MIAMBENA AVAO!
Mihamanjeky ty Kerè Tratsin’ny Aly noho Fiovaovan’ny Toetsandro Io: Ino ty Volanin’ny Baiboly?
Mbo tsy ampy avao ty hany amy tany toy iaby, vokatsin’ny aly a Ukraine any io noho ty fiovaovan’ny toetsandro. Tany mahantra rey moa ty tena sahira marè, satria ty ankamaroan’olo any mialy mafy vo mahita hany ampy.
“Lasa sarotsy ty hahità hany noho ty hamokara azy, vokatsin’ny aly, fiovaovan’ny toetsandro, fiakaran’ny vilin’ny angovo noho ty maro hafa.”—António Guterres, sekretera zeneralin’ny ONU, 17 Ziè 2023.
“Najanon’ny Russie fifanaraha mikasiky fampiboaha hany baka a Ukraine any iny, ka mieritseritsy ty manam-pahaiza fa vomaiky hampanjeky ty krizy ara-tsakafo amy tany toy iaby raha zay. Ty faritsin’ny Afriky Avaratsy noho Moyen-Orient ro tena atahora ho voa mafy.”—Atalayar.com, 23 Ziè 2023.
Diniho ty raha resahin’ny Baiboly mikasiky ty mosary noho ty raha hiseho amy hoavy.
Fa nivola ty Baiboly hoe hisy ty mosary
Naminany Jesosy hoe: “Hisy firenena hitsanga hanafiky firenena, le hisy fanjakà hanafiky fanjakà. Sady hisy mosary.”—Matio 24:7.
Miresaky mpitikitsy sovaly efatsy ty bokin’ny Apokalypsy. Manondro aly ty raiky amy mpitikitsy sovaly reo. Azy sovaly raiky nanaraky azy baka afara ao iny manondro mosary. Hisy fotoa zany lasa ho sarotsy ty hahità hany, le hiakatsy koa ty vilin-draha.“Hitako fa iny nisy sovaly mainty, le nisy balansy tan-tanani-azy mitikitsy azy iny eny. Atao raha naharè feo . . . nanao hozao aho: ‘Denaria raiky [karama andro raiky] ty vilin’ny varimbazaha kilò raiky, le denaria raiky ty vary orza telo kilò.’”—Apokalypsy 6:5, 6
Tanteraky amy androntsika zao faminanian’ny Baiboly mikasiky tsy fahampian-tsakafo reo. Miay amy fotoa kaihin’ny Baiboly hoe “andro farany tsika” henanizao. (2 Timoty 3:1) Laha ta hahay misimisy mikasiky ty “andro farany” noho mikasiky an’ny mpitikitsy sovaly efatsy resahin’ny bokin’ny Apokalypsy rey iha, le henteo ty video hoe Niova ty Fiaina Nanomboky tamy 1914, le vakio koa ty lahatsoratsy hoe “Iza Ireo Mpitaingin-tsoavaly Efatra?”
Ty anampean’ny Baiboly anao
Misy torohevitsy mahasoa sady azo orihy ty amy Baiboly ao. Afaky manampy anao hiatriky raha sarotsy maro torohevitsy ao rey, anatini-zay ty fomba hiatreha ty fiakaran’ny vilin-tsakafo noho ty mosary. Ahità ty sisany amy torohevitsy reo zao ty lahatsoratsy hoe “Ahoana Raha Lasa Nihena ny Vola Miditra Aminao?”
Mampitamà koa ty Baiboly fa mbo hihasoa avao ty fiaina. Mampitamà zao ty Baiboly fa hisy fotoa “hahavokatsy be ty tany, le ho maro biby ty vokatsy”, ka hana sakafo ampy soa ty olo iaby. (Salamo 72:16) Mbo misy raha teanao ho hay va mikasiky raha ampitamanin’ny Baiboly amy ho avy io? Akory ty hahazoanao antoky fa ho tanteraky raha io? Vakio ty lahatsoratsy hoe “Mbola Hihatsara ve ny Fiainana Amin’ny Hoavy?”