MIAMBENA AVAO!
Ino ty Hanampy Anao Hana Raha Tamàny amy 2024 Toy?—Ino ty Volanin’ny Baiboly?
Maro ty olo mieritseritsy hoe tsy ho voavaha ty problemo hiseho amy 2024 toy. Fe ndre zay, le mbo mana raha tamàny mikasiky ty hoavy avao tsika. Aia ty ahità ani-zay?
Manome raha tamàny ty Baiboly
Mampitamà ty Baiboly fa hafahi-Ndranahary problemo mahavy antsika tsy hana raha tamàny rey. Kely sisa le “hofafàny [Ndranahary] ty ranomaso iaby amy ty mason-[tsika], ka tsy hisy sasy ty fahafatesa, sady tsy hisy sasy ty alahelo na ty fitaraina na ty raha mahararirary.”—Apokalypsy 21:4.
Laha ta hahay misimisy mikasiky ty raha ampitamanin’ny Baiboly mikasiky ty hoavy iha, le vakio ty lahatsoratsy hoe “Mbo Hihasoa va ty Fiaina amy Hoavy?”
Afaky manampy anao ty Baiboly ndre henanizao
Manampy anao tsy ho kivy noho hifantoky amy raha mampahery avao ty Baiboly satria manome raha tamàny mikasiky ty hoavy. (Romanina 15:13) Afaky manampy anao hiatriky ty problemo mahazo anao henanizao koa ty torohevitsy amy Baiboly ao, anatini-zay ty fahantrà, ty tsy rariny, noho ty arety.
Ndre niay tanatin’ny fahantrà, ohatsy, lahilahy raiky zay, le tena nanampy azy ho sambatsy noho ho falifaly ty raha ampitamanin’ny Baiboly. Henteo amy video toy ty tantarany: Juan Pablo Zermeño: Nataoni-Jehovah Ze Hampisy Dikany ty Fiainako.
Afaky manampy anao koa ty Baiboly laha ohatsy iha manamelo-tena marè, malahelo lava, miasa loha, na namoy nama na longo. Vakio moa ty lahatsoratsy hoe “Afaka Mampahery Ahy ve ny Baiboly?”
Nivola maramila raiky zay hoe “niraty fanahy noho tsy nidary olo ie” taloha, fe lasa nana raha tamàny ie lafa nianatsy Baiboly. Henteo moa ty video hoe Navelako ny Basiko.
Anovo ze azo atao mba ho tao mahafalifaly ho anao noho ho ahi-ty fianakavianao tao 2024 toy. Laha ta hahay misimisy mikasiky ty fomba azon’ny Baiboly anampea anao iha, le andramo ty fianara Baiboly miaraky amy mpampianatsy. Tsy andoava drala fianara io. Ianaro hoe akory ty fomba hanomeza Ndranahary anao “fiadana” henanizao, le “raha tamany amy hoavy.”—Jeremia 29:11.