 7 magnitude niseho. Mbo tsy nisy horohoron-tany maro mitovy amy zay, liany nanomboha nanisaky ani-raha rey.” b
Vakio ty lahatsoratsy hoe “Nisy Horohoron-tany Nandravarava ta Tirkỳ noho Syria Any.”
“Raha mampatahotsy.”—Lioka 21:11.
“Fa tsy raha fa mafana sasy tany toy henanizao fa mandevy.” —António Guterres, sekretera zeneralin’ny ONU. c
Vakio ty lahatsoratsy hoe “Mihamanjeky Avao ty Hafanà amy Tapatapan’ny 2023 Toy.”
“Kerè.”—Matio 24:7.
“Vomaiky sahira ndraiky azy tena mialy mafy vo mahita hany ho ahi-ty fianakaviany rey tamy 2023 toy.” d
Vakio ty lahatsoratsy hoe “Mihamanjeky ty Kerè Tratsin’ny Aly noho Fiovaovan’ny Toetsandro Io.”
“Fotoa sarotsy tsy mora atrehy.”—2 Timoty 3:1.
“Amy tany toy iaby, le olo raiky anatin’ny valo ro mana karazan’aretin-tsay.” e
Vakio ty lahatsoratsy hoe “Mihamaro ty Tanora Voan’ny Aretin-tsay.”
Ino ty Raha Tamanintsika amy 2024 io?
Tsy misy olo tena mahay ty raha hiseho amy 2024. Fe laha hentea ty raha miseho amy tany toy iaby, le hita fa tsy ho ela, le handay ani-tany toy ty Fanjakà-Ndranahary, zany hoe azy fanjakà an-danitsy any iny, ka hanafaky ty raha iaby mampijaly noho mampiasa loha antsika.—Daniela 2:44; Apokalypsy 21:4.
Fe zisiky hiaviani-zay, le afaky mangataky fanampea amy Ndranahary avao tsika lafa misy raha mampiasa loha antsika. Zao moa ty resahin’ny Baiboly:
“Lafa matahotsy aho, le miantehitsy aminao.”—Salamo 56:3.
Akory ty azontsika ampisehoa hoe matoky a-Ndranahary tsika? Manasa anao zahay mba hianatsy misimisy mikasiky ty raha resahin’ny Baiboly mikasiky hoavy tsy misy fijalea io. Andramo ty fianara Baiboly tsy andoavan-dralanay, mba hahitanao ty soa horambesinao noho ty fianakavianao baka amy raha ampitamanin’ny Baiboly.
a Raharaham-bahiny: “Aly amy Tany Toy Iaby: Ino ty Tena Fototsin’ny Fipoahan’ny Aly amy Tany toy Iaby io?” nisoratin’ny Emma Beals noho Peter Salisbury, 30 Oktobra 2023.
b Vaovao Mikasiky Horohoron-tany: “Year 2023: Number of Major Earthquakes on Course for Record,” Mey 2023.
c Firenena Mikambana: “Safà Fampiliran’ny Sekretera Zeneraly tamy Fivoriambe Mikasiky Toetsandro Iaraha amy Mpanao Gazety,” 27 Ziè 2023.
d Programme Alimentaire Mondiale: “Krizy Ara-tsakafo amy Tany toy Iaby.”
e Organisation Mondiale de la Santé : “Andro Iraisam-pirenena ho an’ny Fahasalamà Ara-tsay 2023”, 10 Oktobra 2023.